Hagai 1
1
Allah owi ebalema woruak oluk mo’gulentesi wene
1 #
Ezr. 4:24–5:2; 6:14 Ap Darius ’gain otluk wene le’gelogo mo’gulentasukhwe, tahun mesik takpoluk mesik tagokhwe dogwi huaben pelelak poluk mesik pelelak a’ge tanggal satu ai erlige at ’gain Onuk Logo a’ge Allah en at mo’gulosokhwe mo’gulentasu a’ge Hagai ano Allah en mo’gulosoam, at Hagai en ap Sealtiel omlogo o Yehuda eiye welago a’ge Zerubabel ano emin, ap Yozadak omlogo Allah eiye a’ge onue Yosua ano emin, mo’gulentesi.
2At anni modok welago a’ge at ’gain Onuk Logo a’ge Allah en egei ano re, yuat o. “Is aphwami yu en ogulat e, at ’gain Onuk Logo a’ge Allah owi ebalema woru erlige horok lau wom erlak ogukhwe entegis o, oluk, egeimu en, mo’gulhentegis o,” oluk, mo’gulentesi. 3Asogo mo’gulentesirik, at ’gain Onuk Logo a’ge Allah en at mo’gulosokhwe mo’gulentasu a’ge Hagai ano en, is aphwami mo’gulontouwak oluk, mo’guleselat, 4“Is an neiyagai ai, an nowi werik a’ge moluk-moluk legenak oruakhwe, is nak e, onowi e modok op a’ge pam werik pagathorloluk wolom a’ge arat horok lau waga ya? oluk, egei o. 5Asogo egeirik, at anni modok welago a’ge at ’gain Onuk Logo a’ge Allah en pobuk, eminat eselat e, is tagenebil lasu ano pobirak pogu lemak o. 6Is owi a’bigat yorogwi a’geat de, e’gen wei nak ’balhorlogulat, onso’boru loksogo no’gwi a’geat de, onogummu om erlagat welat, enegeik a’bigat no’gwi a’geat de, onogum om erlakma en nele nak welat, onosum ’bukhorlogwi a’geat de, enebam aganhan ago erlakma en sogwei nak enagap pam e’gerlik welat, yabuk togwi a’ge o’go horlogwi a’geat de, ’geba lasu ’gela’ge takpogulat, togwi o, oluk, egei ai o. 7Asogoatma re, at ani modok welago a’ge at ’gain Onuk Logo a’ge Allah en mesik emin, eselat e, 8is tagenebil lasu a’ge ai re, enede pam enat pobirak pogu lemak o. Yogodagat dom pam ligotluk e il ’gogolak poluk An nowi ebalema wosumak o. Ai worogwi holuk e, An nogola nagai enebam pasulat, An nonuk lok agokhwe houwak oluk, takpasulat, togolik o, oluk, at ’gain Onuk Logo a’ge Allah enat, egei o. 9At anni modok welago a’ge at ’gain Onuk Logo a’ge en eselat, e’gen a’bigat ’bal horlo a’ge oluk onogola epegesa a’geat de, we wei nagat ’balhorlogulat, ye wei nak ’bal horloluk onowi pam pou wegesa a’ge ebano, o yasobu en woluk nal-pal houwak oluk, takpasuam e, woluk nal-pal takpesi ano re, no oluk en tegei? Ai, tegei a’ge edip ano re, an nowi werik a’ge moluk-moluk lasukhwe, is onomu nak onowi ut horlo a’ge paget nak enede sagalak til lagai ai pam en tegis ai o. 10Is en togwi ano pam ’bogorl pam en moru legen ’belakpou wago erlak welat, ye, ’gwiang a’bosu en di a’ge yu a’ge e’gen hurleapsogo po erlakma en welat, tago yo. 11O yu ’gwiang ’buk agalat, dom-dom asu ’belakpasulat, gandum yogo a’ge emin, e anggur e’gen egeik a’ge emin, e Zaitun e’gen egeik a’ge emin, di a’ge yu a’ge ’gwiang pam yogo a’ge ’berlegat ’gen ’gen agalat, aphwami enemage ’buk agalat, onuam asu li eselat, aphwami en mesik horlouwok oluk set a’bik togwi a’geat de mesik ogo sabuthorlogwi erlagat welat, tuagoluk, o hebi lau mak o, oluk, an enat worlhegi o, egeimu re, mo’gulhentegis o,” oluk, mo’gulentesi.
12Mo’gulentesimu, at Sealtiel omlogo Zerubabel emin, ap Yozadak omlogo Allah eiye a’ge onue Yosua emin, is aphwami pobuk togolik wegesa a’ge ’berlegat emin, at enaik ’gain Onuk Logo a’ge Allah en at mo’gulosokhwe, mo’gulentasu a’ge Hagai wene mo’gulontouwak oluk, perak pou wagama re, at enaik ’gain Onuk Logo a’ge Allah en egei a’ge mo’gulentesi ano enesa’go hwelegisarik, at Allah ebe onogorlok aga.
13Asogo onogorlok agama, aphwami mo’gulontouwak oluk, Allah en perakpou waga a’ge Hagai ano en at ’gain Onuk Logo a’ge Allah mo’gulesi a’ge ano is mo’gulentasulat, “at ’gain Onuk Logo a’ge Allah en An eneminat welik egei ai o,” oluk mo’gulentesi.
14Mo’gulentesimu, at Sealtiel omlogo o Yehuda eiye welago a’ge Zerubabel ano emin, ap Yozadak omlogo Allah eiye a’ge onue Yosua ano emin, is aphwami pobuk togolik wegesa a’ge ’berlegat emin, at Allah en tu a’ge enede ’gagalisoam, odoktu wegesarik, at anni modok welago a’ge enaik at ’gain Onuk Logo a’ge Allah owi woruak oluk, tenak pegesa. 15Ai tigisa ano re, ap Darius ’gain otluk, wene le’gelogo mo’gulentasukhwe tahun mesik takpoluk mesik agokhwe dogwi huaben pelelak poluk mesik pelelak a’ge tanggal 24 pam Allah owi woruak oluk, serlelegisa.
Currently Selected:
Hagai 1: Wul
Highlight
Copy
Compare
Share
Want to have your highlights saved across all your devices? Sign up or sign in
