Hosea 5
5
Israel ’gwelagentarok welagai a’ge eneminat e’gin enebam po wene
1-2Nenaik ’gain Onuk Logo a’ge en mo’gulentesirik, mesik disogo mo’gulentesi,
“His ap an eiye a’ge welegep a’ge yu emin, his aphwami Israel a’ge ’berlegat emin, his aphwami ap ononuk logo a’ge en dogo’gwe a’ge yu emin, henemin en is logon wene enebam pogulat, no’gorlogulat, hegitsogo tu a’ge oruakhweat de, o Mizpa en ’baik herle pogwi ai ’gela’ge pogulat, o dom Tabor pam en hiane sum hiane wouwogoluk hele’gik ai ’gela’ge pogulat, o Sitim wam teiye ’bule ’buak oluk ’gwiang ’geling yatsogo delak welago ai ’gela’ge delogulat togwi ai ’gela’ge, is logon wiak emagoluk togu legep ai en e, an en wene his ’berlegat henebam paik o. 3An en his aphwami Israel a’ge henebabut togu legep a’ge ’berlegat an naluk o. His togu legep a’ge an nilem hisogo oruak modok erlak o. His en dogwi asua erliktogulat e, an nemin hwedik wolom henebit ai en, aphwami his a’ge logon en an erliknobu mia ago ai o,” oluk mo’gulentesi.
Allah en e, “Is aphwami Israel a’ge an uknoboluk dogwi asua erliktogwi ai en pobuk togolik ne’bek wom mia ago yo,” oluk egei wene
4Aphwami Israel a’ge Allah ukpoluk, at iak sagalogo enebabut dogwi asua erliktogulom modok enede enagai welagai ai en e, enaik ’gain Onuk Logo a’ge ebe dokhumsogo enaluk om enebit en e, pobuk togolik e’bek wom e, mia o. 5Is aphwami ena’gul onuk Israel a’ge onu’gwarek en erlikhorlogwi ai pam e, enebabut enagat ago yo. Is Allah iak sagalogo wiak togwi ai en e, onoyuk a’gul dungsogo wathorlogwi ai o. Asogo wathorlogwiam aphwami ena’gul onuk Yehuda a’ge eneminat wathorlogwiat o. 6Is aphwami Israel a’ge en Nenaik ’gain Onuk Logo a’ge heratuogoluk wam domba emin, sapi emin, at ebaget wusogo narlik obogwi a’geat de, at en is enebe ugenebesi ai en e, almasogo togwi. Ebe emin sarlok tua erlak o. 7Is enebe Nenaik ’gain Onuk Logo a’ge emin hwedik wolom erlakma en, togwi ai pam, is eneiyagai Allah eiyagai demat a’ge dagonobogwi erlak. We, ’babi ’gwelogo nak dagonobogwi ai en, wiagap enebiso a’ge en enebe erlagap enebasulat, eniabuk erlagap pasulat, tua ani o.
“Aphwami Yehuda a’ge emin, Israel a’ge emin, enemin weim obua o,” oluk egei wene
8His ap Benyamin a’ge, weim obu manis a! oluk eniak ngai-wai u ’gela’ge, o Gibea en ’bi’gong iak lok a’ge iak ing hemit a! O Rama en e ele delak a’ge pam iak ing hemit a! O Bet-Awen ogulat Betel en heniak ngai it a! 9His aphwami Israel a’ge wene henebam po a’ge paget, honowi dakha ua ai pam, wiak orogup ani o, oluk egi ai demat emayat o.
10Nenaik ’gain Onuk Logo a’ge en e, disogo egei,
“Aphwami Yehuda a’ge onuelak ’gaindek en aphwami Israel a’ge enebe waronobogulat, onowi sebelil ’gu egesa ai en, nolot het enebam modok poluk wene ik ebe wago ’gela’ge enebam perakpaik ani o. 11His aphwami Israel a’ge en is logon delonobua erlak a’geat de delhonobuagoluk ningsogo yo’go onobogu legep ai en, is logon en modok wiagap henebegesarik, wene henebam poluk honowi modok sebeligisa ai o. 12His asogo togu legep ai en e, aphwami hena’gul onuk Israel a’ge an en wiagap henebiselat, his aphwami Yehuda a’ge erlagap henebiselat, tik o.
13His aphwami hena’gul onuk Israel a’ge emin, Yehuda a’ge emin, wiak welegep a’ge ai pobi holuk e, his Israel a’ge en, aphwami Asyur a’ge onue ’gain en delhonobuagoluk yo’go legep a’geat de, at en delhenebiselat, henebe op welemagoluk takhenebasulat, tu a’ge miayat aga ai o. 14Singa en aphwami warenebiso ai ’gela’ge, an en his aphwami Israel a’ge emin, Yehuda a’ge emin, henemin wathenebik o. His henebe an nu’gwarek enat lebil-lebalsogo wathenebiktik e, ukhenebaik ani o. An en henebe lisogo wokhonoboluk lasuam aphwami logon en delhonobua modok erlak o.
15An niak sagalogo wiak togu legep ai en, di obotut yu obotut loksogo hogu lemagoluk henebe ukhenebaik o. Asogo ukhenebaikmu, his en,
Nis wiak tige o, oluk pobitak poluk, di obotut yu obotut asogo hogulat en nak e, henede pam enat heranebil worogup hwi a,” oluk mo’gulentesi.
Currently Selected:
Hosea 5: Wul
Highlight
Copy
Compare
Share
Want to have your highlights saved across all your devices? Sign up or sign in
