Ibrani 6
6
1Ai en e, Kristus osi agalat togulom a’ge wene naduk nadugat mo’gulogwi ai a’ge mo’gulige a’ge ai oruakhwe, enarlue agalat togulom a’ge mo’gulogu lomok o. O wa’gi opsogo delak poluk pobuk ene’gik agam togwi erlak ai ’gela’ge, nis naduk wiak togu lege a’ge ’baksogo ukpoluk nenebabut heberlogo nenede Allah pam he’berik pege a’ge ai pobuk agam tul erlak o. 2Ik olomu ’bogwi a’ge wene ai mo’gulogulat, ena’gul sebelogwi wene ai mo’gulogulat, waragaiam Allah en nenelalugapnonobua wene ai mo’gulogulat, ologun pam wene nenebam pasulat, no’gorliselat, tisokhwe modok-modok wolomul wene ai mo’gulogulat, tige a’ge ai neniak agamsogo pobuk mo’gulul erlagat o. 3We, Allah en op epasu holuk, pobuk mo’gulu a’ge aiat mo’gulil laga lomok o.
4-6Is aphwami logon, Allah en enede atiarak enebasukhwe, di a’ge yu a’ge oduk nekholuk op a’ge wogwi ai ’gela’ge, Allah ’bogorl pam en o’go erlak weat woknentasu a’ge ai wogulat, Arogun so’butnentasu a’ge ai mesik wogulat, Allah iak ai op modok oluk enalugat welat, Allah ebabut op en pobuk annisogo op modok taknonobouwa ano owan taknonobo erlak oruakhwe, yogodak ya di a’ge yu a’ge naduk-naduk ’gomuk no’gwi ’gela’ge, wogentasuam horlogulat, togulomtik enat de, pobuk is en e,
“Allah nenebit o,” oluk iak ukpoluk pobuk togolik libotluk welat e, Yesus Allah omlogo ebe e pam edikpoluk worogulat eniak esegen wokhegesa ai ’gela’geat pobuk togwi ai o. Asogo modok til lagalat, pobuk, is en e,
“Nis wiak tige,” oluk enebabut heberluagoluk, pobuk togolik ’gesogo wogonoboluk wom ’gela’geat. Mia o.
7Allah en nin erlige nan erlige o moru ’gwiangma ’belabu wagoam e, ’gwiang opsogo sakho osoam aphwami en yabuk wokho di a’ge yu a’ge owi yorogwi a’ge en ebe op no’gwiam, Allah en,
“’Gwiang ai op o,” oluk obap pasuat o. 8#Kej. 3:17-18Asogo a’geat de, ’gwiang ai di agan e’ga yu agan e’ga wiak a’ge emin, molip orlok a’ge emin, ’baktiso holuk e,
“’Gwiang yu, we ’burlat almasogo oruak ai wiak nebit o,” oluk Allah en heman pasulat e, pobuk odouk narlik poma perlengsogo nouwa o.
9Asogo egi a’geat de, narilak norokhwi. Henebe nede o.
Allah en wiagaphonobua, oluk nenede opogu lege erlak o. At e, obaphonobua oluk pobi togu lege. 10At Allah ebabut e, dagan tiso a’ge puk. At hegitsogo nak tiso ai en e, his en at ebaget togulat henarilak honorokhwi Allah eiyagai a’ge logon henede en naduk lerontogulat, pobuk lerontogulat, togu legep a’ge ai, at en his memerak honobouwa erlak o. 11Narilak norokhwi. Nis nonogola nenagai e, his henede en e,
“Allah en nis obapnonobua,” oluk honogola henagai hogu legep a’ge aiat epasu lemarik, hwerli ologun pam en eiye orogup en e, togu legep ai ’gela’geat henebe lo’bok henannisogo togwi modok wolom nenagai opogu lege o. 12His henerim ’boksogo togulom e, nenebit o. Is aphwami naduk enede Allah pam he’berik poluk enerim om erlakma en, is en e,
“Demat wul,” oluk opogu legesa pam, Allah en e,
“His wokhentaik,” oluk obok mo’gulentesi a’ge ebe wegesa ai ’gela’ge, his asogoat is enebabut wokho togu lomup o.
“Allah en obok mo’gulentasu a’ge sogwi ago erlak,” oluk mo’gulentigisa wene
13-14 #
Kej. 22:16-17
At Allah en e, at Abraham mo’guleselat e,
“Hat pobuk disogo takhebaik,” oluk obok mo’guleselat,
“Hat hebe ip-opsogo takhebasulat,
heiyagai en dogo’gwe a’ge modok a’bik seik-’beiksogo wokheselat, tik o,”
oluk, ap mu a’ge onuk logo a’ge mesik erlakma re, Allah u’gwarek onuk pam ho’buk ’balogo mo’gulesi. 15Asogo mo’gulesimu, Abraham ede ’bugom erlakma en yetharok welaga ai pam, wene obok mo’gulesi a’ge ai, demat aga ai o. 16A’ge re, is aphwami en ho’buk ’baluogoluk holuk e, onu’gwarek ononuk mia ’gela’ge en e, onu’gwarek ononuk pam ho’buk ’balu erlak. We, is logon ononuk oruak logo a’ge ononuk pam ho’buk ’balogwi ai o. Asogo ’balogwiam e, is logon en wene ’balogu lema a’ge eniak erlak ago ai o. 17Asogo ago ai ’gela’ge, Allah en e,
“Aphwami an nede opoluk obok mo’gulentasu a’ge, niak edenogo pobuk mu a’ge mesik mo’gulentasu legi erlak o,” oluk, is obok mo’gulentesi a’ge nak demat opou wagoluk e, ho’buk ’balogo mo’gulentesi ai o. 18Wene ho’buk ’balogo mo’gulentesi ai re, nis Allah eragam ’gu ege a’ge nenede en,
“Obapnonobua o,” oluk eberak welege a’ge nenede ha’buksogo welemagoluk nisat mo’gulnentesi o. Obok eselat, ho’buk ’baliselat, wene ’biren egei ai, nis en e,
Allah iak esei oso modok erlak, oluk nenede ha’buksogo welemagoluk mo’gulnentesi ai o. 19#Ima. 16:2At en e,
“Obaphenebik,” oluk egei ai sogwi ema erlak.
“Demat ema,” oluk opogu lege a’ge, ik so e’gin a’ge ’gwiangma ningsogo erlelik poluk welagai ai ’gela’ge, nenede ’bogorl pam o hwerlirak o’gut akhit se’gerlak Allah oruakma eba hwedik takpoluk ha’buksogo wolomok o. 20#Mzm. 110:4At Yesus nis nenebaget ebela yogo poluk o eba ’gwegeitik, ap Melkisedek Allah eiye welat taga laga ai ’gela’ge, modok-modok taga lema a’ge Allah eiyesogo ’gain agarik welago ai o.
Currently Selected:
Ibrani 6: Wul
Highlight
Copy
Compare
Share
Want to have your highlights saved across all your devices? Sign up or sign in
