Yeremia 52
52
O Yerusalem wiak aga wene
1Ap Zedekia ano dogo oruakhwe tahun 21 agokhwe ’gain otluk, o Yerusalem welat, wene le’gelogo mo’gulentasukhwe, tahun 11 tegei. At ia re, owi Libna a’ge ap Yeremia agalogo onuk hwe Hamutal aiat o. 2Ap Yoyakim ano wiak taga laga ’gela’ge, at Zedekia en At ’gain Onuk Logo a’ge Allah il oruakhwe wiak taga laga. 3Is aphwami o Yerusalem a’ge emin, Yehuda a’ge emin, e’gin enebam aga ano re, At ’gain Onuk Logo a’ge Allah olot het enebam pesi ano pam takpoluk, “Is enebam eberak wolom nebit o,” oluk, ugenebesi aiat o. “Asogo toluk ap Zedekia en, ap Babel a’ge onue ’gain en wene le’gelogo mo’gulnentasulom nebit o,” oluk, ukpesi o. 4#Yeh. 24:2Ukpesirik, ap Yehuda a’ge onue ’gain otluk wene le’gelogo mo’gulentasukhwe, tahun 9 takpoluk, mesik tagalat dugwi 10 pelelak poluk mesik pelelak a’ge tanggal 10 dugwi ai pam at ap Babel a’ge onue ’gain Nebukadnezar eiyagai enesegen oruak a’ge ’berlegat o Yerusalem sebel horlouwogoluk wegesa, wegesarik, o kota o’borlma ebano onowi sabo werik pagathorloluk, o pak wogo a’ge siatle horluksogo ’guogoluk, ’gwiang pam ’berla til ligegesarik, 5wal til lagaihwe modok, ap ’gain Zedekia wene le’gelogo mo’gulentasukhwe tahun 11 tegei ai pamat aga. 6Ye, dugwi 4 pelelak a’ge tanggal 9 pam o kota eba aphwami onsoʼboru no a’ge modogat erlak agama re, so’boru nele modok nogorlok ebelesogo tagenebesi. 7#Yeh. 33:21Tagenebasuam e, is ap Yehuda enesegen oruak a’ge ’berlegat o huba’go is ap Babel a’ge o kota wale’gik poluk oruakhwe, o kota helep pak wogo ano, ele delak poluk, ap ’gain iabuk yogoma horoksogo o pema-pema werik oruakhwe, ’burl ’goduk ’gogwi ’gwe ano libegesarik, hweiye o Araba ik Yordan dogoma louwogoluk lagaimu, 8Is ap o Babel a’ge enesegen oruak a’ge en mugonoboluk, o Yerikho dogoma eriano en osilak hweiye libagaihwe, 9Onue ’gain Zedekia ano tenak poluk, ap Babel a’ge onue ’gain o Hamat kota Ribla oruakma pei lagaiam, eriano en, “Disogo takhobul o,” oluk, mo’gulegisa. 10Mo’gulegisarik, o Ribla eria, is Babel a’ge onue ’gain en at Zedekia il oruakhwe emalik wusogo enebasulat, is Yehuda a’ge enemin togwi a’ge onugwarek a’ge ogo wusogo enebasulat, takpoluk, 11#Yeh. 12:13At Zedekia il sogulogo pasulat, herle tembaga hele’gik a’ge ano pam e’gik oyuk hetsogo pasulat, takpoluk, woluk o Babel pei lagarik, herle werak welagaimu ’gwelebak pesimu ebano welat waraga.
