Yehezkiel 27
27
O Tirus takpo a’ge paget leweni pam daintegei wene
1At Allah en wene an mo’gulneselat e.
2“Aphwami en dogo a’ge yu o. O Tirus takpo ano leweni pam dain tagalat werise lomup o.
3Di aphwami yu aphwami o ik laut esa’go’gwe welagai a’ge enebaget di a’ge yu a’ge o’go ’balil neselat ik laut pam libagalat ’guagalat tugumu welat, tago a’ge o tirus ai, mo’gulemin o, oluk, At ’gain onuk logo welago a’ge en egei ano re, yuat o. O Tirus en an ik so ’gela’ge modok op a’ge nak oruak o, oluk, eselegi o.
4At eiye welat lasumu eba re, ik laut ede’burl ebayat oruak o. Ap ik so helo’gogwi modok enaluk enat arat op modok a’ge heli’gogo pogulat,
5E, Sanobar dom Hermon ’gagalak ebe pam heli’gogo pogulat, E Ara o Libanon a’ge pam o sogwei en woluk lasu a’ge sum sepnogwi a’ge edikpogulat,
6E, tarbantin o Basan a’ge pam ik so worogwi a’ge sain sogo, pogulat, e, cemara o Kitim e’biang ’balisoma esa’goma etle pam en at holu delak poluk, gajah iak e’gerlakma lo’boksogo pil lagalat,
7Helep modok hegerligen dape’gek-yape’gektak a’ge o Mesir a’ge pam o Sogwei en purak woluk lasukhwe sum pogwi a’ge ano pogulat, sum tepnik a’ge ai pam, at ai re, ai a’ge o, oluk, enalugapsogo takpogulat. O Elisa e’biang ’balisoma esa’goma en sum ebak ’borlu ’belak a’ge emin, herle il momi-momisogo tak a’ge emin, mo orlouk hasumu no oluk o ou’gwa ’gela’ge salogo pogulat, tigisa o.
8Ap Sidon a’ge emin, Arwad a’ge emin en, at ebe ik so worogulat, At lasukhwe, ap at eiyagai lo’bok enaluk a’ge en degelogulat,
9Wiak agoma no oluk, hele’gogwi a’ge ap modok enaluk o Gebal a’ge emin ik so at en a’ge pam welat. Asogo tugulat, a’gea’ge woluk lagaimu o’go ’baluogoluk di ik so yu ik so ik laut pam lagalat, is degelonobogwi a’ge emin, ’berlegat at ebam lo’bok lau wagalat, tugu legesa o.
10Is ap o Persia a’ge emin, Lud a’ge emin, Put a’ge emin en at osi enesegen oruak a’ge o weim togwi a’ge wagalat sing emin, sum erik a’ge emin, at owi hebat lo’boktak a’ge pam sepnogo-sepnogo pegesema oruak en e, aphwami en eige! Oluk, logo pogulat. 11Is ap Arwad a’ge emin, at Osi enesegen oruak a’ge emin, en at ebe ’gwelabogo welat, Is ap o Hamat a’ge en enil wolomma lekho yatsogo werik a’ge pam ligagalat, asogo tugulat. Ebe modok op a’ge oruak a’geat de, is enesing at owi o hebat lo’boktak a’ge pam modok leik-louksogo tepnik pil lagama re, ebenagaikmu, modok op at agama oruak o.
