Yehezkiel 30
30
O Mesir wiak o’go tagonobo wene
1At Allah en an mo’gulneselat,
2-3“Aphwami en dogo a’ge yu o. At otok modok welago a’ge Allah en tik egei ano re, yuat o, oluk, mo’gulonto egei ano re, yuat o. O agauwa ai erlige tu a’ge ano horogat lau wagalat, Allah en tagonobouwom erlige arat horok lau wagalat, tegeimu re, eige, oluk, lo’gu marogu lemak o. Agauwa ai pam e, dugwi orlomongtak pou wagalat, ai erlige re, di aphwami yu aphwami e’gin enebam lau wagalat, tua o.
4O Mesir eba wa’gun pam warenebil ’gogulat, O Kusi eba waronobogwiam e, enede wathorlogulat, O Mesir eba waronobogwiam waretil lagaihwe, ena’ge di a’ge yu a’ge hogul woluk lagalat, onowi ’bobuk ’belebak a’ge ebano moluktak pil lagalat, tua o.
5Wa’gun en is Mesir a’ge enebe nil lasulat, is Kus a’ge emin, Put a’ge emin, Lud a’ge emin, o Arap a’ge ’berlegat emin, Libia a’ge emin ye, is Aphwami Allah en hono’gwiang wokhentaik o, oluk obok mo’gulentesi a’ge emin wene ’belakpegesa a’ge ano emin, is ’berlegat wa’gun en nil lasu lema o, oluk, egei o.
6At Allah en egei ano re yuat o. Aphwami is Mesir a’ge enakhit egesa a’ge ebano enebe wusogo waragalat, Is Mesir a’ge en, nenanni a’bik o, oluk, enede logo pogwi a’ge ano sebelak onobogulat, is o Migdol en ’bekhit, o Siene hwerli welagai a’ge ebano a’ge ebano wa’gun pam en wusogo waragalat, tua o,” oluk, At onuk logo a’ge Allah enat egei o.
7Di owi yu owi di iak yu iak erlak agarik oruak a’ge ano at ’gela’ge di, yu, iak erlak agalat, Di kota yu kota modok wiagapsogo pegesa a’ge ebano ’gela’ge o Mesir a’ge onowi kota-kota ano asogoat wiagap pil louwa o.
8An en o Mesir odouk paikmu nil lasulat, is aphwami o Mesir a’ge lerentegisa a’ge, ano eneminat erlagapsogo nasuam, Allah anat enaluk ema o.
9O agauwa ai erlige is o Kush a’ge enede we enede aganhan oruakma, enarogun youk uagoluk is ap an en perak enebaikmu ik so pam perleneat louwarik, o Mesir disogo til wema o, oluk, mo’gulontouwa o. Mo’gulontouwa oluk tagonobo a’ge agauwa ano re, demat wemama re, wago holuk, eige! Oluk enede yarluk ua o, oluk, egei o.
10At otok modok welago a’ge Allah en egei ano re yuat o. Is Babel a’ge ’gain Nebukadnezar en is Mesir a’ge enebe a’bigat welagai a’ge ebano, erlagapsogo enebei louwagoluk, an en enede ’gagalik o.
11Asogo takpasuam e, is di aphwami yu aphwami onolot het a’bigat oruakhweat de. At Nebukadnezar osi enesegen oruak a’ge emin, onolot het a’bigatma re, o Mesir erlagapsogo pouwagoluk, an en wogonoboluk enebei laikmu o Mesir sebelogulat, onua’gun pam enebe wusogo ’gabok eselat o Mesir ’gwiang il modok erlagat ema o. 12An en ik nil e’gen wago a’ge ano dengtak pasulat, ’gwiang ai, is ap wiak a’ge ene’gikmu pasulat, ye, ’gwiang emin, ’gwiang ai pam oruak a’ge ’berlegat erlagapsogo poluk o wogowiat welemagoluk, ap mu a’ge ene’gikmu pasulat, tik o, oluk, ’gain nonuk logo a’ge Allah enat egi o, egei.
13At otok modok welago a’ge Allah en egei ano re yuat o.
