Yehezkiel 37
37
Aphwami onuak o do’goma eba ’gellogo orluktak oruakma il hesi wene
1An nebe Nenaik ’gain Onuk Logo a’ge e’gik annisogo tenaknebasumu hegi. Holuk e, at Arogun en woknoboluk o do’goma eba aphwami onuak ’gellik modok a’bik oruakma nebesi. 2Asogo nebesimu, Nenaik ’gain Onuk Logo a’ge en e, o do’go ebano woknoboluk denagalat o do’go eba aphwami onuak ’gellik modok a’bik ’gaboktak oruakma nil hil-hil legi. 3Asogo tegismu, Nenaik ’gain Onuk Logo a’ge en e, disogo egei,
“Hat aphwami a’ge yu. Aphwami onuak ’gellik a’ge yema pobuk togolik enelalugap onobo elit a? Mia ya,” oluk hin wokniesi. Asogo hin wokniesimu, an en e, disogo mo’gulegis,
“Naik ’gain Honuk Logo a’ge, hat nak e, haluk o,” oluk mo’gulegis.
4Asogo mo’gulegismu, at Nenaik ’gain Onuk Logo a’ge en iak aphwami onuak ’gellik ebano mo’gulontuagoluk disogo egei,
5“An henaik ’gain Nonuk Logo a’ge en his pobuk togolik henelaluk emagoluk, set honogola ’gwelebakhenebaik o. 6His heneme’gen heli’gogo henebasulat, heneino heli’gogo henebasulat, henagap ’buksogo henebasulat, tik o. Asogo toluk e, set honogola ’gwelebakhenebasuam togolik henelaluk otluk, his en e,
Nenaik ’gain Onuk Logo a’ge, arat o, oluk pobi togup ani o, oluk egei,” oluk mo’gulontuagoluk mo’gulnesi.
7Asogo mo’gulnesimu, an en e, Nenaik ’gain Onuk Logo a’ge en mo’gulontuagoluk mo’gulnesi ’gela’geat, aphwami onuak ’gellik a’ge ebano mo’gulentegis. An en asogo mo’gulentasukhwe, onuak ’gellik a’ge ebano ebale lo’bok dip tagalat iak erle’ge-erle’ga egei. 8Asogo osoam nil pobi tago oruakma re, aphwami enebe heling eriogoluk, eneme’gen agalat, eneino heling agalat, enagap la’baliselat, tegei a’geat de, set owan lebikpo erlak oruakma hegi o.
9Asogo hegimu, at Allah en e, disogo mo’gulnesi,
“Hat aphwami en dogo a’ge yu. Sogwei etleba en, yema en erabu en, orogobu en wotluk aphwami werak oruak a’ge ai togolik enelaluk emagoluk set onogola’gwe pusogo ’gwelagenebi suk o, oluk an henaik ’gain Nonuk Logo a’ge en mo’gulerinogoluk mo’gulhegis o,” oluk mo’gulnesi.
10 #
Wah. 11:11
Nenaik ’gain Onuk Logo a’ge en sogwei mo’gulemagoluk mo’gulnesi hegitsogoat mo’gulegismu, punhau wagalat aphwami enebe werak a’ge ebano onogola set ’gwiselat, enebe enelaluk egesarik e, inegesa. Asogo enelaluk egesa ai, enebe modok a’bik, ap esan modok lok logolak ’gela’geat inegesa.
11Asogo lai lagama, Allah en e, disogo mo’gulnesi,
“Hat aphwami a’ge yu. Aphwami Israel a’ge ’berlegat enebe aphwami onuak ’gellik ai ’gela’geat o. Is onu’gwarek en e,
Nis nenebe nena’bosu erlak ’buk modok egerik, pobuk obapnonobua modok erlagat, nenebe ebagasema erlagap nonobo a’ge welege o, oluk ogwi ai o. 12Asogo ogwi ai en,
Disogo egei, oluk, disogo mo’gulontomup o,
An Henaik ’gain Nonuk Logo a’ge en his henebe werak ’gela’ge ’gwiangma sebelak welegep a’ge ai, ’goduk huthontoluk, henebe eba en lebikhonobou wagalat, his aphwami Israel a’ge honowi pam togolik wokhonoboluk laik o. 13An en asogo his henebe ’gwiangma sebelak ’gela’ge oruakma lebikhonobou womma, his neiyagai Israel a’ge en,
Nenaik ’gain Onuk Logo a’ge arat o, oluk pobi nobogup ani o. 14An en his henebe werak ’gela’ge welegep ai, Narogun honogola ’gwelakhonoboluk, henebe henelalugap honoboluk e, his henebe honowi pam welegep o’gwe lo’bok welemagoluk henebaik o. Asogo takhenebasuam his en e,
Nenaik ’gain Onuk Logo a’ge Allah at o, oluk pobi nobogup o. An henaik ’gain Nonuk Logo a’ge en arat egi ai ebe tigat o,” oluk mo’gulnesi.
