Yunus 4
4
Allah en aphwami Niniwe a’ge edeap enebisoam e, at Yunus olot het aga wene
1Allah en asogo togolik ukpesimu re, at Yunus ano ede modok wiak otluk e, olot het aga. 2#Kel. 34:6Asogo olot het agarik e, Allah yo’go pasulat e, disogo egei,
“Allah ’gain Honuk Logo a’ge, naik! Pageat nowi pam welat hat en asogo togun oluk egi erlak no? Egiat epegi! Hebabut op modok aphwami hede welat hebam haro erlak lo’buktak welegen ai en e, aphwami wiak togwi a’ge warenebigoluk onobok osolomtigat de, pobuk hedeap enebise legen ai naluk en e, an hweiye o Spanyol laigoluk legi ai o. 3#1Raj. 19:4Allah ’gain Honuk Logo a’ge, naik! An nebe nelaluk wolom nebit o. Nebe waromat nagai o. Holuk e, nebe woknebi suk o,” oluk mo’gulesi. 4Asogo mo’gulesimu re, at Nenaik ’gain Onuk Logo a’ge en e,
“Hat holot het om hegitsogoat holot het aga no?” oluk mo’gulesi.
5Asogo mo’gulesimuat, Yunus ano o kota ma en lebagarik e, o mo il orlu ago hegitsogo lagarik, o tabo mesik weregeitik, ogola ’gwegeitik olema welat,
“Aphwami o kota Niniwe a’ge enebam no’gosogo ema o,” oluk e, il welaga. 6Oruakma re, Allah en at Yunus ede opsogo ’gunmu welemagoluk owi e’gela a’ge mesik yogo pesi. Asogo yogo pesimu at Yunus ogola agai modok a’bik epesirik ’gunmu welaga. 7Asogo a’geat de, hubet o hirl pou wagokhwe re, Allah en o’gon ’gela’ge mesik perakpou wagama wagarik, owi ano iak en ’balegeimu re, sawet aga. 8Asogo lai lagama, Allah en, yasobu aganhan a’bik a’ge o mo orlu ago hegit en punhau magaluk perakpou waga. Asogo perakpou wagoam, mo orlouk en Yunus a’gul pato hesimu, ilporluk tu ’gela’ge aga. Asogo agama re, at en e,
“Nebe nelaluk wolom nebit o. Nebe waromat nagai o,” oluk egei. 9Asogo egeimu re, at Allah en e,
“Hat e’gela ai paget holot het aga no?” oluk mo’gulesimu re, at Yunus en e,
“An nolot het agama, nebe waromat nagai o,” oluk mo’gulesi. 10Asogo mo’gulesimu re, at Allah en e, disogo mo’gulesi,
“E’gela ai hat he’gik en yoru erlagat o. Hogol egesu erlagat o. A’geat de, hopmu ’baktegeirik e, yogodak ’buk aga ai paget hede wiak aga o. 11Hat en e’gela paget ogo re, hogola wiak aga ai. Ye, an en e, aphwami o Niniwe yema eneiyagai wiak togwi op togwi eneperlak a’ge enebe logolagat 120.000 emin, onuam a’bigat emin, eneminat nedeap onobo erlak epegen a? Nedeap onobo yo,” oluk mo’gulesi.
Currently Selected:
Yunus 4: Wul
Highlight
Copy
Compare
Share
Want to have your highlights saved across all your devices? Sign up or sign in
