Yeremia 51
51
O Babel e’gin enebam po wene
1At ’gain Onuk Logo a’ge Allah en egei ano re, yuat o. “O Babel sebelogo pasulat, is aphwami Babel a’ge sebelogo enebasulat, tuagoluk, aphwami wiagapsogo onobogwi a’ge enede pam takpasukhwe niouwa o. 2Gandum aling, sogwei en woluk louwagoluk, pel hai lagai ’gela’ge, o Babel asogoat takpogulat, aphwami o eba welagai a’ge ebano modogat erlagap onobogulat, tuagoluk, o Babel e’gin ebam po erlige ap mu a’ge perak enebaikmu wemarik wathonobogulat, erabu akhit en orogobu akhit en gane wokho o wale’gik poluk en o ’berlegat erlagapsogo onobogu ema o. 3Is weim enanni a’ge en enesegen pesalogulat, enesing weim sum ’buk horlogulat, owan tak erlakma waronobogulat, enemalik logomalik souwe a’ge ebano eneli u erlakma en waronobogulat, onosilak enesegen oruak a’ge logolak ebano modogat erlagap onobogulat, tuak o. 4O Babel eba waronobogwiam gelil etil lagalat, enebe dok werak enil pak-pak ebela ’gwe ’goluksogo mo-mo lagalat, tua ani o. 5Is Israel a’ge emin, Yehuda a’ge emin, welegesema eba wiak a’ge nak ’beterak oruak a’ge ebano an mu ago erlak a’ge nomu degelak Israel enaik nil hasu a’geat de, An Henaik ’gain Nonuk Logo nanni modok welago a’ge Allah en is ugenebaik erlak oluk, egi o,” oluk, egei o. 6“Asogoatma re, An ’gain Nonuk Logo a’ge Allah en is aphwami o Babel en togwi a’ge ogo e’gin enebam po a’ge ’gagalogo pegi erlige agauwa lau wagama re, at wiak taga laga a’ge ogo ebam pasulat, is An neiyagai enemin la’bolik onobouwa no oluk, is aphwami Babel oruak a’ge ene’gerlakma en bogologulat, enagap delhorloluk hweiye bogologulat, togu lemak o. 7#Wah. 17:2-4; 18:3O Babel ano re, ik e’be emas pam hele’gik a’ge ’gela’ge An ’gain Nonuk Logo a’ge Allah ne’gik pam welat tu a’ge mo’gulentasukhwe at de aphwami ’gwiangma ’berlegat enede balemagoluk anggur a’bosu wogentasu laga. Anggur a’bosu naʼgogo pesi ano di aphwami yu aphwami nil legesarik, enede ’belak a’ge nagat oruak o. 8O Babel wolom erlakma en wik-wiaksogo sebelogulat, moluk-melaksogo pou wama re, ebaget nge taga lemak o. Agab ’balil louwa a’ge obotut ano op emagoluk, yebil a’bosu egelik po a’ge heratil louwak o. 9#Wah. 18:5Is o Babel sebelak poluk welagai a’ge ebano en ogulat e, o Babel obotut obab onobuok oluk epege a’geat de, at wiak tago ogo ebam po ai, ’bogorl horoksogo ten halikagalat, a’gurlok horok lailigagalat, tegeimu re, op om a’ge miama re, nis nenemin sapli nonobumu re, o yu ukpoluk, nonowi lobok louwok o.
10Nis aphwami nenebe op oruakhwe wiak oluk mo’gulnontogwi ano yethontouwagoluk, at ’gain Onuk Logo a’ge Allah en taknenebesimu re, nenaik At Allah, en taknenebesi ano, aphwami o Sion oruakma, ’beli’gogo mo’gulentai louwok o, oluk, mo’gulogwi o,” oluk, egeimu re, mo’gulhentegis o.
