Hakim-hakim 6
6
At Gideon en tegei wene
1Asogo welegesarik en, aphwami Israel a’ge en Nenaik ’gain Onuk Logo a’ge iak sagalogo pobuk wiak tigisayat. Asogo tigisema, aphwami ena’gul onuk Midian a’ge ene’gik pam enebesimu, tenentarok 7 tahun welegesa. 2Asogo oruakma, aphwami Israel a’ge en aphwami Midian a’ge onogorlok en owik o’gwe hisak agalat, dom petne op wolom o’gwe holuk hisak agalat, togu legesa. 3Asogo welat, yabuk wokho di a’ge yu a’ge owi yogo polukmu en, aphwami Midian a’ge emin, Amalek a’ge emin, aphwami mu a’ge onowi pam o leimu mo orlu ago hegit eba a’ge emin, enemin en waronobuogoluk ene’bek waga legesa. 4Asogo wotluk e, o sum owi aphwami Israel a’ge onowi hegit werigisarik e, Israel a’ge onso’boru di a’ge yu a’ge owi yerigisa a’ge modogat ’berlek wiagap poluk, modok hwerli aphwami Gaza a’ge onowi ik o’but hegit eba esa’go’gwe ’berlegat wiagap pogu legesa. Asogo togulat, aphwami Israel a’ge onuam domba emin, sapi emin, keledai emin, modogat horlogu legesa. Asogo tigisema, aphwami Israel a’ge di a’ge yu a’ge no’gulom a’ge modok erlak aga. 5Is aphwami ai, enebe modok esan a’bik, onuam emin, o sum owi woru a’ge emin, ’bi-’betesogo enebe ho’bukhak odoktak welagai ai ’gela’ge, modok woluk waga legesa. Holuk e, enebe emin, onuam unta emin, ene’gik wenaru modok mia a’bik wegesarik, aphwami Israel a’ge onowi pam modok wiagap pogu legesa. 6Asogo wiagap pogwiam, aphwami Israel a’ge en o’go is disogo yusogo tagonobo modok mia aga.
7Asogo mia agama, is en e, Nenaik ’gain Onuk Logo a’ge en aphwami Midian a’ge waronobuagoluk eniak loksogo ’gonu mo’guligisa. 8Asogo mo’gulegisema, Nenaik ’gain Onuk Logo a’ge en ap mesik at iak mo’gulentasulom a’ge yo’go pesirik perakpou wagama, ap ai en e, disogo egei,
“Aphwami Israel a’ge enaik ’gain Onuk Logo a’ge en e, disogo egei,
Aphwami Mesir a’ge en his eneragam a’ge ’gela’ge tenhentarok oruakma, an en delogo wokhonoboluk liplau wegi ai o. 9An en e, his aphwami Mesir a’ge en wathenebelip a’ge delhenebiselat, aphwami o yema a’ge en sebelogo honobuogoluk togumu delhenebiselat, tegis ai o. Tegistik e, his en aphwami o yema a’ge waronobuogoluk togumu, an en is mugentegistik, is onowi pam his wokhentegis ai o. 10Asogo wokhentaigoluk tiselat, naduk e, an en disogo mo’gulhentegis epegi,
Henaik ’gain Nonuk Logo a’ge Allah anat o. Holuk, aphwami Amori a’ge en, mu a’ge paget de,
Nenaik ebe yuat, oluk enede at ebam he’berik poluk erliktogwi a’ge ai, mesik erliktogup o, oluk pageat mo’gulhentegis a’geat de, his yogodak o yema is onowi pam ’gu otluk an niak hwelak poluk tu henebit o, oluk Allah en mo’gulhentesi,” oluk mo’gulentesi.
11Agauwa mesik erlige re, at Nenaik ’gain Onuk Logo a’ge en yo’go enebasu a’ge malaikat a’ge mesik e, o kota Ofra wagarik, ap a’gul onuk Abiezer a’ge, ebe onuk Yoas, agan e pei ’gela’ge edipmu hweriogo welaga. Oruakhwe, at Yoas omlogo onuk Gideon aphwami Midian a’ge en enil niouwano oluk hisogo welat, anggur e’gen a’bosu na’gogumu ebano gandum e’gen pulogo pasulat, aling holuk lebikpasulat, taga laga. 12Asogo tisoma, at Nenaik ’gain Onuk Logo a’ge malaikat a’ge mesik ano at ologotma inagarik disogo mo’gulesi,
“Hat ap hogorlok erlak hebam haro a’bik a’ge not o. Nenaik ’gain Onuk Logo a’ge emin welegep o,” oluk mo’gulesi.