Allah owi werik a’ge wiagap pegesa wene
12Ye, ap Nebukadnezar ano ap Babel a’ge onue ’gain oruakhwe, tahun 19 takpoluk mesik ogola welat 5 pelelak a’ge tanggal 10 a’ge pam ap ’gain emin togwi a’ge mesik at ebe woluk noso a’ge onue onuk Nebuzaradan o Yerusalem waga. 13#1Raj. 9:8Wagarik, At ’gain Onuk Logo a’ge Allah owi werik a’ge emin, ap ’gain owi o lok opsogo werik a’ge emin, is ap ’gain-’gain onowi werik o Yerusalem oruak a’ge ’berlegat emin, odouk ’gwelabil lagarik, 14is ap Babel a’ge enesegen oruak a’ge enebe logolak ’berlegat at emin o Yerusalem pak wogo a’ge moluk-melaksogo pil legesa. 15Pil legesarik, ap ’gain ebe woluk no’gwi a’ge onue Nebuzaradan ano en is aphwami ene’gik horlo mia a’ge ene’gik erlak a’ge logon emin, is aphwami pema oruakhwe legesarik o kota eba welagai a’ge ebano emin, is ap ene’gik ’bogun a’ge pema emin, is ap Babel onue ’gain emin mangno tegisa a’ge emin, wogonoboluk laigoluk eberiselat, 16Ye, is ap ene’gik modok erlak a’ge pema nak e, anggur yogoma yabuk til lagalat, di a’ge yu a’ge yogo a’ge hogol il lagalat, togu lemagoluk, eba at ugenebasulat, tegei.
17 #
1Raj. 7:15-47
Tagoam e, at osilak Babel a’ge en At ’gain Onuk Logo a’ge Allah owi werik o ogut-ogut uak tembaga a’ge pam hele’gik a’ge edikpegesa a’ge ano emin, At Allah owi werikmu ene’gik ’gela’ge ik ne’gak woluk no’gwi a’ge emin, sogoluak lok a’ge onuk, ik yegelak, tembaga a’ge pam hele’gik a’ge ano emin, edikpoluk, tembaga a’ge holuk nak, o Babel woluk louwogoluk, pogulogo wogulat, 18sogoluak kuali ’gela’ge emin, yabuk hua emin, esaga heberlogwi a’ge emin, ik herlelik pil lagai a’ge sogoluak emin, Allah owi werikmu aphwami enebaget togwi a’ge di a’ge yu a’ge tembaga pam hele’gik a’ge emin, ’berlegat wogulat, togukhwe. 19Ap ’gain ebe woluk no’gwi a’ge onue ano en di a’ge yu a’ge perak emas pam hele’gik a’ge sogoluak lok kuali ’gela’ge emin, odouk e’gen orlok togwi a’ge emin, ik herlelik pil lagai a’ge sogoluak emin, sogoluak ebak a’ge emin, esaga heberlak a’ge edip hele’gik a’ge emin, ebaget herlelik pogwi a’ge a’bosu na'gogwi a’ge emin, ’berlegat wesi. 20-23Ai wesi ai re, at Salomo en At ’gain Onuk Logo a’ge Allah owi weriselat, o ogut uak emin e, erei akhit yat e meter 8 pam walholuk heli’gogo pasulat, ebagase pam hettak a’ge meter e 5 pam takpoluk, mesik ’burl o’gwe walhegeik ebelogo pasulat, ye, ’burl ukpoluk, emde ’gwe re ene’gik ebak a’ge ’gela’ge takpoluk heli’gogo pasulat, tegeitik, ologun hweriogo po a’ge tembaga a’ge pam erei akhit yat meter mesik takpoluk, mesik ’burl o’gwe walhegeik hele’gik poluk, ’besieme’gen a’ge pam sum ogut ’gela’ge ikho sepnik poluk, tembaga pam e delima e’gen ogut ’gela’ge takpil-pil lasulat, ye, o o’gut uak akhen ano ogo asogoat heli’gogo poluk, ’besieme’gen tembaga a’ge pam sum ogut ’gela’ge ikho sepnik pasulat, tagalat, e delima e’gen ogut ’gela’ge heling-heling legenak a’ge ai at heli’gogo pasulat, ye, sum ogut ’gela’ge ikho sepnik a’ge o’borl pam ai, 100 pam at takpasulat, tegei a’ge ano emin, At ’gain Onuk Logo a’ge Allah owi werikmu welemagoluk ik ne’gak ene’gik ’gela’ge woluk no’gwi a’ge emin, sogoluak lok a’ge onuk, ik yegelak, ano emin, edikpoluk, tembaga a’ge nak pogulogo wegesa a’ge ano re, momu e’gin walho miahwe de, wegesa o.