11“An ’gain Nonuk Logo a’ge Allah en is Babel a’ge en tegisa ano ogo tagenebasulat, ye An nowi werik wiagapsogo pegesa a’ge ano o’go tagenebasulat, tu a’ge wegerlogo pegi a’ge ano takpasulat, o Babel erlagapsogo pou wagoluk, is o Media a’ge onuelak ’gain-’gain ebano dok segen ebelak poluk welat, onosi weim obogwi a’ge en onogodok e’gen ’get a’ge nak ebelogo-ebelogo pogulat, enesing weim sum leik-louktak pagathorlogulat, 12O Babel helep pak wogo a’ge moluk-tuagoluk, sum ’gwia hogulat, weim enebam ’guwagaimu no oluk, enil ’gagalak welemagoluk onobogulat, yenal naduk louwagoluk, naduk perak onobogulat, hou selak poluk welemagoluk tagonobogulat, togu lemak o. An ’gain Nonuk Logo a’ge Allah en tu a’ge eberegis a’ge anoat tagalat, ye, is aphwami o Babel welagai a’ge ebano tagonobo a’ge wene werak mo’gulentegis a’ge anoat tagalat, tikmu re, 13#Wah. 17:1is ap ene’gik oruak a’ge ik lok lasu a’ge iak pam welagai a’ge ’gain-’gain welagai a’ge ebano ononuk erlak om erlige agauwa lau wagalat, op nak wolomok, opogwi a’ge ebano agauwa erlak om a’ge horok lau wagalat tago yo. 14Ha’bukhak logolak lagai ’gela’ge, aphwami o Babel ’bete la'guagoluk peragonobou wagoam sebelak poluk, arat sebelak enebege o, oluk, ngai-wai ogu lema o, oluk, An ’gain Nonuk Logo nanni modok welago a’ge Allah nonuk ’balholuk ho’buk balegis o,” oluk, egeimu en mo’gulhentegis o.
Allah erliktagalat, weni weregei wene
15At ’gain Onuk Logo a’ge Allah e’gik anni pam o yu walhasulat, ede oruak en o ’gwiang yu hwalogo pasulat, at aluk ano pam ’bogorl ’bierak obok hasulat, tegei o.
16At iak orlolu iak ’gela’ge osoam, ik ’bogorl pam lerak welagai a’ge ebano erliak-’gwerliak eselat, o moru o esago-esago en lagabak porlu wagalat, o obinal yebek takpasulat, moru ’belebak pou wagalat, o yasobu odoksogo pasumu ebano en perakpou wagalat, tago yo.
17Is aphwami ’berlegat ai, enede erlak uo a’ge ’gela’geat welagai o. Is ap emas a’ge pam helo’gogwi a’ge en ogut-ogut heli’gogo pogwi ai, iak erlak a’ge ogut nagat heli’gogo pogumu re, enegerli agai ani o.
18Dogwi asua onogut hele’gik ano re, we almasogoat hele’gikmu re, aphwami en enebirapsogo pogwimu re, togwi a’ge ogo enebam po a’ge horok-horok wago en, ena’guluak erlagat ema o.
19At Yakub agai epasu a’ge nak e, asogo tu erlak o. At en di a’ge yu a’ge ’berlegat walhesirik, ogo ’gela’ge ena’gul onuk Israel a’ge oruagapsogo enebesi ano re, onuk, anni modok welago a’ge At ’gain Onuk Logo a’ge Allah at o.
20At Allah en eselat, “At Babel ai, martelu ’gela’ge, weim tago a’ge nesegen ’gela’geat oruakma re, at ebam en aphwami ena’gul onuk lobok sebelak enebasulat, at ebam en aphwami eneragam onoboluk oruakma erlagapsogo enebasulat, tik o. 21At ebam en ap ono kuda emin wiagap enebiselat, at ebam en ap wogonoboluk nogwi a’ge ono’gwiang so emin egerlik wiagabenebiselat. 22At ebam en ap emin, hwami emin, warenebiselat, at ebam en ap enarlue emin, ap souwe a’ge emin, onu ’gwarek a’ge erlagapsogo enebasulat, at ebam en malik logomalik emin, hwelani emin, erlagapsogo enebasulat, tik o. 23At ebam en ap domba degelonobogwi a’ge o domba emin wusogo enebasulat, at ebam en lembu ’gwiang paliso a’ge ap yabuk tiso a’ge emin wusogo enebasulat, at ebam en is ap o eiye welagai a’ge emin, welat yabuk togwi a’ge onu’gwarek a’ge emin, wusogo enebasulat, tago yo.
