Yehezkiel 31
31
“Ap Firaun ai re, e laik ’gela’ge o,” oluk, elitsogo mo’gulesi wene
1Muknentegisema wegerik welat, tahun 11 takpoluk, mesik togulat dugwi ’biren pelelak poluk, mesik pelelak a’ge tanggal 1 dugwi ai a’ge pam Al Allah en an mo’gulneselat,
2“Aphwami en dogo a’ge yu o. Is Mesir a’ge onue onuk logo a’ge Firaun emin, at osi modok a’bik oruak a’ge ebano emin, mo’gulonto ano re, yuat o.
At onuk modok logo onogorlok a’geat ’gela’ge ap sa oruak no?
3O Asyur aga a’ge ano pobi tuak o. O Asyur ano re, naduk e laik o Libanon a’ge ’gela’ge e’gik modok op a’ge didual takpasulat, ebe yat ’bogorl tenhaligom ’gela’ge agalat, e’gela lalusema takpasulat, tisokhwe, eragam o’gwe di agan-yu agan welaga.
4Ik a’bik wago a’ge ano ebe logwap pasulat, ik ’gwiang ogola welago a’ge ano pam a’bosu wogoso a’ge ano ebe ’bekhit ligagalat, ik ai en e eme’gen ano sakhorak pil lasulat, di agan yu agan omu yabukmu oruak a’ge ebano eme’gen sakhorak pil laga o.
5Ik modok a’bik wago ano pam di agan yu agan yabukmu welago a’ge ebano, sakhoap tu ago modok oruakhwe e ebano modok ono’borl pam en lekhasulat, e’gik ebano yat a’ge lebik pil lasulat, esemis ano pam en a’bigat nin porluk-nan porluk til lasulat, tagokhwe re, e ano hou didual-dadual takpasu o.
6Takpasuam e’gik delak a’ge ano pam di tue yu tue darak no’gwi a’ge ebano onowi wosu agalat, e’gik duelak a’ge edip lekho seiye hogobi enemalik dagonobogulat, e’gik delak a’ge edip ’gunmu eba di aphwami yu aphwami set hwal horlouwogoluk, ebano goluk welat, togu legesa.
7’Gwiang ogola ik a’bik oruakma re, eme’gen yakho ’belabil lasu ano pam ebe modok op nagat ’bekhit nogorlok a’ge ligagalat, e’gik dal-paltak pil laga.
8 #
Kej. 2:9
E laik an Allah niabukmu oruak a’ge ano ebe lok agalat, e sanobar e’gik modok duelak pasulat, e berangan, e’gela un sektak pasulat, di agan-yu agan an Allah niabukmu modok op ebelak a’geat welat, tago ano re, e yu ’gela’ge mesik erlak, e ai modok mu ebelesogoat ligaga o.
9E ai, an en modok opsogo ebelogo pasulat, e’gik horok-horok lo’boktak pegimu re, di agan-yu agan an Allah niabukmu o Eden yogo ano en, at ai ’gela’ge, nis om a’ge logwe, eige, oluk, at ebe enebit hogu legesa o,” oluk, egei.
