Hakim-hakim 9
9
Ap Abimelekh en taga laga wene
1Asogo togukhwe, agauwa mesik erlige re, at Gideon omlogo Abimelekh o kota Sikhem ia orokhwi at amilak ene’bek laga. Lagarik, is emin, aphwami is a’ge logon emin, disogo mo’gulentesi,
2“His en e, aphwami o kota Sikhem welagai a’ge ’berlegat hin wogentasulat, disogo mo’gulontomup o,
His honogola henagai e, Gideon eiyagai enebe 70 eba en, tenhentarok welat,
Disogo tip, asogo tip, oluk mo’gulhontogulom henagai a? At e, ap mesigat a’ge en, tenhentarok welat,
Disogo tip, asogo tip, oluk mo’gulhontogulom henagai a. An his henemin welegi yu re, his hene’genma a’ge welegi ai o, oluk egei, oluk enede ebesogo mo’gulontomup o,” oluk mo’gulentesi. 3Asogo mo’gulentai lagama, is ap Abimelekh ia ue ari ebano aphwami o Sikhem a’ge logon ene’bek legesarik e, wene Abimelekh en egei a’ge ano mo’gulentigisa. Asogo mo’gulentai legesema, is aphwami o kota Sikhem welagai a’ge ebano en e,
“At Abimelekh ai nis nene’genma a’ge o,” oluk asogo ogumu oluk e, at Abimelekh iak hwelak poluk e’berlik louwogoluk tigisa. 4Asogo tigisarik, uang perak a’ge 70 pam dogwi onuk Baal-Berit paget owi hele’gik a’ge wegesarik, at Abimelekh wogigisa. Asogo wogegisema, at Abimelekh en ap logon enebabut wiak a’ge at oruak akhit emagoluk o’go wogentesi. 5Asogo wogentesirik, enemin e, at aik owi pam o onuk Ofra legesa. Legesarik, uelak arilak enebe 70 ebano helep mesigat a’ge pam onoboluk warenebegei. Asogo warenebegeimu, Gideon omlogo labo a’ge onuk Yotam ai nak e, ebe hisak agama re, at woru erlak. 6Asogo warenebegeimu, aphwami o Sikhem a’ge emin, o Bet-Milo a’ge emin, welegesa a’ge ’berlegat odoktigisarik e, o Sikhem eba e pei edipmu asuama ebano legesa. Legesarik, eba en at Abimelekh onue ’gain onuk logo welemagoluk edikpegesa.
7Asogo edikpegesema, at Yotam esa’go hwelegeirik e, dom Gerizim duk ebe pam inlai ligagarik olukhwe aphwami Sikhem a’ge ebano hegit welat e, iak loksogoat disogo mo’gulentesi,
“His aphwami Sikhem a’ge yu, his heniak ogukhwe Allah esa’go holuagoluk e, an en wene ebam elitsogo mo’gulhentaik ai henesa’go hwelit o. 8Agauwa mesik erlige re, is e di agan yu agan ’berlegat onue ’gain onuk logo a’ge mesik edikpuogolugat odoktigisa o. Asogo odoktak poluk, e zaitun ano mo’gulogulat e,
Hat nis nonue ’gainat erinok o, oluk mo’gulogwiam e, 9at e zaitun ano en e,
An na’bosu pam, Allah hau weriselat, aphwami hau warenebiselat, tuagoluk ne’gen ikhasu a’ge ano, ikho erlakma en mo oluk, an his honue ’gain nonuk logo a’ge om nebit o, oluk egei. 10Asogo osoam e, is e ebano en e, e ara disogoat mo’guligisa,
Hat e ara yuat nis nonue ’gain onuk logo a’ge erinok o, oluk mo’gulosoam, 11at e ara en e,
An his honue ’gain nonuk logo a’ge eiktik e, ne’gen oduk op a’ge eselegi a’ge ai, u erlakma en mo oluk, an his honue ’gain wolom e, nebit o, oluk egei. 12Asogo egeimu, is e ebano en e, e anggur mo’gulogulat e,
Harat, nis nonue ’gain honuk logo a’ge erinok o, oluk mo’gulogwiam, at en e,
13An his honue ’gain nonuk logo a’ge omtik e, ne’gen ikhasu legi a’ge ai pam enaik mu a’ge enebam enagaisogo takpasulat, aphwami enebam enagaisogo takpasulat, taga legi a’ge ai egesu erlakma en mo u mia o, oluk egei. 14Asogo egesa ai en, is e ebano ’berlek en e, at e molip ’gela’ge orlok a’ge ebano mo’gulogulat e,
Harat nis nonue ’gain honuk logo a’ge erinok o, 15oluk mo’gulogwiam e, at en e,
An his honue ’gain nonuk logo emagoluk, henede pam en demat ediknobuogoluk egep holuk e, an neragam a’geat ’gu manis o. Asogo a’geat de, ’guom henebit holuk e, an ne’gik orlok a’bik a’ge yema en odouk magale libagalat e, e ’ge’bik ’gela’ge edip lok o Libanon yema daintak welago a’ge ’berlegat odouk en nouwa o, oluk egei,” oluk ebam elitsogo mo’gulentesi.
