Hakim-hakim 12
12
Yefta Efraim emin en tigisa wene
1O agauwa ai erlige ap Efraim a’ge ebano odoktak poluk, o Zafon liplai legesarik, ap Yefta ano mo’gulogulat,
“Nis nenemin aphwami Amon a’ge warenebil louwak oluk, nis mo’gulnonto erlakma re, ai no pagerat? Hematek enat warenebi legen, howi pam oruakhwe hebe hemin odouk ’gwelakhobul o.”
2Mo’gulegisema, at Yefta en e, is mo’gulentesi,
“Aphwami Amon a’ge en weim nogorlak a’ge ’gela’ge re an nosi enemin nenebam agaiam e, letnentau wagalat, nenagap delu manis o, oluk mo’gulhentige a’geat de, is ene’gikmu en nenagap deluom erlakma en mo egep ani o. 3Nenagap delnonobuak oluk mesik wagai erlakhwe hontoluk, nomuat lasumu watnobua holuk e, obat o, oluk, aphwami Amon a’ge enemin, weim tuok oluk, lasumu At ’gain Onuk Logo a’ge en is aphwami ai waronobuak oluk an ne’gikmu pesi ani o. Asogoat tegeimuat de, his no paget o agauwa yogodak yu pam en wegeptik Nemin weim tu a’ge epegeptik en mo’gulnogu legep?” 4Mo’gulentesirik, Yefta ano en ap Gilead a’ge odoktagonoboluk mo’gulentasulat, is ena’gul onuk Efraim a’ge ebano en is Gilead a’ge ai nena’gul onuk Efraim a’ge emin Manasye a’ge ado me’gerik a’ge ’bogolil legesa a’ge ebano ene isat ai o, oluk egesema re, enebam, ’gwi lul ai o oluk, ena’gul onuk Efraim a’ge weim enebam ligegesarik, modogat wusogo enebil legesa. 5Wusogo enebil, legesarik ebela o Efraim o’gwe lo a’ge ik Yordan ebe ’balogwi ’gwe ano sebelhesimu re is ap Efraim a’ge mesik ene’bek loluk, “An ik ’balogo laik o,” oluk mo’gulentasu lagama, is ap Gilead a’ge en, “Hat hebe Efraim a’ge a?” Mo’gulogwiam e, at en, “Erlak o,” osoam e, 6is en at, mo’gulogulat, ai holuk e, wene, “Syibolet,” in o, oluk, mo’gulogwiam e, at en wene, “Sibolet,” u a’ge oruakhweat de, Sibolet osoam e, tin ten ik Yordan ebe ’balogumu erianoat, wusogo pogu legesa. Agauwa ai erligeat aphwami Efraim a’ge enebe 42.000 at wusogo onobogu legesa.
7Wusogo onoboluk Yefta ano en aphwami Israel a’ge ’gwelagentarok welat, onuak lol enebiselat oruakhwe, tahun 7 takpasu lagarik ap Gilead a’ge Yefta ano ebe waragoam o Gilead kota mesik eba ’gwiang ’balogo sebeligisa.
Ap Ebzan en taga laga wene
8Asogo waragama ap mesik o Betlehem a’ge onuk Ebzan en, aphwami Israel a’ge tenentarok welat, wene enebam pasulat, no’gorliselat, taga laga. 9At eiyagai ap e, 30, ye, hwelani re, enebe 30 pamat dak enebegeimu re, hwelani ano onogunlak ap ena’gul onuk muat a’ge horlouwak oluk, wokho wogentau wagalat, taga laga. Ap Ebzan ano Israel a’ge tenentarok welat, onuak lol enebisokhwe tahun 7 pamat tegei. 10Asogo takpoluk waragama, o Betlehem eba ’gwiang ’balogo sebeligisa.
Ap Elon en taga laga wene
11Waragama, ap Zebulon a’ge onuk Elon en aphwami Israel a’ge tenentarok welat, wene enebam pasulat, no’gorliselat, tagokhwe tahun sepuluh at tegei. 12Asogo tegeirik, ap Elon ano waragama, aphwami Zebulon a’ge ono’gwiang pam o kota Ayalon eba ’gwiang ’balogo sebeligisa.
Ap Abdon en taga laga wene
13Waragama ap o Piraton a’ge onuk Hilel omlogo Abdon en aphwami Israel a’ge tenentarok welat, onuak lol enebise laga. 14At en eiyagai ap a’ge re, 40 dak enebegei. Ye, eiyagai en dogoma a’ge e’balak ap e, 30 pamat dagonobogulat, tigisa. Eiyagai emin, e’balak emin, ano re, onuam keledai ierak a’ge 70 pamatma re, enematek lo’bogat o’borl pam hurotluk denaga legesa. Ye, ap Hilen omlogo Abdon ano Israel tenentarok welat onuak lol enebisokhwe, tahun 8 arat takpoluk, waraga. 15Arat takpoluk waragama, aphwami Amalek a’ge onowi dom ho’gorlakma ap Efraim a’ge ono’gwiang pam o Piraton ebano at ’gwiang ’balogo sebeligisa.
Currently Selected:
Hakim-hakim 12: Wul
Highlight
Share
Compare
Copy
Want to have your highlights saved across all your devices? Sign up or sign in