Is Yehuda a’ge o Babel wogonoboluk legesa wene
24Ap ’gain ebe woluk no’gwi a’ge Nebuzaradan ano en ap Allah eiye a’ge onue Seraya emin, ot eragam a’ge Zefanya emin, Allah owi werik ’goduk’gwelabogo welagai a’ge enebe henagan emin, ten enebiselat, 25Pema oruakhwe legesarik o kota owan oruak a’ge ebano, ap ’gain ano emin togwi a’ge mesik is weim togwi a’ge onue ano emin, ap ’gain ano ebaget opsogo hwalogwi a’ge enebe 7 emin, ap enesegen oruak a’ge onue en aphwami ene’gerlakma enesegen oruak a’ge emagoluk, ononuk odo ’baliso a’ge ano emin, at osilak enebe 60 o eba oruakhwe entesi a’ge ebano emin, wogenebiselat, tegeitik, 26’berlegat wogonoboluk ap Babel onue ’gain o Ribla oruakma, enebei laga. 27Enebei lasuam e, o Hamat kota Ribla eba at ’gain a’ge ano en waronobuagoluk, osilak mo’gulentasuam e, wusogo enebegesa. Is aphwami Yehuda a’ge ono’gwiang pam en herle wusogo wogonoboluk lebik enebegesa ano re aiat o. 28Ap Nebukadnezar en is aphwami wogonoboluk o Babel enebei laga ano re, at ’gain welat wene le’gelogo mo’gulentasukhwe tahun 6 takpoluk, mesik wagokhwe is Yehuda a’ge enebe 3.023 wogonoboluk lasulat, 29At ’gain welat, wene ’gagalogo mo’gulentasukhwe tahun 17 takpoluk, mesik wagokhwe o Yerusalem en enebe 832 wogonoboluk lasulat, 30Ye, at ’gain welat, wene ’gagalogo mo’gulentasukhwe tahun 22 takpoluk, mesik wagokhwe ap ’gain ebe woluk no’gwi a’ge onue Nebuzaradan en is Yehuda a’ge enebe 745 wogonoboluk lasulat, tegisa a’ge enebe la’bolik e 4.600 aiat o.
Yoyakin herle werak welaga a’ge hebilogo lebikpesi wene
31Ye, ap ’gain Yehuda en Yoyakin woluk, o Babel herle wusogo pei lagama oruakhwe, tahun 36 takpoluk, mesik agokhwe ap Ewil-Merodakh o Babel onue ’gain aga. ’Gain agarik, tahun ai a’ge pam dugwi 11 a’ge pelelak poluk, mesik pelelak a’ge tanggal 25 dugwi ai a’ge pam at Yoyakin ano herle wusogo onobogumu ebano oruakma, hebilogo lebikpesi. 32Lebikpesirik, edeap poluk, wene mo’guleselat, is onuelak ’gain Babel emin welegesa a’ge ebano sebelak ’gela’ge oruakhwe, at Yoyakin onogorlok a’geat logo ’gela’ge welemagoluk edikpasulat, tegei. 33Tisoam e, at Yoyakin ano herle werak welat, o’bogoyum ’buktak welaga a’ge ano ukpoluk, op a’ge nak ’buk horloluk, ap ’gain emin so’boru no’gumu ebano, emin nasumu en, warom a’ge hwerliat aga. 34Ye, warom a’ge hwerli at agama, a’ge-a’ge erlak holuk ogo bal horlouwagoluk, ap ’gain ano en hwedik hwadigat o uang wogese laga o.
Currently Selected:
Yeremia 52: Wul
Highlight
Copy
Compare
Share
Want to have your highlights saved across all your devices? Sign up or sign in