12At a’gea’ge a’bik oruak holuk e is Sardis a’ge en at emin o’go-o’go togulat, is ena’ge besi perak emin, besi uak emin, besi timah amolit oruak a’ge emin, esing a’ge emin, woluk at en a’ge-a’ge oruak a’ge ebano o’go ’bal hwerlau wagalat. 13Is Yawan a’ge emin, Tubal a’ge emin, Mesekh a’ge emin, en enemin ena’ge-a’ge o’go-o’go tugulat, a’ge horlouwogoluk eneragam a’ge wokho at wogogwiam e, ena’ge besi tembaga a’ge pam hele’gik a’ge ebano wogulat, 14Is ap Bet-Togarma a’ge en a’ge-a’ge horlouwogoluk ’gwiangso litluk lagai a’ge kuda emin, hurotluk weim togwi a’ge kuda emin, di a’ge yu a’ge woluk no’gwi a’ge keledai emin, wogogulat, 15Is ap o Rodos a’ge en at emin o’go-o’go tugulat, is aphwami a’bigat o ik esa’go’gwe welagai a’ge en a’ge-a’ge o’go ’bal horlogwi a’ge agalat tugulat, gajah iak emin, woluk at a’ge o’go ’bal hwerlau wagalat, 16Is Edom a’ge en at en a’ge a’bik oruak holuk, ena’ge pam o’go agam pagam tugulat, is ena’ge helep il erli penne tagenemep ’gela’ge emin, sum ’borlu werak a’ge emin sum dape’gek-yape’gektak a’ge emin, sum modok ebelak a’ge emin, helep op a’ge emin, helep delima ’gela’ge emin, ebano pam a’ge o’go ’balhorlogulat. 17Is Yehuda a’ge ogo, is Israel a’ge ogo, is en at emin ena’ge-a’ge o’go agam pagam tugulat, gandum o Minit a’ge emin, kami emin, ’gin a’bosu emin, Zaitun a’bosu emin e’ben op a’ge emin, pam en a’ge a’ge o’go ’balhorlogulat, 18At en di a’ge yu a’ge a’bigat modok loksogoat takpil lasulat, a’ge il hun-hun lo’bok welat asogo takholuk is Damsyik a’ge en enemin o’go agam-pagam tugulat, anggur a’bosu o Helbon a’ge emin domba asu o Sakhar a’ge emin, woluk at ebam o’go ’balil wagalat, 19Is o Dedan a’ge emin, Yawan a’ge emin, en at a’ge o’go agam pagam o’go ’bal hwerlau wagalat, ena’ge-a’ge besi pam di a’ge-yu a’ge hele’gik a’ge emin, odouk op a’ge e’gen emin, el emin, ebano pam a’ge o’go ’bal hwerlau wagalat, 20Is Dedan a’ge en kuda o’borl pam delak poluk huragai a’ge hele’gik a’ge ano pam at emin o’go agam pagam tugulat, 21Is Arab a’ge emin, ap onuelak ’gain ’gain o Kedar a’ge ’berlegat, emin, en a’ge o’go ’bal horlogulom a’ge otluk, enemin o’go agam pagam tugulat, domba emalik emin domba ierak emin, kambing ierak a’ge emin, ai pam a’ge o’go ’bal hwerli wagalat, 22Is Syeba a’ge emin, Raema a’ge emin, at emin o’go agam pagam tugulat, di a’ge yu a’ge oduk op tago a’ge modok op a’ge emin, helep il ekhen-ekhen a’ge lo o’go lok a’ge ano emin, besi emas emin, ano pam a’ge a’ge o’go ’bal hwerlau wagalat, 23Is Haran a’ge emin, Kane a’ge emin, Eden a’ge emin, di a’ge yu a’ge o’go ’balil lagalat, is Syeba a’ge emin, Asyur a’ge emin, Kilmad a’ge emin, en at emin, o’go agam pagam hil wagalat, 24Is ena’ge sum yat modok op a’ge emin, helep ’borlu werak a’ge emin, sum dape’gek ’belak a’ge emin, sum delak poluk huragai a’ge dape’gek ’belak a’ge eregin annisogo egeik a’ge emin, at di a’ge yu a’ge o’go ’baliselat o’go ’balisoma ebanoat o’go ’balhorlogulat, togu legesa. 25#Wah. 18:11-19Ik so o Sardis a’ge en at a’ge-a’ge ebano o’go ’bal horlouwak oluk, di owi yu owi woluk lagalat, ik laut ede ’burl ebano a’ge-a’ge woluk no’gulat, e’gin en sebelak ’bi lasukhwe no’gwi o.
