Yehezkiel 29
29
O Mesir takpo wene
1 #
Yes. 19:1-25; Yer. 46:2-26 Lebik nonobou wegesema oruakhwe, tahun 9 arat takpoluk, mesik dugwi 9 a’ge pelelak poluk mesik pelelak a’ge tanggal 12 dugwi ai pamat at Allah en an mo’gulneselat,
2“Aphwami en dogo a’ge yu o. Hat hebe ap Mesir a’ge onue ’gain Firaun oruakma lagunmu, at emin, is o Mesir a’ge ’berlegat emin, tagonobo wene mo’gulontomup o.
3At Allah otok modok welago a’ge en egei ano re, yu o, oluk, mo’gulonto ano re, yuat o. O Mesir ik lasu a’ge ede ’burl eba buaya lok a’ge edenogo ’boutak welago ai ’gela’ge, ap o Mesir a’ge onue onuk logo a’ge Firaun ai, ne’birek hwerli tagat oruak o. At en eselat, ik Nil ano re, lasulom a’ge paget an enat tak pagathwerlegi egimu re, ik ai re, an na’geat o, oluk, egei a’geat de, 4An en at o’gorlop pam herle erlelik pasulat, ik e’gen edipmu at eiye welagoma hiane welago a’ge ebano, At osum hiane yagarogwi a’ge ogola yagat la’guagoluk hwelak pasulat, takpoluk At ik e’gen eiye welagoma ebano en hiane ebano ’gosu osum hiane sum ano pam lo’boktak hwe lisogo lebikpaik o. 5Lisogo lebikpoluk, at ebe emin, at ik e’gen eiye welagoma hiane ’berlegat at e hiane sum pam lo’boktak a’ge ano emin, o leimu eba hwikhai laik o. Asogo hwikhai laikmu o leimu eba kelil ua eba kelil uama re, aphwami en enebe odoksogo pogulat enagap ’gwiang ’balogo pogulat, tua erlak, is teiye hogobi emin, di tue yu tue darak noso a’ge emin onso’boru eniorum emagoluk, wogentaik ani o. 6#Yes. 36:6Asogo tagoam e, is aphwami o Mesir welagai a’ge ’berlegat en Allah anat enaluk ema o. At ai re, is Israel a’ge onua’gun orlogop ’gela’geat o. 7Ene’gikmu woluk lagaimu, deksogo biselat enadeng ’bekhit lasulat, enebe orlogop ai pam he’berik poluk lagaimu, deksogo ono’borluak porlok eselat, taga laga,” oluk egei o. 8Asogoatma re, at otok modok welago a’ge Allah en egei ano re yuat o, wa’gun woluk at eragam louwagoluk, peragenebaik a’ge ano louwarik, osilak enemin, onuam emin, erlagapsogo pouwa o. 9Erlagapsogo pogwi holuk e, o Mesir ai, di iak erlak, yu iak erlak o lei owi at ema o. Asogo ago holuk e, An Allah at enaluk ema o. At ano en eselat e, ik nil lasulom a’ge re, an enat takpegimu re, ik ai, an na’geat o, oluk, egei ai pam. 10At emin, at ik e’gen eiye welagoma emin, an nebit en o Mesir wiagapsogo pasulat, ye, o Migdol horogap poluk en ’bekhit, o ’gwiang Etiopia hwerli ’belakma o Siene hwerli ’belakma o di iak yu iak erlak o leimu ’gela’geat takpasulat, tik o. 11Aphwami mesigat nak ogo mesik ’gebela ’gwe ai lagalat, onuam ogo re ’gebela ’gwe ai lagalat, tua modogat erlak o. ’Gwiang ai pam aphwami mesigat nak mesik ogo re, eba eiye welagai erlakhwerli, tahun 40 pamat tua o. 12Di owi yu owi wiagap pil legesema e’gerlakma o Mesir ai nak e, ebenagaikmu, modok wiak di iak yu iak erlak o wogomayat ema o. Di kota yu kota wik-wiaksogo wiagap pil legesa a’ge e’gerlakma o Mesir kota-kota eba nak e, ebenagaikmu, modok wiak di iak erlak, yu iak erlagap paikmu oruakhwe, tahun 40 pamat ema o. Ye, is aphwami o Mesir a’ge ai, wokho di aphwami yu aphwami ene’gerlakma, peragenebasulat, tik o, oluk, egei.
