Yehezkiel 33
33
Allah en Yehezkiel aphwami Israel a’ge tenentarok welat, hoso’bi mo’gulontuagoluk edikpesi wene
1Nenaik ’gain Onuk Logo a’ge en asogo mo’gulnesirik, mesik disogo mo’gulnesiat,
2“Hat aphwami en dogo a’ge yu, aphwami ena’gul hat a’ge disogo mo’gulontomup o.
An en aphwami ena’gul onuk logon onowi da ya eba weim ’gagalumak, oluk ikmu re, demat ’gagalemaat o. ’Gagalemama re, is en ap is a’ge mesik selei a’ge wagaimu ’gagalak welemagoluk edikpouwaat o.
3Asogo edikpoma, ap ai en selei a’ge wagaimu il ontoluk, aphwami o eba a’ge enebe ’berlegat en e,
Watnonobua a’ge wegesema o, oluk enede we’gerotluk, enebabut heberlogo welemagoluk ’bi’gong lok a’ge iak inghasu o. 4-5Asogo inghasukhweat de, aphwami mesik sa en ’bi’gong iak ai esa’go holholugat de, edemu en mi-miarak poluk oruakma, selei a’ge wagalat ebe woruema re, at u’gwarek ebabut pamat ebe warema o. Asogo a’geat de, at en ’bi’gong iak ai esa’go holholuk e, ebabut heberlelepma re, u’gwarek ebe agap delhwerlelep o. 6Asogo a’geat de, ap ’gagalak welema a’ge ai selei a’ge wagaimu il yerontolugat de,
Watnonobua a’ge wegesema, oluk enede we’gerlemagoluk ’bi’gong iak ingho erlakma en mo ua holuk e, selei a’ge wagalat e, aphwami wiak togwi a’ge ai enebe waronobua holuk e, an en, is enemep at ’gagalak welema a’ge ai e’gik pam paik o.
7Hat aphwami a’ge yu, an en e, hat hebe aphwami Israel waremano oluk tenentarok welerinogoluk edikhebegi o. Holuk e, hat en is hoso’bi wene mo’gulentasu lomup o. 8An en e,
Aphwami logon enebabut wiak togwi a’ge enebe warema o, oluk mo’gulheik a’geat de, hat en is enebabut wiak togwi a’ge ai ukpoluk, enebabut heberlagaiam an en delonobuagoluk hoso’bi mo’gulonto erlakmaat enebe warema holuk, is enemep hat he’gik pam paik o. 9Hat en is mo’gulentagun a’geat de, is enebabut wiak togwi a’ge ai ukpoluk enebabut heberlagai erlak welat, wiak togularat warema holuk, hat hebam selagat, hagap delogun o,” oluk mo’gulnesi.
“Aphwami enebabut togwi a’ge lo’bok wene enebam pasulat, no’gorliselat, tik o,” oluk egei wene
10Nenaik ’gain Onuk Logo a’ge en wene asogo mo’gulnesirik mesik disogo mo’gulnesi,
“Hat aphwami a’ge yu. Is aphwami Israel a’ge en wene disogo ogwi a’ge yu, hat en pobuk lagaksogo mo’gulentemen o. Is en e,
Nis nenebabut wiak modok Allah iak modok sagalogo togu lege ai en wene nenebam oruak en e, nenebe wiak aga lege yu. Nenebe op otluk nenelaluk wolomogoluk no’gosogo tul, oluk ogwi ai o. 11An henaik Allah ’gain Nonuk Logo a’ge nelaluk modok welegi a’ge ano nu’gwarek nonuk ’balogo mo’gulheik a’ge yu is mo’gulontomup o,
Is aphwami wiak togwi a’ge ai enebe waragaiam nogola nagai hasu legi erlak. Nebit o. We, is enebe enelaluk modok welemagoluk, enebabut wiak togwi a’ge ai ukpoluk enebabut heberlom aiat nagai o. His aphwami Israel a’ge yu, his henebabut wiak togu legep a’ge ai ukpoluk henebabut heberlemis o. Henebabut heberlemis o! Henebe warom ai nopaget.
