Yehezkiel 16
16
Allah en o Yerusalem ugwe ’gela’ge hwerlesi wene
1’Gain onuk logo a’ge Allah en an mo’gulneselat,
2“Aphwami en dogo a’ge yu o, Kota Yerusalem en wiak a’ge til lasu ano wene mo’gulesi lak o. 3Asogo laguntik, at otok modok welago a’ge Allah en, wene disogo mo’gulhesi o, oluk, mo’guloum ano re yuat o. At Yerusalem edip emin, dagagama emin, ai, is o Kanaan welagaimuat oruak o. At aik ai re, ap Amori a’ge, ye, ia re, hwe Het a’geat o. 4At dagaga erlige onum ’balogulat, ebetne aling oruak holuk e, ik pam ’gume wusogo pogulat, aling ebetne a’ge ’gela’ge, mayu pam emesogo hosogo pogulat, sum ebak a’ge pam ebe e’girlogo pogulat, tu erlak o. 5Ap mesik en at edeap tagalat, at ede en di takebasulat, yu takebasulat, asogo tagalat, ebaget hunsogoat degeliselat, tu erlak o. A’geat de, at dagaga ai erlige malik yu nenemelmel wiak o, oluk, at ebe dakho emep emin yabukmu eba ’bulogo hwikhegesa o.
6Hwikhail legesema ebano oruakma, an ’gebela ’gwe ai lasulat, at emep petne e’gin-e’gan osoma nil hegirik emep e’gin-e’gan sogo oruakma, modok helaluk emen o oluk, mo’gulegis o. 7Mo’gulegistik, e’gela yabukmu ligago ai ’gela’ge, at ebe souweap pasu oruakma en, ebe lok agalat uak yat agalat, epema modok op agalat, tegei o. Asogo tegeirik, agamu arat lebagalat, omutaruk arat lebagalat, tegei a’geat de, eserli wantak erlak we age’golomat welaga o. 8Pobuk, an ’gebela ’gwe ai lasulat, ebe nil hegirik, arat dogumom a’ge agoam e, nosum yat a’ge ologun pam at agap enemak oruak a’ge ano e’girlogo hettak pegi o. Pegirik, at nemin wene ologun ’balogo horak poluk, nare harat o, oluk, An notok modok welegi a’ge Allah en ho’buk ’balisoam e, at an nare at aga o. 9An enat at ebam emep e’gerlik a’ge ano ik pam hosogo pasulat, a’bosu egelik pasulat, takpoluk,
10Osum dape’gek-yape’gek ’belak a’ge ’buktak ebasulat, oyogut hiane laut pam a’ge onuk lumba-lumba agap pam egeik a’ge ’buktak pasulat, osum ’gut a’ge pam e’girlogo pasulat, osum yat o’go lok a’ge ’buktak pasulat, takpegi o. 11Asogo takpegirik ebetne a’ge leik-louktak pasulat, ’gware ’gela’ge e’berli pam ’buktak pasulat, egeille o’gorlop pam ’goluktak pasulat, 12e’biang ele’gwe wam iak ’gela’ge ’gwelebak pasulat, esa’goma takpasulat, ’gare-’gare modok nogorlok a’ge a’gul pam ’buktak pasulat, tegis o. 13Emas perak a’ge pam ebetne leik-louksogo pasulat, osum modok ’gut a’ge emin, o’go lok a’ge emin dape’gek ’belak a’ge emin, ’buktak pasulat, ye, at en nasulom a’ge re, gandum e’gen wogo modok op a’ge emin, ’gin a’bosu emin, Zaitun a’bosu emin modok leik-louksogo wogeselat, tegismu ebe modok op ebelak a’geat op otlukhwe lok ap onuk logo a’ge ugwe ’gela’geat aga. 14At orogole modok op ano pamat, modok op a’ge leik luksogo takpegimu re, hwe modok op a’ge arat modok ebelak a’geat agarik di aphwami yu aphwami ene’gerlakma onuk arat wiyal aga o, oluk, ’gain notok modok welegi a’ge An Allah enat egi o,” oluk egeimu en mo’gulhegis o.