26Is at ebe ik so worogwi a’ge en ik laut lok a’ge ede ’burl erliak-’gwerliak hasumu ebano woluk lagalat, tugukhwe at de, O yasobu o mo pou wago hegit eba en o’borlogouk punhau wagalat, ik laut ede ’burl ebano en moluk-melak, sogo pouwa o.
27At a’ge-a’ge amonno ede hwedik a’ge emin, a’ge-a’ge o’go ’baliso a’ge emin, a’ge o’go agam-pagam hasu laga a’ge emin. Is ik so degelogwi a’ge emin, ebe woluk no’gwi a’ge emin, wiak ago holuk helo’gogwi a’ge emin, a’ge-a’ge o’go ’balogwi a’ge emin, at ’gwelakharok welagai a’ge enesegen oruak a’ge emin, aphwami wogonoboluk lasu a’ge ’berlegat emin, at ebe porlok-perlaksogo pasu ai agauwa ai erligeat ik laut ede’burl sebel onobouwa o.
28Is at ebe woluk lagai a’ge sebel enebisokhwe eniak ngai wai ogukhwe is o’borlma ik iak pam welagai a’ge ebano enesa’go hwologulat, onogorlok en onuak erlik ’bo pouwa, o.
29Is di kapal yu kapal so wetil no’gwi a’ge ’berlegat at ik laut ede’burl ’bi lasukhwe enil hogulat, enekapal ukpogulat, is woluk lagai a’ge ano emin, is at degelogwi a’ge enebe ’berlegat emin, en ik laut esa’goma inlai lotluk
30Eniak lok pam nge tugulat, disogo tegei nenebit o, oluk, ogulat, sip-sip ena’gul pam pogulat, ul enede’burl irep hogulat,
31At en tua ano pam is ena’gul’bie ’gotnaksogo pogulat, sum wiak derleptak a’ge ’buk horlogulat, takpoluk, at tago ano pam enede pit hogulat olo’gu marogulat, leweni di dogoksogo ogulat, tua ani o.
32At tiso ano pam is en nge togulat, lo’gu marogulat, asogo tugulat, E leweni pam a’gul weni ano yuat o. O kota Tirus ai, e’biang ’balil ik laut ede ’burl oruakhwe, iak erlak aga ’gela’ge, kota mesik o ’geba iak asogo erlak aga epegep?
33A’ge a’ge o’go ’baluogoluk ik laut pam woluk no’gwi holuk, di aphwami yu aphwami o’go ’bal horlogu lomtik, op at o’go ’bal hwerlege o, oluk, ede hweriogo pasulat, a’ge a’ge a’bik modok ede hwedik a’ge ano woluk lasulat, a’ge o’go ’balil lasulat, tago ano pam e, ap ’gain ononuk logo a’ge o ’gwiang pam oruak a’ge ebano ene’gik oruagap enebil lasulat, taga laga o.
34Asogo taga laga a’geat de, yogodak nak e, ik laut en porlok-perlaksogo pasulat, ik laut en henede modok sebelak pil wagalat, tisokhwe, di a’ge yu a’ge o’go ’balil noso a’ge ano emin, is aphwami at ogola yagarak oruak a’ge emin, ’berlegat sebelogo enebesi o.
35Is aphwami is esa’go’gwe welagai a’ge ’berlegat, enil holuk youk ogulat, is ap ononuk oruak a’ge en onuak lup lasulat, onorogole hegi lekho pogulat, togwi o. 36At takpo a’ge arat harok lau wago holuk tagalat, At a’guluak modok-modok erlagapsogo pasulat, tegei ai lok logoatma re. Is ap di a’ge yu a’ge o’go ’balil lagai a’ge di aphwami yu aphwami ene’gerlakma welagai a’ge ano en nis asogo taknonobou wemama re, nogorlok o! Oluk, eniak ngai wai ogulat amitmit sup ogu lema o, oluk, weni pam o Tirus takpo a’ge a’gul weni ano aiat, egeimu re, egi o,” oluk, mo’gulegis o.
Currently Selected:
Yehezkiel 27: Wul
Highlight
Copy
Compare
Share
Want to have your highlights saved across all your devices? Sign up or sign in
