Yosua 16
16
Is Efraim a’ge emin, Manasye a’ge emin, ono’gwiang hwerli ’belak wene
1Asogo toluk, helep pam wal-hegesarik, ap a’gul onuk Yusuf pam en weiyelak a’ge ono’gwiang ’balogo wogentesi a’ge hwerli re, o Yerikho ik elaruk porlolu tisoma o mo porlu ago akhit o’gwe o kota Yerikho horoksogo ik Yordan iak pam eria horok lai lotluk, en ’bekhit, o kota Yerikho oruakhwe, o leimu en dom petne o Betel erabuno lail lotluk,
2o Betel ai, o Lus ogu legesema atma re, eba en legesa-legesa re, is aphwami Arki a’ge welagaimu o Atarot lail legesarik,
3eba en ’bekhit o mo obuk ilasu hwerli ik lasu akhit o’gwe hegit mugonoboluk ap Yaflet a’ge ono’gwiangma legesarik, eba en legesa-legesa o Bet-Horon olukhwe akhit en, legesarik, ologun ik lok ye’gelak a’ge Laut Tengah hwerliat welaga.
4Ap a’gul Yusuf pam en weiyelak is Manasye a’ge emin, is Efraim a’ge emin en, ono’gwiang dogoma a’ge en eiye emagoluk hwerlegesa ano re, aiat o.
Ap a’gul Efraim a’ge ono’gwiang hwerli ’belak wene
5A’gul onuk Efraim en dogo’gwe a’ge ono’gwiang welemagoluk, eiye om ’gela’ge ono’gwiang hwerli re, yuat. O ono’gwiang hwerli o mo orlu ago akhit o’gwe ai re, o Atarot-Adar at horoksogo louwok oluk, ’bekhit, o Bet-Horon ik elaruk akhit en ’bekhit,
6ik lok ye’gelak Laut Tengah ano hwerliat welaga. O o’borl akhit de, o’borl o’gwe hwerli re, ik lok ye’gelak Laut Tengah horok lai lot-luk, en ’bekhit, o mo orlu ago akhit o’gwe motluk-motluk o Mikhmetat o’borl pam erabu de, o’borl akhit lisogo woluk, hokhomsogo o mo orlu ago akhit o’gwe o Tanaat-Silo oruakhwe, o Yanoah mo obuk ilasu akhit maminghau wegesarik,
7orogobu o sogweik akhit motluk-motluk o Atarot en, Naharat en, o Yerikho ologun akhit oruakhwe, ik Yordan ’begei ai hwerliat o.
8Asogo toluk, o ’gwiang hwerli re, o Tapuah en ’bekhit o mo obuk ilasu akhit o’gwe hegit ik Kana som legesarik ologun e, ik lok ye’gelak Laut Tengah pamat diptak welaga. A’gul onuk Efraim a’ge en dogo ’gwe a’ge en enebe? Eiye omogoluk ono’gwiang hwerli ’balogo wogentesi aiat o. 9Ye, wogentasulat, a’gul onuk Manasye ado me’gerik a’ge onowirak om ’gela’ge emagoluk ono’gwiang ebano pam o kota-kota pema emin, kota-kota ai pobuk togolik o seli logon emin lo’bok-lo’bok delnasogo is o Efraim a’ge nagat wogentesi. 10#Hak. 1:29Asogo a’geat de, aphwami o Kanaan a’ge o Gezer welegesa a’ge ebano mukho lebik onobo erlakma re, aphwami o Kanaan a’ge ai is Efraim a’ge enemin welat, is enebaget yabuk tagonobogulat hwerli o yogodak ogo oruagat o.
Currently Selected:
Yosua 16: Wul
Highlight
Share
Copy
Want to have your highlights saved across all your devices? Sign up or sign in
