Hakim-hakim 7
7
At Gideon en aphwami Midian a’ge mi-miaragonoboluk warenebegei wene
1Asogo hesirik, pobuk agauwa mesik erlige re, at Gideon osi ’berlegat enemin huberat sialogo legesarik, aphwami Midian a’ge dom More edipmu do’goma ebano onowi sum owi wosu egesarik, ik Yordan elaruk hegit oruakhwe, is Gideon lak ik o’but akhit, ik mesik onuk Harod elarukmu eragam erabu akhit o sum owi wesi legesayat.
2Asogo wesi legesema, at Nenaik ’gain Onuk Logo a’ge en Gideon disogo mo’gulesi,
“Hat hosi enebe modok a’bik ai nogorlok o. Pobuk enanni emarik onogola en e,
Nonu’gwarek nenanni pam nenanni ege, oluk enede opoluk, an erliknobu erlakma en mo u ai en e, his henebe a’bik disogo oruakhwe, aphwami Midian a’ge hene’gik pam po ai nebit o. 3#Ula. 20:8Holuk e, hat hosi wene disogo mo’gulentemin o,
Ap sa ogola en,
Nogorlok o, epasu holuk e, perlene-perleneat dom Gilead yema ukpoluk owi pam lo yo, oluk mo’gulonto yo,” oluk egeimu mo’gulentesi. Asogo mo’gulentesimu, aphwami enebe 22.000 togolik wegesema, enebe 10.000 nak mo egesa.
4Asogo mo egesema, at Nenaik ’gain Onuk Logo a’ge en e, Gideon disogo mo’gulesi,
“Hat hosi yema enebe a’bigat o. Holuk e, hat hebaget an en degelhaik en e, ik olomu wogonoboluk lak o. Asogo wogonoboluk lasuam an en e,
At yu hat hemin lu o, oluk mo’gulheik holuk e, elirat lo yo. Asogo a’geat de, an en,
At yu hat hemin lagup erlak o, oluk mo’gulheikmu re, louwa erlagat o,” oluk mo’gulesi.
5-6Asogo mo’gulesimu, at Gideon en ap ebano wogonoboluk e, ik olomu lagama, at Nenaik ’gain Onuk Logo a’ge en e, disogo mo’gulesi,
“Ap eba ik mene emage en nasu ’gela’ge, ene’gik pam ’gwesiak-’gwesiak no’gwi holuk, is onodogorlu sisogo welat nouwa a’ge holuk degelogo enematekma onobomup o,” oluk mo’gulesi. Asogo mo’gulesimu, asogo no’gumu ’gwelagentesi ’gal e, aphwami enebe lok akhit e, ik ondogorlu pam welat ne’gesema re, ik ene’gik en ’gwesiak-’gwesiak ne’gesa a’ge re, we, enebe weiyat 300 nak aga.
7Asogo agama, at Nenaik ’gain Onuk Logo a’ge en Gideon disogo mo’gulesi,
“Ap enebe 300 ene’gik pam en ik ’gwesiak-’gwesiak ne’gesa a’ge yu pam en, an en hat delhebiselat, aphwami Midian a’ge he’gik pam paik o. Holuk e, ap pema akhit eba onowi lo’bok louwagoluk, togolik peragenebemin o,” oluk mo’gulesi. 8Asogo mo’gulesimu, at Gideon en aphwami Israel a’ge pema akhit ebano ’berlegat togolik peragonobou wagalat, enebe 300 eriano nak ugenebasulat, tegei. Asogo peragonobou wagokhwe, is ap enebe 300 ebano en e, is ap togolik wema a’ge ebano onso’boru ebela pam en no a’ge emin, ene’bi’gong iak lok a’ge ano a’ge emin, wegesa. Is aphwami Israel a’ge o sum owi werik poluk welat, asogo tigisa ai erlige re, ap Midian a’ge onowi sum owi a’ge wusogo is Israel a’ge enabel opma’gwe do’goma eba oruakhwe tigisa.
