Yehezkiel 32
32
Firaun takpouwa ano pam en at edami weni dain tu wene
1Muknentegisema wegerik oruakhwe tahun 11 arat takpoluk, mesik tak a’ge dogwi 11 pelelak poluk, mesik pelelak a’ge tanggal 1 dogwi ai pam a ’gain Onuk Logo a’ge en an mo’gulneselat,
2“Aphwami en dogo a’ge yu o. Is Mesir a’ge onue ’gain Firaun takpo ano pam dami weni edip dain tagalat, mo’guloum ano re, yuat o. At di aphwami yu aphwami ene’gerlakma singa ’gela’ge oruak o.
At ik laut ede’burl ’gosu lok anni a’bik a’ge welat, At oruak hegit ik lasu a’ge ano-ogola lagak pagak hasulat, Oyuk pam ik ’gwesalogo lagabak pil wagalat, Ik ’gurlap sogo pil wagalat, tago ai ’gela’ge, tago yo, oluk, egei o. 3At otok modok welago a’ge en egei ano re, yuat o. At ebe yagaremagoluk di aphwami yu aphwami a’bik odoktak a’ge enemin en hiane sum yagarogwi a’ge nosum emde lasogo ebam pei loma yagat ago holuk, Lisogo ik iak pam lebikpoumul o. 4Asogo lebikpoumultik, ’gwiangma herlilogo ’belebak poluk, parema eba lisogo hwikhasu holuk e, tue darak no’gwi a’ge ’berlegat en at ebe ebam, lagabak pou wagalat, ’Gwiang pam noso a’ge seiye hogobi ’berlegat en onogum ningsogo nau wagalat, tuagoluk, tak paik o. 5Dom-dom eba einnyo ’belak belabil lasulat, o dogo-dogo eba uak lolak nak ’bete takpasulat, 6Emep herlelik paikmu ’gwiang sakhorak modok takpil lasulat, dom-dom emin sakhorak pil lasulat, dom petne ik lasu’gwe ogo re, emep ye’gelogo pil louwagoluk takpasulat, tik o. 7#Yes. 13:10; Mat. 24:29; Mrk. 13:24,25; Luk. 21:25; Wah. 6:12,13; 8:12At a’guluak erlagapsogo pouwa ai erlige ’bogorl atiarak a’ge ano orlomongtak pasulat, hwesagal amolit erlagapsogo pasulat, a’gurlok en mo il hiktak pou wagoluk takpasulat, dugwi atia agoma no oluk, hatia togun o, oluk, mo’guleselat, 8’bogorl pam en at atiarak pil lasu a’ge ’berlegat hiktak pasulat, asogo takpoluk. O’gwiangma eba o hubap pouma o,” oluk, at otok modok welago a’ge Allah enat egei o.
9Di owi yu owi at eperlak di aphwami yu aphwami ene’gerlakma oruakma, at wiak ebam pasukhwe, is aphwami ena’gul onuk a’bigat a’ge en, yu re, no’gorak pesi? oluk, enede perik welemagoluk, tak paik o. 10An en at takpasu a’ge ano, di aphwami yu aphwami enil holuk e, yu takpasu yu nonogorlok e, oluk, ogulat, at tago ano pam nua’gun pebisogo wago a’ge enil niogulat e, is onuelak ononuk logo a’ge en ogo re, onuak erlik bo pil lagalat, tuagoluk, tagenebaik o. At takpo a’ge o agauwa ai erlige is enematek lo’bok en, Nenelaluk wolom opma re, warom hegi, oluk, loruk hupmu alik worogwi modok nak welema o ogu lema egei o.
11At otok modok welago a’ge Allah en egei ano re, yuat o. “At en tago ano pam is Babel a’ge onue onuk logo a’ge ua’gun woroksogo hwik hauweik o.
