Yehezkiel 28
28
Ap onuk logo Tirus a’ge takpo wene
1At Allah en an mo’gulneselat,
2“Aphwami en dogo a’ge yu o. At otok modok welago a’ge Allah en egei ano re yuat o, oluk, ap onuk logo Tirus a’ge mo’guloum ano re yuat o. At ede en logo pasulat, an ai, Allah ’gela’geat o. An en ik laut ede ’burlmu eba Allah ’gela’geat welat, wene mo’gulentasumu eba hweriogo welat, oso a’ge o. An nede oruak a’ge re, at Allah ’gela’geat oruak oluk epasu legi a’geat de, at ano re, An Allah ’gela’ge erlak aphwami at a’geat de oso yo. 3At Daniel ede oruak ai re, we weiyat ’gela’ge a’geat de, an nede oruak ai nage modok logat, epasu a? At Daniel en wene hisogo a’ge ’berlegat aluk oruak ano, at ’gela’ge alukmu de, oso a? 4At ede oruak ano pam, di wene yu wene pobirak pasu ano pam, at a’ge a’ge a’bigap pasulat, Besi Emas emin, Besi perak emin, o uang pasumu ebalema a’bik odoksogo pagathwerlasulat, 5Di a’ge yu a’ge o’go-o’go til lasulat at modok alukmu re, a’ge a’bik ano pam e’gikmu oruak a’geat tak pagathwerlasulat, tago ano pam ede en logo pagathwerlasu o,” oluk, egei o.
6Asogoatma re, At otok modok welago a’ge Allah en egei ano re yuat o. “Allah ede oruak ’gela’ge, an ogo nede oruagat, epasumu re, 7Aphwami mu a’ge ena’gul onuk lo’bok ene’gerlakma logon onolot het modok a’bik a’ge at sebelak pou wagoluk wogonoboluk weik o. Wogonoboluk wagoam e, at ede oruak a’geat welat, modok lok logoat o, eige, oluk uagoluk, takpil laga a’ge ano, erlagapsogo pogulat, at onuk logo yo, eige, oluk ogwi a’ge ano, wiagapsogo pogulat, tua o. 8At ebe wusogo ’gelingmu ’belabuama re, Ap ik laut ede ’burlmu eba enebe werak waragai ’gela’ge, waremagoluk, takpouwa o. 9Asogo takpogwiam e, is worogwi a’ge enil pam at en, An Allah ’gela’geat o, oluk, ua ya? woruogoluk ene’gikmu oruakma re, At Allah ’gela’ge wolom a’ge erlakhwe, aphwami ’gela’geat welema o. 10Is ap enagap ’belak erlak a’ge, enebe werak waragai ai ’gela’ge, waremagoluk, ap mu a’ge enat wusogo pouwa o, oluk, An notok modok welago a’ge Allah enat egimu re, tua o, oluk, mo’gulomup o,” oluk, mo’gulnesimu re, mo’gulhegis o, oluk mo’gulegis.
Ap Tirus a’ge onue ’gain a’ge edami logo po wene
11At ’Gain Onuk Logo a’ge en an mo’gulneselat,
12“Aphwami en dogo a’ge yu o. Ap Tirus a’ge onue onuk logo a’ge takpo a’ge edami weni pam logo pasu lomup o. At otok modok welago a’ge en egei a’ge mo’guloum ano re yuat o. At modok op a’ge aphwami il walhegeigat welat, ede modok oruaksogo ebe modok degelak a’geat welaga o. 13An Allah niabukmu o Eden eba oruakma, di helep yu helep o’go lok il erli pennesogo, helep yaspis ’borlu ’belak a’ge emin, krisolit emin, yaspis e’gela iltak a’ge emin, pirus emin, krisopras emin, nefrit emin, lazurit emin, helep aphwami enemep ’gela’ge emin helep malakit emin, ’berlegat ai pam. At ebetne leik-louktak poluk welat, helep hweriogokhwe wolom ai besi emas a’ge pam heli’gogo oruak ano re, At ebe heli’gogo pesi ai erligeat leik-louksogo pegi o. 14At malaikat ’gela’ge kerub welat, niabuk wogo a’ge ’gwelabogo welemagoluk eberegis mure, taga lemagoluk, a’bosu egilogo edikpegi o. An Allah nebabut omu degelak a’ge pam welat, helep odouk ’gela’ge ’bak-’bage yebekhasu a’ge e’gerlak o’gwe eba denaga laga. 15At ebe heli’gogo pegi ai erlige en ’bekhit wiagap tegei hwerli, at wiak mesik ebam om erlagat welaga. 16At di owi yu owi a’ge a’ge pam o’go o’go til lasulat, olot het aga laga ano pam wiak tegei o. Wiak tegeimu re, onuk wiak agama an Allah en lebikpasulat, At Malaikat ’gela’ge, kerub welat, niabuk wogo ’gwelakharok a’ge ano helep odouk narlik a’ge ’gela’ge magale en atia pasu a’ge ano e’gerlakma en lebikpasulat, tegis o. 17Ebe modok op ano pam ede en logo pasulat, at onuk modok logo oruak holuk e, eige oluk, ogwi ano pam, ede oruak a’ge ano erlagapsogo pasulat, Tegeimu re, an en ’gwiangma belebak pasulat, is ap ononuk oruak a’ge enede en logo pogwi holuk e, Allah en disogo takpasukhwe hege o, oluk, uak olugat takpasulat, tegis o.
