Hakim-hakim 5
5
Hwe Debora emin, ap Barak emin, e’birek en weni werigisa wene
1Asogo erlagap pegesarik, o ai erlige, hwe Debora emin, ap Abinoam omlogo Barak emin, e’birek en weni disogo werigisa,
2“Aphwami Israel a’ge en, onuelak heberlak a’ge enat o,
Nis weim ebi lul egesarik degelogo pegesa o.
Ap enebe ’berlek enat enede pam enat o,
Ebi lul egesa ai en Nenaik ’gain Onuk Logo a’ge o,
nis en erliktuok o.
3Nis aphwami Israel a’ge nenaik Allah Onuk Logo a’ge paget o,
weni worogu lege yu o.
His ap hononuk logo a’ge honosi enemin enat o,
henesa’go hologo welemis o.
4Nenaik o Seir en wegen o, aphwami Edom a’ge o,
onowi ukpoluk wegen o.
Wagoam ’gwiang o’borlogouk tegei o.
Moru ’bogorl pam en herlilogo ’bu aga o.
Moru o hena pam en ’gollosogo ’bu aga o.
5 #
Kel. 19:18
Nenaik ’gain Honuk Logo a’ge dom Sinai eiye a’ge o,
Israel a’ge nenaik hat Allah Honuk Logo a’ge o.
Hologotma di dom yu dom ’berlegat o’borlogouk tegei o.
6Samgar ap Anat omlogo yo, welaga eria pam o,
hwe Yael oruakma aphwami a’bik pulholuk lo erlak o.
Ebela lok o’gwe aphwami onorogole erlak o.
7Israel a’ge onowi kota,
aphwami modok enareng modok erlakma o.
An Debora wegi re, Israel a’ge enia o,
enede hwedik a’ge o.
8Israel a’ge en mu a’ge paget,
Nenaik ebe yuat, oluk o,
enede ebam he’berik pegesa o.
Erliktuogoluk ogumu onowi pam weim ’gagaletil laga o.
Ap heberlak a’ge 40.000 a’ge, ap mesigat a’ge en ogo yo,
sing ’buktak erlak, wa’gun wo erlak o.
9Ap heberlak Israel a’ge enagai enat, weim obul egesa o.
Nede o, oluk hau warenebise legi o.
Nenaik ’gain Onuk Logo a’ge nis en erliktuok o.
10His ap ’gaindek ai wam keledai ’gut a’ge o,
o’borl pam hweriogo welat no’gu legep o.
Honosum wam keledai o’borl pam demak poluk no’gu legep a’ge o.
His aphwami logon honoyuk pam no’gu legep o.
Nenanni ago a’ge wene yu mo’gulentil laga lemis o.
11Asogo mo’gulentil lagaimu,
aphwami ik omugwe pelakma welat o,
weni worogwi modok welat Nenaik ’gain Onuk Logo a’ge en,
selei a’ge mi-miarak pesimu o.
At eiyagai Israel a’ge nenanni egerik,
oluk weni worogumu enesa’go hologwi o.
O kota leget emde ’belakma, ’gong ’bilik a’ge wagai o.
12Wagalat Debora inotluk en, hat weni edip lebin o.
Abinoam omlogo Barak en, hebe sialogo inoroguntik o,
Selei a’ge, ene’gik herle wusogo yo,
wogonoboluk lak, ogwi o.
13Nenaik ’gain Onuk Logo a’ge paget, weim ebi louwogoluk o,
ap logon heberlak a’ge, waronobu erlakma en welegesa a’ge o,
onuelak ene’bek legesa o.
14Ena’gul onuk Benyamin esan logolak oruakma,
ap Efraim a’ge ene’berlik do’goma ’bigisa o.
Ap Makhir onuelak ’gaindek do’goma ’bigisayat o.
Zebulon a’ge onuelak sialogo legesayat o.
15Isakhar a’ge onuelak, an Debora enemin lege o.
Ap Isakhar a’ge ai, an Barak ne’berlik legesa o.
Neneminat do’goma pungtak ’bige, asogo a’geat de o,
is ap Ruben a’ge enebe me’gisogo yo.
Eniak hundomok egesarik lo erlakma en, mo egesa o.
16 Domba ene’gerlakma mo egesa ai nopaget mo egesa o,
Ap domba o’goniso a’ge en o domba iak pakhasuam o,
holuogoluk mo egesa hwi a o.