12Di aphwami yu aphwami ene’gerlakma aphwami mesik enebabut wiak modok welagai a’ge eneiyagai ap weim obogwi enanni wiak a’ge onua’gun pam at osi enebe a’bik pulogo oruak a’ge ebano waronobumagoluk, tagenebaikmu wagalat, is Mesir a’ge en, nis elit o, oluk, enede en logo pogwi a’ge ano erlagapsogo pasulat, aphwami at eiyagai at iak inghogwi a’ge enebe a’bik ebano ’berlegat ena’guluak erlagapsogo enebasulat,
13at uam ik lok esa’go’gwe e’gela nil no’gwi a’ge ebano ’berlegat erlagapsogo pasulat, tagoam e, ik olomu ebano aphwami onoyuk peilagai am e, o’borlogouk eselat, onuam ik olomu ebano onoyuk peilagaiam e, ’gurlap sogo pogulat, togwi a’ge ano re, pobuk mesik asogo tua erlak o. 14At welagoma eba ik ’gurl aga a’ge ano il moli-moli pasulat, At oruakma di ik yu ik lasu a’ge ebano e zaitun a’bosu du-du lasu ai ’gela’ge lasulat, tuagoluk tak paik o,” oluk, at otok modok welago a’ge Allah enat egei o.
15“O Mesir di iak erlak yu iak erlak takpasulat, o eba welago a’ge ’berlegat ’berlik-’berleksogo lebikpasulat, is aphwami eba welagai a’ge enebe ’berlegat ena’guluak erlagapsogo pasulat, tagoam e, An Nonuk Logo a’ge Allah anat enaluk ema o.
16Leweni pam at en edip lebikpasulat, logo po a’ge ano aiat o. Di owi yu owi hwami ena’gul onuk lo’bok en leweni lebikpogulat, o Mesir takpo a’ge emin is aphwami enebe a’bigat o eba welagai a’ge enebe ’berlegat tagonobo a’ge emin edip lebikpogulat logo pogulat, tua a’ge ano re, aiat o,” oluk, At ’Gain otok modok welago a’ge enat an mo’gulnesi o.
Warotluk lagaimu ebano welat ogulom wene
17Lebik nonobou wegesema welat, tahun 12 takpoluk, mesik tak a’ge dogwi naduk-naduk pelelak tanggal 15 dogwi ai pam ai Allah en an mo’gulneselat, 18“Aphwami en dogo a’ge yu o. Is aphwami Mesir a’ge enebe a’bik oruak a’ge ebano, onologu mariselat, is aphwami o ’geling elema ’bogwi a’ge ebano waragaimu eba enemin louwagoluk, o Mesir emin, di owi yu owi enanni modok welagaimu onogulani ’gela’ge emin, ’belebak enebasulat, tip o. 19Belap enebinogoluk mo’gulentasulat, his modok obatma re, is tagenebasu a’ge ano ’gela’ge his takhonobo erlak epegep? Tak honoboatma re, is ap enagap ’belak erlak a’ge henemin eba ’bi lit oluk mo’gulontomup o.
20Mo’gulentagunmu, is o Mesir a’ge wa’gun pam waronobogwiam enebe waretil lagai a’ge ebano enebe werak eminat warema o. Wa’gun arat ene’gikmu pangtak oruakma re o wiagapsogo pogulat, ogulani ’gela’ge enebe a’bik welagai a’ge ebano enilen wogonoboluk enebeil lagalat, tua o. 21Is ap enanni a’bik weim obo’gwi enaluk a’ge ano warotluk lagaimu eba en ogulat e, is o Mesir a’ge ogo, enakhit egesa a’ge emin ogo re, yema ’bu egesarik nis ap nenagap ’belak erlak a’ge wa’gun en werak waregerik oruakma re, nene’bek wegesema nenemin welege o, oluk, ua ani o.
22O Asyur emin, emalik ’gela’ge osilak enesegen oruak a’ge ’berlegat emin, eba oruak o. O Asyur wi-waling eba emalik at osi enesegen oruak a’ge wa’gun pam enebe werak waregesa a’ge ebano onuak soloksogo pil lagama oruak o. 23Onuak lolak a’ge ebano ’geling elema orogobu henede domok o Asyur ebe sebelak oruakma eba derlelogo pil lagama oruak o. Is oruak ano re, enelaluk ’gwiang o’gwe lagaimu eba welat, enemi om a’ge aphwami tenentil laga legesa a’ge ebano, wa’gun pam enebe werak waregesa a’ge ebano eba yat oruak o.
