Yeremia 46
46
Aphwami ena’gul onuk lo’bok tagonobo wene
(Pasal 46-51)
O Mesir sebelogo po wene
1Aphwami ena’gul onuk lo’bok tagonobo a’ge At ’gain Onuk Logo a’ge Allah en mo’gulosokhwe mo’gulentasu a’ge Yeremia mo’gulesi ano re, yuat o. 2#Yes. 19:1-25; Yeh. 29:1–32:32Is o Mesir a’ge tagonobo egei ano re, Ap Yosia omlogo Yoyakim ano is Yehuda a’ge onue ’gain otluk, wene ’gagalogo mo’gulentasukhwe tahun henagan takpoluk, mesik agokhwe, ap o Babel a’ge onue ’gain Nebukadnezar en is aphwami o Mesir a’ge onue Firaun Nekho osi enesegen oruak a’ge enemin o Karkemis ik Efrat esagoma eriano oruakma, sebelak pesimu Firaun osi enemin en tagonobo wene mo’gulentesi ano re, yuat o. 3“Sing sum egeik emin, sing egeik wei-wei a’ge emin leik-louktak poluk weim ebil louwagoluk, libemak o. 4Is ap kuda ebano pam lagalat weim obogwi a’ge ai, hut agai a’ge kuda ebe lobok o’borl pam herle hettak poluk, hut agalat, ena’gul sum erik a’ge ’buktugulat, weim tu a’ge paget, onuagun e’gat merlelogulat, onosum weim sum erik a’ge ’buk horlogulat, enebagaluk ’gennesogo wan horlogulat, takpoluk, onosilak enemin weim lobom o’gwe lobok louwak o.
5Is enede yarluk osoam, enagehan lagalat, onosi weim enanni wiak obogwi a’ge ebano sebelak onobogwiam, togolik onolukhwe edenogo yet onto erlakma en onolukhwe dikhum hweiye bogologulat da hisak ya hisak hweiye bogologulat, togukhwe an nil entasu legi ai, nopaget en togwi o,” oluk, At ’gain Onuk Logo a’ge Allah enat egei o. 6“Is weim enebam haro a’bik a’ge ebano hweiye bogologulat, is ap weim enanni a’bik a’ge ebano enagap delhorloluk bogologulat, tua modok erlagat o. O o’borl erabu akhit o’gwe ik Efrat esa’goma eba at onoyuk a’gul dungsogo kelil-kelil louwa o. 7Ik Nil en hettak til ligago ’gelage inagalat, ik ebe wagalat, iak orlu oso ’gelage iak il-il wagalat, tago yu re, sa o? 8Ik Nil en hettak til ligago ’gelage, ik ebe wagalat, iak, orlu, oso ai ’gelage, ai re o Mesir anoat o. At en eselat an inagalat, o ’gwiang yu, sebeliselat, o kota-kota emin, is aphwami o kota-kota welagaimu ma emin, erlagap pasulat, tik o oluk, oso yo. 9Asogoatma re, is kuda-kuda ebano, yeik ’buk ogulat, is ’gwiangso weim togwi a’ge ebano, ’bekhit weim ede ’burl logo la ’gogulat, is ap weim togwi a’ge sing sum ene’gikmu welat Kusi a’ge emin, Put a’ge emin, ai weim til libagalat is enesegen werik poluk oruak a’ge ap Lidia a’ge ai, weim ’gogulat, togu lemak o.
10Asogo tu erlige ano re, At Allah en emin selei a’ge ogo tagonoboat o. Asogo selei a’ge ogo tagonoboatma re, At ’gain Onuk Logo anni modok welago a’ge At Allah en ogo tagonobo a’ge poligat o. At ’gain Onuk Logo anni modok welago a’ge nenaik At Allah en o abel erabu akhit o’gwe ik Efrat esa’goma eria domba wusogo wogogwi ’gelage eselei a’ge enebe warenebil louwama re, wa’gun owan gabelik erlakhwe nil nak lasulat, enemep en nogum tegei o, u erlakma en wat enebil nak lasulat, taga lema ani o. 11O Mesir emalik ap enemin nogou erlak a’ge holuk e, o Gilead louwarik, ou holuk a’bosu nonobouwagoluk louwa a’geat de op ema erlakma re, obotut erlak om a’ge paget palo til lasu a’ge ai re, we almasogo palo til lasu legi o. 12At wiagapsogo pegesa a’ge ano aphwami ena’gul onuk lobok en enesa’go hwelegisa o. At iak nga oso a’ge ano o ’gwiang pam ’berlegat ’bete etil lasulat, is ap weim togwi a’ge is-is onoyuk a’gul dung-dung ’bogulat, ’gwiang pam kelil agalat, tegisa o,” oluk egeimu en egi o.
Nebukadnezar wom a’ge paget egei wene
13 #
Yer. 43:10-13
Is o Babel a’ge onue ’gain Nebukadnezar en o Mesir sebeluom wene At ’gain Onuk Logo a’ge Allah en mo’gulosokhwe mo’gulentasu a’ge Yeremia mo’gulesi ano re, yuat o. 14“Is aphwami o Mesir oruak a’ge ebano mo’gulentasulat, Is o Migdol oruak a’ge ebano mo’gulentasulat, is o Memfis oruak a’ge emin, o Tahpanhes oruak a’ge emin, mo’gulentasulat, tagalom ano re, yuat o. Aphwami is ono’borl o’gwe oruak a’ge eba re, wa’gun pam enebe nil louwama re, enesegen onuagun wogo poluk, weim tilo’gwe lo’bok etil louwak o. 15Is onodogwi enasua enanni a’ge ononuk a’bik ebano, no oluk en bogologwi? An Henaik ’gain Onuk Logo a’ge Allah en sebelak pegimu, is onodogwi asua sapi ugwa'buk ogut hele’gik a’ge ano, anni erlakma re, mo u erlakma en hweiye bogologwi o. 16Is enesegen oruak a’ge ebano onoyuk a’gul dungsogo wathorlil lagalat, nis disogo tagnenebasumu re, is sebelak nenebelep opogwi a’ge en onuagun pam watnonobogumu no oluk, nenagap delhorloluk nonue nenari oruakma, nonowi edipmu louwok o, oluk, ogwi o.