13Asogo mo’gulesimu, at Gideon en e,
“An mia o, nue. Nenaik ’gain Onuk Logo a’ge demat nis nenemin welege holuk e, wene ’berlek yu nopaget nis nenebam ago no. Nis nene’balak en e,
Nenaik ’gain Onuk Logo a’ge en di a’ge yu a’ge elalin a’ge tagalat, o Mesir en woknonoboluk liplau waga erlak no? At enat woknonoboluk liplau waga o, oluk mo’gulnontogwi a’geat de, yogodak at en e, nis uknonoboluk, aphwami Midian a’ge en tenagonoboluk welemak o, oluk ene’gik pam nenebesi eba re!” oluk mo’gulesi.
14Asogo mo’gulesimu, at Nenaik ’gain Onuk Logo a’ge orogole at Gideon akhit pesirik wene yu mo’gulesi,
“Aphwami Israel a’ge aphwami Midian a’ge en tenentarok oruak ai, hat hanni yu pam delenebi lagun en, an Allah en yo’go hoboluk perakhebegi o,” oluk mo’gulesi. 15Asogo mo’gulesimu, at Gideon en e,
“Naik ’gain Honuk Logo a’ge en an nopaget mo’gulnigen. Is aphwami Midian a’ge en nis aphwami Israel a’ge sennentarok oruakma, an en elirat delonobu no? Mia o. Nis aphwami nena’gul onuk Manasye a’ge re, ap pema akhit enanni weiyat logon oruak a’geat de, ap a’gul an a’ge nak e, nenanni modok erlak o. Ye, ap a’gul an a’ge ai re, pema akhit elit a’geat de, anat modok mia o, naik,” oluk mo’gulesi.
16Asogo mo’gulesimu, at Nenaik ’gain Onuk Logo a’ge en e, disogo mo’gulesi,
“An en, hat lethiaik ai en e, hat elit o. Hat hematek a’ge ’gela’ge en aphwami Midian a’ge ai a’bigat a’geat de, mesigat a’ge en mabenap po ’gela’ge, mi-miarak onoboluk modok erlagap enebagun o,” oluk mo’gulesi.
17Asogo mo’gulesimu, at Gideon en e,
“Naik ’gain Honuk Logo a’ge en demat an nebe hebam lo’buk oso holuk e, wene ai hat ’gain Honuk Logo a’ge enat mo’gulnigen oluk an pobi tiogoluk elalin a’ge mesik tin o. 18Hat an senniarok ya oruakma, an hat hebaget so’boru logon wai laiktik woluk wokhosu agoam lagun en e, ya wolomup o,” oluk mo’gulesi.
Asogo mo’gulesimu, at en e,
“Op o. An hat togolik wagoam laik en e, ya yethiarok weleik o,” oluk mo’gulesi.
19Asogo mo’gulesimu, at Gideon togolik o pam lagarik e, wam kambing emalik ’get a’ge wusogo seriselat, tepung 10 kilo wesirik e, roti peruagoluk e’gen ogola ’gwelabogwi a’ge ’gwelebak erlakma en werariselat, tegei. Asogo tegeirik e, kambing sogo a’ge ano mul egeik a’ge ogola yagasogo pasulat, ik kambing sogo a’ge a’bosu ai panci ogola lu’gwerak pasulat, tegeirik, ’berlek ai, at Nenaik ’gain Onuk Logo a’ge malaikat a’ge mesik ano wogeigoluk ebe e pei ’gela’ge ano edipmu yetharok oruakma wogosu aga. 20Asogo wagama, at Nenaik ’gain Onuk Logo a’ge malaikat a’ge mesik ano en e, disogo mo’gulesi,
“Kambing ebesogo a’ge emin, roti emin, helep yu o’borl pam poluk e, ik kambing eminsogo a’ge a’bosu ai o’borl pam herlelik pemen o,” oluk mo’gulesi. Asogo mo’gulesimu, at Gideon en malaikat en mo’gulesi a’ge hegitsogoat tegei. 21Asogo tegeimu, at Nenaik ’gain Onuk Logo a’ge malaikat a’ge mesik ano o’bouwa’gun wesirik, ologun pam kambing sogo a’ge ano emin, roti ano emin, ebam dipsogo pesi. Asogo pasuam e, helep ano pam en odouk magale dain eselat, wam kambing sogo emin, roti emin, asogo perlengsogo ne’gei. Asogo nasuam, at malaikat ano nalaga.