24O Elam ogo re, ebayat oruakma re, at waraga a’ge ebe waragama ebe sebelak sel’gwelsogo eba at osi enebe ’berlegat enebe werak waregesa a’ge ebano onuak soloksogo pil lagama oruak o. Is aphwami enelaluk ’gwiang pam denagaimu yema welat, enemi agalom a’ge tagenebil laga legesa a’ge ’berlegat ai re, enagap ’belak erlakhweat de, ’gwiang ogola hede pam ’bi legesarik oruak o. Is ’geling elema naduk ’bi legesa a’ge ene’gerli pam welagai a’ge ebano emin hegitsogoat ene’gerli hogwi o. 25Is enebe wusogo waretil legesarik oruak a’ge ene’gerlakma at ebe sebelakma eba abi’gat enebe wali’gogo at osi enebe a’bik wusogo waregesa onuak gelilogo pil lagama oruak o. Is ’berlegat ai re, enagap ’belak erlak a’ge wa’gun pam enebe wusogo waregesa o. Is ai re, aphwami enelaluk ’gwiang pam denagaimu eba welat, aphwami enemelmel ho a’ge tagonobogu legesa ano pam naduk enebe werak waretil legesa ano a’ge ene’gerlakma saplirak enemin sebelak welat, aphwami ’geling elema ’bogwi holuk, ene’gerli pam welagai a’ge ebano enemin hegit-hegit ene’gerli hogulat oruak o.
26O Mesekh emin, Tubal emin, eba oruak nak o. Is waregesa a’ge enebe selak oruak weling-waling eba onosi enebe wusogo modok a’bigat waregesema onuak soloksogo pil lagama oruak o. Aphwami enelaluk ’gwiang o’gwe no’gumu ebano welat, aphwami enemelmel ho a’ge tagenebil laga legesa ano pam enagap ’belak erlak a’ge wa’gun pam enebe wusogo waregesa o. 27Nadugat is ap weim tenak welegesa a’ge aphwami enelaluk welagaimu ’gwiang pam denagalat, enemelmel ho a’ge takpil legesema re, ap weim togwi a’ge enagap ’belak erlakhwe enebe werak waretil legesa a’ge salonobogulat, enebam a’ge enebe enebam louk takpogulat, enesegen onogodok ononuk ’balogo pogulat, tugu legesa ai ’gela’ge, is ap ai asogo tagonobo erlak o.
28Asogoatma re, at Firaun ogo re, worumu ap enagap ’belak erlak a’ge wa’gun pam werak enebe waregesema ’gwiang ’balogo sebelak oruakma ebano enemin saplisogo sebelak onobouwa o.
29O Edom a’ge ogo eba nagat oruak o. Is o Edom a’ge onuelak ononuk logo a’ge emin, aphwami onuelak ’gain-’gain emin, enanni welegesa a’geat de, wa’gun pam wusogo waretil legesa a’ge ano, eneminat selak welat, ye, aphwami enagap ’belak erlak a’ge ’geling elema ’bi legesarik oruak a’ge ebano ogo, eneminat legesarik oruak o.
30Is ap ’gain ’gain o o’borl akhit o’gwe welagai a’ge ’berlegat emin, aphwami o Sidon a’ge ’berlegat emin, en enanni pam aphwami enemi etil lo a’ge tagenebil laga legesa a’geat de, enebe werak warotluk ’bi legesarik oruak a’ge ebano, is ’gela’ge, ononuk erlak a’ge warotluk ’bi legesarik oruak o, Is wa’gun pam enebe werak waregesarik oruakma re, enagap ’belak erlakhwe waregesarik, ’bigisa a’ge eneminat welat, is ap ’gelingmu ’bigisarik oruak a’ge ebano enemin, welat ene’gerli pam e, asogoat tak, oruak o.
31At Firaun ano re, at emin, osi enesegen oruak, a’ge emin, ’bi lotluk is eba welagai a’ge ebano enil ontogu lemarik, nonosi enebe a’bik modok wa’gun en werak waregesa a’ge ebano asogo egesarik oruakhwe entige o, oluk, enede hweriogo pouwa o,” oluk, At otok modok welago a’ge Allah enat an mo’gulnesi o.
32“Ap Firaun ai re, aphwami enelaluk welagaimu ’gwiang pam denagalat, aphwami enemin etil lo a’ge tagenebil denaga lemagoluk, an en ede gagalegis a’geat de, at ogo, at osi enebe modok a’bik welagai a’ge ebano ogo is ap enagap ’belak erlak a’ge wa’gun pam enebe wusogo waregesarik oruakma loluk, eneminat welema o,” oluk, At odok modok welago a’ge Allah enat an mo’gulnesi o.
Currently Selected:
Yehezkiel 32: Wul
Highlight
Copy
Compare
Share
Want to have your highlights saved across all your devices? Sign up or sign in
