Hosea 4
4
Nenaik ’gain Onuk Logo a’ge en e, “His aphwami Israel a’ge henebabut modok ’gorlo togu legep o,” oluk mo’gulentesi wene
1Nenaik ’gain Onuk Logo a’ge en,
“His aphwami Israel a’ge o yema welegep a’ge an nemin wene henebam paik ai en e, henesa’go opsogo hwelip o. His aphwami o yema welegep a’ge yema henebabut e, his-his henemin hwedik welat, henedeap onobogulat, an Allah nebe dokhumsogo henaluk agalat, togu legep a’ge mesik modok erlak o. 2Asogo welat, is aphwami logon heman onobogulat, eniak eseiyat mo’gulontogulat, enebe waronobogulat, is logon ena’ge hisarogulat, ’babi tenontogulat, tenontuagoluk togulat, wiak ebam louktak modok til lagalat, is logon enemep namogo pobuk-naduk waronobogwi modok welat, togwi modok welegep ai o. 3Asogo togu legep ai en, o his honowi yema modok ’buk ema o. Asogo ’buk agoam, di a’ge yu a’ge ’berlegat warema o. Di a’ge yu a’ge a’gul onuk lo’bok, tue ’bogorl pam darak noso a’ge emin, wam, sue, ’baik ’gwiangma welago a’ge emin, hiane ik laut ye’gelak ogola welago a’ge emin, ’berlegat erlak ema o,” oluk mo’gulentesi.
Nenaik ’gain Onuk Logo a’ge en e, “His ap an eiye a’geat de, henebabut ’gorlo modok togu legep o,” oluk, mo’gulentesi wene
4Nenaik ’gain Onuk Logo a’ge en asogo egeitik, mesik disogo egei,
“His ap an eiye a’ge yu. Henebe an eiye a’geat de, ’gorlo modok togu legepma re, an en hisat wene yakhentaik ai en e, his en an neiyagai mo’gulontogulat e,
His modok ’gorloat togu legep o, oluk wene yagontogu-legep ai, wene yagentagup o. 5His en, erlige en ’gorlo togulat, ’bule ’bugulat, huba’go en is ap an niak mo’gulontogwi a’ge ’gela’ge welagai a’ge ai, henemin hegirat ’gorlo togulat, ’bule ’bugulat, togu legep ai en, aphwami Israel a’ge enebe his henielak ’gela’ge ai, enebe an en erlagap paik o. 6His en, an nebe dokhumsogo henaluk om henebit en togu legep ai en e, is neiyagai en ogo re, an nebe enaluk om enebit welagai ai pam, enebe almathorlouwa o. Ye, an en ogo re,
His henebe an eiye wolom nebirat o. An en wene mo’gulhentegis wene ai ukpoluk memerak nebegep ai en, an en ogo re, his heneiyagai enebe an eiye ema no oluk, ugonoboluk memerak enebaigat o.
7His ap an eiye a’ge ’gela’ge welegep a’ge yu, henebe a’bik yarluk ogulat e, modok a’bigat niak sagalogo wiak togu legep ai o. Asogo togu legep ai en, an en e, his henebe aphwami logon en hau wusogo mo’gulhonto erlakma en, onogola en mi-miarak honobogu lemagoluk takhenebaik ani o. 8An neiyagai wiak togwi ai pam, his en di a’ge yu a’ge loksogo no’gwi ai ’gela’ge his honogola en e,
Is wiak modogat til laga lemak, oluk opogu legep ai o. 9Pobuk wene neiyagai enebam paik ai ’gela’ge, his henebam ogo paigat ani o. An en his henebabut togu legep hegitsogoat wene henebam paik o. 10Pobuk, aphwami en an nebaget di a’ge yu a’ge noboluk narlik nobouwa a’ge ’gwerik logon nagup a’geat de, honogola re, neleat wolorogup ani o. Ye, his en dogwi asua en obaphonobuagoluk erliktogup a’geat de, an henaik Allah uknoboluk libotluk, mu a’ge erliktogu lema ai en e, henebe yarluk ogu lorogup modok erlak o,” oluk mo’gulentesi.
Nenaik ’gain Onuk Logo a’ge en, “Dogwi asua a’ge erliktogulom mia o,” oluk mo’gulentesi wene
11Nenaik ’gain Onuk Logo a’ge en asogo mo’gulentesirik, mesik disogo egei,
“Neiyagai o, anggur a’bosu naduk a’ge emin, ’get a’ge emin, no’gwiam e, honogola opsogo eberu puk a’ge takhenebasu aiat o. 12His en e, hwe mesik ogun ukpoluk ebabut danian nil nosolom ’gela’ge, his an henaik Allah uknoboluk, mu a’ge paget de,
Nenaik ebe yuat o, oluk ogwi a’ge ai, henebe at wogotluk e, e ebagase ’belak a’ge emin, ’bouwa’gun a’ge emin en, wene pobuk om a’ge mo’gulhentasuam henaluk omogoluk emdema wogu legep ai o. 13His en o dom lok a’ge pam emin, wei a’ge pam emin, wam, di a’ge yu a’ge dogwi asua paget wusogo narlik obogulat, e e’gela moli op a’ge lekho ’gunmu op ai en e’ben op a’ge narlik obogulat, togu legep ai o. Asogo togu legep ai, ologun pam honogulani demat a’ge enebabut danian agalat, honogulani heneiyagai onugwami a’ge ’babi tenontouwok oluk togulat, togwi ai o. 14His henebe ogo re, hwami enebabut danian nil no’gwi a’ge dogwi asua owi werikmu oruakma tenontogwi a’ge, his is ene’bek loluk, henemin dogwi asua paget wam wusogo narlogu legep ai en e, is honogulani demat a’ge enebabut danian agaiam, honogulani heneiyagai onugwami a’ge ’babi tenontouwagoluk togwiam wene enebam po mia o. Asogo togu legep ai paget aphwami en e,
Onogola en Allah ebe pobi togwi erlak a’ge ai enebe almarema o, oluk ogwi ai, modok demat ogwi o.
15His aphwami Israel a’ge yu. Henebabut e, an nemin lo’boksogo wolom henebit welat, wiak togu legep ai, is aphwami Yehuda a’ge asogoat tu erlak. Nebit o. Holuk e, his o Gilgal lagalat, Betel lagalat, togup modok erlak o. Ye, o eba loluk, an henaik ’gain Nonuk Logo a’ge nelaluk modok welegi a’ge nonuk ’balogo ho’buk ’balu modok erlagat o. 16His aphwami Israel a’ge yu. Henebabut e, henede modok helebat sapi emalik ’gela’ge. An en his henebe wam domba o leimu tenakho wolom ’gela’ge, no’gosogo tenhentarok wolom no.
17His Israel a’ge dogwi asua hele’gik a’ge henemin arat mesigat la’buk lai legep ai en e, asogoat lu o! 18His ik anggur a’bosu a’bik ne’geptik e, honogola henagai enat danian aga legep ai o. His e, is logon en hau wusogo mo’gulhontogu lemagoluk tu re, henebit. We, onogola en mi-miarak honobogu lemagoluk togulom henagai welegep ai o. 19His asogo togu legep ai en, his henebe sogwei en di a’ge yu a’ge punsogo woluk lasu ai ’gela’ge, nalorogup ai o. His en wam di a’ge yu a’ge dogwi asua paget wusogo narlogu legep ai en, pobuk hene’gerli hagup ani o,” oluk mo’gulentesi.
Currently Selected:
Hosea 4: Wul
Highlight
Copy
Compare
Share
Want to have your highlights saved across all your devices? Sign up or sign in
