Hakim-hakim 3
3
Di aphwami yu aphwami o Kanaan welagai a’ge ebano ugenebesi wene
1-2Is aphwami Israel a’ge ado emin, ene’balak wi’gal etil laga lema a’ge ebano emin, o Kanaan welat weim obogumu enemin obogu legesa erlak eneperlakma re, weim obogwi a’ge enaluk emak oluk, at ’gain Onuk Logo a’ge en enebabut ’balik oluk di aphwami yu aphwami o Kanaan a’ge enemin ugenebesi eneminat welegesa. 3Ap Filistin a’ge ononuk oruak a’ge enebe 5 emin, is aphwami Kanaan a’ge ’berlegat emin, is aphwami Sidon a’ge emin, is ap Hewi a’ge o Libanon ho’gorlak dom nak Baal-Hermon hwerli en ’bekhit, ebela Hamat lagaimu hwerli welagai a’ge ebano enemin ugenebesi. 4Is ugenebesi ano re, At ’gain Onuk Logo a’ge en e, disogo tip, asogo tip, oluk Musa ’beli’gogo mo’gulosokhwe, is Israel a’ge ene’balak mo’gulentasu laga a’ge ano is Israel a’ge ’gela’ge togumu ontul a? erlak a, oluk, enebabut ’balik oluk, ugenebesi. 5Asogo ugenebesimu, is Israel a’ge ebano re, is aphwami Kanaan a’ge emin Het a’ge emin, Amori a’ge emin, Feris a’ge emin, Hewi a’ge emin, Yebus a’ge emin, ene’gerlakma at welegesa. 6Asogo welat, is ap Kanaan a’ge enemalik hwelani ano is Israel a’ge wogonobogulat, ye, is Israel a’ge en enemalik hwelani is Kanaan a’ge eneiyagai horlouwak oluk, wogontogulat, asogo tugulat, Allah e’berlik lagai a’ge, ebalema is Kanaan a’ge enasua erliktugulat, motluk laga legesa.
Ap Otniel en tegei wene
7Is aphwami Israel a’ge ebano en At ’gain Onuk Logo a’ge il oruakhweat de wiak nak til lagalat, At Nenaik ’gain Onuk Logo a’ge eneperlagap poluk aphwami Kanaan a’ge ondogwi enasua onuk Baal emin, enasuahwe o’gut hele’gik a’ge Asyera emin, onogorlogap poluk motluk laga legesa. 8Asogo togwi ene At ’gain Onuk Logo a’ge olot het ningsogo Israel a’ge enebam pesirik, wokho is aphwami Aram Mesopotamia a’ge onue onuk logo a’ge Kusyan-Risyataim e’gikmu pasuam at eragam Sebelogo enebesimu oruakhwe, tahun siragen at tegei. 9Asogo tegeimu is Israel a’ge ebano en e, eniak loksogo At ’gain Onuk Logo mo’gulogwiam e, At ’gain Onuk Logo en enagap deluak oluk, ap Kaleb at Kenat omlogo Otniel at edikpesi. 10Asogo edikpesirik, is Israel a’ge wene enebam pasulat, no’gorliselat taga lemagoluk, At ’gain Onuk Logo arogun at ebam agoam e, ap Aram a’ge onue onuk logo a’ge Kusyan-Risyataim e’birek weim obogukhwe, At ’gain Onuk Logo en ap ai, Otniel e’gikmu pasuam ap ano sebelogo pesi. 11Asogo sebelogo poluk o ebano o’borlogouk erlak op aruakhwe, tahun 40 agoam e, ap Kenas omlogo Otniel ano arat waraga.
Ap Ehud tegei wene
12Pobuk emin is Israel a’ge ebano At ’gain Onuk Logo il oruakhwe wiak pobuk logon til lagaiam e, At ’gain Onuk Logo a’ge en ap Moab a’ge onue onuk logo a’ge Eglon ano aphwami Israel a’ge Sebelogo onobou wak oluk, anniap pasuam e, 13At Eglon ano en is aphwami Amon a’ge emin, Amalek a’ge emin, enemin la’buk ogulat e, is Israel a’ge mabenap onoboluk libagalat o kota e onuksogo tak a’ge o Korma ebano sebel-sebelhwerlegesa. 14Ye, is aphwami Israel a’ge ebano en is aphwami Moab a’ge onue onuk logo a’ge Eglon eragam sebelak enebesimu oruakhwe tahun 18 aga.
