Ibrani 8
8
At Yesus nis nenebaget Allah eiye a’geat
’Gain welago wene
1 #
Mzm. 110:1
Nis wene ogu lege ai, logo re, yuat o. Nis nonue ’gain Allah eiye a’ge ege ai ’gela’geat oruak. At ebe re, Nenaik ’gain Onuk Logo a’ge Allah welagoma eba eragam e’gik ’bekhit akhit ’gainat oruak o. 2Asogo oruak ai, Allah owi sum a’ge aphwami en lodu paget werigisema oruak puk. Erlak o. We, Allah u’gwarek owi demat a’ge weregeimu eba welat nis nenebaget tiso yo.
3Is ap Allah eiye a’ge onuelak ’gain enebe lo’bok edigonobogwi ai re, di a’ge yu a’ge Allah wogogulat, onuam warogulat, togu lemagoluk edigonobogwi ai ’gela’ge, nis nonue Allah eiye a’ge ’gain ai re, di a’ge yu a’ge logon nis nenebaget Allah wogoum a’ge oruak o. 4Wene Allah en nenesa’go weregei wene ai hegitsogo re, di a’ge yu a’ge Allah paget wogogulom a’ge, is ap Allah eiye a’ge enebe oruak ai en e, at Yesus ebe ’gwiangma yema wellepma re, Allah eiye wellep erlak o. 5#Kel. 25:40Allah en e,
“Nowi sum a’ge lodu paget werik nobomup o,” oluk Musa mo’gulesimu, o ebe weriogoluk tisoma re, pobuk disogo mo’gulesi,
“An nemin dom pam welat, an nowi disogo werik nobomup,
oluk elit a’ge walsogo onukhiegi ano hegitsogo modok werinogoluk, hede eberak modok wolomup o,”
oluk mo’gulesi ai ’gela’geat, is ap Allah eiye a’ge ’gwiangma yema welat, ebe ’bogorl pam oruak a’ge ebam elit hogulat, ogut walhogulat, togwi ai o. 6Asogo togulat, is e, mia ogut hele’gik a’ge togwi a’geat de, Allah en,
“His obaphenebik,” oluk obok mo’gulnentesi wene ebam louktak, at Yesus ebe Allah emin, nis aphwami emin, ’burl heirakma welat, wene Allah en ’get a’ge wusogo woknenebegei hegitsogoat demat a’geat logo modok pasu ai o.
7Wene naduk Allah en,
“Obaphenebaik,” oluk wene wusogo woknenebegei ai pam mia om erlakma en obapnenebelipmu re, wene ai ebalema,
“Obaphenebaik,” oluk pobuk elip erlagat o. 8#Yer. 31:31-34A’geat de, Allah eiyagai wene ai tenakho welat, mia ’gela’ge togu legesema disogo mo’gulentesi,
“Aphwami Israel a’ge emin, Yehuda a’ge emin,
an en wene ’get a’ge wusogo wogenebik a’ge oruak o, oluk demat mo’gulhentegis o.
9An en his hene’balak o Mesir en wogonoboluk liplau weigoluk ene’gik tenentasulat,
Disogo takhenebaik, oluk wene weragenebegi ai ’gela’ge puk. Muat o.
An en is wene weragenebegi a’ge ai hwelakpoluk hegitsogo tu erlak ai en e,
is enebe nebit, oluk enagap ’goboksogo ugenebegi ai o.
10Pobuk aphwami Israel wene ’get a’ge wusogo wogenebigoluk egi ai, ebe yuat,
An en wene enesa’go weriso a’ge ai onogola eberak modok welemagoluk,
wogentasulat, enedemu pelal wokho pasulat, toluk e, an is enaik weleik o. Ye, is an neiyagaiat welema o.
11Is enarlue ’gain emin, malik wei a’ge emin, ’berlegat enaik an nebe enaluk welema ai en e,
is enaiklak onuelak emin, enarilak onorokhwi emin, mo’gulentasulat,
Henaik Allah ai henaluk omup o, oluk mo’gulonto erlak o.
We, onu’gwarek enabusak enat, nebe enaluk aga lema o.
12Is wiak togwi a’ge ai, an en erlagapsogo ukpoluk,
pobuk nede eberak weleik erlak o,”
oluk mo’gulentesimu pelal wogo oruak. 13At en e,
“Wene ’get a’ge wusogo wogenebik,”
oluk egei ai re, wene page a’ge erlagap paigoluk egei o. Di a’ge yu a’ge page a’ge il wiak agoam perleneat ukpogwi ai ’gela’ge, wene naduk a’ge erlagap paigoluk egei ai o.
Currently Selected:
Ibrani 8: Wul
Highlight
Copy
Compare
Share
Want to have your highlights saved across all your devices? Sign up or sign in