24Asogoatma re, is Babel a’ge en is o Sion oruak a’ge ebano wiagap enebil legesa ano pam ogo at il oruakhwe o Babel takpasulat, is aphwami o Babel oruak a’ge ebano tagenebasulat, tua o,” oluk, At ’gain Onuk Logo a’ge Allah en egeimu en, mo’gulhegis o.
25“At o Babel ai, dom en aphwami al besilogo enebasu ai ’gela’ge aphwami o ’gwiang pam a’ge ’berlegat erlagapsogo enebasu ai neselei a’geatma re, at erlagapsogo paigoluk, An ne’gik map entasulat, dom pam en helep erlebilogo obok hogwi ’gela’ge takpasulat, dom odouk dain eselat nekhi oso ’gela’ge takpasulat, tik o,” oluk At ’gain Onuk Logo a’ge Allah enat egeimu en mo’gulhegis o. 26“An en o’gwiang ’bugap paikmu oruakma hat hebe asogoat ’bugap paikmu wolorogun ani o, ap mesik en, helep obule delak a’ge yu pam pil lasulat, helep mesik wokho uak daintak pasulat, tua o, oluk, wai louwa erlagat o,” oluk At ’gain Onuk Logo a’ge Allah enat egeimu en, mo’gulhegis o.
27“At ap onue ’gain o o’borl akhit ogwe welago a’ge ano en o ’gwiang pam yu en, sum ’gwia hasulat, di aphwami yu aphwami ene’gerlakma en iak loksogo oso a’ge trompet iak pu hasulat, aphwami ena’gul onuk lobok ene’gerlakma o Babel weim til ’gwi lo a’ge paget iakma eselat, o Ararat emin, Mini emin, Askenas emin, en o Babel sebeloguak oluk, yogo enebasulat, weim tu a’ge enesegen oruak a’ge onue edikpasulat, ha’bukhak oluktak welago ’gela’ge kuda pam hurotluk is naduk peragenebasulat, tik o. 28O Babel a’ge enemin weim tu a’ge paget, aphwami ena’gul onuk lo’bok ’berlegat leik-louktak pasulat, is ap o Media a’ge emin, o eiye welagai a’ge onuelak emin, enarilak emin lerontogwi a’ge onu’gwarek emin, is eneragam onoboluk welagaimu eba a’ge ’berlegat enesegen oruak a’ge emin, leik-louktak pasulat, togu lemak o.
29At ’gain Onuk Logo a’ge Allah en o Babel eba aphwami wolom a’ge erlagapsogo po a’ge wene gabulogo pesi a’ge anoat tuama re, o ’gwiang yu, alik weriselat, obotut en nonuk tagalat, yel weriso yo. 30O Babel pak wogo a’ge ’goduk moluk-melaksogo pil lagalat, o odouk ’gwelabogulat tegisa ano pam ap o Babel a’ge enesegen oruak a’ge ebano weim tu erlakma en mo ogulat, helep pak wogoma ebano mo oluk welat, enanni erlak agalat, is hwami ’gela’ge agalat, asogoat takpegesarik oruak o. 31-32Is aphwami ebela ologun-ologun ’berlegat en o kota sebelil ’guagalat, ik ’balogo libom o’gwe onogowaksogo huragalat, waronobogumu no oluk, helep pak wogo a’ge odouk ’gwelabil legesa ’gwe ano damuk-damuk biselat, ap enesegen oruak a’ge eneme’gen orlou eselat, tegei o, oluk, pungtak ap o Babel a’ge onue ’gain ano aluk emagoluk wene tak a’ge mesik mo’gulesi lagalat, mesik mo’gulesi lagalat, asogo togulat, wene woluk mesik perakpogulat, mesik perakpogulat, togulat, togwi o,” oluk, egei o. 33Asogoatma re, at ’gain Onuk Logo anni modok welago Israel a’ge enaik Allah en egei ano re, yuat o. “O Babel agalogo ’gela’ge is Babel a’ge ai, ap gandum agape’gen wogulat, onoyuk en besilogo pogumu ’gela’ge takpo erlige arat horok tagat oruak o.