22Asogo nalagama, at Gideon en e,
“Naik Onuk Logo a’ge u’gwarek emalaikat a’geat ne’bek wagama hegi,” oluk pobi tegei. Asogo pobirak poluk ogorlok agarik e, Allah disogo mo’gulesi,
“Naik Allah Honuk Logo a’ge, an hat hemalaikat a’ge mesik nemin nene’berli mesikmu yet-’ben ege ai en, nebe modok wareik hegi, naik,” oluk mo’gulesi.
23Asogo mo’gulesimu, Nenaik ’gain Onuk Logo a’ge en e, disogo mo’gulesi,
“Yuk ogun. Hogorlok erlak. Hebe warorogun erlak o,” oluk mo’gulesi. 24Asogo mo’gulesimu, at Gideon en Allah paget wam di a’ge yu a’ge narlogulomma ebale mesik hele’gegeitik, onuk disogo tualegei,
“Nenaik ’gain Onuk Logo a’ge en nenede ha’bugapnenebiso a’ge o,” oluk tualegei. Asogo ebale hele’gegeimu, domba, di a’ge yu a’ge Allah paget narlogulomma ebale ai, o kota Ofra aphwami Abiezer a’ge onowi pam eba, hwerli yogodak hwerli ogo oruagat.
25O ai erlige hup Nenaik ’gain Onuk Logo a’ge en wene yu, at Gideon tu a’ge paget disogo mo’gulesi,
“Hat haik en a’ge sapi ierak ebe op a’ge umur 7 tahun a’ge womup o. Waguntik e, hat haik en, wam, di a’ge yu a’ge, dogwi asua Baal paget narlogulomma ebale hele’gegei a’ge ano ’bulogo hwikhasulat, e daintak a’ge asua ebe hwe a’ge onuk Asyera oluk ogut walsogo wam di a’ge yu a’ge Baal paget narlogumu ano eragam daintak a’ge ano orlo’buktak pasulat, tin o. 26Asogo hwikholuk, moluksogo pagun a’ge o’borl pam e, wam, di a’ge yu a’ge an nebaget narlnogulomma ebale opsogo werip o. Asogo werik poluk, wam sapi ierak a’ge ano ebe ebesigat an haik Nonuk Logo a’ge nebaget wusogo narliknobomup o. Asogo narlnerinogoluk, e daintak asua ebe hwe a’ge onuk Asyera oluk ogut hele’gik a’ge orlo’buktak pagun a’ge ano e ’gelogo odouk narlip o,” oluk mo’gulesi. 27Asogo mo’gulesimu, at Gideon eragam a’ge enebe 10 pam pulogo yo’go enebesirik e, Nenaik ’gain Onuk Logo a’ge en,
“Disogo tip o,” oluk mo’gulesi hegitsogoat ti laga. Asogo a’geat de, aphwami at ue ari emin, o kota at oruakma eba a’ge emin, ogorlok en e, selakma o erlige tu erlak, we, hisakho huba’go tegei.
28Asogo tegeimu, aphwami o kota eba a’ge o loruk ’gela’ge hubet sialogo enil yethegesa ’gal e, wam, di a’ge yu a’ge, dogwi Baal paget narlogu legesema ebale ano moluksogo hwikhasulat, e daintak a’ge dogwi asuahwe a’ge onuk Asyera oluk ogut hele’gik a’ge ano orlo’buksogo hwikhogulat, tigisarik, ebalema re, wam, di a’ge yu a’ge Allah paget narlogulomma ebale mesik hele’gigisarik o’borl pam wam sapi ierak a’ge mesik wusogo narlik ebegesema enil hegesa. 29Asogo hegesarik, is en e,
“Yema salak en tigisa epegep,” oluk hin wil lagaiam aphwami en e, is-is nak hin wok han wogogulat,
“Ap Yoas omlogo Gideon en tegei o,” oluk egesema edip lo’boligisa. 30Asogo lo’boligisarik, Yoas disogo mo’guligisa,
“Hat homlogo en wam di a’ge yu a’ge dogwi asua Baal paget narlik obugumu ebale hele’gik a’ge ano moluksogo hwikhasulat, eragam e daintak a’ge asuahwe a’ge onuk Asyera ogut hele’gik a’ge ano orlo’buksogo hwikhasulat, tegei o. Asogo tegei ai en homlogo ebe worul en lebikpei suk o!” oluk mo’guligisa.
