Ibrani 7
7
Ap Melkisedek Allah eiye welat taga laga wene
1-3 #
Kej. 14:17-20
Ap Melkisedek ai ebe re, aphwami o Salem a’ge onue ’gain welat, Allah ’gain Onuk Logo a’ge eiye welaga. Ap Melkisedek ai onuk nis neniak pam e,
“’Gain onuk logo a’ge welat ebabut hegitsogo nak tago a’ge,” oluk u ’gela’ge, onuk Melkisedek tuelakma ogu legesa ai. Ye, mesik e,
“’Gain onuk logo a’ge en lialiso a’ge,” oluk u ’gela’ge, aphwami o Salem a’ge onue ’gain onuk logo a’ge oluk ogu legesayat. At Melkisedek ai paget e, at ia aik ai en dogo’gwe a’ge ogulat, a’bu eba ai en dogo’gwe a’ge ogulat, at ai hwerli en dagaga ogulat, eria hwerli waraga ogulat, se’geksogo mesik u erlagat. Ai en e, at Allah ebe omlogo emin hegit welat, at ebe Allah eiye a’ge modok welago ’gela’geat o. Oruakma, at Abraham ap ’gain a’ge waronoboluk togolik wagoam e, at Melkisedek ai en il haiyogoluk libagarik e, aphwami en mu’gat wusogo enebam pogwi ai ’gela’ge, at en e,
“Allah en hebe obaphobuak,” oluk iak lobuksogo mo’gulesi. Asogo mo’gulesimu, at Abraham en, weim ai obogulat, di a’ge yu a’ge hogul wesi a’ge ’berlegat e’gik wenakho 10 ’gela’ge lau wagoam mesik ’gegilogo Allah paget poluk, at Melkisedek wogosi.
4Nis aphwami Israel a’ge nena’bu Abraham en weim ai ebiselat, di a’ge yu a’ge hogul wesi a’ge e’gik wenakho 10 ’gela’ge lau wagoam mesik ’gegilogo Allah paget poluk, at Melkisedek wogosi ai en e, nis nonogola en,
“At Melkisedek ai ebe ’gain modok,” oluk opo ai hemit! 5#Bil. 18:21Nis aphwami Israel a’ge wene Allah en nenesa’go weregei wene ano pam mo’gulnentasulat, mesik disogo egei,
“Di a’ge yu a’ge ene’gik wenakho 10 ’gela’ge lau wagoam mesik ’gegilogo an nobogwiam e, ap an eiye a’ge is Lewi en dogo’gwe a’ge nak wogu lemak o,” oluk enesa’go weregeimu pelal wogo oruak. Is enebe mesigat a’ge ap Abraham en dogo’gwe a’ge enarilak onorokhwi enat pogwiam wogu lemak o, oluk egei ai o. 6Asogo egei a’geat de, at Melkisedek ai, ebe ap Lewi en dogo’gwe a’ge puk. At ebe we a’ge welarat de, at Abraham Allah en,
“Obaphebik,” oluk obok mo’gulesi a’ge ano en, di a’ge yu a’ge e’gik wenakho 10 ’gela’ge lau wagoam mesik ’gegilogo Allah paget poluk Melkisedek wogesimu wesirik e, aphwami en mu’gat wusogo is logon enebam pogwi ai ’gela’ge,
“Allah en obaphobuak o,” oluk ede aganhan ebam pesi. 7Asogo ebam pesi ai re, is aphwami enebe ’gain a’ge enat onosi eneragam a’ge enede aganhan enebam pogwi ai, asogo togwi nis ’berlegat nenalukmu no oluk e, wene ai paget eniak sagalu erlak. 8Is ap Allah eiye a’ge welat, is aphwami logon en di a’ge yu a’ge ene’gik wenakho 10 ’gela’ge lau wagoam mesik ’gegilogo, Allah paget pogwiam enebe aphwami waragai a’ge en wogu legesa a’geat de, ap Melkisedek ai nak e, elaluk welago a’ge en asogo wesi, oluk Allah iak pam pelal wogo oruak o. 9-10At wesi ai paget e, is aphwami Israel a’ge en di a’ge yu a’ge ene’gik wenakho 10 ’gela’ge lau wagoam mesik ’gegilogo Allah paget pogwiam e, is ap Lewi en dogo’gwe a’ge wogu lemagoluk egei a’ge anoat de, at Abraham at Melkisedek emin sarlok tigisarik, di a’ge yu a’ge e’gik wenakho 10 ’gela’ge lau wagoam mesik ’gegilogo Allah paget poluk, at Lewi owan dagom erlak oruakhwe Melkisedek wogosi ai o. At Abraham en wogosi a’geat de, is ap ena’gul onuk Lewi a’ge Abraham en dogo’gwe a’ge no oluk e, is en wogegisa oluk umu re, elirat o.
11Is ap ena’gul onuk Lewi en dogo’gwe a’ge Allah eiye logo oruakma, wene Allah en nenesa’go weregei wene ano wogentesi. Asogo wogentesi a’geat de, is en aphwami Israel a’ge ’garoksogo obabonobogullepma re, Allah en e,
“Ap Harun en dogo’gwe a’ge erlak o. We, an eiye Melkisedek taga laga ai ’gela’ge, ap mu a’ge mesik edikpaik,” oluk elip erlagat o. 12Is ap Allah eiye naduk a’ge ukpoluk, mu a’ge ’get edigenebaigoluk holuk e, wene Allah en nenesa’go weregei wene ai ebalema wene ologun mu a’ge oluk en edigonobo yo.