34Aphwami Babel a’ge onue ’gain Nebukadnezar en emdema yagat enebiselat, ’bullak nenebasulat, ik ne’gak a’ge dengsogo no’gwi ’gela’ge taknenebasulat, pesa'go sorluak en yagat enebiso ’gela’ge, nis yagat nenebiselat, pesa'go en oduk op en ogum sogo noluk, lukho pasu ’gela’ge asogoat taknenebasulat, tegeimu re,
35Nenemalik enemin wiagapnonobogwi a’ge ai, is o Babel a’ge enebam emak o, oluk, is Sion a’ge en ogulat, wusogo nonobogulat nenemep is o Babel oruak a’ge ebano enebamat emak o oluk, is Yerusalem en ogulat, ogwi o,” oluk, egei.
Allah en Israel a’ge leronto egei wene
36Asogoatma re, At Nenaik ’gain Onuk Logo a’ge Allah en egei ano re, yuat o. “An en neiyagai Israel a’ge onowene ’balogo pasulat, is wiagap onobogwi a’ge ogo tagenebasulat, o Babel egeik laut yegelak a’ge ano dengtak takpasulat, egeik elaruk ano dengtak pil lasulat, tagokhwe niouwa ani o. 37O Babel ai, moluk-moluk lasukhwe welat, orlomene hisogo welagoma ’gela’ge agalat, o eba aphwami erlak en onogorlok owi agalat, aphwami en enebit-enebat takpogwi a’ge owi at agalat, tua o. 38Singa onolot het en eniak hurle wiak il-il no’gwi ’gela’ge o Babel emalik eniak asogoat il no’gulat, singa emalik onolot het en eniak gin orlo il no’gwi ’gela’ge ogulat, ogwiam, 39Is so’boru nele oruakma, An en so’boru opsogo werakho wogentaikmu oduk o en onogum ningsogo nouwa o. Ye, is en ik nele oruakma, An en ik wogentaikmu is enagai en onogum ningsogo noluk, enede erlak agoam nogo lebagoluk inom a’ge erlagat ema o. 40Domba emalik waronobuogoluk wogonoboluk wagai ’gela’ge, domba kambing ierak a’ge waronobuogoluk, onobou wagai ’gela’ge, is asogo tagonobouwagoluk, wogonoboluk onobou wema o,” oluk, At Allah enat egei o.
