Hakim-hakim 11
11
Ap Yefta en taga laga wene
1Ap mesik Gilead a’ge onuk Yefta weim ebiso a’ge onue modok at welaga. At ari onuk ai re, Gilead ye, ia nak e, hwe danian ano a’ge welaga. 2Ap Gilead uge edip hwe wogo a’ge ano en emalik ap Gilead ebalema dagenebegei a’ge ebano souwe egesarik, Yefta ano mo’gulogulat, “Hat hugwe mu a’ge emaligatma re, nenaik emining a’ge nis logon woknentasulat, horlogulat, hat logon wokhema modok erlak o.” 3Mo’gulegisema at Yefta ano arilak ene’gerlakma en hweiye libotluk o onuk Tob eba o ’balogo han hwerlesirik, welat, aphwami wiagabonobogwi a’ge enemin uttak poluk welat, yogorlia wil no’gu legesa.
4Pobuk aphwami Amon a’ge ebano en aphwami Israel a’ge emin weim ’gagalak poluk, 5Ap Amon en aphwami Israel a’ge enemin weim togulat Gilead a’ge onuelak ebano en at Yefta o Tob oruakma, wai legesarik, 6Mo’gulogulat, “Hat nonosi segen eiye a’ge ’gwelagentarok welat, nonoweim wene legesilokhwe aphwami Amon a’ge emin weim obogu lomok oluk, wokhobuegema re, nenemin louwok o.”
7Mo’gulegisa a’ge at de, Yefta ano en wene o’go is mo’gulentasulat, “An henebirap nebegeptik, nue nari ene’gerlakma en mukho lebiknobou wegep a’ge his ano erlak no? Hisat a’geat de, o yogodak e’gin pegin henebam aga holuk emde, an muknoboluk wegep a?”
8Mo’gulentesimu, is ap Gilead a’ge onuelak ebano en at mo’gulogulat, hat en e’gen ai, demat a’geat de, nenemin laga lomultik, aphwami Amon a’ge henemin weim tagalat holuk nage nis aphwami Gilead a’ge nenebe ’berlegat ’gwelaknentarok wolom a’ge paget edik hobouwok oluk, o yogodak nenemin lul en e, wokhebil wege o.
9Mo’gulegisema, at Yefta en is mo’gulentasulat, his en woknobu egepma nemin laga lomultik, aphwami Amon a’ge enemin weim togukhwe At ’gain Onuk Logo a’ge en, enebe wokho an ne’gikmu pasuam, his en an honue welemagoluk ediknobo a’ge egep ai, demat egep a?
10Mo’gulentesimu, is en at mo’gulogulat, nis asogo ogukhwe, At ’gain Onuk Logo a’ge esa’go hweliselat il yetnentasulat tegeimu re, hat en mo’gulnentigen ano re, hegit hegirat takhobul o? 11Mo’gulegisema, ap Yefta ano en ap onuelak ebano enemin wegesarik, is tenentarok welat, ano weim wene le’gelise lemagoluk, onue at edikpegesa. Edikpegesema, at Yefta ano en wene tu a’ge mesik ebam agama re, At ’gain Onuk Logo a’ge il pam o Mizpa eba mo’gulesi lasu laga.
Ap Yefta Amon emin en, tigisa wene
12Pobuk togolik, ap Yefta ano en ap Amon a’ge onue, onuk logo a’ge ano mo’gulesi louwak oluk wene wusogo perakpasulat, nis edip ’gesogo mesik tigema emde, nenemin weim tuok oluk nonowi pam ’gu egen?
13Oluk wene wusogo Perakpogwiam mo’gulesi legesema, ap onuk logo a’ge Amon a’ge ano en, ap Yefta wene wusogo perakpegesa a’ge ano mo’gulentasulat, is aphwami Israel o Mesir en liplau wegesarik nis nono’gwiang ik Arnon hwerli en ’bekhit ik Yabok en ’bekhit ik Yordan hwerli ’berlegat mik hwerlege a’ge ebano henede opsogoat nono’gwiang eiye a’ge togolik woknentemit o.
