Yehezkiel 39
39
Ap onuk Gog sebelogo po wene
1“Aphwami en dogo a’ge yu o. At otok modok welago a’ge Allah en egei ano re, yuat o, oluk, at Gog ano sebelak po a’ge mo’guleselat e, is o Mesekh a’ge emin, o Tubal a’ge emin, onue ’Gain Gog ai, nemin hwerlirakma re, 2At olukhwe edenak poluk, o abel akhit walek enat lisogo woluk waga leiktik, is Israel a’ge welagaimu ebano dom-dom sebelil louwagoluk, pou weik ani o. 3Pou wagoam sebelil lasuam e, e’gik hware akhit werisoam e, e’gik senap agalat, esegen ’goboksogo ’biselat, e’gik ’bekhit akhit werisoam e, ogodok e’gen ebano ’bulel-’bulel ’biselat tua o. 4Israel a’ge welagaimu dom-dom eba pam at emin, osilak enesegen oruak a’ge emin, di aphwami yu aphwami at akhit egesa a’ge emin, ’berlegat werak ’bi louwa o, ’bi lagaiam, an en enebe wokho sue eneinnyo no’gwi a’ge a’gul onuk ’berlegat emin, seiye hogobi emin, onoso’boru eniorumat emagoluk, wogentaik o. 5Yabuk o’gwe eba en waretil louwa ani o, oluk, An notok modok welago a’ge Allah enat egimu re tigat o. 6An en odouk o Magog pam pasulat, di ap yu ap o ik iak petne enede we yogun lielak oruak a’ge ebano enebam pasulat, tikmu re, is en an Allah at enaluk ema o. 7Nonuk modok op omu degelak a’ge ano en an neiyagai Israel a’ge houwagoluk tikmu re, is an nonuk modok op omu degelak a’ge ano wiagapsogo pogukhwe, an en logon emin ugenebaik erlak o, tagenebasuam, di aphwami yu aphwami en, At Allah ai, is Israel a’ge enaik mu ago erlak omu degelak welago a’ge arat hege o, oluk, enaluk ema o.
8Asogo tu a’ge ano arat tuma. Tu erlige egesa ano demat tuma o,” oluk. At otok modok welago a’ge Allah enat egeimu re, mo’gulhegis o. 9“Asogo tu agoam, is aphwami Israel a’ge kota-kota welema a’ge ebano libemarik, weim togwi a’ge sing weim sum wei-lok ebano emin, enesegen onogodok emin, go’bu waronobogwi a’ge e ’belak emin, onua’gun emin, ’berlegat e kelak ’gela’ge takpoluk, ai pam onoso’boru werakho no’gukhwe, tahun 7 at tua o. 10Weim togwi a’ge di a’ge yu a’ge eba re, so’boru weraru a’ge nenagan ’gelagat oruak o, oluk, ai a’ge nagat o’go ’balogulat, yabuk warlik mu enagan kelil lagalat, e’gelama ebano enagan mosi lagalat, togu lema erlak o. Aphwami en Israel ena’ge-a’ge hogul woluk legesa a’ge ebano o’go is Israel a’ge en is aphwami ai, ena’ge-a’ge asogoat hogul woluk lagalat, is aphwami en Israel ena’ge-a’ge hokhom toluk libegesa a’ge ano, o’go asogoat is Israel a’ge en is aphwami ai, ena’ge-a’ge hokhomsogo horlogulat, tua ani o,” oluk, At otok modok welago a’ge enat egeimu en egi o.
At Gog ano ’gwiang ’balogo salu wene
11“Agauwa ai erlige is Israel a’ge welagaimu o mo orlu ago akhit o’gwe ebela ik lok laut pam lagaimu dogoma eba, at Gog ebe salumu ’gwiang ’balogo wogeik o. At Gog emin, at osilak enebe a’bik logolak emin, enebe eba salonobogwiam, ebela ’gwe ai ’belak paikmu re, aphwami ebela ’gwe ai laga lema erlagat o. Asogoatma re, o ai onuk, ap Gog osi a’bik logolak salonobumu o dogoma o, oluk, ogu lema o. 12Is Israel a’ge ono’gwiang ai, op emagoluk, is Israel a’ge en aphwami werak ai, ’gwiang ’balogo salonobogukhwe, dugwi 7 at pelelua o. 13Is o Israel eba welagai a’ge ’berlegat let-let ’gwiang ’balogo salonobogu lemama re, an nesegen siak ua erlige is en tua a’ge ano ononuk il laga lema o, oluk an notok modok welago a’ge Allah enat egi o. 14Dugwi 7 pelelisoam e, ’gwiang eba obab pou wagoluk o eba ap pema logon enil ’gogolil no’gulat, is logon en ap werak ’gelilogo oruak holuk, ’gwiang ’balogo, selak onobogulat, tuagoluk, ap meren ’gela’ge pulogo onobul ani o. 15Is pulogo onobul a’ge ano en o eba enil ’gogolil lagalat, onuak porlolak mesigat nak mesik oruak holuk, enak a’ge houwagoluk, ede logo pogwiam e, is salonobogwi a’ge ebano wotluk, onuak porlolak ano, woluk ap Gog osi esan a’bik a’ge selak enebegesema dogoma ebano sebelak onobogu, lema o. 16O dogo eba kota mesik onuk, ap esan a’bik, oruak o. Is ai togwi ano pam o eba obab sogoat onobouwa o.