O Babel takpo wene
41“O Babel sebelak pogwi ano re, nogorlogat o! Aphwami o ’gwiangma oruak a’ge ’berlegat logo pogwi a’ge en o Babel sebel horlogwi ano re, modok nogorlogat o! O Babel ai, modok wiagat en e, is aphwami ena’gul onuk lo’bok en, nogorlok o! oluk, onogorlok a’bik agalat onuak lup bo pogwi o. 42Ik lok ye’gelak laut ebe wagalat, o Babel sebeluwagalat, ik laut iak orlu eselat, erliak-werliaksogo o Babel sebeluagalat, tua o. 43O Babel kota-kota ebano, o wogogwi at agalat ’gwiang ’buk otluk o lei owi at takpasulat, tagokhwe, aphwami o eba wolom a’ge enebirat agalat, ebela ’gwe ai lagalom a’ge enebirat agalat togu lema o. 44Dogwi asua Bel o Babel oruak a’ge ano e’gin a’ge ebam pasulat, di a’ge yu a’ge at emdema yagaregei a’ge ano lukho lebikpoumagoluk, takpasulat, tuama re, aphwami ena’gul onuk lo’bok at e’bek wagalat togwi a’ge ebano logon togu lema modok erlak o. Ye, o Babel egelep pak wogo a’ge ogo, molugat ua o,” oluk, At Allah en egei o. 45“Asogoatma re, is An neiyagai o eba en ukpoluk, ’bogologu lemak o. Enagap delhorloluk bogologulat, an ’gain Nonuk Logo a’ge Allah nolot het odouk ’gela’ge enebam pasumu re, is hettak enebasumu no oluk, enagap delhorloluk hweiye bogologulat, tuak o. 46Is o eba welat, disogo ema o, oluk, ogulat, tahun yu pam, yusogo ema o, oluk, ogulat, tahun pobuk a’ge pam, disogo ema o, oluk ogulat, eniak aganhan bo pogulat, o eba wiagap pagathwerlil lagai o, oluk ogulat, ap ’gain is nin ’gain pema en is ap sebelak onobogwi o, oluk, ogulat, togwi ano enesa’go hologwi holuk, enede yarluk eselat, enede erlak agalat, togumu no yo,
47Onodogwi asua ogut hele’gik o Babel oruak a’ge ebano moluk-melaktak po erlige demat horok louwema re, arat lau wago holuk, moluk-melaksogo bo pouwa o, bo pasuam e, is o eba welagai a’ge ’berlegat enegerli agalat, is ene’gerlakma eba aphwami waronobouwa a’ge ’gwiang o’gwe ’gelil etil lagalat, tua o. 48#Wah. 18:20Is ap o wiagap pegesa o, o erabu akhit o’gwe en waga lemarik, o Babel erlagap pouwa ai erlige ’bogorl emin, ’gwiang emin, di a’ge yu a’ge is enemin welago a’ge ebano ’berlek en o Babel ano arat erlak aga o, oluk, enagai en ngai-wai ogu lema o,” oluk, At ’gain Onuk Logo a’ge Allah enat egei o. 49#Wah. 18:24“Naduk is ap Babel a’ge en tagenebil laga legesa ano pam aphwami o ’gwiang pam welagai a’ge ’berlegat ena’guluak erlagetil laga-legesa ano ’gela’ge, is Israel a’ge wusogo onobogu legesa ano pam isat onu’gwaregat ena’guluak erlagapsogo pou wama re, 50Is pema waronobu erlak ’bullak a’ge ebano re, mo u erlakma en o ai ukpoluk, hweiye bogologulat, o walek nonowi edipmu At Nenaik ’gain Onuk Logo a’ge Allah emin welege ani o, oluk, eberogulat, o Yerusalem ai nogosogo aga, oluk enede eberogulat, tuak o. 51Is aphwami mu a’ge en At ’gain Onuk Logo a’ge Allah owi omu degelak a’ge werikmu arat ’goluk welat eriano pamat nononuk wiak agalat, aphwami en mimiasogo taknonobogwi ano pam nenegerli agalat, tegei o, oluk ua a’geat de, 52is o Babel ondogwi asua ogut hele’gik a’ge ano moluk-melaksogo po erlige demat horok etil wemma re, horok lau wago holuk, o eba waronobogwiam obotut en nonuk til lagai a’ge ano eniak enesago hologu lema o,” oluk, At ’gain Onuk Logo a’ge Allah enat egei o. 53“Is aphwami Babel a’ge en aphwami sebelogo ’belap onobu miama re, ’bogorl pam ligotluk, o eba werik poluk, pak modok annisogo wokho pouwa a’geat de, sebelogo belebak pobumagoluk, is ap o wiagapsogo pegesa a’ge ebano ebayat perak onobou weik o,” oluk, at Nenaik ’gain Onuk Logo a’ge Allah enat egei o.