16At Yotam en asogo mo’gulentesirik, aphwami Sikhem a’ge ebano wene mesik disogo mo’gulentesi,
“His en Abimelekh honue ’gain welemagoluk edikpegep ai, demat hegitsogo tigep no? An naik Gideon eiyagai enemin enebaget tigep ai tagonobo a’geat tigep no? An naik ai en his henebaget opsogo annisogoat taga laga ano o’go at ebaget e, obat tigep no? 17His e, aphwami Midian a’ge en tenhentarok oruakma, at en delhenebiogoluk, ebe woruogoluk togukhweat de, at en ningsogo taga laga ano henede eberip o. 18Asogo tegei a’geat de, yogodak his en e, naik Gideon eiyagai o’go ’balenebigeptik enebe 70 a’ge ’berlegat helep mesigat a’ge pam onoboluk mesigerlige perlengsogo warenebigep ai o. Abimelekh ebe re, naik omlogo, ugwe eragam a’ge en deregei epegi. Asogo a’geat de, his aphwami Sikhem a’ge en e, at Abimelekh ebe his hene’genma a’ge ai en, his honue ’gain onuk logo a’ge welemagoluk edikpegep ai o. 19His yogodak an naik Gideon eiyagai enemin, wiagap enebigep ai demat hegitsogo tigep holuk e, his Abimelekh emin welat, at ebaget his honogola henagai hogulat, his henebaget at ogola agai hasulat, togu lomup o. 20Asogo togulat, asogo tu puk a’ge togup holuk, Abimelekh ogola en odouk liplaumarik, his aphwami o Sikhem a’ge emin, Bet-Milo a’ge emin, welegep a’ge perlengsogo nasulat, ye, his aphwami o Sikhem emin, Bet-Milo emin, welegep a’ge honogola en odouk liplaumarik, Abimelekh ebe modok nasulat, tuak o,” oluk mo’gulentesi. 21At Yotam en asogo mo’gulontoluk, at ue Abimelekh ogorlok en e, hweiye o Beer lagarik welaga.
22Asogo lagarik oruakhwe, at Abimelekh en aphwami Israel a’ge tenentarok oruakma en hwerli 3 tahun welaga.
Owak longga
23Asogo tegeimu at Allah en Abimelekh is aphwami Sikhem welagai a’ge ebano enemin wimol ’balogo welemagoluk tagenebesimu, is aphwami Sikhem welagai a’ge ebano en e, welat-welat ap Abimelekh eniak eseiat lagak holuk mo’gulogu legesa. 24Asogo takpoluk, At Allah en tagenebesi ano re, ap Yerubaal ogulat Gideon ogul a’ge ano eiyagai enebe 70 a’ge Abimelekh en wusogo enebasulat, ye, o kota Sikhem welagai a’ge en at arilak wat onobuak oluk, lethogulat, tegisa ai pam ena’gulmu enebe werak enemep enare Abimelekh emin is aphwami Sikhem a’ge emin en ebam welemagoluk tagenebesi. 25Asogo tagenebesimu, is o kota Sikhem welagai a’ge ebano en ap Abimelekh osi enemin ogo wagolom no oluk ado dom-dom yat a’ge petne aphwami lak wak ogwi hwia oluk enil wolomogoluk, enebogese ma, aphwami wagaiam e, enebe tenak onoboluk ena’ge nak delhorlogulat legesa a’geat de Abimelekh osi enemin holuk nage enemin il ’belak welegesa.