17 #
Wah. 19:17,18 Aphwami en dogo a’ge yu o. An notok modok welago a’ge Allah en egi a’ge mo’gulonto ano re yuat o. Sue a’gul onuk lobok emin, seiye hogobi emin, ’berlegat wemagoluk hiak loksogo mo’gulontomup o. An Allah en enebaget wusogo degelogo enebasulat, Israel a’ge welagaimu dom-dom petne eba enebaget degelogo enebasulat, tagoma re, di owi yu owi en odoktumak o. Wemarik e, is en einnyo emin, emep emin, nogu lema o. 18Domba ierak emin, domba emalik emin, kambing ierak emin, lembu ierak emin, ’berlegat enesei oruak o Basan a’ge en no’gwi ’gela’ge, ap weim enanni wiak a’ge eneinnyo nogulat, o ’gwiang pam yema is ap kain-kain enemep nogulat, togu lema o. 19An en wusogo enebaget leik-louktak pasu legi ano re, esei noluk honogum yegerlagalat, enemep noluk henede bal et til lagalat, togup ani o. 20Kuda emin, kuda pam no’gwi a’ge ap emin, ap weim enanni wiak a’ge emin, ap weim togwi a’ge lo’bok ’berlegat emin, werak onoboluk, degelogo paikmu no’gulat, onogum yegerlema o, oluk an notok modok welago a’ge Allah enat egi o.
21Di aphwami yu aphwami enegerlakma an modok logo a’ge niouwagoluk tagalat, is di aphwami yu aphwami ’berlegat is onowiak o’go tagenebasu a’ge ano niogulat, ne’gik anni pam warenebise legi a’ge ano niogulat tua o. 22Nonuk logo ai niouwagoluk, tik a’ge agauwa ai pam en ’bekhirat tagenebil lasukhwe is Israel a’ge en an enaik Allah anat enaluk ema ani o. 23Ye, is Israel a’ge en an mo’gulentasu legi a’ge ano opsogo motluk lo erlak, ma en ukpoluk, wiak togu legesema, nonorogole hisogo pagathorloluk welat, selei a’ge ene’gikmu pasuam, enebe a’bik wa’gun pam waronobogulat, pema a’bigat wogonoboluk lebik onobogulat, tuagoluk tagenebegi ano, di aphwami yu aphwami enaluk ema o. 24Asogo til lagalat, wiak enebam agalat, wene ’belak oruak a’ge ano sagologo pogulat, togu legesa a’ge motluk laga legesa, o’go hegitsogo tagenebasulat, ye, norogole yetniouwano oluk, hisogo pagathorloluk welat, tegismu re, egi ai o.
25Asogoatma re, an notok modok welago a’ge en egi ano re yuat o. An en o yogodak Yakub pam en weiyelak naduk welegesa ’gela’ge obab sogo enebasulat, is Israel a’ge ’berlegat nedeap enebiselat, ye, an nonuk mu om erlakma en omu degelak welemagoluk, nede aganhansogo til lasulat, taga leik o. 26Tagokhwe, is Israel ai, is ono ’gwiang pam aphwami logon en enebam il ’bal hogwi erlakhwe enede we yogun lielak obat welarat de, an en mo’gulentasu a’ge ano pobirak poluk, tu erlakma en uknoboluk, wiak til laga legesa pam ene’gerli etil no’gwi a’ge ano memerak pouwa o. 27Di aphwami yu aphwami enegerlakma en wogonoboluk togolik onobou wagalat, is eneselei a’ge ono’gwiangma odoksogo onobou wagalat, taga leiktik, agauwa ai erlige is aphwami ena’gul onuk a’bigat enilem is Israel a’ge tagonobouwa ano pam an mu ago erlak nomu degelak welago a’ge is aphwami ai en, niouwa o.
28Ye, di aphwami yu aphwami enegerlakma welemagoluk enebeil legi a’geat de, pobuk ono ’gwiang pam lo’bok welemagoluk, mesik ukpaik erlak o, is ’berlegat wogonoboluk onobou weik ai pam en an enaik Allah anat enaluk ema o. 29An narogun is Israel a’ge enebam paikmu re, is tagenebasuam, is en niogumu no oluk, norogole hisogo pagathorloluk weleik erlagat o,” oluk, At ’gain Onuk Logo otok modok welago a’ge enat egeimu en egi o, oluk, mo’gulentesi.
Currently Selected:
Yehezkiel 39: Wul
Highlight
Copy
Compare
Share
Want to have your highlights saved across all your devices? Sign up or sign in
