Hakim-hakim 8
8
Aphwami Midian a’ge mabenap onoboluk warenebigisa wene
1Aphwami Efraim a’ge asogo wegesarik Gideon disogo mo’guligisa,
“Hat en ap Midian a’ge warenebigoluk wagalat, nis mo’gulnonto erlakma en wegen eba re! Nis asogo taknenebegen ai nopaget,” oluk at Gideon wene wiaksogo yagegisa.
2Asogo wene yagegisema, at Gideon en e, disogo mo’gulentesi,
“An en tegis a’ge ai, his en tigep a’ge ai emin walhoma re, an en tegis a’ge ai modok mia. Logo re, erlak o. An nosi ’berlek en a’bigat tigisa a’ge ai mia a’geat de, his en wei nak tigep a’ge ai nak e, modok logo ’gela’ge o. 3#Mzm. 83:11Holuk e, at Allah en aphwami Midian a’ge onuelak enebe ’biren Oreb emin, Zeeb emin, his hene’gik pam pesimu re, enebe his en warenebigep a’ge ai, an en tegis a’ge paget hau wusogo watnobu epegep a? Erlak o. We, hisat hau wusogo erlikhonobu o,” oluk mo’gulentesi. Asogo mo’gulentesimu onolot het ano erlak aga.
4Ai erlige re, at Gideon osi enebe 300 ebano enemin e, ik Yordan pageat ’balogo libegesarik, enanni erlak aga a’geat de, eneselei a’ge mugonoboluk modok legesa. 5Asogo legesarik hwerli o Sukot lai legesa. Legesarik, at Gideon en aphwami o kota eba a’ge disogo mo’gulentesi,
“An nosi enanni erlak agokhweat, ap Midian a’ge onuelak ’gain ononuk logo a’ge Zebah emin, Zalmuna emin, mugonoboluk modok waga lege ai en e, so’boru weisogo logon wogentemit o,” oluk ’gonu mo’gulentesi.
6Asogo mo’gulentesimu, is aphwami o Sukot eba a’ge onuelak ’gaindek en e, disogo mo’guligisa,
“Ah! His en ap Zebah emin, Zalmuna emin, owan tenento erlakma en welegep a’geat de, so’boru ’gonu mo’gulnentigen ai, ebe nopaget hosi so’boru wogonto. Mia o,” oluk mo’guligisa.
7Asogo mo’gulegisema, at Gideon en e, disogo mo’gulentesi,
“Op mo’gulnigep. Pobuk naik ’gain Onuk Logo a’ge en ap Zebah emin, Zalmuna emin, an ne’gik pam poma, mabenap paik holuk e, an en his ’go’bu obotut a’ge orlok a’ge o leimu welago a’ge pam lagal’bisok ’go’bu wathonobou weik o,” oluk mo’gulentesi. 8Asogo mo’gulontoluk, ’bekhit lasu lagarik, hwerli o Pnuel hwerli lai laga. O eba en ogo re, so’boru osi enebaget ’gonuat egei. Asogo ’gonu egeimu is aphwami Pnuel a’ge en is aphwami Sukot a’ge en mo’guligisa a’ge hegitsogoat mo’guligisa. 9Asogo egesa ai en e, at Gideon en disogo mo’gulentesi,
“An selangsogo loluk pobuk togolik weik epasu legi o. Holuk e, ai erlige an wagalat, o kota yema o yat helep uak louk-louk werik a’ge moluksogo hwikhaik o,” oluk mo’gulentesi.
10At Gideon en asogo mo’gulentesi ai erlige re, at Zebah emin, Zalmuna emin, onosi tentara a’ge esan logolak onowi o leimu mo orlu ago hegit eba a’ge naduk esan logolak wegesa a’ge ebano, is Israel a’ge en enebe 120.000 pam warenebegisema, we, 15.000 ’gela’ge nak egesarik o onuk Karkor legesarik welegesa. 11Asogo oruakma, at Gideon ano ene’berligat lasu lagarik e, o Nobah emin, Yogbeha emin, eba abel mo porlu ago hegit, o leimu aphwami enebe erlakma eragam o’gwe, selei a’ge ebano,
“Arat wege o,” oluk wongat oruakma enebam libaga. 12Asogo enebam libagalat, ap ’biren aphwami Midian a’ge onuelak ’gain ononuk logo a’ge Zebah emin, Zalmuna emin, ano hweiye ’bekhit libegesema mugonoboluk loluk tenagenebesi. Asogo tenagenebesimu, onosi tentara a’ge esan logolak ebano enede erlak agarik onogorlok agama ’bogoligisa.
