Yehezkiel 38
38
Ap onuk logwap po wene
1At Allah en an mo’gulneselat,
2 #
Wah. 20:8
“Aphwami en dogoma a’ge yu o. Horogole o ’gwiang Magog akhit yetha’guntik, is o Mesekh a’ge emin, onue o Tubal a’ge emin, onue Kain onuk lok welemagoluktak po a’ge mo’gulemin o. 3At otok modok welago a’ge Allah en egei ano yuat o, oluk, mo’guleselat, is o Mesekh a’ge emin, o Tubal a’ge emin, onue ’gain modok lok logo at Magog ano nemin hwerlitakma re, 4At olukhwe edenogo poluk, at agaukhwak pam herle erlelogumu ebale pam erlelik pil lasu lomtik, lisogo lebikpou wagalat, at osi weim togwi a’ge emin, is at o kuda pam hurotluk weim togwi a’ge leik-louktak poluk no’gwi a’ge emin, enebe a’bik a’ge ebano enesing weim sum wei a’ge ogo-lok a’ge ogo, ’buksogo wa’gun ene’gikmu pang hegeik waga legesa a’ge ’berlegat at emin lisogo lebik enebasulat, 5-6Is di aphwami yu aphwami enakhit egesarik welagai a’ge ap Persia a’ge emin, Kus a’ge emin, is o Put a’ge emin, en enesing weim sum ogo, ena’gul sum erik a’ge, ’buktak a’ge ebano nak at emin lebik onobou wagalat, o Gomer a’ge enesegen oruak a’ge ’berlegat emin, is o walek o abel akhit o’gwe Bet-Togarma a’ge enesegen oruak a’ge ’berlegat emin, at emin lebik onobou wagalat, tua o. 7Asogoatma re, at emin, is modok a’bik at emin otluk odoktak welagai a’ge emin, enebe ’berlegat leik-louktak poluk heberlogo oruakhwe, at en wene ’gagalogo mo’gulentasu lemak o. 8Agauwa a’bik ago holuk e, at mesik en weim tu a’ge paget yogo pouwa o. Pobuk tahun a’bik takpoluk, o mesik ekhenma weim togulat, arat erlagapsogo pogwiam ebalema wusogo pogulat, aphwami eba a’ge is aphwami ena’gul onuk modok a’bik ene ’gerlakma oruakma en odoksogo Israel a’ge welagaimu dom-dom di yu iak erlak agama ebano onobou wagama eba welat, togumu ebano sebelogumak oluk, mo’guleik o. Is aphwami o eba oruak ano re, di aphwami yu aphwami enegerlakma en lebik enebaikmu ono ’gwiangma ebano is ’berlegat enede we yogun lielagat oruakma. 9At emin, at osilak enesegen oruak a’ge logolak emin, is aphwami ena’gul onuk lo’bok a’bigat emin, at emin otluk, o Yasobu pu tagalat wetil wago ’gela’ge o ai, sebelil ’gogulat, o selak a’ge hiktak welago ’gela’ge o ’gwiang ai pam orogole enemak po a’ge erlagap poluk, welema,” mo’gulhentegis o, oluk, an mo’gulnesi o.
10“At odok-modok welago a’ge Allah en egei ano re yuat o. Togwi a’ge agauwa ai erlige tu a’ge edemu en eberiselat, wiak modok tu a’ge eberua o. 11At en eberiselat, an inagalat, o kota-kota helep pak wogo erlak o’gwe pang enebil ’gwiselat, is aphwami onowi kota-kota pak wogo erlak welat, ’goduk hele’gik erlak emde larak welat, tak oruakhwe aphwami enede we yogun lielak welat enagai a’ge nak oruakma, ebano enebam ’gwiselat, tagalomtik, 12O Hogul ’goluk wasulat, ena’ge-a’ge perlengsogo wasulat, o kota-kota moluk-melaksogo pogwiam ebale ’gwe werik poluk oruakma emin, is aphwami ena’gul onuk lo’bok welagai a’ge ene’gerlakma en odoksogo onobou wagama o ’gwiang ede ’burl eba welat, onuam emin, ena’ge-a’ge emin, a’bigat eiye welegesa a’ge ebano, ne’gik anni pam sebelak onoboluk, wasulat, tik o, oluk, wene ’gagalogo paik o. 13Wene Gagalogo paik a’ge ano is o Syeba a’ge emin, Dedan a’ge emin, is ap di a’ge yu a’ge o’go wogwi o Tarsis a’ge emin, o Tarsis o’borl-o’borl wei o’gwe lok e’gwe welagai a’ge lo’bok emin, en enesa’go holholuk, at mo’gulogulat, hat en aphwami ena’ge-a’ge perlengsogo waigoluk en wegen a ia? Aphwami en a’ge onohogul wogulat, perak emin, emas emin, onuam emin, ena’ge-a’ge emin, hogul a’biksogoat woluk louwagoluk, hosilak odoktagonoboluk wegen i? oluk, mo’gulomup o.