17Onowi pam loluk welat, is Mesir a’ge onue Firaun ai. Obab nonobo a’ge ebale oruakhweat de we iak nak il noso a’ge ebe arat o, oluk ogu lema ani o, oluk,” egei ai o. 18At onuk logo a’ge onuk anni modok welago a’ge At Allah en eselat, “Di dom-yu dom e’gerlakma dom Tabor welago ’gelage, ik lok yegelak laut iak pam dom Karmel welago ’gelage, at onogorlok oruak a’ge mesik asogoat lauma o, oluk an modok nelaluk welago a’ge nonuk ’balholuk egi o. 19Asogoatma re, o Memfis wiagapsogo pasulat, odouk e nil lasulat, o moluk-melaksogo pasu ano pam aphwami mesik welagai modok erlak o, o wogoat welat tuama re, is o Mesir welagai a’ge ai, hogul wogonoboluk louwama re, enage a’ge ’berlegat di degelsogo pagathorlogu lemak o. 20O Mesir ai re, lembu owan get dogo a’ge asu modok ’boguntak welago ai ’gela’ge oruak a’geat de, Morli sobon mesik o o’borl erabu akhit en at ebek wema o. 21Wagoam e, is Mesir a’ge onosilak ap enesegen oruak a’ge ebano lembu emalik esei ensogo welago ’gela’ge oruakma re, is ogo tagonobo erlige horok etil wagalat, e’gin enebam po erlige agauwa ano lau wagalat, tuama re, is pang tuarik mo u erlakma re mesik erligeat hweiye bogolil louwa o. 22Enemin selei a’ge enebe a’bik logolak en waronobu agaiam, pesa'go iak peserlele lis hasulat lebago ai ’gelage is Mesir a’ge eniak asogoat il-il bogologukhwe, ’besie pam e motil lagai ’gelage, is Mesir a’ge sebelogo onobouwogoluk, ene’besie woluk wagalat, 23His ’gebela ’gwe ai lo mia o. O pare e huk lok a’ge oruakhwe motil lagalat, tua ani o, oluk egei. Onosilak enesegen oruak a’ge wagai ano re, ap enebe a’bik ene’gik wenaru modok mia ha’bukhak oluk ’gela’ge wema o. 24O Mesir agalogo ’gela’ge, is Mesir a’ge ai re, aphwami o o’borl erabu akhit o’gwe en wagai a’ge ebano ene’gikmu paikmu re, ene’gerli ema o,” oluk, At Allah enat egei o.
25At ’gain Onuk Logo anni modok welago a’ge Israel enaik Allah en eselat, “Is o Tebe a’ge onodogwi asua Amon ano emin, at Firaun emin, o Mesir oruak a’ge emin, is onodogwi enasua emin, is onuelak ’gain-’gain emin, is ap Firaun ebam heberik poluk welagai a’ge ebano emin, ’berlegat wiak togwi ogo e’gin a’ge enebam paik oluk taga legi o. 26Is ap ai waronobuogoluk togulat o Babel a’ge onue ’gain Nebukadnezar emin, osi emin togwi a’ge emin, ene’gikmu pouwa a’geat de, aphwami o Mesir naduk welegesa ’gelage, pobuk asogoat welema o,” oluk, At Nenaik ’gain Onuk Logo a’ge Allah enat egei o.
27 #
Yer. 30:10,11 “Asogoatma re, at neragam a’ge Yakub pam en weiyelak a’ge ai, onogorlok hogulat, ye, at Israel pam en dogo ’gwe a’ge ai en alik worogulat, togumu no yo. An o walek en is enagap delak onobou wagalat, at pam en weiyelak a’ge wogonoboluk enebeil lagaimu eba en togolik wogonoboluk onobou wagalat, naduk enede we yogun lielak enagaisogo welegesa ’gelage tagenebasulat, tikmu re, enede erlak om a’ge mesik enebam ema erlagat o.
28At neragam a’ge Yakub pam en weiyelak a’ge ai, An nemin welema re, onogorlok hogumu no yo. Bulogo di aphwami yu aphwami welagai o’gwe ene’gerlakma is Yakub a’ge de perak enebil laikmu wolomma ebano enebe erlagapsogo enebaik a’geat de, Yakub pam en weiyelak a’ge is nak e, erlagapsogo enebaik erlak o. Til laga legesa ogo e’gin a’ge enebam paik erlak e erlak, tagenebaik atma re, enede eberuagoluk, tagenebasu legi ai re, tegisa a’ge hegitsogoat tagenebasulat taga leik o,” oluk At ’gain Onuk Logo a’ge Allah enat egeimu en mo’gulhentegis o.
Currently Selected:
Yeremia 46: Wul
Highlight
Copy
Compare
Share
Want to have your highlights saved across all your devices? Sign up or sign in
