Yehezkiel 26
26
O Tirus eba takpo wene
1 #
Yes. 23:1-18; Yoe. 3:4-8; Amo. 1:9,10; Zak. 9:1-4; Mat. 11:21,22; Luk. 10:13,14 Woknonoboluk nonobou wegesema oruakhwe, tahun 11 takpoluk, mesik tak a’ge pam dogwi owan ’gerat pelelak tanggal 1 dogwi ai pam At Allah en an mo’gulneselat.
2“Aphwami en dogo a’ge yu o. O kota Tirus en o Yerusalem obok ’baliselat, di aphwami yu aphwami libagalat-’guagalat tugumu kota Yerusalem ai, arat erlagapsogo oruakma yogodak ’gebela an nebam nak waga lema o. At wik-wiaksogo oruakhwe, an nak e, modok logo a’geat eik o, oluk, egeimu re,
3At kota Tirus ai, ede eberiso a’ge ano an en erlagapsogo paik o oluk, an notok modok a’ge Allah enat egi o. Ik laut en erliak-gwerliak-hasu ai ’gela’ge, di aphwami yu aphwami en, at sebelak pogu lemagoluk, mo’gulentaik o. 4Mo’gulentasuam, laga lemarik, o Tirus helep pak wogo a’ge ano erlagapsogoat weim yenal wogulat welagaimu o yat werik a’ge ano moluk-melaktak pogulat, tua o. Togwi holuk, moluksogo pouwa a’ge ano an en modok berlik-berleksogo hwikhasu leiktik, helep asu ’belak ebak a’ge demak ’gela’ge demak poluk ukpaik o ani. 5O Tirus e’biang ’balogo laut ede’burlat oruakma, hiane yagarogwi a’ge sum egeik a’ge ere’gik pogulommaat ema o, oluk, An notok modok welago a’ge Allah enat egimu re, asogoat ema o. O Tirus ai, di aphwami yu aphwami en hogul horlogulomma enebagerat agalat, 6ye, at emalik ’gela’ge di seli yu o seli o lok sebelegei ik iak petne welagai a’ge ano ’bouwa’gun en nil lasulat, togolik o. Asogo tago holuk, ’gain nonuk logo a’ge anat is Tirus a’ge enaluk ema o, oluk, egei o.
7At otok modok welago a’ge Allah en wene mesik egei ano re, yu at o. Ap ’gain ’berlegat onue ’gain o Babel a’ge Nebukadnezar ano en kuda pam emin, ’gwiangso kereta weim togwi a’ge pam emin is kuda pam denagai a’ge emin, ap enesegen oruak a’ge enebe lok logolak emin, o abel akhit hegit eba en o Tirus sebelil wemagoluk, perak onobou weik ani o. 8Waga lemarik, at Tirus emalik ’gela’ge di seli yu seli o lok seli ik esa’go ’gwe welagai a’ge ebano guok onua-a’gun pam wusogo enebi lagalat, pang enebil oluk e lagalat, ’gwiang palogo lagabil ligagalat, nonoweim o, oluk, sum weim sum ’buk horlogulat, tuagoluk, osilak mo’gulentaik o. 9O kota Tirus helep pak werik a’ge moluk uagoluk e ’belak a’ge pam yema akhit delhogulat, eba akhit delhogulat, tit o, oluk, mo’gulentasulat, at e’besi wa’gun pam ’gagalak wolom a o werik a’ge ano moluksogo ’bo pasulat tua o. 10At o kuda modok a’bikmu re, onoyuk pil lagalat, likho ’gwe o ai ’berlegat, sip-sip e’girlogo pil lasulat, is ap weim togwi a’ge en pak wogo a’ge emde ’belakma kota ’gwi lagai ai ’gela’ge, at Nebukadnezar en kota Tirus ’goduk ’gwi lagaimu ’gwi lasu holuk e, weim obu a’ge kuda pam huragai a’ge emin, kereta weim obogwi a’ge emin, kereta we a’ge emin, ’golok-golok a’ge til lagai ano pam helep pak werik a’ge ano erlang-erlang ua o. 11O kota di ebela yu ebela eba at okuda esan a’ge onoyuk en ’beselil lagalat, o kota emalik ’gela’ge, aphwami ebano wa’gun pam wusogo enebi lagalat, tugu legesa a’ge ano ebet hegeik helep ebe a’ge pam wogo a’ge ano moluk-melaksogo pil lagalat, 12O Tirus eba di a’ge yu a’ge hogul a’ge woluk lagalat, di a’ge yu a’ge o’go ’balogo welago a’ge ebano woluk yarluk ogulat, asogo tugulat, pakleget wogo a’ge ebano moluk-melaksogo pogulat, aphwami onowi op a’ge a’bigat werik o kota ede’burl welaga a’ge ebano moluk-melaksogo pogulat, takpoluk, egelep emin, agan emin, o’gwiang ukpegesa a’ge emin, wokho ik laut, e ede ’burl hwikhai louwa o. 13#Wah. 18:22O kota eba onogola enagai en weni wetil lagalat eniak amitmit sup ogulat, gitar iak e’gil lagalat togwi a’ge ebano an en erlagapsogo paikmu re mesik emin enesa’go hologu lema erlak o. 14An en o kota ai, helep ebak asu erlak a’ge ’gela’ge delak pasulat, sum egeik hiane yagarogwi a’ge ere ’gogulomma ’gela’ge takpasulat, tikmu re, ebalema wusogo pouwa modok erlagat o, oluk, An Allah enat egimu re, tik o,” oluk, At otok modok welago a’ge Allah enat egeimu re, hat o Tirus yuat mo’gulhegis o.