“O Mesir eba onodogwi enasua erlagapsogo pasulat, o Memfis eba enasua ogut hele’gik a’ge ano erlagapsogo pasulat, tik o. O Mesir eba ap onue ’gain mesik ogo welema erlakma re, aphwami o eba onogorlok pam denaga lemagoluk, takpasulat,
14O Patros di iak yu iak erlak o wogoat takpasulat, o Soan odouk narlik pasulat, o Tebe onowiak o’go enebam pasulat,
15O Mesir sebelo’gogumu no oluk, kota anniap poluk welago a’ge Sin ano an nolot het ebam pasulat, aphwami a’bigat o Tebe welagai a’ge ano enebe erlagapsogo pasulat,
16O Mesir odouk narlik pasulat, tik o. Is o tin a’ge nonouk wiaksogo tuagoluk, tagonobogulat, o Tebe pak wogo a’ge moluk-melaksogo ukpoluk, enebe a’bik esanat Sebelhwerla’gogulat, is Mesir a’ge en loruk hopmu e’gin-pe’gin enebam agokhwe hogulat,
17Ap souwe o On a’ge emin, o Pi-Beset a’ge emin, wa’gun en nasuam enebe waretil lagalat, is hwami ene’gik abusak hogul a’ge wogonoboluk lagalat, tua o.
18E e’gin a’ge Sapi um pam a’ge porloksogo ukpogwi ’gela’ge, is o Mesir a’ge enanni welagai a’ge ano erlagapsogo pasulat, o ai erlige kota Tahpanhes orlomongtak paik am o. Nenanni a’bigat o, oluk, enede en logo pogwi a’ge ano o eba en ologun ’goboksogo erlagat emama re. O kota ai hena a’gurlok en e’gerlik pasukhwe at emalik ebano hogul wogonoboluk wema o.
19Is Mesir a’ge onowiak o’go enebam, pasu holuk e, An Allah at enaluk ema o, oluk, egeimu re,” mo’gulhentegis o, oluk, mo’gulentesi.
Is Mesir a’ge enanni erlak aga wene
20Hwik nentau wegesema oruakhwe, tahun 11 takpoluk mesik tak a’ge dogwi naduk-naduk pelelak tanggal 7 dugwi ai a’ge pam At Allah en an mo’gulneselat,
21“Aphwami en dogo a’ge yu o. An en is Mesir a’ge onue ’gain Firaun e’gik anni oruak a’ge ano porloksogo pegimu re, e’gik ano anni takpoluk wa’gun mesik emin woluk nosolom ’gela’ge, an en op emagoluk, hettak pasulat, e ’belak a’ge lo’boktak poluk, herle het tagalat, tu erlakma enat welegi o, oluk egei o. 22Asogoatma At otok modok welago a’ge Allah en egei ano re, yuat o. Is Mesir a’ge onue ’gain Firaun ai re, an nemin il ’belagatma re, e’gik pema owan anni erlak porlok takhwe pema anni oruak a’ge ano porloksogo pasu holuk e, eminat porloktakma re, wa’gun at e’gikmu woluk noso a’ge ano deksogo ’bua o. 23An en is Mesir a’ge ai di aphwami yu aphwami ene’gerlakma perak enebasulat, di owi yu owi ’berlegat yarluk tagenebasulat, tik o. 24Is Babel a’ge onue ’gain e’gik eminat anniap pasulat, nua’gun at e’gikmu pasulat, tik a’geat de, at Firaun nak e, e’gik ’birenakhoat porlologo paikmu re at Nebukadnezar eragam eria welat enebe werak enede ’goluk oso ai ’gela’ge, at asogoat ese lema o. 25Is Babel a’ge onue ’gain e’gik anniap paik a’geat de, at ap piraon nak e, e’gik porlologo paikmu tenap louk ua o. Nua’gun is Babel a’ge onue ’gain e’gikmu paikmu o Mesir sebele ’gwiselat, pebisogo lasu holuk e, ’gain nonuk logo a’ge Allah anat enaluk ema o. 26Is Mesir a’ge ai re, di aphwami yu aphwami ene’gerlakma perak enebasulat, di owi yu owi ’berlegat ’bulogo perak enebasulat, tagoam e, is Mesir a’ge en An Allah at enaluk ema o,” oluk, an mo’gulnesi.
Currently Selected:
Yehezkiel 30: Wul
Highlight
Copy
Compare
Share
Want to have your highlights saved across all your devices? Sign up or sign in
