Yeremia 44
44
Aphwami Yehuda o Mesir oruak a’ge ebano tagonobo wene
1Is aphwami Yehuda a’ge o Mesir ik Nil o’but akhit eba kota Migdol emin, Tahpanhes emin, Memfis emin, ye, ik elarukmu o Patros emin, oruak a’ge ebano tagonobo a’ge Yeremia mo’gulesi re yuat o. 2-3At ’gain Onuk Logo anni modok welago a’ge Israel enaik Allah en eselat, An en o Yerusalem emin, o Yehuda kota-kota ’berlegat emin, e’gin modok mia a’ge enebam pasukhwe niegesa ani o. Is wiak modok til laga legesa ano pam yogodak o ai, aphwami erlakma en, o wokho moluk-melaktak nagat oruak o. “An oruakhweat de, ene’balak emin, is enebe emin, onodogwi asua eneperlak a’ge ebaget e’ben op a’ge-op a’ge odouk narlogulat, eragam sebel otluk erliktogulat, togu legesa ano pam nolot het en o ai wiagap pegi ani o. 4Enebit enemelmel a’ge togwiam An modok nebit epasu legi ano en e, ukpemit o, oluk mo’gulontouwagoluk, neragam a’ge An en mo’gulentasukhwe mo’gulontogwi a’ge hwedik-hwadigat perak enebasu modok welegi a’geat de, 5Enesago hologulat, pobi togulat, is wiak togwi a’ge ai, ukpoluk sogolik neragam wagalat, dogwi asua paget e’ben op-op a’ge odouk narlogwi a’ge ano ukpogulat, tu erlakma re, 6an nolot het odouk ’gelage dain eselat, o Yehuda kota-kota emin, o Yerusalem ebela ’gwe emin, nolot het herlilogo pil-pil wegi ano pam o ai, aphwami oruak erlak ai ’gwiang ’bugap pegimu yogodak ogo enil hogwi aiat o,” oluk, egei o.
7At ’gain Onuk Logo anni modok welago a’ge Israel enaik Allah en egei ano re yuat o. “Is en togwi ano pam en ap emin, hwami emin, malik hwelani emin, malik pou ’get dogo a’ge emin, ena’guluak erlagap pagathorlogulat togumu re, is Yehuda a’ge pema ’bulogo ugonobo erlakma en, erlagapsogo onobouwagoluk togwi ai, no paget, e’gin asogoat taknonobouwak oluk, togwi o? 8Is en o Mesir ap ’bok ’gelage lau wotluk welat, An oruakhwe ene’gik pam en hele’gik a’ge dogwi asua ano ebaget e’ben op-op a’ge narlogwi ano pam nolot het emagoluk, no paget en togwi no? Ena’guluak erlagapsogo pagathorlogulat di aphwami yu aphwami o ’gwiang pam oruak a’ge ene’gerlakma oruakhwe, aphwami en, hweim onobogwi at, oruak o oluk onobouwagoluk tak pagathorlogulat, mi-miarak onobouwagoluk tak pagathorlogulat, togwi ai o. 9Is emin, onugwami emin, o’gwiang Yehuda pam ogo, o Yerusalem ebela pam ogo, wiak nagat til no’gulat ye, is ene’balak emin, is ap Yehuda a’ge onuelak ’gain emin, onuelak ’gain-’gain onugwami emin, wiak modok nogorlok a’ge til no’gulat, togu legesa a’ge ebano memerak poluk en togwi a? 10O page en ’bekhit, yogodak hwerli enede sebelak pagathorlogulat, onogorlogap nobogulat, tu erlakma en welat, togulom wene mo’gulentegis a’ge Musa en odo balegei a’ge emin, is ene’balak emin en togulom a’ge wene ’gagalogo mo’gulontogwi a’ge emin, opsogo motluk lo erlakma enat togwi o,” oluk, egeimu en mo’gulhentegis ai o.
