Yunus 3
3
Yunus pobuk Allah iak hologo o Niniwe laga wene
1At Yunus asogo lebikpou agama, Nenaik ’gain Onuk Logo a’ge en naduk Yunus mo’gulesi ’gela’geat, pobuk togolik disogo mo’gulesi,
2“Yunus. Perlene siaksogo inotluk e, o kota Niniwe lokma ano loluk e, wene hebam pegi a’ge ano mo’gulentai lu o,” oluk mo’gulesi. 3Asogo mo’gulesimu re, at Yunus Nenaik ’gain Onuk Logo a’ge iak hologo, arat siaksogo o kota Niniwe lokma ano laga. O kota ai modok lok dualakma re, o seli’gwe modok lagaihwe, agauwa henagan nogogwiat. 4#Mat. 12:41; Luk. 11:32Asogo a’geat de, Yunus o kota eba arat ’gwi lagarik, hubet en ’bekhit hopmu’gwe o seli’gwe lasu lagarik, wene disogo mo’gulentesi,
“Eiga! Nenaik ’gain Allah en agauwa 40 hari wolotluk en, his aphwami o kota Niniwe welegep a’ge yema wollo’gen dagalogo wathonobua o!” oluk mo’gulentesi. 5Asogo mo’gulentasuam e, is aphwami Niniwe a’ge ebano pobi holuk, enede Allah pam he’berigisa. He’berik poluk e, wene edip disogo egesa,
“Aphwami ’berlegat so’boru no’gwi erlakhweyang ’gela’ge wolomok o,” oluk egesarik e, aphwami en ’belagwi pogwi ’gela’ge, ’gaindek emin, malik suarek emin, enebe ’berlegat sum ’garum a’ge ’buktigisa.
6“Asogo togwi o,” oluk egesema, aphwami Niniwe a’ge onue onuk logo a’ge ai esa’go holhesirik e, at ebe ’gain welaga pam en perlene ’bu agarik e, osum onuk logo a’ge oluk ’buktaga laga a’ge no’gorlogo ukpoluk, ebalema ’garum a’ge ’buktegeirik, ul pam huraga. 7Asogo welat, at osi ’gaindek enemin en wene deksogo egesarik e, aphwami o kota onuk Niniwe welagai a’ge ’berlegat wene edip enebam lebikpogulat, disogo egesa,
“His aphwami ’berlegat emin, wam sapi domba logon ’berlegat emin, ik emin, so’boru emin, no modok erlak o! 8No erlak welat e, aphwami emin, wam emin, sum ’garum a’ge ’buktu o. ’Buktoluk e, aphwami enebe lo’bok enebabut wiak togulat, is logon enedeap onobogwi erlak wiagap onobogulat, togwi ai, ukpoluk, eniak enerlagaik eniak Allah yo’go pouwak o. 9Asogo togwiam e, nenaik Allah olot het nenebam pesirik watnenebigoluk nonobok ’balegeirik oruak ai, ukpoluk edeap nonobua ya? Erlak de a. Sa aluk o,” oluk wene edip lebegisa.
10Asogo tigisema, Allah il entesirik e,
“Is ai enebabut wiak togu legesa a’ge ukpegesa hegi o,” oluk egeitik e, naduk wene enebam poluk warenebigoluk tegei a’ge ano togolik ukpesi.
Currently Selected:
Yunus 3: Wul
Highlight
Copy
Compare
Share
Want to have your highlights saved across all your devices? Sign up or sign in