13At Gideon weim asogo toluk togolik wagalat, ebela o Heres lagai o’gwe waga. 14Wagalat, ap souwe a’ge o Sukot lasumu tenak pesi. Tenak pesirik,
“Aphwami Sukot a’ge onuelak ’gain ononuk mo’gulnemin o,” oluk mo’gulesimu ap ano en e, ap ’gain enebe ’berlegat 77 a’ge ononuk lo’bok odo ’balogo Gideon wogesi. 15Asogo wokho wogesimu, at Gideon en aphwami o kota Sukot a’ge onuelak ’gain ebano ene’bek wagarik e, disogo mo’gulentesi,
“An en Zebah emin, Zalmuna emin, owan tenonobu erlak ai en, his en e,
Hat lethio nenebit o, oluk egep ano erlak no? Demat egep a’ge ano henede eberagat welegep o. Asogo egep ai erlige re, an nosi so’boru modok nele en enanni erlak agama oruakhweat de, his en e,
Hat hosi so’boru wogonto nenebit o, oluk egep ebano re! Asogo a’geat de, yethemit! Ap Zebah emin, Zalmuna emin, ebano enebe yema o,” oluk mo’gulentesi. 16Asogo mo’gulentesirik, ’go’bu orlok a’ge emin, orlouk a’ge emin, o leimu welago a’ge wesirik, aphwami o kota Sukot a’ge onuelak ebano lagal’bisok ’go’bu pam puk-’baksogo warenebegei. 17Asogo warenebegeitik, o Pnuel ogo asogoat, o yat helep uak louk-louk werik a’ge ano moluk-melakhasulat, aphwami o kota eba a’ge ap holuk enebe ’berleksogoat warenebiselat, tegei.
18Asogo tegeirik, pobuk Zebah emin, Zalmuna emin, disogo mo’gulentesi,
“His ap o Tabor en warenebigep ai onorogole no’gorak a’ge warenebigep,” oluk hin wogentesimu, is en e,
“Onorogole re, hat hemin hegit, ap ’gain ononuk logo a’ge eneiyagai ’gela’ge warenebige o,” oluk mo’guligisa.
19Asogo mo’gulegisema, at Gideon en e,
“Eba re, an nosilak nuelak o. Nenia mesigat en daknenebegei a’ge de, warenebigep o. His en is ai warenebelip erlakma, an en ogo re, naik ’gain Onuk Logo elaluk modok welago a’ge onuk ho’buk ’balogo,
His wathenebik erlagat o, oluk mo’gulhentele o,” oluk mo’gulentesi. 20Asogo mo’gulentesirik, Gideon omlogo naduk a’ge onuk Yeter disogo mo’gulesi,
“Ap ’biren ya hat en warenebin o,” oluk mo’gulesi a’geat de, at Yeter ebe malik owan ai en e, warenebiogoluk ’garok lisogo wo erlakma en e, ogorlok en mo egei.
21Asogo mo egeimu, is ap Zebah emin, Zalmuna emin, Gideon disogo mo’guligisa,
“Yogo. Hat hebe abat holuk e, hat hu’gwarek he’gik enat watnonobogunmu re,” oluk mo’guligisa. Asogo mo’gulegisema, at Gideon en is warenebegeitik e, aphwami enalli a’ge wogwi ’gela’ge, onuam unta alli a’ge wam iak ’gela’ge a’ge o’gorlop pam erlelik welaga a’ge ’berlegat wesi.
22Asogo wesimu, is aphwami Israel a’ge en e, Gideon disogo mo’guligisa,
“Hat en e, nis aphwami Midian a’ge en ene’gik pam sennentarok oruakma, delnenebigen ai en, hat hebe nis nonue sennentarok woloroguntik e, homlogo en sennentarok welemarik, pobuk at omlogo heba en sennentarogat welemak o,” oluk mo’guligisa.
