Habakuk 2
2
Allah en wene o’go Habakuk mo’gulesi wene
1An en wene Allah mo’gulegis a’ge ano, o’go ’gesogo mo’gulnema. An aphwami mo’gulontuagoluk, no’gosogo a’ge mo’gulnema, oluk an yel’berla enil welagaimu ligotluk nil weleik, 2oluk egimu, Nenaik ’gain Onuk Logo a’ge en, wene o’go disogo mo’gulnesi,
“An en wene habi ’gela’ge pam mo’gulheik a’ge ai, aphwami logon en pobisogo onuk mo’goluagoluk, pelal e e’bet saintak a’ge pam dokhumsogo wokho pemen o. 3#Ibr. 10:37Wene ebe ema a’ge, owan ai en e, pelal wokho pemen o. Pobuk il, pobuk il, oso wolom erlakma en, an en habi ’gela’ge pam ’baksogo mo’gulheik a’ge ai, erlak om erlakma en perleneat ema oluk, owan om erlak oruakhwe ’gwelakharok wolomup o. 4#Rom. 1:17; Gal. 3:11; Ibr. 10:38Weni ebe yu: Is wiak togwi a’ge ai op ema erlak o. A’geat de, is logon Allah ogola agai epasu a’ge hegitsogo togwi a’ge nak, enede Allah ebam he’berik poluk welema ai pam, enelaluk modogat welema o,” oluk mo’gulnesi.
Wiak togwi a’ge heman onobua wene
5Ena’ge a’bik ai en enebe lalenebiso yo. Aphwami waragai modok welagai ai ’gela’ge, is ena’ge a’bik a’ge ai en,
“An na’ge elit oruak,” oluk opo erlakma enat,
“An nak nebam wellep e,” oluk opogwi modok welat, erlikhorlogwi ai o. Ai en e, di owi yu owi onu’gwarek eneragam a’ge pou wagoluk sebelil-sebelil wagai ai o. 6A’geat de, is eneragam onobogwi a’ge ai en e, is enanni oruak a’ge ebano eniak esegen wogontogulat, ene’gerli worogulat, asogo togulat e,
“Is logon ena’ge odoksogo pagathorlogu legep ai en, Allah en heman honobouwak o! His hena’ge is ado enebam ’belaga’ge oruak ai en, is ena’ge-a’ge hene’gik abusak delogu legep a’ge ai, ’ge erlige en mo ogup no?” oluk ogwi o. 7His wongat oruakma, is logon ena’ge-a’ge henebam ’belaga’ge welegep a’ge ai,
Ebe a’ge woknontogulat, ebam louksogo mesik woknentemit o, oluk ningsogo mo’gulhontouwayat o. Ye, his henselei a’ge wotluk e, honogorlok emagaluk togulat, hena’ge ene’gik abusak horlouwayat o. 8His en e, aphwami ena’gul onuk lo’bok o di owi yu owi welagai a’ge, henanni wiak enebe waronobogulat, onowi kota moluk-melaksogo ’bo pogulat, enebe wiagap onobogulat, togulat, ena’ge hene’gik abusak delogo hwerlegep ai en e, pobuk is a’ge ado enelaluk welema a’ge en e, togolik lagaksogo his hena’ge ene’gik abusak delogo horlouwayat o. 9Honu’gwarek heneiyagai henemin di a’ge yu a’ge a’biksogo horlouwogoluk, henanni wiak is logon ena’ge-a’ge delogo horlogulat, ye, his honowi pam is pema en ene’gik abusak wa ’guma no oluk o ningsogo worogulat, togu legep ai, Allah en heman honobouwak o. 10His henebabut togu legep ai pam, honu’gwarek heneiyagai ene’gerli ago yo. Aphwami ena’gul onuk lo’bok wiagap onobogulat, honu’gwarek en wiagaphorlogu legep ai o. 11Aphwami en wene henebam po ’gela’ge re, o werik yema, eleget helep wogo a’ge en,
“His wiak,” oluk osoam, iak ogut e, o uak daintak a’ge pam en togolik lagaksogo, asogo mo’gulhentasuat o.
12Honowi seli ai re, ’bobuk daintogwi ai ’gela’ge, wiak togulat werigep ai o. ’Bobuk daintak poluk o worogwi ai ’gela’ge aphwami enemep ’belabogu legep ai en, heman honobuak o! 13Aphwami ena’gul onuk lo’bok his en sebelogo enebegep a’ge ai, mep li-lagaiksogo o werigisa a’ge ebano odouk en nasulat, set hoporak togu legesa a’ge ai alemat agalat, tua ai, Nenaik ’gain Onuk Logo a’ge di a’ge yu a’ge tu nak a’ge ano en e, at ede epesi a’ge hegitsogoat ema o. 14#Yes. 11:9A’ge re, ik laut lok ye’gelak ogum ’buaksogo welaga ai ’gela’ge, aphwami o ’gwiangma yema nenaik Allah Onuk Logo erliktogwi a’ge ai enaluk ema a’ge enebe a’bik ema o.
15Henarilak ik enede ’balemagoluk no’gwi a’ge noluk, lugwi-lugwi ’balogo ene’gerli erlak enage’golom no’gulemagoluk wogontogu legep ai en e, Allah en heman honobouwak o! 16Yogodak his ogo re, ik ai a’ge a’bigat noma, erlikhonobua puk. We, onogola mi-miarak honoboma logat hene’gerli hagup o. Ik no’gwiam enede ’balagai a’ge, a’bigat noluk e, henepe lugwi-lugwi sogo honuak erlang-perlang ’bok lu o!
Aphwami en is logon ik nouwagoluk wogontogwi ai ’gela’ge, Allah enat hene’gerli emagoluk wene e’gin henebam pouwa o. Yogodak erlikhonobogwi ai, pobuk onogola en mi-miarak honoboma hene’gerli ema o. 17His henanni wiak aphwami o di owi yu owi welagai a’ge enemep enamogo waronobogulat, onowi seli kota modok wiagapsogo pogulat, togulat e, o Libanon eba e modok mukho-makho tigep ai ’gela’ge, henebe asogoat mukhonobua o. His en wam, sue, ’baik eba a’ge wusogo erlagap tigep ai ’gela’ge, wam, ’baik ai en, pobuk lagaksogo honogorlogap honobua o.
18Henede enat, e a’ge hele’gik poluk,
“Nenaik,” oluk ogu legep ai nopaget. We, ’burlat o. E ai a’ge en demat wene mo’gulhentasu no? E ai lalhenebiso a’ge o. Iak modok erlak a’geat de, is e ebe hele’gegisa a’ge oruak ai ’burlat e ai a’ge pam he’berik welagai o. 19His en e, e a’ge mo’gulogulat e,
“Helaluk emin,” ogulat, helep a’ge mo’gulogulat e,
“In emin,” ogulat, ogu legep ai, is ai en o’go mo’gulhontouwa no? Orogole il opsogo oluk e, emas emin, perak emin, ebam lo’boksogo hele’gik a’geat de, arogun e, erlak o. Asogo togu legep ai en, Allah en heman honobouwak o.
20A’ge re, Nenaik ’gain Onuk Logo a’ge u’gwarek owi werikmu oruak o. Di aphwami yu aphwami ’gwiangma yema at il pam eniak erlagat welemak o.
Currently Selected:
Habakuk 2: Wul
Highlight
Copy
Compare
Share
Want to have your highlights saved across all your devices? Sign up or sign in