14Asogoatma re, aphwami en dogo a’ge yu o. At otok modok welago a’ge Allah en egei ano re yuat o, oluk, at ap Gog tak obo a’ge ano mo’guleselat, neiyagai Israel enede we yogun, lielak oruak holuk e, at en pobi tua erlak no Pobi tuaatma re, 15At welagoma o walekma o abel akhit o’gwe welagoma eba en is aphwami ena’gul onuk modok a’bik weim togwi enanni wiak a’ge enebe mu ebelesogo a’bigat kuda pam hurotluk enemin wema o. 16Neiyagai Israel a’ge sebelak onobouwagoluk, o atia ’gwiang orogole enemak erlakma en hiktak pasu ’gela’ge, asogoat til wema o. Ye, pobuk agauwa mesik pam at ap Gog ano re, neiyagai no’gwiangma oruak a’ge ebano sebelak onobouwagoluk, an en woluk weikmu re, di aphwami yu aphwami enil oruakhwe, at takpouwa ano pam At Allah mu om erlakma en omu degelagat oruakma hege o, oluk, an nebe enaluk ema o, oluk egeimu en mo’gulhegis o, oluk,” mo’gulesi.
Allah en ap onuk Gog wiak o’go takpouwa wene
17At otok modok welago a’ge Allah en egei ano re yuat o. O naduk page enat, ap mesik en disogo tuma ani o, oluk, neragam a’ge mo’gulentasukhwe is Israel mo’gulontogwi a’ge en mo’gulontogu legesa ano re, at ap yu erlak no? An neiyagai sebelak onobouwagoluk, At Allah en ap ai woluk wema o, oluk, is an en mo’gulentasukhwe mo’gulontogwi a’ge en agauwa ai pam mo’gulontogukhwe, di tahun-yu tahun taga laga.
18Ap Gog en Israel a’ge ono’gwiang sebelhwerlauma ai erlige nolot het odouk ’gela’ge inema o, oluk, An notok modok welago a’ge an Allah enat egi o. 19“Nebit modok taknebasulat, nolot het odouk ’gela’ge inagalat, asogo tagokhwe, agauwa eria pam Israel ono’gwiang pam eba o mouk modok miasogo erlang-perlang houwa o, oluk egi o. 20Asogo tagalat, di hiane-yu hiane ik lok laut pam welago a’ge emin, di tue yu tue o ’burl o’gwe darak no’gwi a’ge emin, seiye hogobi e e’gelema a’ge emin, di a’ge yu a’ge o ’gwiang pam onogum pam ebela no’gwi a’ge emin, di aphwami yu aphwami o ’gwiang pam oruak a’ge ’berlegat emin, an norogole yetniogu lemarik, onogorlok agokhwe, di dom yu dom ’goluk-’gelaksogo hwikhil lasulat, dom edip-edip mesak wagalat, helep pak wogo a’ge ’berlegat moluk-moluk ’gwiang pam nak ’buagalat, tua ani o. 21Israel a’ge welagaimu dom-dom petne en wa’gun woluk ap lok sebelenebil wemagoluk, yogo enebaikmu woluk wagaiam, onogorlok en at are en at are mesik weriselat togu lema o, oluk, an notok modok welago a’ge Allah enat egi o. 22Ye, at emin, osi enesegen oruak a’ge emin, aphwami ena’gul onuk modok a’bigat At emin, egesa a’ge ebano emin, is wiak togwi a’ge o’go ou enebam pasulat, enebe wusogo enebasulat, moru derle’gik a’ge pel-pel enebam ’belakpobu agalat moru hagarle’gen emin, moru ’gela’ge odouk, hwedali al ’gela’ge emin, enebam pasulat, tik o. 23Asogo tik ano pam en an modok logo welago a’ge emin, an mu ago erlak omu degelak welago a’ge emin, niouwagoluk, tik o. Is aphwami ena’gul onuk modok a’bik a’ge en an niouwagoluk, enil pam tagoam, is en An Allah at enaluk ema o,” oluk, egeimu en mo’gulhentegis o.
Currently Selected:
Yehezkiel 38: Wul
Highlight
Copy
Compare
Share
Want to have your highlights saved across all your devices? Sign up or sign in