26Agauwa ai erlige ap Ebed omlogo Gaal ano arilak enemin, o kota Sikhem eba welemagoluk wagaiam is ap o Sikhem welagai a’ge ebano en, demat wegesa epegesa. 27Asogo opogukhwe is ap ebano yabuk yogoma ebano legesarik anggur e’gen ’balogo odoksogo a’bosu ne’gak poluk onogola enagai pam Seni sogo poluk enasua owi werikmu ’goluk so’boru no’gulat, anggur a’bosu no’gulat, asogo tugulat Abimelekh hweim yero’gwik pegesa. 28Asogo hweim yaro’gwik pogulat, ap Ebed omlogo Gaal ano en ap Abimelekh emin, nis ap Sikhem a’ge emin, ai salak de, oluk, nis eneragam wolom epegep? At Abimelekh ano re, ap Yerubaal omlogo? Ye, at ebalema wene egesa ano re ap Zebul ano? Sogoatma re, at Sikhem aik ap Hemor a’ge eneragam welege ani o. Asogo wolom op at a’geat de, ap Abimelekh eragam nis no’gosogo wolom? 29Asogoatma re, di aphwami yu aphwami o kota yema oruak a’ge yu an noyukmu wellepma en e, an en Abimelekh erlagapsogo payogoluk mo’guleselat, hosi segen eiye a’ge nemin-weim obuok oluk ’guma ai oluk mo’gulnetlip, oluk mo’gulesi.
30At Ebed omlogo Gaal mo’gulesi ano ap Zebul o kota eiye welago a’ge ano en esa’go hwelegeirik, olot het aga. 31Asogo olot her agarik, ap Abimelekh o Aruma oruakma wene wusogo perakpasulat, “Ap Ebed omlogo Gaal ano arilak enemin o Sikhem ’Gu egerik hat hemin hwerli tuak oluk, o kota yema welagai a’ge enede gagalogwi ai o. 32Asogoatma re, hat emin, hat harilak enemin, welegei a’ge eba emin o huba’goat waga loroguptik, yabuk yogoma eba emde ’belakpoluk hisakho gagalak wolorogupmu re, 33O hubet mo il owan liplau wagokhwe kota yema onowi pam hutla ’gogwi holuk Gaal emin, at osilak emin, henemin weim obuok oluk liplai lagai holuk e, hat en epasu legen a’ge ano hegitsogoat tagonobomup o,” oluk mo’gulesi.
34Mo’gulesimu, at Abimelekh ano osilak enemin, ’gerelak enebe 4 pamat takpoluk, huba’goat o Sikhem ebano emde ’belakpoluk mo lau wegesa. 35Asogo mo lau wegesarik, ap Ebed omlogo Gaal ano we wongat ebela pam liplau waga lagarik, o kota ’goduk ’gwi lagaimu erianoat, edik welat, Abimelekh osi enemin hisogoma eriano en liplau wagaimu il yerentesi. 36Ap Gaal ano en e, Abimelekh osilak enemin liplau wagaimu il yerontoluk, ap Zebul ano mo’guleselat, “Aphwami a’bigat dom pam en buagai a’ge eba hil yet entemin o.” Mo’gulesimu, at Zebul en e, ai re aphwami ’buagai erlak o. “Ai re, dom arogun de, hegen o.”
37Mo’gulesimu, at Gaal en, “Erlak o. Ai re, aphwami a’bigat ’gwiang lok orluk takma dom pam en ’buagalat, ye, ap mesik logolak a’ge e teno ai ebam nin wo’gwi agema re ap edip o’gwe wagai ai hil yet entemin o edip o’gwe hi wok-wok wagalat togumu re is wagai togwi ai hil yerentemin o. 38Asogo osoam e, at Zebul en at mo’guleselat, ap weneane eselat, ap Abimelekh ai ta de nis at eragam wolom, a’ge oluk, egei ano re ’ge o? Hat en mi-miarak pegen yu erlak no? Yuatma re, yogodagat hemin, weim ebit o.” 39Mo’gulesimu, aphwami o Sikhem welagai a’ge enil oruakhwe ap Gaal Abimelekh e’birek weim ebigisa. 40Weim obogulat, at Abimelekh ano inagarik muk onoboruk warenebil-enebil o kota ’goduk ’gwi lagaimu eriano hwerli at onobou waga. 41Asogo onobou wagarik, ap Abimelekh ano owi o Aruma mo lai lasukhwe, at Zebul ano en ap Gaal emin, at arilak enemin, ’berlegat o Sikhem yema his wolorogup erlak o, oluk, mukho lebik enebesi.