23Asogo mo’gulegisema, at Gideon en e, disogo mo’gulentesi,
“Asogo erlak o. An his honue welat, tenhentarok weleik erlak o. Ye, an nomlogo ogo, his honue ’gela’ge welat tenhentarok welema erlak o. We, Nenaik ’gain Onuk Logo a’ge en tenhentarok welema o,” oluk mo’gulentesi. 24Asogo mo’gulentesirik, wene mesik disogo mo’gulentesi,
“Asogo a’geat de, an en wene mesigat nak ’gonu mo’gulhentaik. Neneselei a’ge enalli a’ge enesa’go pam erlelik a’ge wegep a’ge ai, henebe ’berlek en an nak woknosu manis o,” oluk mo’gulentesi. Asogo mo’gulentesimu aphwami Midian a’ge enebe Ismael a’ge oluk e, enalli a’ge emas a’ge asogo enesa’goma a’ge erlelogumu erlelik oruakma wegesarik oruakma re, asogo ’gonu egei ai o.
25Asogo mo’gulentesimu, aphwami Israel a’ge en e, disogo mo’guligisa,
“Op o. Nis nonogola op pam en hat wokhomul o,” oluk mo’guligisarik, sum kain demigisarik en, enebe lo’bok eneselei a’ge enalli a’ge enesa’goma a’ge wegesa a’ge modok odoksogo pou wegesa. 26Asogo pou wogigisa ai, we, enalli a’ge emas enesa’goma a’ge nak e’gin e, 20 kilo om a’ge ’gela’ge aga. Enalli a’ge logon ono’gorlopma wantak a’ge emin, sum onorogole wibe’gen werak a’ge ’gela’ge ap ’gain ononuk logo Midian a’ge en ’buktak welegesa a’ge emin, onuam unta alli a’ge o’gorlop pam wantak a’ge emin, emin e’gin walho erlak. We, emas a’ge enesa’goma erlelogwi a’ge ai nak walhesi. 27Asogo wogosu egesema walhesirik, at Gideon en emas ai a’ge dogwi asua mesik weregeitik, at owi Ofra eba pesi. Asogo wusogo pesimu aphwami Israel a’ge enede dogwi asua ai pam he’berik poluk erliktogulat, Allah ebe memerak poluk welegesa. At Gideon asogo tegeimu asogo togu legesa ai pam, at Gideon eiyagai enemin ’baik herle pogwiam ’gotnok oso ai ’gela’ge ’gotnok egesa ai o.
28Aphwami Israel a’ge en aphwami Midian a’ge arat mabenap enebegesema, is en pobuk enanni om a’ge modok erlak aga ai o. Asogo tigisarikmu, at Gideon en aphwami Israel a’ge tenentarok welat, ebe elaluk pam op modok weim erlak lioksogo welat 40 tahun welegesa.
At Gideon ebe waraga wene
29At Gideon weim asogo oboluk, at owi pam togolik wagarik ebano welaga. 30Eba welat, ugwami modok a’bik ai en, eiyagai ap enebe re, 70 welegesa. 31Ye, ugwe eragam a’ge o Sikhem welaga. Welat, at en emalik ap mesik deregeimu, aik en onuk e, Abimelekh tualegei. 32Asogo dagenebegeitik, Yoas omlogo Gideon en ebe umur arat sebal agarik mip otluk e, waraga. Asogo waragama, at ebe werak e, aphwami ena’gul onuk Abiezer a’ge onowi kota o Ofra Gideon aik Yoas sebeligisema ebanoat ’gwiang ’balogo sebeligisa.
33-34At Gideon ebe waragarikmu re, aphwami Israel a’ge Nenaik ’gain Onuk Logo a’ge emin hwedik welegesa erlak. At Allah en eneselei a’ge, is eneragam o’gwe welegesa a’ge en waronobuogoluk togumu delenebise laga a’ge ano pam he’berik welat erliktu pukmu en ukpoluk,
Nenaik onuk Baal-Berit ebe aiyat o, oluk onodogwi wusogo pagathorloluk, enede ai pam he’berik poluk erliktogu legesa. 35Asogo erliktogulat, at Gideon elaluk welaga pam aphwami Israel a’ge tenentarok welat, obap enebise laga a’ge ano o’go, is en at Gideon eiyagai obap onobogu legesa modok erlak.
Currently Selected:
Hakim-hakim 8: Wul
Highlight
Share
Compare
Copy
Want to have your highlights saved across all your devices? Sign up or sign in