10Asogoatma re, at otok modok welago a’ge Allah en egei ano re, yuat o. “E ai, ebe yat ’bogorl tenhaligagalat, ye, e’gela un sektak hwe o’borl pam modok oruakhwe, tak-welema o. 11An modok logoat hegi, opoluk, ede en logo pagathwerlesimu re, at e ai, wiak tegei ogo, hegitsogo takpou wagoluk, is aphwami ena’gul onuk lo’bok oruak a’ge enegerlakma ap mesik anni logo modok welago a’ge ano e’gikmu pesi o. E ai, an en ukpasuam, 12Is aphwami mu a’ge ena’gul onuk lo’bok ene’gerlakma aphwami mesik enebabut wiak a’ge en e ano, mukho, ’bo pegesa. Mukho biselat, e’gik kurlengsogo dom petne ’biselat, dogoma ’biselat, tegeimu re, e’gik kurleng sogo ’gwiang ho’gorlakma eba ’bil laga o. ’Bil laga ai pam o ’gwiangma yema is aphwami ena’gul onuk lo’bok e ’gunmu eba set hwal hwerla ’gu aga legesa a’ge ebano, hweiye ’bulogo libagaihwe, 13Di sue yu sue darak no’gwi a’ge en e morik a’ge ai pam onowi ’bal hwerla ’gogulat, seiye hogobi en e morik a’ge e’gik dektak a’ge eragam ma ebano eragam ’gogulat, tegisa. 14Asogoatma re, di agan yu agan ik esa’goma welago a’ge ’berlegat o yogodak en e ano yat ’bogorl ten haligom ’gela’ge tagalat, e’gela un surakhwe ono’borl pam logo oruakhwe, tak welat, an modok logoat welegi, epasu a’ge ano asogo mesik welat, ye, di agan-yu agan ik en mugwap pil lasuam, e modok yat ligago a’ge ebano asogo mesik ligagalat, tua modok erlagat o. Tua erlagatma re, e ai ’berlegat ’bugetil lasulat, is aphwami warotluk ’geling ogola ’gwigisarik ’gwiang olukhwe akhit oruak a’ge ebano enemin agalat, tuagoluk, takpegimu oruak o,” oluk, egei o.
15At odok modok welago a’ge Allah en egei ano re yuat o. “E ai aphwami waragaimu ’bu aga ai erlige an en ik ’gwiang ogola yegelak a’ge ano en at pong poluk ebaget nge tuagoluk takpasulat, ik lasu a’ge ano mo in o; oluk, mo’gulosoam, di egeik yu egeik elaruk porlolu tagalat liplau wago a’ge ebano mo et til lasulat, aphwami waragaiam, nge togulat, onosum, derlelak wiak a’ge ’bukhorlogwi ’gela’ge, e ’begei ai pam o Libanon dom petne dom petne asogoat takpasuam, di agan-yu agan e’gelema oruak a’ge ebano, sawet etil lasulat, tegei o. 16E ai, is aphwami warotluk ’gelingmu begisarik oruak a’ge ano enemin mangno tuak oluk ’belebak enebegimu iak orlu-orlu ’biso a’ge ano, di aphwami yu aphwami enesa’go hwelak poluk onogorlok houwagoluk, takpegi o. Asogo takpasuam, di agan yu agan Libanon a’ge modok opsogoat omu degelak a’ge di egeik yu egeik en eme’gen mugwap pil laga a’ge o Eden yabukmu welaga a’ge ’bugotluk, ’gwiang ogola lail lagarik oruak a’ge ebano, ’berlek en enede siok egei o. 17E a’gul onuk lo’bok e’gerlakma di agan yu agan pema at e lok ’bou tegei ai, nenemin omok o, oluk, e’bek gogu legesa a’ge ebano, ’besie pam mukho ’bo pogwi ’gela’ge wa’gun pam werak warotluk lagalat welagaimu ebano ’bi legesarik oruak a’ge ebano ene’bek legesa.
18E modok logo erliktogwi a’ge oruak ano re, di agan yu agan o Eden yabukmu oruak a’ge ano ’gela’ge mesik a’ge oruak no? Erlagat a’geat de, e ai ogo, di agan yu agan Eden yabukmu oruak ano ’gwiang olukhwema eba louwagoluk, mukho pasulat, e ai emin mukho ’belebak paik o. Is ap enagap ’belak erlak a’ge welat, di ap-yu ap wa’gun pam wusogo werak a’ge welat, togumu ene’gerlakma eba nemin otluk welema o. E tu a’ge egesa ano re, at Firaun emin, is aphwami enebe a’bigat at emin e’girlogo woluk no’gwi a’ge ebano emin, tagonobo anore aiat o, oluk, an notok modok welago a’ge, an Allah enat egi o.”
Currently Selected:
Yehezkiel 31: Wul
Highlight
Copy
Compare
Share
Want to have your highlights saved across all your devices? Sign up or sign in