13Asogo tik a’geat de, At otok modok welago a’ge Allah di owi yu owi ’berlegat yarluk tagenebasulat, en egei ano yuat o. Tahun 40 takpoluk, an en is aphwami o Mesir a’ge di aphwami yu aphwami ene’gerlakma yarluk tagenebaik a’ge ano, odoksogo onobou weik o. 14Odoksogo onobou wotluk o Mesir naduk welaga ’gela’ge takpasulat, pobuk togolik onowi edipmu o Patros onobou weikmu onue ’gain onuk logo a’ge en eragam onoboluk oruakhwe, is ononuk mesik ogu lema erlagat o. 15Di aphwami yu aphwami eneragam onoboluk welagaimu ene’gerlakma eba at onuk erlak modok sebelak welat, di aphwami yu aphwami ononuk logo oruakhwe, is ono’borlma at onuk mesik logo pasu lema erlak o. Naduk di aphwami yu aphwami eneragam onoboluk wene mo’gulentasu laga ’gela’ge, pobuk asogoat mo’gulentasulom no oluk, an en at onuk erlagapsogo pasu leik o. 16Asogo takpasuam e, is aphwami Israel a’ge en o Mesir emin enede he’berik pogu lema erlagat o. O Mesir a’ge en letnontouwak o, oluk, is Israel a’ge en is Mesir a’ge mo’gulentegisema wiak tigisa ano is eberagat welema o. Asogo ago holuk e, is Mesir a’ge en An nelaluk modok welegi a’ge Allah anat enaluk ema o, oluk, mo’gulnesimu re wene yu ’berlegat his Mesir a’ge mo’gulhentegis o, oluk, mo’gulentigis.
O Mesir ap Nebukadnezar e’gikmu pesi wene
17Lebik nonobou wegesema, welat, tahun 27 arat takpoluk mesik tak a’ge dogwi pelelak tanggal 1 a’ge dugwi ai pam At Allah en an mo’gulneselat.
18“Aphwami en dogo a’ge yu o, is Babel a’ge onue onuk logo a’ge Nebukadnezar en o Tirus ’baligoluk tagalat, osilak enesegen oruak a’ge iak anni pam wene mo’gulentasuam, til lagalat, enasu Bun sogo ukpasulat lasulat, onnum e’girlogo ukpasulat, ene’gik tenap lo’buksogo pasulat, tegei a’geat de, o Tirus sebelogo paigoluk osi mo’gulentesimu tegisa a’ge ebano at emin, at osilak enemin, o’go horlo erlakma enat oruakhwe hegi o, oluk, egei. 19Asogoatma re, at otok modok welago a’ge Allah en egei ano re, yuat o. An en o Mesir ai, is Babel a’ge onue ’gain Nebukadnezar wogeik o, wogosoam e, ena’ge-a’ge eba welago a’ge ebano ’berlegat hokhomsogo wasulat, at osi enesegen oruagap pagathorlo a’ge o’go tagonobo a’ge paget, onowi pam ’gwilotluk ena’ge horlogulat, di a’ge yu a’ge o eba oruak a’ge ebano hogul wogulat, tua o. 20At emin, osi enesegen oruak a’ge emin, tu a’ge an en mo’gulentaikmu tuama re, at en til louwa a’ge ano o’go o Mesir at e’gikmu paik o,” oluk, At otok modok welago-a’ge Allah enat mo’gulnesi o.
21“O ai erli’ge an en is Israel enanni etil lasu lemagoluk, takpasulat, ye, hat ene’gerlakma en wene mo’gulentasu holuk Demat mo’gulnentasu hege o, oluk e, enesa’go hologu lemagoluk, takpasulat, tik o. Asogo takpasuam e, An Allah anat enaluk ema o,” oluk, egeimu re, an mo’gulnesi o.
Currently Selected:
Yehezkiel 29: Wul
Highlight
Copy
Compare
Share
Want to have your highlights saved across all your devices? Sign up or sign in