14Oluk wene wusogo perakpou wegesa a’ge ano at Yefta mo’gulogwiam e, at en ap onuk logo Amon a’ge ano mesik eminat togolik mo’gulesi louwak oluk, 15Wene wusogo perakpasulat,
“Aphwami Israel en ap Moab a’ge ono’gwiang emin, ap Amon a’ge ono’gwiang emin, is en delhorlo erlak o. 16Aphwami Israel a’ge o Mesir en liplau wotluk wagalat, ebela o’gwe en ik ye’gelak Laut Merah hegit eba lau wegesarik, o Kadesh at wegesa o. 17#Bil. 20:14-21Asogo wegesarik, aphwami Israel ebano ebela ap onuk logo a’ge o Edom a’ge o’gwiangma eba wom a’ge paget ’gonu mo’gulemagoluk, yo’go perak enebegesema, mo’gulosu egesa a’geat de, ap o Edom a’ge onuk logo a’ge ai en e, Nesa’go holu nebit o, oluk osoam e, pobuk emin ap Moab a’ge onue onuk logo a’ge oruak o’gwe ebela’gwe ai womok oluk wene wusogo perakpou wegesa a’geat de, ap ai en ogo io oluk u erlakma enat mo egeimu, is aphwami Israel a’ge ebano o Kadesh eba mo egesarik welegesa.
18 #
Bil. 21:4
Eba welegesarik, pobuk nin, is ebela o lei o’gwe toluk waga legesarik ap Edom a’ge ono’gwiang emin, ap Moab a’ge ono’gwiang emin, hwerlitak o’gwe ebela ’gwe ai toluk ap Moab a’ge ono’gwiang o mo il liplau wago hegit akhit o’gwe ebane toluk hoyuk gwelak ik Arnon ’balogo liplau wegesarik, eba onowi Sabo ut hwerlegesa. Ik Arnon ’balogo liplau wegesarik, eba onowi Sabo ut hwerlegesa. Ik Arnon ai, ap Moab a’ge ono’gwiang hwerliatma re, ap Moab ono’gwiangma eba ’guom erlak. 19#Bil. 21:21-24Pobuk aphwami Israel a’ge en wene wusogo ap Amori a’ge onue onuk logo a’ge Sihon ’gwelakharok o Hesybon oruakma wene wusogo perakpou wagalat, nis lul epegema re, lul en ebela hat ho’gwiang o’gwe ai wom op a? Oluk mo’gulemagoluk perakpou wegesema mo’gulosu egesema at de, 20Ap Sihon ano en ede eberiselat, is Israel a’ge ebela an no’gwiang o’gwe yu wema egesa ai re, weat wom puk a’geat de, we an mesik taknobouwok oluk en egesa hwia? Oluk ede epesirik ede pitdeiya ese lagarik, aphwami at osilak ’berlegat odoktak poluk o Yahas eba onowi sabo ut hwerlegesarik, Israel a’ge enemin weim obogu legesa. 21Asogo obogu legesa a’geat de, ap Israel enaik At Onuk Logo a’ge en ap Sihon emin, at osilak enebe ’berlegat emin, wokho Israel ene’gikmu enebesimu, wusogo enebegesarik, aphwami Amori eba welagai a’ge ebano ono’gwiang ’berlegat is aphwami Israel a’ge enat mikho hwerlegesa. 22Ono’gwiang hwerlegesa a’ge ano hwerli re, ik Arnon en legenak a’ge ik Yabok hwerli emin, o leimu en ’bekhit legenak a’ge ik Yordan hwerli emin, ’berlek is aphwami Israel a’ge en eiyetak pagathorloluk wolomok oluk, hwerlegesa. 23Is Israel a’ge enaik At ’gain Onuk Logo a’ge en ap Amori a’ge ono’gwiang ano aphwami Israel a’ge eiye welemagoluk, ap Amori a’ge mukho lebik onoboluk delogo wogentesimu oruakhwe, edip no pam en hat ’gwiang ai waik oluk ese legen? 24Hat hasua Kamos ano en ede eberak poluk wokhoso a’ge ano obat o, oluk wasu legen ano erlak a? Ano ’gela’geat at ’gain Onuk Logo a’ge en delogo woknentesi a’ge ano nis en ogo re, eiyerak pagathorloluk, wolomogat o. 25#Bil. 22:1-6Aphwami Moab a’ge onue onuk logo a’ge ap Zipor omlogo Balak ano en nenemin wene ’balogulat, weim obogulat, togwi erlakhweat de, at ai mia, an nak elit oluk ese legen a? 26Aphwami onowi kota Hesybon emin, Aroer emin, is kota ’biren eria re o’borl olukhwe onowi wei lok ’berlegat werik a’ge emin, kota-kota ik Arnon esa’go’gwe welagai a’ge emin, is Israel a’ge oruakhwe tahun 300 at tegei o. Asogo tagokhwe ai erlige hat horlo erlakma en no oluk ukpegen? 27No pagerat nis en hat wiak gap hobo erlakhweat de, nis wiagap nenebasulat, nenemin weim tu a’ge ese legen! Asogoatma re, at onuak lol enebiselat, no’gorliselat, tago a’ge Nenaik ’gain Onuk Logo a’ge en agauwa o yogodak yu pamat Israel a’ge enemin, Amon emin, at en nak nonowene ’balogo nonuak lol nonobua egei o,” oluk mo’gulemagoluk, perak enebesimu mo’gulesi legesa. 28Asogo mo’gulesi legesa a’geat de, ap Amon a’ge onue onuk logo a’ge ano en ap Yefta en wene wusogo perak enebesi a’ge ano esa’go holu erlakma en ukpesi.
