Yeremia 43
43
Yeremia o Mesir woluk pei legesa wene
1Is Yehuda a’ge enaik At ’gain Onuk Logo a’ge Allah en Yeremia en mo’gulontouwagoluk, wene mo’gulesi a’ge ebano ’berlegat ’beli’gogo is aphwami ebano mo’gulentasuam, 2Hosaya omlogo Azarya emin, Kareah omlogo Yohanan emin, is aphwami enede en logo pogwi a’ge ’berlegat emin, en Yeremia mo’gulogulat, “Nenaik At ’gain Onuk Logo a’ge Allah en, is o Mesir eba ap ’bok ’gela’ge otluk welemagoluk, lo mia oluk mo’gulentai lak o, oluk, egei, oluk mo’gulnentigen ai re, at u erlakma at de, mo’gulnentigenma re hiak eseiat ese legen o. 3Nis ap o Babel a’ge ene’gikmu nenebasuam e, is en wusogo nonobogwi de a, woknonoboluk o Babel hwiknentai lagai a, asogo tuagoluk, at Neria omlogo Barukh en hede gagalegeimu emde mo’gulnentigenma hiege o,” oluk, mo’gulegisa. 4Asogo mo’gulegisarik, at Kareah omlogo Yohanan emin, is ap enesegen oruak a’ge onuelak emin, aphwami ’berlegat emin, At Allah en, “His o Yehuda at welemis o,” oluk, mo’gulentesi a’ge oruakhweat de, enesago holu erlakma enat, 5#2Raj. 25:26at Kareah omlogo Yohanan ano emin, is enesegen oruak a’ge onuelak ebano emin, en is aphwami pema ’bulogo yarluk egesarik di aphwami yu aphwami ene’gerlak o’gwe ebano en pobuk togolik o Yehuda wegesa a’ge ebano wogonoboluk lagalat, 6Is ap ’gain ebe woluk no’gwi a’ge onue Nebuzaradan en ap Safan eba Ahikam omlogo Gedalya en ’gwelabentarok welemagoluk edikpesi a’ge enebe ap emin, hwami emin, enemalik emin, ap ’gain ogolani emin, wogonoboluk lagalat, ye, Allah en mo’gulosokhwe mo’gulentasu a’ge Yeremia ogo, Neria omlogo Barukh emin, wogonoboluk lagalat. 7Til-til At ’gain Onuk Logo a’ge Allah en mo’gulentesi a’ge sagalak poluk, o Mesir ’gwi legesarik, o Tahpanhes akhit ebale’gesa.
Is Mesir a’ge Nebukadnezar eragam sebel la’gwilo wene
8At Yeremia ano o Tahpanhes oruakma, At ’gain Onuk Logo a’ge Allah en mo’gulesi ano re, yuat o. 9“Helep lok a’ge logon he’gikmu wa’guntik, is Yehuda a’ge enil oruakhwe, o Tahpanhes ap Firaun owi o lok op a’ge werikmu ’goduk’gwilasumu helep demak a’ge ano wokho paguntik helep ebano eba hisogo poluk, o’borl pam ’gwiang en sebelil laguntik, pobuk helep ano wikwok o’borl pam demak pomup o. 10Asogo toguntik, is mo’gulentasulat, at ’gain Onuk Logo anni modok welago a’ge Israel enaik Allah en egei ano re, yuat o. At neragam a’ge is Babel a’ge onue ’gain Nebukadnezar wemagoluk, mo’guleikmu wagoam e, helep ebano edikpaikmu yema at wene ’gagalogo mo’gulentasulomma hele’gik paikmu re, o’borl pam eba ’gain-’gain en wene ’gagalogo mo’gulontogumu ebale heli’gogo werik poluk, wene ’gagalogo mo’gulentasu lema ani o. 11At wemarik, o Mesir sebeliselat, ou obotut en warom a’ge holuk, obotut ai pam waremagoluk takpasulat, hogul wogonoboluk enebeillo a’ge oruak holuk, hogul wogonoboluk enebeil lasulat, wa’gun pam waronobu a’ge oruak holuk, wa’gun pam warenebiselat, tik o. 12-13Aphwami Mesir a’ge onodogwi asua owi werik a’ge odouk ’gwelabil lasulat, onodogwi asua odouk narliselat, pema hogul woluk lasulat tik o. Ap domba degelenebiso a’ge en domba ene’gebi onosum petne lo’bok-oso a’ge wokho hwikhogwi ’gela’ge, o Mesir asogoat takpasu leiktik, o Mesir o mo erliktogulom a’ge paget edikhwe erliktogulat onogorlok en alik worogwi a’ge ano moluk-melaksogo pasulat, is Mesir a’ge onodogwi asua owi werik a’ge ano odouk ’gwelabil lasulat, takpoluk, e’gebela ’gwe ’balogo po erlakma en ebenagaikmu at nouwa o, oluk mo’gulontomup o,” oluk, mo’gulesi.
Currently Selected:
Yeremia 43: Wul
Highlight
Copy
Compare
Share
Want to have your highlights saved across all your devices? Sign up or sign in