42Lebik enebesimu, loruk a’gwe aphwami Sikhem a’ge ’berlegat yabuk yogoma legesa. Legesarik wene ano ap Abimelekh mo’gulesi legesema, 43Osi ebano enebe 3 hwerli a’ge polik poluk yabukmu lagaimu hisaklau wegesarik odoktak welat, is aphwami ebano o kotama en liplau wagaimu hwiak enebegisarik inotluk e, aphwami Sikhem a’ge ebano enebe a’bigat wusogo onobogulat, 44Abimelekh ano osi logolak a’bigat enemin o kota ’goduk ’gwi lagaimu eba inlau wegesarik warenebil lagalat, ye, is ’biren logolak a’ge ebano en e, aphwami a’bik logolak yabuk yogoma oruak a’ge ebano enogo is ap pema aphwami o Sikhem a’ge wusogo onobogulat, tigisa. 45Ap Abimelekh ano en o agauwa mesik dakha egei a’ge ano pamat, aphwami ai warenebil lasulat, o eba moluk-melaktak pasulat, aphwami o kota ede’burl welagai a’ge ebano wusogo enebasulat, tegeirik, mayu nak tak suam o kota ano wiak aga yorogwimu no oluk, mayu nak nasu laga.
46Ai tegei ano re, is aphwami o Sikhem a’ge o kota Sikhem eba o yit-yat a’ge werikmu welegesa a’ge ebano-en enesa’go hweligisarik enasua El-Berit erliktugumu eragam ’gwiang erang takpegesema ebano hisak la’gwigisa. 47Hisak la’gwigisarik odoksogo oruak o, oluk ogwi ano at Abimelekh esa’go hwelegeitik,
48Abimelekh osilak enemin, dom Salomo pam ligegesarik, Abimelekh en ’besie wik-wok e e’gik ’balogo um pam wesirik osi enemin laga a’ge ebano mo’gulentasulat, “An tishokhwe hegep yu, gela’ge his asogoat perleneat tip o.” 49Mo’gulentesimu, at osilak ebano enebe hun-hun e e’gik ebano ’balogo wogu legesarik, Abimelekh emin wegesa. Asogo wegesarik e e’gik ’belak a’ge ebano ’gwiang duelak pegesema ebano emdema aphwami ena’gul ’gela’ge ano eriayat ukpegesarik odouk ’gwialogo pegesema, aphwami o kota Sikhem yit-yat a’ge werikmu welegesa a’ge ebano hwami emin, ap emin enebe 1.000 a’ge ’berlegat waregesa.
Hwe a’ge en Abimelekh weregei wene
50Pobuk emin Abimelekh ano Tebes yat legesarik sebeli ’guok oluk o kota ano enebe mesik-mesik wale’gik poluk, mesik erlige ’gogulat sebelak pagathorloluk den egesa. 51O yit-yat anni modok lok a’ge anni o kota ede ’burlmu werik oruakma hwami emin ap emin, o kota ebano a’ge ’berlegat pungtak o ebano ’gwi legesarik, ’goduk kunci annisogo lerak poluk o yat werik a’ge ano o’borl pam holi’bo ebano ligegesa. 52Ligegesarik oruakma, at Abimelekh ano lagarik, o yit-yat lok werik a’ge ano odouk norlik paik oluk ’goduk ’gwi lagaimu horok lai lasuam e, 53#2Sam. 11:21helep o’borl pam poluk gandum agap e’gen wogwi a’ge ano a’ge hwe mesik en wik-wok ap Abimelekh ano a’gul pam ’bo pasuam e, a’gul ano harloksogo laga. 54Asogo harlok egeimu, at Abimelekh, ano en e, ap at ua’gun woluk noso a’ge ano mo’guleselat, aphwami en Abimelekh ano hwe a’ge en weregei o, oluk oguno, oluk hat en perleneat watnebin o, oluk mo’gulesimu ua’gun ano pam damuksogo wusogo pesimu ebe arat waraga. 55Werak pasuam waragokhwe, aphwami Israel a’ge enil arat hegesarik, enematek lo’bok onowi welagai o’gwe hun lo’bok ’bogoligisa.
56Asogo aga ano re, ap Abimelekh en aik wiagap pasulat, arilak 70 pam warenebegei o’go at Allah en Abimelekh ano weriselat, 57Ye, is ap Sikhem a’ge wiak togu legesa o’go Allah enat tagenebasulat, tegei. Asogo tegei ano re, ap Yerubaal omlogo Yotam en hweim pesi ano pam hegit aga o.
Currently Selected:
Hakim-hakim 9: Wul
Highlight
Share
Compare
Copy
Want to have your highlights saved across all your devices? Sign up or sign in