9Asogo peragonobou wagarik, nogo ogumu hup at Nenaik ’gain Onuk Logo a’ge en Gideon disogo mo’gulesi,
“Gideon. Hebe sialogo inoroguntik e, aphwami Midian a’ge onowi sum owi werikmu enebam liborogun en e, ’bin o. Asogo ’bisoam, an en aphwami Midian a’ge he’gik pam paik o. 10Asogo a’geat de, hogorlok ’gela’ge ago holuk, heragam a’ge ap onuk Pura yo’go poluk e, emin heneselei a’ge onowi sum owi werikmu ’bi lu o. 11’Bi lagupmu re, heneselei a’ge eniak ogumu hesa’go hwelak poluk eriayat hogorlok erlak oroguntik, hebabut e, enebam libom a’geat ema ani o,” oluk mo’gulesi. Asogo mo’gulesimu, at Gideon eragam a’ge onuk Pura emin eneselei a’ge onowi sum owi werik a’ge eneragam horoksogo ’bigisa. 12Eba ’bigisa ’gal e, aphwami Midian a’ge emin, Amalek a’ge emin, aphwami logon onowi o leimu mo orlu ago hegit eba a’ge emin, ebano enebe ho’bukhak odoktak welagai ai ’gela’ge enebe do’goma eba dalogol-yalogol welegesa. Ye, onuam unta re, modok a’bik ik al ik esa’go’gwe welago ai ’gela’geat welegesa.
13Asogo oruakma, at Gideon eba ’begei ’gal e, is aphwami Midian eba a’ge mesik abi hesi a’ge are mesik disogo mo’gulosoma, at Gideon esa’go hwelegei,
“An nabi re, roti mesigat a’geat lebilogo re, nis nonowi sum owi werikmu ’bu agarik e, o sum owi mesik pelanghai lasuam e, o sum owi ai modok lebaksogo ’gwiangma modok ’bi laga hegi o,” oluk mo’gulesi.
14Asogo mo’gulosoma, at are ano en e,
“Eige! Nogorlok o. Hat habi ai ebe re, ap Yoas omlogo Gideon Israel a’ge ano e’garok woluk ’buom a’ge hegen o. At Allah en nis ap Midian a’ge nonosi tentara a’ge ’berlegat nenemin, at Gideon e’gik pam pesimu tua a’ge paget hegen o,” oluk mo’gulosoma, at Gideon esa’go hwelegei.
15At Gideon en, ap ai abi hesi a’ge are ai mo’gulosoam, at en e,
“Ebe disogo a’ge paget hegenma o,” oluk mo’gulesi a’ge esa’go hwelegeirik e, odogorlu pam hweriogo welat Allah erliktegei. Asogo erliktoluk, togolik aphwami Israel a’ge onowi sum owi werikmu ebano orlu agarik e, disogo mo’gulentesi,
“Nenaik ’gain Onuk Logo a’ge en ap tentara Midian a’ge weim obouogoluk wegesa a’ge ai, nene’gik pam arat pesimu oruak o. Holuk e, inemis o,” oluk mo’gulentesi. 16Asogo mo’gulentesirik, osi enebe 300 ebano esan henagan pam pulogo enebesi. Asogo enebesirik, ’bi’gong iak lok a’ge ebano mesik emin, sogoluak ebe ’gwiang a’ge de, hele’gik a’ge esaga ’gwielak ogola yagarak a’ge mesigat emin, enebe lo’bok wogentil laga. 17Asogo wogentesirik, disogo mo’gulentesi,
“Nis aphwami Midian a’ge onowi sum owi werikmu hwerli pam ’bi lultik e, henil an nebam opsogo welat, an en mesik tikmu re, his en ogo asogoat tip o. 18An nebe emin, ap esan an nemin lul a’ge emin, ’bi’gong iak ing hulmu re, his ogo hene’bi’gong iak ing homubat o. Asogo iak inghogulat, heniak amitmit sup ogulat disogo ip o,
Nenaik ’gain Onuk Logo a’ge paget, nonue Gideon paget, libaga lege a, oluk amitmit sup ip o,” oluk mo’gulentesi.