O Yerusalem hwe danian ’gela’ge aga wene
15At asogoat takpegi a’geat de, at en norogole modok opma oluk epasulat, ye, nonuk modok arat wiyal aga hegi, oluk epasulat, asogo tagalagarik hwami danian a’ge ’gela’ge, takpoluk ap ’gebela at oruak o’gwe ai wagai holuk e, enemin nogo eselat, tenniouwak nak, epasulat, ap we yogunat a’ge en Ne’birek nogouwok o, oso holuk, ebe op a’ge anoat de e’birek nogogulat, 16Osum pema wesirik, asua ebaget wusogo wogosoma dom pam dape’gek-yape’geksogo takpoluk eba welat, ap enemin yogun yogunat til lasulat, tagalaga. Asogo tagalaga ai ’gela’ge re, is aphwami logon hogwi erlakma re, pobuk asogo mesik houwa erlak a’ge pagerat de, tagalaga o. 17Ebetne modok opsogo ebil ebeltakma en emas perakpam hele’gik a’ge ano, wokho asua ogut ap ’gela’ge heli’gogo poluk ap enemin togwi ai ’gela’ge asua ogut hele’gik a’ge ano emin, til lasulat, 18At osum dape’gek yape’gektak a’ge is asua ogut ai pam lo’boktak paik oluk wasulat, Zaitun a’bosu emin, e’ben op a’ge emin, wogegis a’ge ano is asua enebaget wogentasulat, 19Gandum e’gen wogo modok op a’ge emin, Zaitun a’bosu emin, ’Gin a’bosu emin, at nouwagoluk wogegis a’ge ano wesirik is e’ben op houwagoluk, enebaget pasulat, tegei o, oluk, an notok modok welago a’ge Allah enat egi ai o.
20Asogo tagalat, at en at emalik logomalik emin, hwelani emin, dagenebegeirik, is yu ogo at Allah eiyagaiat o, oluk, egei a’geat de, asua onso’boru ’gela’ge nouwagoluk, enebe wusogo enebaget wogentasu laga, hwe, danian ’gela’ge, til lasu ai, wiagatma re, yu hwerliat, yu a’ge oruakhweat de, til nak lasu ai? lok logo erlak oluk, en tago a? 21An neiyagaiat oruakhweat de, enebe wusogo asua paget odouk narlik pasu laga o. 22Apseri werak a’ge til lasulat, hwe danian til lasulat, asogo tagalat, at owan ebe malik pou a’ge pam osum ’buktak erlak we agap e’gen wogo a’ge emep petne erlebik taga laga a’ge ano eberak erlakma enat oruak o, oluk, egei o.
23At otok modok welago a’ge Allah en eselat e, “Ebe nede o! at ebe nede at o! wiak ai a’ge at til lasulat,
24’Gwiang pil ligotluk asua owi wusogo pasulat, wene ’baluogoluk odoktogwi ’gwe ’berlegat mu’gat asua wam wusogo wogogulomma ebale heli’gogo pil lasulat, tegei ai emin, wiagat tegei o. 25’Gebela ologun-ologun ’berlegat asua-ano ebaget wogonto a’ge, e lekho dalogo pil lasulat, di ap yu ap ’gebela ’gwe ai wagalat, enede en nouwagoluk, we yogunat tenniouwak, oluk a’ge-a’ge wogentasu laga ano pam ebe modok pok ’boguntak op a’ge ano wiagapsogo pasulat, tegei. 26At emin horoksogo welat, ede modok nil lasulat o Mesir ano en, tenniouwak o, oluk, emin til lasulat nak tegei ano pam an Allah nolot het aga o.
27Het agoam e, nebit en ne’gik anni pam o’gwiang wogegis a’ge ano weiyal pasulat, emin il ’belak a’ge en, at e’gerli erlak we yogunat til lasu yu nogorlok o, oluk epegesema is Filistin a’ge ano ene’gikmu pasulat, tegis o.
