Yehezkiel 3
3
1 #
Wah. 10:9,10 Asogo hegimu, Allah en e, disogo mo’gulnesi,
“Hat aphwami en dogo a’ge yu o. Tuesi’ga e’gerlik a’ge heragam oruak a’ge men o. Noluk e, aphwami Israel a’ge wene mo’gulentarok oluk, lak o,” oluk mo’gulnesi. 2Asogo mo’gulnesirik, nemde la, holuk Allah en tuesi’ga e’gerlik a’ge ano nouwagoluk woknesi. 3Asogo woknesirik, an mo’gulneselat,
“Hat aphwami en dogo a’ge yu. Tuesi’ga e’gerlik a’ge ai, noluk hogum ogola ’belabin o,” oluk mo’gulnesi. Asogo mo’gulnesimu, tuesi’ga ano ne’gi ’gal e, oduk op ’gin a’bosu ’gela’ge modok nek-nek egei.
4Asogo ne’gimu, Allah en e, disogo mo’gulnesi,
“Hat aphwami en dogo a’ge yu. Hebe aphwami Israel a’ge ene’bek loluk e, wene an en mo’gulheik a’ge ai ’berlegat mo’gulontomup o. 5-6An en e, hat yo’go hoboluk, aphwami ena’gul onuk mu a’ge logon eniak heperlak en pobitu puk a’ge ene’bek perakhebaik puk, erlak o. Aphwami enebabut asogo a’ge ene’bek perakhoboma re, enesa’go holu o. A’ge re, aphwami Israel a’ge enebaget perakhebaik o. 7Enede helep ’gela’ge modok ningtak welat e, an nebam enede he’berik poluk wolom enebit welagai ai en, hat hiak osoam enesa’go holua modok erlak o. 8Ai en e, yethemin, hat en is enede modok ningtak helep ’gela’ge ai sebelogo erlagap pagun en e, an en hede ningtak hebaik o. 9Hede helep sele ’gela’ge re, erlak o. At e, helep onuk ’bun ’gela’ge modok harowiak a’ge ai ’gela’ge takhebaik o. Holuk e, is enebabut an neragam wolom enebit welat onorogole haro ai yerontoluk hogorlok hagun o,” oluk mo’gulnesi.
10Allah en asogo mo’gulnesirik, mesik disogo mo’gulnesi,
“Hat aphwami a’ge yu. An en wene mo’gulhegis a’ge ai ’berlegat opsogo pobirak poluk e, hede eberak modok wolomup o. 11An henaik ’gain Nonuk Logo a’ge en is aphwami hat hemin hena’gul onuk mesigat a’ge ene’gik herle wusogo wogonoboluk wegesema welagai a’ge paget ik a’ge ai mo’gulentanok oluk, ene’bek lak o. Eba loluk mo’gulentasukhwe enesa’go holua ya? Holu erlakma en mo ua ya,” oluk mo’gulnesi. 12-13Asogo mo’gulnesimu re, Allah Arogun en nebe ha’boksogo woknoboluk lasumu re, is Allah en walentesimu enelaluk welagai a’ge ebano enagapsaburl o’borlogouk puk-puk eselat, ye, enabel akhit en e, ’gwiangso e’beri ’gela’ge ebano wale’giselat o’borlogouk loksogo ’bak-’bak eselat, taga laga a’ge ai, la’bulogo aphwami en,
“Nenaik ’gain Onuk Logo ’bogorl pam erliktogwi a’ge ano erliktuok o,” oluk u ’gela’ge, no’borloma en iak loksogo osoma nesa’go hwelegis. 14At Nenaik ’gain Onuk Logo a’ge e’gik annisogo tenaknebesirik, Arogun en nebe ha’boksogo woknoboluk lasumu re, nolot het agalat, nogola wiak agalat, tegei o. 15An nebe Allah Arogun en asogo woknoboluk, aphwami Israel a’ge herle wusogo wogonoboluk wegesema enebe o onuk Tel-Abib, ik Kebar esa’goma eba oruakma ene’bek nebei laga. Asogo nebei lagama, an o eba agauwa 7 en welat nede wong egeimu niak no’gosogo u ’gela’geat mo egirik welegi.