O Babel wiagapsogo po wene
54“O Babel en lo’gu logat marlogulat, is Babel welagaimu wiagap pil lagalat, eniak orluk ogulat, togwi a’ge ebano enesago hologwi o. 55An Henaik ’gain Onuk Logo a’ge Allah en o Babel wiagapsogo pasulat, enagai en eniak eli orluk no’gwi a’ge ebano erlagap pasulat, tik o. Ik lok laut erliak-’gwerliak hasu ’gela’ge eneselei a’ge asogoat ’guagalat, ik laut iak orlu oso ’gela’ge, eniak asogoat il wagalat, tua o. 56An Allah ai re, togwi a’ge hegitsogo ogo tagenebasu a’ge an Henaik ’gain Onuk Logo a’ge Allah, at o. An en o Babel tegei ’gela’ge ogo ebam paikmu re, is o wiagap pogwi a’ge ebano o Babel wemarik, wiagap pogulat, At osi weim togwi a’ge ebano tenak onobogulat, enesegen porlologo pogulat, tua o. 57Is o Babel onuelak onu’gwarek a’ge emin, onuelak enede oruak a’ge emin, is o Babel eiye welagai a’ge emin, onosilak enemin togwi a’ge emin, onosilak ap weim togwi a’ge emin, ’berlegat ik enede balagai a’ge wogentaikmu noluk enelaluk om, erlakma en modok-modok nogo lebeksogo nogogu lema o,” oluk, at onuk logo a’ge onuk e, anni modok welago a’ge At Allah enat egei o. 58At ’gain Onuk Logo anni modok welago a’ge at Allah en egei ano re, yuat o. “O Babel helep pak yat wogo a’ge ano moluk-melaksogo gwiangma pogulat, ’goduk emde yat ’belak a’ge ebano odouk nasulat, tuama re, is aphwami ena’gul onuk lobok en enanni erlak agokhwe tegisa ai, almasogoat togulat, ye, di aphwami yu aphwami yabuk set hoporak tegisa ai, e no a’ge pagerat takpogulat, tegisema hagup ani o,” oluk, egei o.
Yeremia en o Babel mo’gulentai lo a’ge paget mo’gulesi wene
59At ap Zedekia ano Yehuda a’ge onue ’gain welat, wene ’gagalogo mo’gulentasukhwe tahun henagan takpoluk, mesik ago a’ge pam, ap Mahseya eba Neria omlogo ap ’gain ano ebe woluk noso a’ge Seraya ano, Zedekia emin o Babel lagaimu, at Allah en mo’gulosokhwe mo’gulentasu a’ge Yeremia en mo’gulesi ano re, yuat o. 60At Yeremia en egin-pegin o Babel ebam ’gwilo a’ge ’berlegat wene buku berlik-berleksogo odo balegeimu re. 61Ap Seraya ano wogeselat, “Hat o Babel laguntik, wene odo balegis a’ge wokheselegi yu, ’berlegat, aphwami o Babel a’ge enil pam modok mo’golip o. 62Mogolik poluk, At Allah mo’guleselat, hat naik ’gain Onuk Logo a’ge Allah, o. Haren, o kota yu, erlagap pasulat, aphwami emin, onuam emin, mesik welema erlak o wogo modok-modogat welema e’gen o, oluk, se’ban ip, o. 63#Wah. 18:21Wene yu ’berlegat mo’goliselat, se’ban eselat, taga loroguntik, helep mesik wokho tuesiga ’berlegat ’belak a’ge yu e’gerlakma poluk, herle hetsogo ik Efrat ede’burl hwik habi lu o. 64Hwikha’boluk mo’gulentasulat, At ’gain Onuk Logo a’ge Allah en, o Babel yu e’gin lok modok a’ge ebam paikmu helep oboksogo ’begei ai ’gela’ge takpaikmu re, inom erlakma en onuk erlagat welema egei o. Oluk mo’gulomup o,” oluk, mo’gulesi At Yeremia en wene mo’gulentasu laga a’ge ano ologun pam e aiat o.
Currently Selected:
Yeremia 51: Wul
Highlight
Copy
Compare
Share
Want to have your highlights saved across all your devices? Sign up or sign in