15Pobuk, togolik is Israel a’ge ebano en e, eniak loksogo at ’gain Onuk Logo a’ge mo’gulogwiam enagap deluak oluk, ap a’gul onuk Benyamin a’ge mesik onuk Gera emalik e’gik hware-hware a’ge Ehud ano at edikpesi. Asogo edikpasuam is Israel a’ge en uang ’gwelagentarok welago a’ge paget o’go odoktak ano Ehud arilak enemin en wik-wok is ap Moab a’ge onue onuk logo a’ge Eglon wogesi louwak oluk perak enebegesa, 16perak enebegesema lagalat, Ehud, ano en ’garok e’gat pema-pema merak yat a’ge meter ’burl ’gela’ge hele’gegei a’ge ano auwak o’gwe osum ogola yagasogo, 17Ap Moab onue ’gain onuk logo a’ge Eglon ebe ogum lok oruakma re, uang o’go pogwi a’ge ano wogosi legesa. 18-19Uang tenharok welago a’ge paget o’go odoktak poluk wok egisarik helep a’ge ondogwi enasua hele’gogumu o eba Gilgal horoksogo eba lau wotluk is ap enemin uang woluk legesa a’ge ebano at Ehud en onowi pam onobou wagarik at omuat togolik li-lagak ap onuk logo a’ge ano il e’bek lagarik, mo’guleselat, “Naik o, an en hisakho wene mesik mo’gulheik o.” Mo’gulesimu at Eglon en ap at ebaget togwi a’ge ebano libemis o, oluk mo’gulentasuam is at ebaget togwi a’ge ebano enebe ’belagat liplai legesa. 20Asogo libagaiam, at Eglon ano Sogwei ’gwi lasumu owi o lok opsogo werik a’ge ogorlitakma mesik o’borl pam eba ligagarik emategat hweriogo oruakma re, at Ehud ano eragam lagarik, “At Allah en wene mesik mo’guleriogoluk peraknobou waga o,” oluk mo’gulosoam e at esa’go hwelik oluk at Eglon inagokhwe, 21ap Ehud ano e’gik hware akhit en ’garok auwak ’bekhit akhit welago a’ge ano lisogo ap onuk logo a’ge olot ’burl damuk takpesi. 22Asogo takpesimu, esei a’bikmu re ’garok odogorlu ’goboksogo ’gwiselat, e’biang ebe pema poloksogo lasulat, ’garok odogorlu ano esei en hisaregeimu re, ap Ehud ano ’garok lis ho erlakma en hwedikhweat, 23Libagarik o ogorli o’borl pam il likho welago a’ge ano ’goduk lerak poluk kunci annisogo lerak poluk liplau waga. 24Asogo liplau wagokhwe, ap onuk logo a’ge osilak eragam a’ge ebano en o ogorli il o o’borl pam ano ’goduk lerakma enil hegisarik e, disogo egesa. Emie werisoma eba emie weriso hwia? oluk, 25Yethegesa a’geat de, ’goduk husogo lebago erlak en eragam a’ge ebano en e ap ’gain ano ’goduk husogo lebago erlak ai nopaget oluk, enede e’gin agoam kunci agaikhen wik-wok ’goduk hwerigisarik is enaik ano ’gwelakhegesa ’gal e waragarik ’gwiangma hedin egeirik ’boutak oruakma hegesa.
26Asogo togukhwe, at Ehud ano ling long toluk helep onodogwi enasua hele’gogumu ebano oruakhweat de, o onuk Seir a hegit eba hweiye waga. 27Wagarik O Efraim dom ho’gorlakma eba loluk is Israel a’ge weim obumak oluk, iak loksogo oso a’ge onuk trompet ano iak puhasuam is ano arat odoktu agaiam at naduk agarik dom pam en ’bu egesa. 28Asogo ’buagalat, is mo’gulentesi, “At ’gain Onuk Logo en henemin weim ’belak a’ge aphwami Moab a’ge modok arat nene’gikmu nenebesimu re, nenemin lul en manis o,” oluk, enemin dom pam en ’bu egesarik, is aphwami Moab a’ge ik Yordan ’balogumu Sebelogo, welat, aphwami ik’balogo libagaimu no oluk ’gwe ’belakpoluk welegesa. 29Asogo takpoluk agauwa ai erlige is Israel a’ge en Moab a’ge waronobogulat, ap ware enanni a’bik enebe 10.000 a’ge de mesik hweiye libom erlakma en modok at ’berleksogo warenebegisa. 30Asogo werak enebegesarik, is Israel a’ge ebano en aphwami Moab a’ge eneragam a’ge ’gela’ge Sebelak onoboluk o ano o’borlogouk erlak op oruakhwe tahun 80 at tegei.
Ap Samgar en tegei wene
31Asogo tegeimu ap Ehud ebalema ap Anat omlogo onuk Samgar ano inago. Inagarik e sapi odogun mu woluk lasu a’ge ano pam ap Filistin a’ge enebe 600 pam wat enebegei. Asogo wat enebegei ai pam en, at en ogo re, aphwami Israel a’ge enagap delogo enebesi.
Currently Selected:
Hakim-hakim 3: Wul
Highlight
Share
Compare
Copy
Want to have your highlights saved across all your devices? Sign up or sign in