12Hat aphwami a’ge yu. Aphwami Israel a’ge disogo mo’gulontomup,
Aphwami logon enebabut op togwi a’ge pobuk wiak togwi holuk, naduk op togwi ai pam enebe op ema modok erlak o. Ye, is aphwami logon enebabut wiak togwi a’ge ai ukpoluk enebabut heberlema holuk, pobuk wene enebam paik erlagat o. Ye, is logon enebabut op togwi a’ge ai, pobuk wiak togwi holuk, enebe delenebik modok erlagat o. 13An en e,
Aphwami enebabut op togwi a’ge ai, an en pobuk delenebik o, oluk egiat o. Asogo a’geat de, aphwami enebabut op togwi a’ge ai, pobuk wiak toluk, onogola en e,
An naduk nebabut op taga legi ai pam nebe op eik o, oluk onogola opo modok erlak o. Is ai pobi togwi erlak, oluk u o. An en is enebabut asogo togwi a’ge ai enebe pobuk warema holuk, naduk enebabut op togu legesa ai pam delenebik erlak o. 14-15An en e,
Aphwami logon enebabut wiak togwi a’ge ai pobuk warema o, oluk osoam, is ai enebabut wiak togwi a’ge ai ukpoluk, op togulat, hegitsogo togulat, asogo togulat e, is logon ena’ge lodu paget wogulat, togolik onu’gwarek wogontogulat, is logon ena’ge ene’gik abusak wegesa a’ge holuk togolik wogontogulat, asogo togulat enebe op om wene an en henesa’go werise legi wene ai hologo togu lema holuk, warema erlak o. Enelaluk obat welema o. 16Is enebabut naduk wiak togu legesa a’ge ai, pobuk an nede eberak weleik erlak o. Is enebabut op togulat, hegitsogo togulat, togu lema ai pam pobuk enebe enelaluk welema o. 17Asogo a’geat de, aphwami hat hemin hena’gul onuk mesigat a’ge ai en,
Allah en wiak tago, oluk ogwi ai o. Asogo ogwi a’geat de, wiak is enat wiak togwi o. 18Aphwami enebabut op togwi a’ge ai, pobuk wiak tua holuk, wiak tua ai pam en enebe waremaat o. 19Ye, aphwami logon enebabut wiak togwi a’ge ai ukpoluk, pobuk op togulat, hegitsogo togulat, togu lema holuk, pobuk enebe enelaluk welemaat o. 20Asogo a’geat de, aphwami ena’gul onuk Israel a’ge en ogulat e,
Allah en wiak tago, oluk mo’gulnogwi ai o. Asogo mo’gulnogwi a’geat de, an en is enebe lo’bok enebabut togwi hegitsogoat wene enebam pasulat, no’gorliselat, tik o,” oluk mo’gulnesi.
“O kota Yerusalem sebelo’gogulat, enebe warenebegisema o,” oluk Yehezkiel mo’guligisa wene
21 #
2Raj. 25:3-10; Yer. 39:2-8; 52:4-14 Nis nene’gik herle wusogo woknonoboluk wegesema, tahun 11 a’ge pam welegerik, dugwi mesik 9 a’ge, tanggal 5 a’ge pam, selei a’ge en o kota Yerusalem sebelogulat waronobogukhwe, ap mesik ’boloksogo wagarik disogo mo’gulnesi,
“O kota Yerusalem sebelogulat enebe modok warenebigisa o,” oluk mo’gulnesi. 22Ap ai ne’bek wom erlak owan oruakhwe, huba’go ai erligeat at Nenaik ’gain Onuk Logo a’ge e’gik annisogo senniasumu hegi. Asogo senniesirik niak uagoluk nemde a’ge hwerik pesimu weneane elit u a’ge oruakma ap ai waga.
Aphwami Israel a’ge wiak togu legesa wene
23-24Nenaik ’gain Onuk Logo a’ge en wene mesik disogo mo’gulnesi,
“Hat aphwami a’ge yu. Aphwami Israel a’ge enebe o aphwami logon en moluksogo ’bo pegesema eba welat disogo ogwi o,
Nene’ba Abraham ebe emategat o yema da ya wogesimu eiye agarik at en a’ge welaga a’geat de, yogodak nis nenebe a’bik a’ge o yema da ya woknentesimu eiye egerik welegeat o, oluk ogwi ai o.