28At en til lasu ano ebam modok lasu erlak enat, ap Asyur a’ge en ogo, tenniouwak o, oluk, enemin tegei. Enemin tegei a’geat de, ebam modok lasu erlak nak en e, 29di a’ge yu a’ge o’go ’balogwi a’ge tenak welagaimu is ap o Babel a’ge, en tenniouwak o, oluk, enemin til lasu laga a’ge at de ebam modok lasu laga erlagat o,” oluk, egei o.
30At odok modok welago a’ge Allah en eselat, “Tenniouwak epasu a’ge ano sebelogo ukpo mia holuk, hwe danian e’gerli erlak til lasu ano ’gela’geat til lasu ai o. 31Gebela ologun-ologun ’berlegat ’gwiang lagabil ligotluk asua owi wusogo pil lagalat, wene ’baluogoluk odoktogwi ’gwe ’berlegat asua uam wusogo wogogumu ebale heli’gogo pil lasulat, takpoluk, ap we a’ge yogunat enemin til lasulat, o’go erlak a’ge we tenniouwak oluk ogola epesimu re, hwe danian woknemak opoluk tago ’gela’ge, tagalom erlak ai enat modok nogorlok a’ge taga laga.
32At hwe danian ai, nogun en nak tenniouwak oluk opo erlakma en, ap we yogun enat tenniouwak, nak oluk ede ebetil lasulat, taga laga ai en, modok miasogo taga laga o. 33Is ap en hwami da tenentil no’gwi a’ge ai, o’go wogontoluk en tenontogwi a’geat de, at ai nak e, tenniouwak o, oluk, is ap di owi yu owi welagai a’ge en ten hauwagalemak oluk, o’go wogentasu o. 34Asogoatma re, at en til lasu a’ge ai, ap en at motluk lagai erlak, at e, at en Tenniemit o, oluk ap mugonoboluk nosoma re, hwami tenentil denagai ’gela’ge tago erlak at emategenat tagalat, is hwami pema re, tenontogwi a’ge o’go horlogwi a’geat de, at nak e, tenniouwak o, oluk, o’go wogentasulat, tago yo,” oluk, egeimu re, mo’gulhegis ai o.
Wiak o’go o Yerusalem takpouwa egei wene
35Asogoatma re, hwe danian yu o. At Allah en mo’gulhoso a’ge yu, hesa’go hweliso lomup o. 36At otok modok welago a’ge Allah en eselat, “At ede en nasu a’ge ano nak motluk lasulat, an nak tenniouwak, oluk, is enemin til lasu a’ge ano enil pam a’ge a’ge telakmasogo pasulat, enapseri wiak a’ge asua ano enebaget wusogo wogentasulat, at emalik enemep herlilogo asua enebaget wogentasulat, tegeimu re, 37at emin ede hwedik welat til lasulat agai epasu a’ge ano emin, at ebit epesi a’ge ano emin, ’berlegat di owi yu owi welagaimu en odoksogo onoboluk, at e’gerli emagoluk, enil pam osum no’gorlogo pasuam agap ’berlegat telakmasogo pasuam enil houwa ani o. 38Is hwami onogunlak oruakhweat de, ap mu a’ge enemin til lagalat, ye, is aphwami enemep herlilogo pil lagalat, togwi holuk e, o’go tagonobo yo, oluk, mo’gulontogwi ’gela’ge, at ebam pasulat, en warenebil lasulat, ye, an oruakhwe, asua tago yu nebit o, oluk an nolot het agalat, aphwami enemep herlilogo pasulat, taga legi a’ge ano at ebam pasulat, tik o. 39At emin hwedik a’ge ano ene’gikmu pasuam, is en at ’gwiang lagabil ligotluk, asua owi wusogo pesi a’ge ano moluktak pogulat, asua uam wusogo wogogumu o yatsogo werik a’ge ano, erlagapsogo pogulat, osum ’buktak a’ge ano no’gorlogo hwikhogulat, ebetne a’ge leik-louktak welago a’ge ano horloluk yarluk ogulat, a’ge a’ge erlak a’ge we agap nak desogo a’ge golom ukpouwa o.
