Hakim-hakim 4
4
Hwe Debora emin, ap Barak emin, togu legesa wene
1At ap Ehud ebe waragarikmu en, aphwami ena’gul onuk Israel a’ge en Nenaik ’gain Onuk Logo a’ge iak sagalogoat wiak togu legesa. 2Asogo wiak togu legesema, at nonue ’gain Onuk Logo a’ge en aphwami o Kanaan a’ge onue ’gain onuk logo a’ge onuk e, Yabin o kota Hazor welaga a’ge en mi-miarak pou wagoluk, is Israel a’ge ugenebesi. At ’gain Yabin ot heberlak weim ebiso a’ge onuk e, Sisera. Ebe o kota Haroset-Hagoyim eba welaga. 3At ’gain Yabin weim ebiso a’ge ’gwiangso ano a’ge ebe ’besie a’ge pam hele’gik a’ge 900 pam welaga. Oruakma, at en aphwami Israel a’ge 20 tahun tenentarok welat modok wik-wiak tagenebasu laga ai en, is en e,
“Nenaik ’gain Honuk Logo a’ge en delnenebin o,” oluk eniak loksogoat mo’gulogu legesa.
4Eria hegit e, ap Lapidot ugwe onuk Debora, Allah iak mo’gulentasu laga a’ge ai en, aphwami Israel a’ge wene enebam pasulat, no’gorliselat, taga laga. 5Asogo tagalat, o aphwami ena’gul onuk Efraim a’ge onowi dom petne o Rama ho’gorlak, Betel ho’gorlak, ’burl ho’gorlakma eba, e kurma mesik edipmu nin hwedik nan hwedik hweriogo welagoma ebano welaga. Asogo oruakma, aphwami Israel a’ge wene enebam a’ge, at en ’beli’gogo daktuagoluk e’bek waga legesa. 6At ebe eba welat, agauwa mesik erlige re, aphwami en ap Abinoam omlogo Barak ai, owi kota onuk Kedes, aphwami ena’gul onuk Naftali a’ge oruakma eba wene disogo mo’gulesi louwagoluk perakpesi,
“Allah aphwami Israel a’ge Nenaik ’gain Onuk Logo a’ge en hat disogo tuagoluk mo’gulhesi,
Aphwami ena’gul onuk Naftali a’ge emin, Zebulon a’ge emin, ap enebe 10.000 pam odoksogo onoboluk, dom onuk Tabor pam wogonoboluk lak o, egei. 7Eba loma, an en ’gain Yabin ot heberlak a’ge welat weim ebiso a’ge Sisera osi tentara ’gwiangso ano a’ge wik-wok wathenebigoluk ik Kison olomu eba wemagoluk ede ’gagalik o. Asogo a’geat de, hemin weim obogumu, is mabenap panogoluk he’gik pam paik o, oluk mo’gulhesi,” oluk e, mo’gulesi louwagoluk perakpesimu mo’gulesi legesa.
8Asogo mo’gulogwiam wagarik, at Barak en Debora disogo mo’gulesi,
“Hat hebe nenemin lul holuk e, an neminat lul o. Asogo a’geat de, hat mo ogun holuk e, an laik erlagat o,” oluk mo’gulesi.
9Asogo mo’gulesimu, at Debora en disogo mo’gulesi,
“Obat o. An nemin lul o. A’ge re, pobuk hat lioksogo hau wathobua puk. Erlagat a’ge re, hede eberak wolomup o. At ap Sisera ai, hwe mesik en woruagoluk Nenaik ’gain Onuk Logo a’ge en e’gikmu pouwa ai o,” oluk mo’gulesi. Asogo mo’gulesirik, at Barak emin o Kedes legesa. 10Asogo louwogoluk, at Barak en ap ena’gul onuk Zebulon a’ge emin, Naftali a’ge emin, odogenebegeitik, Debora emin lagaimu, ap enebe 10.000 pam en ene’berlik o Kedes legesa.
11Eria hegit e, at Heber a’gul onuk Keni a’ge aphwami at a’gul onuk a’ge ugonoboluk libagarik, o sum owi e pei edipmu o Zaanaim, Kedes horoksogo eba wesi lagarik welaga. (Aphwami ena’gul onuk Keni ai re, ap onuk Hobab Musa iemalhwami a’ge eba en dogoma a’ge.)
12Aphwami en e,
“Barak dom Tabor pam waga o,” oluk egesema at Sisera esa’go hwelegeirik e, 13’gwiangso ’gela’ge weim ebiso a’ge ’besie hele’gik a’ge ebe 900 a’ge ebano osi tentara a’ge esan logolak ’berlek enemin odoksogo enebesirik wogonoboluk, o Haroset-Hagoyim en ik Kison olomu wegesa.