19Asogo mo’gulentesirik, at Gideon ebe emin, osi 100 emin, o hup ede ’burl eneselei a’ge onowi sum owi werikmu siok ’belakma ebano ’bigisa. Asogo ’bigisa ’gal e, aphwami Midian a’ge pang entarok naduk enil welegesa a’ge o pam ’gogukhwe, enebalema ’get a’ge pang enebilul oluk wegesa ’gal ’bigisa. Asogo ’bigisarik o sum owi werikmu ano waling hegesarik, at Gideon osi enemin esan logolak ’bigisa a’ge ebano ene’bi’gong iak inghogulat, ige’be ’gwiang a’ge hele’gik a’ge ano sapsogo esaga heberlogulat, tigisa. 20Asogo tigisema, is ap esan ’biren logolak eriano ogo asogoat tigisa. Is ’berlegat asogo togulat, esaga ’gwialogo ene’gik hware akhit wogulat, ene’gik ’bekhit akhit ’bi’gong tenak poluk iak inghogulat, tigisa. Asogo togulat, eniak amitmit sup ogulat disogo egesa,
“Garok Nenaik ’gain Onuk Logo a’ge en a’ge, nonue Gideon en a’ge, woluk libaga lege a,” oluk eniak loksogoat egesa. 21Is ’berlegat enebe aphwami Midian a’ge onowi sum owi werikmu wali’gogo welegesa’gwe lo’bok edik welegesa. Asogo oruak en e, eneselei a’ge en weim obuogoluk wegesa a’ge ebano ’berlegat enarogun lagama eniak nga agan hweiye libegesa. 22Asogo libagaihwe, at Gideon ebe emin, osi emin, enemin ene’bi’gong iak inghogulat oruakma, at Nenaik ’gain Onuk Logo a’ge en is-is wat-wat ’buagaluk tagenebesimu, ’garok pam wat-wat til ’bogoligisa. Asogo hweiye o Zerera hegit walegat o Bet-Sita emin, o kota Abel-Mehola o Tabat horok eba emin, hweiye legesa.
23Asogo legesema, Gideon en ap ena’gul onuk Naftali a’ge emin, Asyer a’ge emin, ena’gul onuk Manasye a’ge ik Yordan etle akhit mo porlu ago hegit welagai a’ge emin, ik yu akhit mo obuksogo ’biso hegit welagai a’ge emin, yo’goat enebegesa. Asogo yo’go enebegesema, ap tentara Midian a’ge ebano mugentigisa. 24Asogo mugontogulat, at Gideon en ap Israel a’ge o Efraim dom petne di owi yu owi ’berlegat welagai a’ge ene’bek weim yo’go disogoat peragenebesi,
“Aphwami Midian a’ge ai waronobuogoluk e, henebe ’bu oroguptik e, ebela ologun o’gwe, ik Yordan emin, ik wei o’gwe ’berlegat emin, hwerli o Bet-Bara walegat eba ’gagalogo hene’gik tenak wolorogup en perleneat ’bu manup o. Asogo oruakma, aphwami Midian a’ge logon enelaluk lebema no oluk e, ’gagalak wolomup o,” oluk weim yo’goat peragenebesi. Asogo peragenebesimu legesarik, mo’gulentigisema re, ap ena’gul onuk Efraim a’ge en e, yo’go dadung legesarik, ap esan pulogo re, ebela ologun o’gwe ik Yordan olomu emin, ik wei a’ge ’berlegat emin, sebel-sebel hwerli o Bet-Bara walek ebayat ene’gik tenak welegesa. 25Asogo oruakma, is en ap Midian a’ge onuelak ’gaindek enebe ’biren. Ononuk e, Oreb emin, Zeeb emin, tenagenebegesa. Asogo tenagenebegesarik, ’gain Oreb helep pobuk onuk Oreb tualigisema eba en werigisa. Ye, at Zeeb anggur a’bosu na’gogumu pobuk onuk Zeeb tualigisema eba enat werigisa. Asogo warenebil-enebil, aphwami Midian a’ge ano mugonoboluk modok onobou wegesarik, ap Oreb emin, Zeeb emin, ena’gul ’balogoat Gideon ebe ik Yordan ’balogo libagarik, ik etle akhit mo orlu ago hegit eba oruakma wogesi legesa.
Currently Selected:
Hakim-hakim 7: Wul
Highlight
Share
Compare
Copy
Want to have your highlights saved across all your devices? Sign up or sign in