40Is ai en at woruok oluk, aphwami odoktak a’ge ano wogonoboluk onobou wagaiam, helep pam sogupsogo worogulat, ene’garok pam ebe dak-paksogo pogulat, tua o. 41At owi a’bik wetil laga a’ge ano, odouk narlik pogulat, is hwami ’berlegat enil oruakhwe wiak taga laga o’go at ebam pogulat, tua o. Ai togwi holuk e, at en we yogunat tenniouwak oluk, ogola ebetil lasu a’ge ano, erlagapsogo pasulat, tenniouwak o, oluk, o’go wogentasu a’ge ano, erlagapsogo pasulat, tik o. 42Ai tago holuk e, an nolot het hasu legi a’ge ano nede yamuk eselat, an oruakhweat de, mu a’ge togwiam, nolot het epasu legi a’ge ano erlak agalat, nede yamuk ua o.
43At owan wei a’ge oruakhwe takpasu legi a’ge ano eberak erlagat oruak o. Wiak enapseri a’ge nak til lasulat, we yogunat tenniouwak nak epasu a’ge ano emin tilasulaga ano erlak a? Emin til lasu laga ano pam nolot het en nogorlok modok demat taknebasumu re, tilasulaga o’go modok at ebam paik o, oluk, ’gain notok modok welago a’ge An Allah enat egi o,” oluk, egeimu re, mo’gulhegis o.
Ia en tago ’gela’ge, agalogo en ogo hegitsogoat tago wene
44“Is ap wene ebam elitsogo ogwi a’ge en at wene abel pema akhit ogulat, ia en tago ai ’gela’ge, agalogo en ogo hegitsogo nak tago yo, oluk, ogumu, enta’gun ani o. 45Ia en at ogun emin, emalik logomalik emin, nebit enemelmel o, oluk, ebirap enebise laga a’ge ano re, emalik an en ogo hegitsogoat tagalat, ye, at arilak ogwi en ogo onogunlak enemin, enemalik logomalik emin, enebit modok ontogu legesa a’ge ano, is enare Yerusalem ai, modok hegitsogo nagat tagalat, tago ai o. At ia re, hwe Het a’ge, ye, aik ai re, Ap Amori a’geat o.
46At ebap naduk dogo a’ge ogulani hwelani enemin, o abel sogweik akhit welagai a’ge ano re, o Samaria aiat o. Ye, ot ogulani hwelani enemin o abel o’borl akhit oruak a’ge ano re, o Sodom aiat o. 47Is entil lagai a’ge anoat motluk lagalat, is wiak enemelmel a’ge togwi ano re, at en ogo ano ’gela’geat tagalat, taga laga o. Is en wiak til wagalat, ologunmu, wiak loksogoat til laga legesa a’geat de, at nak e, agauwa mesik erlige wiak modok lok a’geat tegei o.
48At ot o Sodom emalik hwelani enemin togu legesa ano re, at ogulani hwelani enemin togu legesa ’gela’ge re erlak o. At ogulani enemin ai re, wiak modok mia a’ge tugu legesa o, oluk, An nelaluk notok modok welago a’ge Allah en demat egi o. 49Ot o Sodom en wiak taga laga ano re yuat o. At emalik ogulani enemin ai re, enede en logo pil lagalat, onso’boru, eniyorum onogum ningsogo no’gulat, nis nak horlolo ebil no’gulat, ap e’gin enebam oruak a’ge emin, ap ene’gik erlak a’ge emin, leronto erlagat welegesa. 50Is ene nis elit, opogulat, an nil pam wiak a’ge til lagai a’ge ai an nil holuk, e, ugenebegi o.