Is ap Ruben a’ge enebe me’gisogo yo,
eniak hundomok egesarik lo erlakma en mo egesa ai re.
17Is ap Dan a’ge ogo onoso pam hweriogo welat mo egesa o.
Ai ’gela’ge Gad a’ge ogo ik Yordan ik etle akhit mo egesayat o.
Ap Asyer a’ge ogo onowi laut eba esa’go’gwe en o,
liplailo enebit en o.
Ono’borlogouk erlagat mo egesa o.
18Asogo a’geat de, Zebulon Naftali nak o,
duk pam ligegesarik onogorlok erlak ebigisa o.
19Ap ’gain ononuk logo a’ge,
o Taanakh Megido ik olomu o,
horok eba obogu legesa o.
Is ap ononuk logo a’ge ai onowi Kanaan a’ge o,
legesarik enannisogo ebigisa o.
Asogo ebigisa a’geat de, hogul ’gogulat uang perak a’ge o,
mesik modok wo erlak o.
20Asogo obugukhwe is hwesagal ’bogorl pam o,
erabu lagalat, ap Sisera woruogoluk o,
is en weim enemin ebigisayat o.
21Ik Kison ai paget onuk page enat ogwi a’ge o.
Ik ebe lok wagalat selei a’ge wogonoboluk laga o.
An nannisogo lasu leik, norogole dikhum lasu leik o,
oluk nesa’go werise legi o.
22Ap enanni oruak a’ge weim hweiye louwogoluk o,
ono kuda pelang hogwiam o.
Oyuk o’borlogouk dung-dung laga o.
23Is ap Meros a’ge Nenaik ’gain Onuk Logo a’ge oruak o’gwe o,
enannisogo ebilo erlak o.
Is mo egesa ai en at malaikat Allah a’ge en o,
Allah en hweim onobuak, oluk mo’gulentesi o.
24Ap Heber Keni a’ge at ugwe Yael ai o,
hwami o sum owi werikmu, Allah en is logon o,
weiyat obabenebiselat at hwe Yael ai nak o,
loksogo obap pouwak o.
25Sisera en ik ’gonu egei, asogo a’geat de o,
sapi agamu a’bosu wogesi o.
’Gain ononuk logo a’ge ige’be pam,
susu a’ge na’gogo wogesi o.
26At hwe Yael en e e’gat ’gabelik a’ge o,
martelu emin wesi o, Sisera dunghesimu o,
a’gul harloksogo esa’gorlem uak poloksogo yo,
at e’gik en weregeimu o.
27At ebe erle’galogo at odogorlu yo’guksogo yo,
hwe Yael oyukmu ’begeitik e, ebe ’be’gi waraga o.
28At Sisera ia en jendela ele’gwe en o,
il yethau wagalat, Sisera ’gwiangso yo,
wago erlak ai re, nopaget o.
Sisera o kuda oyuk o’borlogouk nopaget iak u erlak o,
oluk ese lagama o.
29Eragam a’ge ede ’gagalak a’ge en, wene o’go mo’guleselat o,
Sisera ia en epesi a’ge hegitsogo mo’guleselat o.
30Is hogul wegesa a’ge so’buriselat areng erlak ai o.
Ap tentara enebe lo’bok hwelani ’birendek hwi a o,
mesigat hwi a, horlogulat en, enareng erlak ai o.
Sisera osum a’gul akhit a’ge o’go a’bik a’ge wogigisa o.
Wogeselat, hat hesiong ’gela’ge aga o.
Sing pasulat, momi pasulat a’ge atnik a’ge hat hebaget pegesa o,
oluk ia mo’gulesi o.
31Nenaik ’gain Onuk Logo a’ge at Sisera werige ’gela’ge o,
aphwami hat heselei a’ge ’berlegat asogo waremak o.
Asogo a’geat de, heiyagai hede a’ge nak,
mo dialogo porlu ago ai ’gela’ge o,
is ’berlegat dakharak welemak o.
Nenaik ’gain Honuk Logo a’ge,”
oluk weni werigisa.
Asogo agarikmu en, 40 tahun weim erlak lioktak obat welegesa.
Currently Selected:
Hakim-hakim 5: Wul
Highlight
Share
Compare
Copy
Want to have your highlights saved across all your devices? Sign up or sign in