Yehezkiel 4
4
O Yerusalem laru a’ge enaluksogo wene
1Mo’gulnosoma hegirikmu en, wene mesik an mo’gulneselat, aphwami en dogo a’ge yu o, ’gwiang a’ge pam ebelogo worogo a’ge onuk batu bata mesik waguntik, hologotma poluk, o kota Yerusalem ogut heli’gogo pemen o. 2Pasu loroguntik, o kota ogut hele’gik ai a’ge walhegeik tu a’ge emin, o kota sebeli’gwilo a’ge emin, walhegeik tu ano re, yuat o. Onoyuk ’berla pil ligom a’ge walsogo pil lasulat, ’gwiang palogo pil ligom a’ge walsogo pasulat, ap enesegen oruak a’ge onowi sabo wali’gogo woru a’ge walhegeik pasulat, o pak wogo wali’go’go woru a’ge walhegeik pulogo pasulat tip o. 3Asogo takpasu loroguntik, sogoluak ebak besi a’ge mesik wokho pak besi a’ge pam wogo a’ge ’gela’ge, o kota ogut hele’gik hat wolomma ’burl eria edikpoluk, ebelogo pasu lomup o. Asogo pasulom ai, is Israel a’ge tagonobo a’ge enaluksogoat taga lorogun ai o.
4Asogo taga loroguntik, habel hware akhit o’gwe ’bou otluk, oruakhwe, an en is Israel a’ge onowiak o’go tagonobo a’ge walhegeik hebam paik o. Ye, merenam ’gela’ge habel hware akhit ’bourak wolom ai ’gela’ge, is onowiak o’go e’gin enebam po a’ge walhegeik hebamat welema o. 5Is wiak togwi holuk o’go tagonobo a’ge tahun tu ano ’gela’ge, hat nogo ilo a’ge pulogo pegimu re, is Israel a’ge onowiak o’go hebam paikmu oruakhwe agauwa nogo 390 pamat ilasu lomup o. 6Ai arat togun holuk habel ’bekhit akhit o’gwe ogo ’bou otluk, oruakhwe, is Yehuda a’ge onowiak o’go tagonobo a’ge walhegeik hebam paikmu oruakhwe, nogo mesigat u ai re tahun mesik pam onowiak o’go tagenebasulom ’gela’geat pulogo pegimu re, nogo 40 pamat nogosolomup o.
7Nogoilasulat, holukhwe o Yerusalem hegit eba yethailaguntik, o ai sebele’gwilo ’gela’ge takpoluk, o ai he’gik e’gerlik poluk wal tagalat, disogo takhebasumu hagun ani o, oluk, o kota ogut hele’gik ai mo’guleselat, taga lomup o. 8O Yerusalem sebeli’gwilo a’ge paget nogo disogo u o, oluk, wene werak a’ge ano owan tilo erlakhwe hat habel pema edenhasulat togun no oluk An en herle wusogo hebaik o.
9 Gandum e’gen emin, jelai e’gen emin, hurla’gen momi lok a’ge wei a’ge, weinyali emin, he’bak e’gen emin, lologo sogoluak mesigat ogola yagarak pagathorloluk, hat habel hware akhit ’bourak welat, hoso’boru aiat nasukhwe, agauwa 390 pamat emak o. 10Hoso’boru ai nasulat, agauwa mesik pam e, sogoluak wei a’ge 230 gram a’ge pam walholuk, o mo ai pamat nasulom oluk, pulogo poluk, ai pam nak nasulat, asogo taga lomup o. 11Ye, hegeik nasulat ogo re, agauwa mesik pam sogoluak liter ’burl il likho’gwe ’gela’ge walhegeik o mo il ai pam no ai oluk, polik poluk ai pam nak nasulat, asogo taga lomup o. 12Aphwami enal werik ’buk a’ge pam odouk narliso loroguntik, aphwami enil oruakhwe, hoso’boru ai pam worogo poluk, roti op a’ge ’gela’ge ago holuk nasu lomup o.
13Asogo tu ano re, is Israel a’ge di aphwami yu aphwami ene’gerlakma enebei laikmu di aphwami yu aphwami ene’gerlakma welat, so’boru enemelmel a’ge no’gulom a’ge walsogo pegi ai at o, oluk, Allah enat mo’gulnesi o.
14Mo’gulnesimu, an en At mo’guleselat, “Hat hotok modok welegen a’ge Naik Allah o. An Asogo tu mia o, naik o. Wiak a’ge mesik an nebam e’gerlik erlagat welegi o. An malik wei pam enat ’bekhit yogodak hwerli werak a’ge nasulat, orlomene en nasulat, ado pasu a’ge nasulat, tu mia oluk wene werak ano a’ge einnyo ogo, nemdema mesik pasu erlagat o.”
15Mo’gulegismu, at en an mo’gulneselat, “Ai holuk e, aphwami enal werik ’buk a’ge pam weraru a’ge ebalema sapi enal werik ’buk a’ge pamat hoso’boru werak hwerlasu lorogun ai opat o,” oluk mo’gulnesi.
16-17Mo’gulnesirik, wene mesik emin an mo’gulneselat aphwami en dogo a’ge yu o. O kota Yerusalem eba so’boru louktak oruak a’ge ano an en erlagapsogo pasu holuk, so’boru emin, ik emin, weiyat emma re, so’boru wei-wei wogontogwi holuk enede perik welat, no’gulat, ye, ik wei-wei na’gogo wogontogwi holuk e, miayat taknonobouwa hegi oluk enede opogulat, no’gulema o. Enil yet-yet ogulat, yu taknenebegesa logwe, oluk, erliktugulat, wiak til lagalat, enebe erlak etil lagalat, tugu lema o, oluk, mo’gulnosoma hegi o.
Currently Selected:
Yehezkiel 4: Wul
Highlight
Copy
Compare
Share
Want to have your highlights saved across all your devices? Sign up or sign in