51A’geat de, at wiak taga laga ’gela’ge, at Samaria asogo tu erlak, pema nak taga laga. At Samaria wiak wei nak taga laga a’geat de, at nak e, ebenagaikmu wiak modok enapseri a’ge logat taga lagama re, arilak enede op ’gela’ge oruakhwe, at nak e, ede modok wiagat oruakhwe, hege o, oluk, ogwi ai o. 52Is wiak togu legesa a’geat de, at modok wiak nak til lasu laga edip ai pam, arilak ai op ’gela’ge togukhwe hege o, oluk, mo’gulogwiam e, at omuat e’gerli pam neselemak o. Arilak op ’gela’ge tugu legesa a’ge yerontouwak oluk, tegei ano pam onuk wiak agama re, omuat e’gerli pam neselemak o,” oluk, egeimu en, mo’gulhegis o.
O naduk welaga ’gela’ge takpo yo oluk egei wene
53-54“Asogoat a’geat de, is op ’gela’ge oruakhwe entige o, oluk, uagoluk, enare Yerusalem en til laga ano pam onuk wiak agalat, e’gerli agalat, tegei ano re op at o, oluk, wasu lemagoluk, o Sodom emalik hwelani emin, O Samaria emalik hwelani emin, naduk welegesa ’gela’ge, obapsogo enebasulat, at ogo re, naduk welaga ’gela’ge obap sogoat paik o. 55At arilak o Sodom emalik hwelani ebano emin, naduk welegesa ’gela’ge takpasulat, o Samaria ogulani hwelani emin naduk welegesa ’gela’ge takpasulat, asogo tagalat, at ogo re naduk welaga ’gela’ge tak paik o. 56-57At o wiak owan telakma om erlakhwe, naduk ede logo pasulat, at ot o Sodom e’gin ebam agama obok ’balil lasu laga ano erlak no? Ano ’gela’ge yogodak O Edom emalik hwelani emin, is at emin horoksogo welagai a’ge emin, o Filistin emalik hwelani emin, di owi yu owi at en o’borl o’borl welagai a’ge ’berlegat, at wiak o, oluk, ogwi a’ge ano en at mi-miarak pogwi o. 58We yogunat tenniouwak o, oluk, il neselat, enapseri a’ge tagalat, til lasu a’ge o’go omu ebamat ebam ema o,” oluk, At Allah enat egei o.
59At odok modok welago a’ge Allah en egei ano re yuat o. “At nemin en wene daksogo ’balogo poluk ho’buk ’balegis a’ge ano, at en mi-miarak poluk, ukpesimu re, at en tegei ai, ’gela’geat o’go takpouwa o. 60Asogo a’geat de, at owan souwe oruakma nemin en wene ’balogo pegi a’ge ano ebet hasu lemarik, wene erlak ema erlak modok wolom a’ge at nemin en ’balogo paik ani o. 61At arilak naduk dogo a’ge emin, pobuk dogo a’ge emin, ano re, an en at emalik ’gela’ge emagoluk, wogosoam e, at wiak til lasu laga a’ge ano ebethasu lemarik, disogo tegis logwe, oluk, ua o. At emalik ’gela’ge emagoluk wogentaik a’ge ano edip e, ne’birek en wene ’balogo pegi ano pam tua erlak o. A’geat de an muat ’belakpoluk en tik o.
62Asogoatma re, at nemin wene tugulom a’ge wene hosogo pasu legi a’ge ano re, at ene An Allah at naluk ema o. 63Ye, at en til lasu laga a’ge ano erlagap poluk, nemin la’bulisoam e, at en taga laga a’ge ebano ebet agalat, disogo tu a’ge tegis logwe, oluk epasulat, ye, modok e’gerli ebam ago holuk e, wene mesik u erlakma en modok-modogat mo eselat taga leik o, oluk, An notok modok welago a’ge Allah enat egimu re, mo’gulemin o,” oluk, wene yu ’berlegat an mo’gulnosoam e, mo’gulegis o.
Currently Selected:
Yehezkiel 16: Wul
Highlight
Copy
Compare
Share
Want to have your highlights saved across all your devices? Sign up or sign in