29Ukpasuam at ’gain Onuk Logo a’ge arogun ano Yefta ebam agoam e, o Gilead emin, ap Manasye a’ge ono’gwiang pam emin, ebela ’gwe ai lasu lagarik, o Gilead kota Mizpa pam en ’bekhit ap Amon a’ge ono’gwiangma eba laga. 30-31Asogo lagarik at ’gain Onuk Logo a’ge mo’guleselat, hat en aphwami Amon a’ge an ne’gikmu pasuam, wusogo onoboluk nagap delak obat wagoam e, no’gwe a’ge mesik an nowi pam en ’goduk hwerik poluk an hau warenebil liplau wagoma, naik ’gain Onuk Logo a’ge hat hebaget aiatma re, hebaget wusogo odouk narlogwi ai ’gela’geat, wusogo hebaget odouk narlik o, oluk wene modok ologun ’balogo ho’buk ’balogo pesi.
32Ho’buk ’balogo pesirik, Yefta ano ’bekhit ’bekhirat aphwami Amon a’ge enemin, weim ebisokhwe At ’gain Onuk Logo a’ge en at e’gikmu pasuam e. 33O Aroer en warenebil laga-laga o Minit kota Abel-Keramim hwerli kota 20 ’berlegat modok ’berlegat lologunsogo erlagap pesi. Asogo takpesimu aphwami Amon a’ge Israel a’ge eneragam sebelak ’gela’geat welegesa.
Yefta en agalogo hwele dogum a’ge ano ede oboturap pesi wene
34Wusogo enebesirik, at Yefta ano owi pam Mizpa waga. Asogo wagoam e, at agalogo hwele ano at aik hau woru a’ge pegat ’bong-’bong iak ing-ing horlok til odipmu hai laga. At eiyagai mu logon hwelani emin, logomalik emin dak onobu erlak we, hwele ai nak naduk dogo no olukma re, tegei. 35#Bil. 30:2Agalogo mesigat a’ge ano enat tagoma, aik ano il hesirik osum derlep derlapsogo pesirik, agalogo ano mo’guleselat, “Eige! Nagalogo yo. An haik ano wene modok ho’buk ’balogoat ’gain Onuk Logo a’ge mo’gulegis a’ge ano erlagapsogo po miayatma re, nede wiagapsogo pasulat, nede weresilat tuak oluktak nebegen o, nagalogo.”
36Asogo mo’gulesi a’geat de, hwele agalogo ano en e, “Naik o. Hat en At ’gain Onuk Logo a’ge wene ho’buk ’balogo mo’guligen ai at o. Is aphwami Amon a’ge henemin weim ’belak ai re, warenebik epegen a’ge ano At ’gain Onuk Logo a’ge en lethiasukhwe erlagapsogo pegentikmu re, ho’buk ’balogoat ’gain Onuk Logo a’ge mo’guligen ano re, hegitsogoat takpomup o, naik.” 37Mo’gulesirik mesik, emin mo’guleselat, mo’guligen a’ge ai taknobo obat a’geat de, an mesik tu a’ge, io, oluk mo’gulnerinok oluk mo’gulheik o. An hwele dogum owan ap enemin nogou erlakma en waromma re, nede ebetil lasulat, lo’gu matil narilak enemin dom edip ho’gorlak o’gwe eba dugwi ’biren a’ge pam denaga lemak, oluk peraknebemen o. 38Mo’gulesimu, at aik Yefta ano en e, “Io. Dogwi ’biren ebal lak o. Mo’gulesimu, hwele ano arilak enemin dom ho’gorlakma ebano legesa. Eba denagalat, hwele dogum ano ap enemin la’bolu erlakhweat warema yema re, oluk, arilak enemin lo’gu matil no’gu legesa.” 39Dogwi ’birenak arat a’ge pelelak poluk pobuk e’bek wagoam e, hwele agalogo ano ap enemin nogou erlakhweat de aik en wene ho’buk ’balegei ano ’gela’geat takpesi. 40Asogo takpesi ai pam aphwami Israel a’ge enemalik hwelani dogum a’ge ebano en e tahun mesik takpoluk ap Gilead a’ge Yefta agalogo hwele ano ede en eberiselat, nge togukhwe modok agauwa uganak a’ge til waga lege o.
Currently Selected:
Hakim-hakim 11: Wul
Highlight
Share
Compare
Copy
Want to have your highlights saved across all your devices? Sign up or sign in