14Asogo wegesema, at Debora en Barak disogo mo’gulesi,
“Yogo, Nenaik ’gain Onuk Logo a’ge en ebela’gwe wokhoboluk wago yo. At en o yogodak yayat hat en Sisera mabenap poluk he’gikmu pouwa o. Holuk e, lak o,” oluk mo’gulesi. Asogo mo’gulesimu, at Barak osi tentara a’ge enebe 10.000 a’ge emin dom Tabor pam en ’bigisa. 15’Bigisarik, Sisera lak waronobuogoluk enebam ligegesa. Asogo ligegesema, Nenaik ’gain Onuk Logo a’ge en Sisera ’gwiangso weim ebiso a’ge ebano woluk no’gu legesa a’ge emin, osi tentara esan mesik logolak ’berlegat emin, enebabut wongtak nak pesi. Asogo wongtak pesimu, at Sisera ano ’gwiangso pam en ’gwiangma ’bu agarik, hweiye oyuk pam ’bok waga. 16Asogo wagama, ap Barak en eselei a’ge ’gwiangso weim ebiso a’ge ebano woluk no’gu legesa a’ge enemin, tentara a’ge esan logolak ebano emin, mugonoboluk o Haroset-Hagoyim enebei legesarik e, ap Sisera osi tentara esan logolak ebano ap mesigat a’ge mesik ogo ugonobo erlakma en perlengsogo warenebigisa.
17Asogo warenebil lagaihwe, at Sisera ano weim hweiye ’boloksogo wagarik, at ap ’gain onuk logo Yabin owi Hazor a’ge ano ap Heber a’gul onuk Keni a’ge ano ue ari enemin hwedik welegesa ai en e, at Heber ugwe Yael sum owi a’ge werikmu hisaklau waga. 18At Sisera asogo wagama re, at Yael en at ebe wesirik e, disogo mo’gulesi,
“Yuk ogun, nue. ’Bekhit an nowi pam ’gwi suk o,” oluk mo’gulesi. Asogo mo’gulesimu, at Sisera ano o pam ’gwegeimu re, at hisogo welemagoluk, at Yael en sum a’ge kamar ogorlirakma ’goduk lerak welago a’ge sebelogo hisogo pesi. 19Asogo hisogo pesimu, at Sisera en Yael disogo mo’gulesi,
“An ik nele a’bik. Ik weiyat logon naik en e, woknemin o,” oluk mo’gulesimu, at Yael en e, ige’be domba agap pam hele’gik a’ge sapi agamu a’bosu ne’gak oruakma emde huthesirik, wogosoam ne’geimu re, sum kain ano togolik sebelak poluk hisogo pesi. 20Asogo hisogo pesimu, at Sisera en Yael disogo mo’gulesi,
“Hat hebe o sum owi werikmu yu, ’godukmu edik wolomup o. Asogo oruakma, aphwami logon wotluk e,
Aphwami logon ya wegesa ya? Erlak a, oluk hin wogwi holuk e,
Erlak o, oluk mo’gulontomup o,” oluk mo’gulesi. 21Asogo mo’gulesirik, at Sisera ebela en werakma no oluk e, nogo il agama nogo lebeksogo modok nogosi. Asogo nogogeimu, at Yael en martelu emin, e e’gat ’gabelik sum owi worogwi a’ge paget eba welaga a’ge mesik emin, wesirik ling-long Sisera eragam horoksogo ’gwegei. ’Gwegeitik e, at Sisera olotluk ebe ’bekhit poloksogo ’gwiang pam hodobu pesirik ukpesi. At hwe Yael en Sisera weregei e, asogo weregei ai. 22Asogo weregeitik oruakma, at Barak Sisera heratil wagama re, ebe wesirik e, disogo mo’gulesi,
“Ap hat palo til wegen ai ebe hwiakheik en e, suk o,” oluk mo’gulesi. Asogo mo’gulesimu, at Barak Yael emin ’gwigisa ’gal e, Sisera arat waragarik, e e’gat ’gabelik a’ge ano pam olotluk ’bekhit poloksogo ’gwiang pam daintak oruakma enil hegesa.
23O ai erlige re, at Nenaik ’gain Onuk Logo a’ge en aphwami Israel a’ge anni wogentesimu, is en ap Yabin, aphwami o Kanaan a’ge onue onuk logo a’ge ano mi-miaragonoboluk enanni egesa. 24Is aphwami Israel a’ge en aphwami Kanaan a’ge onue onuk logo Yabin ano mi-miarak pogwi modok welegesarik en pobuk ebe modok erlagap pegesa ai o.
Currently Selected:
Hakim-hakim 4: Wul
Highlight
Share
Compare
Copy
Want to have your highlights saved across all your devices? Sign up or sign in