31Asogo mo’gulegisema, at Yoas en is Gideon woruogoluk tigisa a’ge ’berlegat disogo mo’gulentesi,
“His dogwi asua Baal akhit egeptik erlele wouwogoluk ogu legep a? Ap sa en Baal akhit ago holuk e, ebe o yogodak yu pamat worul o. At Baal ai demat ebe Allah holuk, wam, di a’ge yu a’ge at narlik obogumu ’bullegei ai en e, at u’gwarek enat erlele horlouwak o,” oluk mo’gulentesi. 32At Yoas en,
“Baal ebaget wam, di a’ge yu a’ge narlogwi a’ge ebale Gideon en ’bulogo hwikhesi ai en e, at Baal enat Gideon woruak o,” oluk egei ai en, aphwami en o ai erligeat Gideon onuk e,
“Yerubaal,” oluk tualigisa.
33Onuk asogo tualigisema, o ai erligeat aphwami ena’gul onuk Midian a’ge emin, Amalek a’ge emin, aphwami ena’gul onuk logon o leimu ik Yordan etle akhit mo yegelogo liplau wago hegit welagai a’ge emin, ’berlegat odoktigisa. Asogo odoktoluk, ik Yordan ’balogo liplau wegesarik e, onowi sum owi o Yizreel do’go eba werigisa. 34Asogo a’geat de, Allah Arogun Gideon ebam louk egeitik, ap Abiezer a’ge at oruak akhit la’buklaumagoluk ’bi’gong iak lok a’ge iak pam worlentesi. 35Asogo worlentesirik, ap logon yo’go enebesirik, weim yo’go ap ena’gul onuk Asyer a’ge emin, Zebulon a’ge emin, Naftali a’ge emin, ap ena’gul onuk Manasye a’ge onowi ik Yordan etle akhit mo yegelogo orlu ago hegit welagai a’ge emin, ik yu akhit mo obuksogo ’biso hegit welagai a’ge emin, enemin at oruak o’gwe la’buklaumagoluk yo’go ene’bek peragenebesi. Asogo yo’go peragenebesimu legesema re, is weim Gideon lethouwogoluk wegesa.
36Asogo wegesema re, at Gideon en Allah disogo mo’gulesi,
“Allah Honuk Logo a’ge naik. Hat en an mo’gulneselat e,
Aphwami Israel a’ge delonobogun en yo’go hebegi, oluk mo’gulnigen ai 37demat yo’go nebegen holuk e, ’gwiang an nebe welegimu ya re, nis en gandum e’gen hwellogumu welegi o. Holuk e, an en domba asu ’belak a’ge yu yema pegi o. O hubet ’gela’ge lil en domba asu yu pam lil tepnik pasulat, ’gwiang modok do’bon welema holuk e, an en aphwami Israel a’ge delonobuagoluk demat yo’go nebesimu hegi, oluk pobitik o,” oluk mo’gulesi. 38Asogo mo’gulesi a’ge demat asogo agama, at Gideon loruk o’gwe hubet siaksogo il hai lagarik e, a’bosu ’berelogo ige’be mesik pam emde lorop takpoluk na’gogo pesi. 39Asogo na’gogo pesirik, Allah disogo mo’gulesi,
“’Gain Honuk Logo a’ge naik. An en wene pobuk mesik mo’gulheikmu re, wene yaknorogun o, naik. An nede we’gerlogo domba asu ’belak a’ge yu pam pobuk walhaigat o. Asogo walhasuam, domba asu ’belak a’ge yu lil a’bosu en mugwap po erlakma en do’bon oruakhwe, ’gwiang nak mugwap tiso holuk e, pobitigat o,” oluk mo’gulesi. 40Asogo mo’gulesimu, o hup ai erlige Allah en, at Gideon en mo’gulesi hegitsogoat tegeimu, o loruk ’gela’ge hubet e, domba asu ano do’bon oruakhwe, ’gwiang nak e, lil en mugwap pesimu hesi.
Currently Selected:
Hakim-hakim 6: Wul
Highlight
Share
Compare
Copy
Want to have your highlights saved across all your devices? Sign up or sign in