Allah en Yehezkiel mo’guleselat, “Hat en aphwami Israel a’ge tenentarok wolorogun en edikhebegi o,” oluk mo’gulesi wene
16An agauwa asogo 7 pam welegirik oruakma, Nenaik ’gain Onuk Logo a’ge en disogo mo’gulnesi an mo’gulneselat,
17“Hat aphwami a’ge yu. Hat en aphwami Israel a’ge tenentarok wolorogun en, edikhebegi o. Hat en is hoso’bi mo’gulentanogoluk mo’gulheik a’ge yu mo’gulontomup o. 18An en e, aphwami logon enebabut wiak togwi a’ge paget mo’gulheselat e, demat.
At ai ebe warema o, oluk mo’gulhoso Holuk hat en e, at mo’gulomup, oluk mo’gulheik a’geat de, hat en at ebabut wiak tiso a’ge ai ukpoluk ebabut heberlemagoluk hoso’bi mo’guloum erlakma re, wiak tagalat warema holuk e, at emep hat he’gik pam oruak oluk mo’gulheik ani o. 19Asogo a’geat de, hat en at ai hoso’bi mo’gulorogun a’geat de, at en wiak taga lema a’ge ai ukpoluk ebabut heberlom erlakma en wiak tagalarat warema holuk, hat hu’gwarek en delhwerlagun o. Hebam selak o.
20Ye, ap mesik op tago a’ge, pobuk ukpoluk wiak taga lema holuk, an en e,
Hat hebabut asogo togun holuk e, pobuk warotluk nalorogun o, oluk ik a’ge ai, hat en e,
Allah en hat pobuk asogo togun egei, oluk at hoso’bi mo’guloum erlakma re, at wiak tua ai pam ebe warema holuk, an en at ebabut op taga laga a’ge ai eberu erlakma enat ukpoluk e, at emep hat he’gik pam paik o. 21Asogo a’geat de, hat en at ai mo’guleselat,
Hat asogo tu puk o, oluk mo’gulosoam, hiak esa’go hweliselat, wiak tu erlakma en mo ua holuk e, at ebe elaluk welema o. Ye, hat hu’gwarek en hebe delhwerlagunat ani o,” oluk mo’gulnesi.
Allah en, Yehezkiel ede wongtak poluk, iak erlagap pesi wene
22Asogo mo’gulnesirik, Nenaik ’gain Onuk Logo a’ge e’gik annisogo tenaknebesirik, at iak disogo mo’gulnosoma nesa’go hwelegis,
“Hebe siaksogo inotluk e, o do’goma eba an en wene mo’gulheik en e, lak o,” oluk mo’gulnesi. 23Asogo mo’gulnesimu, an nebe o do’goma eba legirik, Nenaik ’gain Onuk Logo a’ge ebe erliktogwi a’ge o ik Kebar esa’goma en nil hegi a’ge ano ’gela’geat nil hegi o. Asogo hegirik e, nebe norogole sogup ’gwiangma sakhun egi. 24Asogo sakhun osoam, Allah Arogun nogola ’goluk nebe ediknebesimu, Nenaik ’gain Onuk Logo a’ge en e, disogo mo’gulnesi,
“Togolik loluk e, howi pam ’goduk lasogo wolomup o. 25Hat aphwami a’ge yu, hebe asogo oruakhwe, hebe libotluk aphwami logon ene’gerlak o’gwe noso lorogunno oluk, is logon en herle wathobua o. 26Asogo wathobumu, aphwami enebabut an nemin hwedik wolom enebit a’ge ano hoso’bi mo’gulentasumu no oluk an en hema’ge horo’go pam dopnosogo herle ’gela’ge hettak hoboluk, hiak modok erlagap hebaik o. 27A’ge re, pobuk an en hat hiak ese lerinogoluk togolik hiak oruagap takhoboluk e, wene mo’gulheik holuk, an haik ’gain Nonuk Logo a’ge en wene is enebaget mo’gulheik a’ge ai, is mo’gulontoat o. Asogo mo’gulentasuam, is aphwami ena’gul onuk ai a’ge re, neragam wolom enebit ai en e, is logon wene ai enesa’go holu holuk e, enesa’go holuagat o. A’geat de, is logon wene ai enesa’go holu erlakma en mo ua holuk e, mo uagat o. Is enat o,” oluk, mo’gulnesi.
Currently Selected:
Yehezkiel 3: Wul
Highlight
Copy
Compare
Share
Want to have your highlights saved across all your devices? Sign up or sign in