25Is en asogo ogwi ai en, hat en e,
Nenaik ’gain Onuk Logo a’ge en egei oluk mo’gulentai lak o,
His en wam di a’ge yu a’ge mep oruakhwe emin no’gulat, dogwi asua erliktogulat, aphwami logon enebe enemep enamogo waronobogulat, togularat de, hene’gerli erlagat,
O yema nis eiye o, oluk ogu legep ai o. 26His e, henedeap woru a’ge hene’garok pam he’berik welat, an nemelmel a’ge togulat, henebe lo’bok en henarilak onugwami ’babi tenontogulat, asogo togularat de,
O yema nis eiye o, oluk hene’gerli erlak ogwi modok wolorogup a? 27An henaik ’gain Nonuk Logo a’ge nelaluk modok welago a’ge nu’gwarek nonuk ’balogo disogo egi,
Aphwami o moluktigisa’gwe welagai a’ge ai, enebe pobuk waronobua o. Ye, is logon o leimu welagai a’ge ai, enebe mene orlomene en nouwagoluk wogontogulat, is logon dom petne emin, owik o’gwe emin hisakho oruak a’ge ai, ou wiak a’ge enebam poma waragalat, tua o. 28Asogo tagonoboluk, is onowi eba o leimu ’gela’ge wiagapsogo pasulat, is enanni a’bikmu erlikhorlogwi a’ge ai, erlagapsogo pasulat, tik o. Asogo takpoluk, is ena’gul onuk Israel onowi dom petne eba modok polugapsogo poma, aphwami ebela ai pam lak-wak ogu lema modok erlak o. 29An en is aphwami an nemelmel a’ge wiak togwi ai en, wene enebam poluk, onowi eba polugapsogo pasuam an henaik ’gain Nonuk Logo a’ge nebe enaluk ema o, oluk mo’gulentai lak o,” oluk mo’gulnesi.
Yehezkiel en Allah iak mo’gulentasuam lai lasu laga wene
30Nenaik ’gain Onuk Logo a’ge en asogo mo’gulnesirik mesik disogo mo’gulnesi,
“Hat aphwami en dogo a’ge yu o. Aphwami hena’gul onuk mesigat a’ge en enebe o kota leget pakleget werikmu eragam eba hwi a, at e, o werikmu, ebela pam eba de a, enebe odoktak poluk, akhen en akhen mo’gulontogulat, hat hobok disogo ogwi,
Nis Nenaik ’gain Onuk Logo a’ge en yogodak mo’gulnontuagoluk egei a’ge nenesa’go hweli louwok o, oluk ogwi. 31Is enebe a’bigat hat he’bek odoktumarik, an neiyagai enebe odoktoluk niak enesa’go hologwi ’gela’geat, hat en osoam enesa’go hologwi o. Asogo a’geat de, wene ai hegitsogo togwi modok erlak o. Is enemde pam en e,
Nenede hwedik, oluk ogularat de, enebabut e, loksogo saboru puk a’ge aiat logap pogwi o. 32Is en hat mo’gulentasu legen a’ge paget ogulat e,
weni hwami agai en eniak op modok ogulat, ’bi’gong ene’gik op modok worogwi ’gela’ge oso, oluk hobok op ogulat, is en hat hiak osoam enesa’go hologwi a’geat de, wene mo’gulentasu legen a’ge ai hologo hegitsogo togwi modok erlak o. 33Hat en wene mo’gulentasu a’ge ai ebe demat ema o. Demat emma eba loluk agoam, is en e,
Nis nene’gerlakma ap Allah iak mo’gulnentasu laga a’ge nene’gerlakma welaga o, oluk pobi tua ani o,” oluk mo’gulnesi.
Currently Selected:
Yehezkiel 33: Wul
Highlight
Copy
Compare
Share
Want to have your highlights saved across all your devices? Sign up or sign in