11Asogoat togumu re, at ’gain Onuk Logo anni modok welago a’ge Israel enaik Allah en egei ano re, yuat o. “An en e’gin modok enebam pasulat, is Yehuda ogo ’berlegat ena’guluak erlagap pasulat, tu a’ge arat ’gagalogo pegi o. 12Is Yehuda a’ge pema ’bullak o Mesir modok laga lomultik, ap ’bok ’gela’ge wolomul, opoluk, welegesa a’ge ebano, o Mesir yema welat, wa’gun pam wusogo waragalat, so’boru obouk pam waragalat, tua o. Asogo tua a’ge ononuk oruak-erlak ’berlegat wa’gun pam, so’boru obouk pamat, waraga lema ani o. Aphwami en, is yu re, hweim yarogwik a’geat, ogukhwe, onogorlok modok. Oruakhwe ontogulat, ononuk oluk hweim onobogulat mi-miarak onobogulat, togu lema ani o. 13An en is o Yerusalem welagai a’ge ebano e’gin enebam pegi ’gelage is o Mesir yema welagai a’ge ebano e’gin enebam pasulat, wa’gun pam wusogo waragalat, so’boru obouk pam waragalat ou pam en waragalat, tuama re, 14is aphwami Yehuda a’ge pema ’bullak o Mesir eba wotluk oruak a’ge ebano, ’berlegat enagap delhorloluk hweiye bogologulat, ye, nonowi pam togolik womultik, ebayat eiye otluk wolom a’ge, logwe, oluk, opogumu ebano ugonoboma ebano togolik lagalat, tua erlagat o. At e, is mesik-mesik nak enagap delhorloluk togolik o eba louwa, egeimu en, mo’gulhentegis o,” oluk, mo’gulentesi.
15Mo’gulentesimu, is ap Yehuda a’ge onugwami Allah paget erlak is onodogwi asua paget e’ben op-op a’ge odouk narlogwi enaluk a’ge ebano emin, is hwami a’bik odokti legesarik eba oruak a’ge ebano emin, is aphwami o Mesir ik Nil elaruk-obut welagai a’ge enebe a’bik logolak a’ge emin, en Yeremia mo’gulogulat, 16“At Nenaik ’gain Onuk Logo a’ge Allah enat egeimu re, mo’gulhentegis o, oluk, mo’gulnentasu a’ge ano, nis nenesago hologu lomul erlak at o. 17Nis nene’balak emin, nonuelak ’gain-’gain emin, nonuelak onu’gwarek a’ge emin, en o Yehuda kota-kota ogo, o Yerusalem ebela ’gwe ebela ’gwe emin, nenasukhwe onuk, lok a’ge, ’bogorl, ebaget e’ben op a’ge e narlogulat, ebaget anggur a’bosu herlilogo pogulat, togu legesa ’gelage, nis en asogoat togu lomul ani o, oluk, ege a’ge anoat hegitsogo togu lomul o. Asogo ebaget wogogwi erlige ai re nonso’boru nonogum ningsogo no’gulat, nenagaisogo welat, obotut nenebam om erlakma en obat welat, togu lege a’geat de, 18Nenasua hwe onuk, oruak a’ge hwe ai, ebaget e’ben op-op a’ge odouk narlogulat, ebaget anggur a’bosu herlilogo pogulat, tu erlakma en mo ogwi ai pam en nena’ge-a’ge ’berlegat erlak agalat, wa’gun pam erlagap nenebiselat, so’boru obouk en nenebe waragalat, togumu o oluk, mo’gulheige o,” oluk, mo’gulegisa.
19Mo’gulogwiam, is hwami ebano en wene mesik emin at mo’gulogulat, nenasukhwe onuk oruak a’ge hwe ai ebaget e’ben op-op a’ge odouk narlogulat, ebaget anggur a’bosu herlilogo pogulat, asogo togulat, at ’gelage o roti ogut heli’gogo werarogulat, ebaget anggur a’bosu herlilogo pogulat, togwi ai, nonogunlak eneperlak oruakhwe togu lege epegen a? Enalugat o!