Allah eiye a’ge at Melkisedek ’gela’ge,
mu a’geat edikpesi wene
13-14Wene yu nonue ’gain Onuk Logo a’ge a’gul onuk Yehuda a’ge pagerat o. At a’gul onuk Yehuda a’ge oluk aphwami ’berlegat enaluk a’ge re, at Musa en is ap Allah eiye a’ge paget eselat, is ap Yehuda a’ge onobok ese laga modok erlak o. Ai en e, is ap ena’gul onuk Yehuda a’ge logon Allah eiye a’ge welat Allah uam warogu lemagoluk edigonobogu legesa modok erlagat o.
15Ap Allah eiye a’ge at Melkisedek ’gela’ge mesik inagarik oruak ai paget e, wene selakma modok oruak o. 16-17#Mzm. 110:4At ai, Allah eiye a’ge inagarik oruak ai re, aphwami en,
“Ap ena’gul onuk ai a’ge edigenebegesarikmu re, ai a’geat op welemak,” oluk edigonobogwi ai ’gela’ge, edikpesimu oruak puk. Erlak o. We, at ebaget wene disogo pelal wogo oruak. Allah en e,
“Ap Melkisedek an eiye a’ge welaga ai ’gela’ge,
hat an eiye modok-modok welerinogoluk edikhebegi o,”
oluk egeimu pelal wokho pegesa ai ’gela’ge, at Yesus pobuk warom erlak elaluk anni modok welago ai pam edikpesimu oruak o. 18-19Asogo oruakma, Allah en wene naduk nenesa’go weregei ai mia en ’garoksogo obabonobo erlakma en, we, almasogo welema no oluk, erlagap poluk e, pobuk wene ologun ’get a’ge lebikpesimu re, nenebe ’garoksogo obapnonobua oluk Allah e’bek horoksogo ’gu aga lege.
20Ye, wene ai Allah en ho’buk ’balogoat lebikpesi o. Is aphwami logon en e, is ap Allah eiye a’ge welemagoluk ho’buk ’balu erlakma en edigonobogwi a’geat de, 21#Mzm. 110:4at Yesus nak e, Allah en ho’buk ’balogo edikpasulat e, disogo mo’gulesi,
“An ’gain Nonuk Logo a’ge en hat an eiye a’ge modok-modok welerinogoluk ho’buk ’balogo edikhebegi ai,
pobuk niak agamsogo wene mu a’ge mesik niak esei ik erlak o,”
oluk mo’gulesi. 22Allah en,
“Disogoat ’garoksogo obaphenebaik,” oluk wene ’get a’ge werak poluk woknenebegei ai, demat ema oluk at Yesus ebeat edikpoluk woknentesi aiat o. 23Ye, wene mesigat akhen oruak o. Is ap Allah eiye welat togwi a’ge ’bekhit modok togwi erlakma enebe ebagase pam lebeksogo waragaiam e, enebalema edigonobogulat, til wagaiam enebe a’bigat welagai ai o. 24Asogo a’geat de, at Yesus nak e, Allah eiye elaluk modok welema ai en e, Allah en, is aphwami logon at ebalema edigonobouwa erlak o. We, at emategat modok welema o. 25Asogo elaluk modok welat, nis aphwami nenebaget Allah ’gonu mo’guloso modok welago ai en e, nis Allah oruakma ’guogoluk at e’bek til-til ’gogwiam elirat delnenebiselat ’garoksogo obapnonobua ai o.
26Nis nonogola en e,
“Ap mesik Allah eiye a’ge nis nenebaget op ’garoksogo disogo ’gain welat tagallep e,” oluk opogu lege a’ge, Allah en nonue Yesus aiat edikpesimu oruak o. At ebabut e, wiak tagalat logon dagan tago erlak, op degelak modok oruakma, aphwami wiak togwi a’ge ene’gerlakma en degelogo ’bogorl abel o’borl akhit erabu woluk ligagama, nis nenebaget oruak o. 27#Ima. 9:7Is ap Allah eiye a’ge ’gain ai re, nin erlige nan erlige onu’gwarek wiak togwi a’ge paget naduk onuam Allah warogulomtik en pobuk aphwami logon wiak togwi a’ge paget onuam wusogo Allah wogogwi a’geat de, at Yesus nak e, nis wiak togu lege a’ge paget nonuam Allah warom ’gela’ge, at ebe mesik erligeat waragalat, ebe Allah wogosi ai. 28Naduk wene Allah en nenesa’go weregei wene ai pam e, ap enebe mia a’ge, maben a’ge Allah eiye welemagoluk edigonobogu legesa a’geat de, pobuk Allah en ho’buk ’balegei ai pam e, at ebe u’gwarek omlogo nis delnenebiso a’ge ologun wusogoat ’garoksogo edikpesimu, at eiye a’ge ’gain modok oruak o.
Currently Selected:
Ibrani 7: Wul
Highlight
Copy
Compare
Share
Want to have your highlights saved across all your devices? Sign up or sign in