Allah en e, “Aphwami Yehuda a’ge emin, Israel a’ge emin, mesigarat welegesa ai ’gela’ge, pobuk la’buksogo henebaik o,” oluk egei wene
15Nonue ’gain Onuk Logo a’ge en asogo mo’gulnesirik, mesik disogo mo’gulnesi,
16“Hat aphwami a’ge yu. Hat en ’boua’gun mesik waguntik, o’borl petne pelal disogo wemin o,
Aphwami Yehuda a’ge paget emin, is aphwami Israel a’ge logon is enemin hwedik welagai a’ge paget emin, pelal womup o. Asogo wokho re, ’boua’gun mu a’ge mesik waguntik e, o’borl petne pelal disogo womup o,
Efraim o’boua’gun mu ’gela’ge, at Yusuf en dogo’gwe a’ge paget emin, aphwami Israel a’ge logon is enemin hwedik welagai a’ge paget emin, pelal wemenat o. 17Asogo ’balogun holuk e, ’boua’gun ’biren a’ge pelal hundomok ’belak a’ge ai ologun mesikmu la’buksogo he’gikmu mesigarat emagoluk e, la’buksogo tenakpomup o. 18Asogo tagoam, aphwami hat ha’gul onuk a’ge en hin wogulat e,
Yu ebe no’gosogo ema a’ge paget tigen no. Mo’gulnentemin o, oluk hin wogwiam e, 19disogo mo’gulontomup o,
Nenaik ’gain Onuk Logo a’ge Allah en e,
’Boua’gun Yusuf en dogoma’gwe a’ge paget emin, aphwami Israel a’ge logon is enemin hwedik welagai a’ge paget emin, Efraim e’gik pam oruak ai en, an en ebam elitsogo waiktik e, ’boua’gun aphwami Yehuda a’ge enebaget ebam elitsogo mesik wik-wok mesigat la’buksogo paik o. Asogo poluk, ’boua’gun ’biren ai mesigat a’ge takpoluk e, an ne’gikmu mesigat a’ge tenakho weleik o, oluk egei, oluk mo’gulontomup o.
20Asogo mo’gulontoluk e, ’boua’gun ’biren ai he’gikmu tenakho welat, onuk ontoluk e, 21disogo mo’gulontomup o,
Nonue ’gain Onuk Logo a’ge en e,
An neiyagai ’berlegat o da ya wegesarik welagai a’ge ai, enebe odoktak onoboluk e, togolik onu’gwarek onowi pam wogonoboluk laik o. 22Asogo wogonoboluk loluk e, aphwami Israel a’ge onodom petne eba ena’gul onuk mesigat a’geat tagenebaik o. Asogo enebaikmu, is onue onuk logo a’ge mesigat nak en tenentarok welema o. Asogo wolomtik, pobuk enebe me’gisogo ena’gul onuk ’biren emarik, onuelak ’gain ononuk logo a’ge enematek lo’bok en tenentarok welema modok erlak o. 23Is pobuk wiak togulat enebe wiagapsogo pagathorlogulat, dogwi asua erliktogu lotluk pobuk an nemelmel a’ge ai togulat, togu lema erlak o. Is an neragam wolom enebit togwi a’ge ai pam herle ’gela’ge hettak oruakma hebilogo delenebik o. Asogo delenebiselat, is enebe an en emerenebik o. Asogo emerenebisoam, enebe neiyagaiat welema o, ye, An is Enaik at weleik o. 24-25#Yeh. 34:24Is onue ’gain onuk logo a’ge Daud ’gela’ge ai en, enebe ’berlegat la’bulogo opsogo tenentarok modok welema o. Asogo tenentarok oruakhwe, is an en wene,
Disogo togu lomup, asogo togu lomup, oluk enesa’go weriselat, mo’gulentasulat, egi wene ai enesa’go hologo togulat, an nemin lo’boksogo modok welema o. Asogo welat, o an en Yakub wogegismu is ene’balak welegesa’gwe eba is enebe emin, is en dogoma’gwe a’ge ene’balak emin, enemin modok welema o. 26An en is enede ha’buksogo welemagoluk wene modok welema a’ge wene warentaik o. An en is obap enebasulat, enebe a’bik wiyalemagoluk tagenebaik o. Ye, is ono’gwiang pam eba an nowi modok welemagoluk werigat o. 27#2Kor. 6:16; Wah. 21:3An nebe is enemin modok welat e, is enaik Allah Anat weleik o, ye, is an Neiyagaiat welema o. 28An nowi is ene’gerlakma werik modok oruakma, aphwami ena’gul onuk mu a’ge en e,
Aphwami Israel a’ge enaik ’gain Onuk Logo a’ge en is enebe at u’gwarek eiyagai welemagoluk poligenebesimu oruak, oluk enaluk ema o,” oluk mo’gulnesi.
Currently Selected:
Yehezkiel 37: Wul
Highlight
Copy
Compare
Share
Want to have your highlights saved across all your devices? Sign up or sign in