20Oluk ogwiam, at Yeremia en is hwami emin, ap emin, wene ogwi a’ge ebano ’berlegat ogo mo’gulentasulat, 21his emin, hene’balak emin, honuelak ’gain-’gain emin, is ap honuelak onu’gwarek a’ge emin, is aphwami o yema welagai a’ge emin, ’berlek en o Yehuda kota-kota ogo, o Yerusalem ebela ’gwe ebela ’gwe emin, e’ben op-op a’ge e narlil laga legep ano, at ’gain Onuk Logo a’ge Allah en henebe ebethentasulat, pobi henebiselat, tago ano erlak epegep? 22His wiak modok togulat, onogorlok a’ge nak til lagalat, togu legepma re, At ’gain Onuk Logo a’ge Allah en mesik emin mo u mia ago en e, hono’gwiang ai hweim en ma at welat, ye, aphwami erlak o wogoma at welat, takma re, o yogodak ogo enil hogwi aiat o. 23“At Nenaik ’gain Onuk Logo Allah en mo’gulhentasu a’ge ano hologo togulat, wene mo’gulhentesi a’ge Musa en odo balegei a’ge emin, wene ’gagalogo mo’gulhentesi a’ge emin, disogo tip asogo tip oluk owene ’belak a’ge, motluk lagalat, tu erlakma en welat, At Allah paget e’ben op-op a’ge ebaget odouk narlu erlakma en dogwi asua paget narlogulat, at wiagap pogu legep ano pam o yogodak e’gin a’ge henebam pesimu oruakhwe hogu lege yuat o,” oluk, mo’gulentesi o.
24Asogo mo’gulentesirik, at Yeremia en aphwami ’berlegat emin, hwami ebano emin, wene mo’gulentasulat, “His aphwami Yehuda a’ge o Mesir yema welegep a’ge ’berlegat At ’gain Onuk Logo a’ge Allah en egei a’ge mo’gulhentasu a’ge yu, henesa’go hologu lemis o. 25At ’gain Onuk Logo anni modok welago a’ge Israel enaik Allah en wene egei ano re, yuat o. Is ap emin, onugwami hwami emin, en, nis nenasukhwe onuk oruak a’ge ebaget e’ben op-op a’ge odouk narlogulat, ebaget anggur a’bosu herlelogulat, togu lomul o, oluk ho’buk ’baligema re, togu lomulat o, oluk, eniak modogat daksogo egesa ano, hegitsogoat til wagaihwe hegirikmu re, asogoat togulom o oluk egesa ano hegitsogo togulat, ho’buk balegisa ano hegitsogoat togulat, togu lemak o, oluk, egeimu re, 26His ap Yehuda a’ge o Mesir welegep a’ge ’berlegat, At Allah en egei a’ge yu, henesa’go hologo welemis o. At ’gain Onuk Logo a’ge Allah en eselat e, is aphwami Yehuda a’ge o Mesir di owi yu owi oruak a’ge ’berlegat en disogo tik o, oluk, An nonuk ’balogulat, at modok elaluk otok modok welago a’ge Allah uak o, oluk, ho’buk ’balogulat, togwi a’ge ano mesik emin togu lema modok erlak o. 27An en obabenebigoluk taga legi erlak wiagap enebaik oluk nilen wogonoboluk nosoma re, is ap Yehuda a’ge o Mesir eba oruak a’ge ebano, wa’gun pam wusogo waragalat, so’boru obouk pam waragalat, til-til ologun pam ena’guluak erlagap pagathorlouwa o. 28Is aphwami logon weisogo nak wa’gun pam waronobu erlakma en ukpoluk o Mesir en togolik o Yehuda louwa o lagaiam e, is Yehuda a’ge pema ’bullak o Mesir eba wegesarik oruak a’ge ebano ’berlek en is eniak egesa a’ge hegit aga ya, An niak egi a’ge hegit aga ya? oluk, enaluk ema, egeimu re, mo’gulhentegis o. 29At ’gain Onuk Logo a’ge Allah en eselat, is o yema oruakhwe e’gin enebam po egesa ano, demat ema oluk enaluk emagoluk, enaluk om a’ge tagonobo ano re demat e’gin henebam pouwa o. 30#2Raj. 25:1-7An en is o Yehuda a’ge onue ’gain Zedekia ano at woru a’ge et til wagokhwe eselei ogun is o Babel a’ge onue ’gain Nebukadnezar e’gikmu pesi ’gelage, is Mesir a’ge onue Firaun Hofra ano at eselei a’ge en ebe woru a’ge paget togu legesa a’ge ano ene’gikmu paik, egeimu re, mo’gulhentegis o,” oluk, mo’gulentesi.
Currently Selected:
Yeremia 44: Wul
Highlight
Copy
Compare
Share
Want to have your highlights saved across all your devices? Sign up or sign in