18At wiak a’bigat til lasulat, aphwami mimia tagenebasulat, a’ge a’ge o’go o’go til lasulat, til lasu laga ano pam o asuama tak pagathwerlil lasumu ebano wiagapsogo pil lagama re, at oruakma eragam en odouk ’gwielak pasuam e, ebe odouk nil lasulat, is aphwami ’berlegat enil pam, odouk nil lasulat, e’gerlal damulogo pesi o. 19Di aphwami yu aphwami at ebe enaluk a’ge ebano en at tegei a’ge enil holuk disogo tak oruak yu nogorlok o oluk onogorlok hegesa o. At takpo a’ge o ologun arat horok lau wagokhwe, modok onogorlok werak a’ge ’gela’ge takpegimu re, A’guluak modok modogat erlak welema o, oluk, weni pam leweni po ano re aiat o,” mo’gulnesimu re, egi o, oluk, mo’gulegis.
O Sidon takpo wene
20 #
Yoe. 3:4-8; Zak. 9:1,2; Mat. 11:21,22; Luk. 10:13,14 At Allah en an mo’gulneselat,
21“Aphwami en dogo a’ge yu o. Hat hil o Sidon akhit yetholuk, at takpo a’ge. 22At ’gain Onuk Logo a’ge Allah en egei ano re, yu o, oluk, mo’guloum ano re, yuat o. O Sidon ai re, an nemin hwerlitak oruakma re, is at e’gerlakma eba welagai a’ge ebano nonuk logo a’ge yetniouwagoluk, tak paik o. At wiak tegei o’go takpasulat, ye, is at e’gerlakma o welagai a’ge ebano en an mu ago erlak nomu degelak modok welegi a’ge enil niouwagoluk, takpasulat, tago holuk e, An Nonuk logo a’ge Allah anat enaluk ema o. 23An en ou enebam pou wagalat, O kota ebela ’gwe ebela’gwe eba aphwami enemep ik ’gela’ge lasu lemagoluk takpasulat, tik o. At o’borl o’gwe oruak a’ge ’berlegat in otluk, pangtil ’gogulat, At e’gerlakma eba onua’gun pam waronobogwiam waretil lagaiam e, An Allah at enaluk ema o.
24Orlok ’gela’ge, molip orlok ’gela’ge is aphwami Israel o’borl-o’borl welagai a’ge ebano en Israel wiagapsogo onobo a’ge nak enede opogwi a’ge ano pobuk mesik emin eberogu lema, erlagat o. Asogo eberogu lema erlak ai pam An notok modok welago a’ge Allah anat enaluk ema o, oluk, egei.
25At otok modok welago a’ge Allah en egei ano re, yuat o. Is aphwami Israel a’ge ano aphwami ena’gul onuk lo’bok ene’gerlakma ’bullak enebegimu welagaimu eba en odoksogo onobou wotluk, is enil pam an mu ago erlak omu degelak a’ge enil niouwagoluk di aphwami, yu aphwami enil pam tik o. O ai erlige is ono’gwiang lo’bok neragam a’ge Yakub wogegismu ebanoat eiye otluk welema o. 26Is eba eiye otluk enede we op at welat, onowi ut horlogulat, anggur owi yorumu yabuk wokho pogulat, tua o. Ye, is o’borl-o’borl welagai a’ge enebe ’berlegat en wiagap onobogu legesa a’ge o’go an en enebam pasulat, is mesik tagonobo erlakma en enede we op nak welagai ai pam An enaik Allah anat enaluk ema o,” oluk, egeimu re, hat o Sidon mo’gulhegis o, oluk, mo’gulegis.
Currently Selected:
Yehezkiel 28: Wul
Highlight
Copy
Compare
Share
Want to have your highlights saved across all your devices? Sign up or sign in