15At otok modok welago a’ge Allah en wene mesik o Tirus mo’guloum a’ge paget mo’gulnesi ano re, yuat o. O Tirus sebelil ’guagalat, kota e’gerlakma eba aphwami warenebil lagaihwe eniak ngai-wai ogulat, aphwami enebe werak a’ge enede o’borlogouk ing hil lagalat tugukhwe enesago hologulat, is o lok laga a’ge ik esa’go’gwe oruak a’ge ano onogorlok en onuak erlik ’bo pouwa erlak epegen? 16#Wah. 18:9,10O Tirus takpasuam e, is ik esa’go’gwe welagai a’ge onuelak ’gain-gain en is wene mo’gulontogwi a’ge ebano ukpogulat, ’gain welat, onosum yat ’buktogwi a’ge ebano no’gorlogo pogulat, onosum dape’gek a’ge ebano no’gorlogo pogulat, tua o. Asogo takpoluk, onogorlok en onuak erlik ’bo pogulat ’gwiangma hurotluk alik worogulat. O kota Tirus tegei ai nogorlok e! oluk ene’gik eniak sarluk horlogu lema o. 17Asogo erlikhorlogu lemarik olo’gu marogulat, o kota Tirus weni pam a’gul weni worua ano re yu at o. O kota honuk modok wigalaga ik laut ogola erlak e’gen yu nogorlok o. Hat emin, Hat en tenak welegen a’ge emin, ik laut pam togwi a’ge eiye oruakhwe, di aphwami, yu aphwami o lok erang ik esa’go’gwe welagai a’ge honogorlok en enalik worogu legesa o.
18Ye, o yogodak en nage honuk erlak agoam e, is o lok erang ik esa’gogwe oruak a’ge ebano alik worogwi ’gela’ge worogulat ye, is ’gwiang e’biang ’belakma oruak a’ge ebano en hebe erlak e’gen a’ge hwelak poluk onuak emi lasulat, tegei o, oluk, ogu lema egei o.
19At odok modok welago a’ge Allah en egei ano re yuat o. “Di kota yu kota aphwami welagai erlak a’ge ’gela’ge an en o kota Tirus di a’ge yu a’ge iak erlagap poluk o wogo wi takpasulat, ik laut ’gwisalogo ebam ’bo pasulat, ik ebe en at ebe selak pou wagalat, tago holuk e, 20Di ap yu ap o page nadugat, geling elema ’bigisarik oruakma re, enemin welemagoluk, belebak enebaik o. O page nadugat wik-wiak tagenebesimu ’gwiang ogola. Nak oruak ai ’gel a’ge at ’gwiang ogola eba is naduk waregesarik ’geling elema oruakma, enemin welemagoluk belebak enebaik o. Eba en orlu agalat, aphwami enelaluk welagaimu ebalema lau wagalat tua erlagat o. 21#Wah. 18:21Al wolom a’ge hwerli ologun pam onuak erlik ’bo po a’ge takpaikmu re, ebe erlakmaat hagup ani o. Ebe heratil louwa a’geat de ebe modok-modok erlakmaat hagup ani o,” oluk, At otok modok welago a’ge Allah enat egeimu re, hat o Tirus at mo’gulhegis o, oluk, mo’gulegis.
Currently Selected:
Yehezkiel 26: Wul
Highlight
Copy
Compare
Share
Want to have your highlights saved across all your devices? Sign up or sign in
