Yehezkiel 14
14
Ap asua togwi a’ge wiak enebam po egei wene
1Wene ai arat mo’gulentasuam e, is ap Israel a’ge, onuelak enebe meren, ’gela’ge wegesarik, neragam huregesa. 2Huregesema, At Allah en an mo’gulneselat,
3“Aphwami en dogo a’ge yu o. Is ap yu enasua tugu lomok o, oluk, eniak hwelak poluk togulat, onoyuk a’gul dungsogo ’bule ’buogoluk ai nak ene’berli pam poluk til lagalat, asogo tugulat, mo’gulnogwiam e, eniak an no’gosogo holu? Erlagatma re,
4At odok modok welago a’ge Allah en, disogo mo’gulhentesi o, oluk, is mo’gulonto ano re yuat o. Is Israel a’ge mesik en, asua tugu lomok o, oluk, hwelak poluk tugulat, ye, onoyuk a’gul dungsogo ’bule ’buogoluk, ai a’ge nak eneberli pam poluk motluk lo a’ge nak tugulat, an Allah en mo’gulnosokhwe mo’gulentasu a’ge ano osokhwe houwogoluk wagaiam e, an Allah oruakhwe, enasua til lagai a’ge ano ’gela’ge An Allah nomu enat wene o’go mo’gulentaik o.
5Asogo An tik ano re, is aphwami Israel a’ge en di asua yu asua a’bigat motluk lagalat, an uknebegesa a’ge ano enede sogulogo ne’bek wemak oluk, tak paik o.
6Asogoatma re, ’gain odok modok welago a’ge Allah en egei ano re yuat o, oluk, is Israel a’ge mo’gulonto ano re yuat o. Onowiak ukpogulat, enasua ukpogulat, enemelmel wiak a’ge til lagai a’ge ano ukpogulat, takpoluk, pobuk sogulogo waga lemak o.
7Is aphwami Israel a’ge mesik de a, is aphwami ’bok a’ge Israel ene’gerlakma oruak a’ge mesik de a, en an uknoboluk, asua de togolik o, oluk, eberiselat, oyuk a’gul dungsogo ’bule ’bilaik oluk, ai a’ge nak e’berli pam poluk motluk lasulat, asogo tagalat, Allah en egei a’ge re, ’ge o, oluk, an en mo’gulosokhwe mo’gulentasu, a’ge en hau wagoam e, ’gain nonuk logo a’ge Allah nomu enat wene o’go mo’guleik o. 8An nomu enat ap ai, nebit enat takpasu modok welat, aphwami enaluk agalat welemagoluk, takpasulat, at en tegei a’ge walhegeik til lagalemagoluk, takpasulat, asogo taga leiktik, aphwami an neiyagai ene’gerlakma en a’guluak erlagapsogo paik o. Asogo takpasuam e, is en An Allah anat enaluk ema o.
9An en mo’gulosokhwe mo’gulentasu a’ge ano wene demat a’ge erlakhweat de mu a’ge mesik de mo’gulontouwagoluk ede ’gagaliso holuk e, An Allah enat wene mu a’ge mo’gulontouwagoluk, ede ’gagalegeimu re, mo’gulontouwa o. At wene mu a’ge mo’gulontouwagoluk, ede ’gagalisoam mo’gulontouwa ai en e, an neiyagai Israel a’ge ene’gerlakma en, ap ai a’guluak erlagapsogo paik o. 10Is wene wiak mo’gulontouwa a’ge o’go onomuat horlouwa o. At wene wiak mo’gulontouwa a’ge emin, at mo’gulentasu a’ge ano en mo’gulnemak o, oluk, at e’bek wagai a’ge ebano emin, hegitsogo is onomuat tak, enemin pagathorlouwa ano pamat e’gin enebam tak pagathorlouwa o. 11Asogo tagoam e, is Israel a’ge en an uknoboluk, ebela mu’gwe ’gwi’gwani lagalat, is wiak til lagai ano pam enebe wiagap pagathorlogulat, togwi a’ge ano pobuk logon togu lema erlak o. Is an neiyagaiat agalat, ye, an is enaik Allah at agalat, tul o, oluk, An notok modok welago a’ge Allah enat egi ai o,” oluk, an mo’gulnesimu re, mo’gulhentegis o, oluk, mo’gulentegis.
Yerusalem pobuk emin eneli wokho enebaik erlak oluk, mo’gulentesi wene
12Pobuk, At Allah en mesik emin mo’gulneselat,
13“Aphwami en dogo a’ge yu o. Is aphwami o momu a’ge en an opsogo muknoboluk lagai a’ge ano uknoboluk, wiagapsogo nobogwi holuk e, an ne’gik anni pam is tagenebasulat e, onso’boru dak hwerlai lo a’ge mi-miarak enebasulat, So’boru obouk enebam perakpou wagoam o eba ap emin, wam emin, erlagapsogo enebasulat, tagoam e, 14Is ap enebe henagan, ap Nuh emin, Daniel emin, Ayub emin, o ai e’gerlakma welema a’geat de, is enede op welat opsogo nak til lagai ano pam enebe henagan ai nak erlele wokho enebasulat, o eba oruak a’ge ano ’berlegat ai erlagapsogo enebaik o oluk, an nelaluk modok welago a’ge Allah enat egi ai o.
15O eba wam teiye perakpou weikmu malik wei a’ge lebil enebil lasu lema ano pam di iak yu iak erlak agalat, ye, wam teiye ai en e, aphwami ’gebela ’gwe ai lo a’ge onogorlok agalat, tuagoluk, perak pou weikmu, aphwami lebil enebil lasukhwe, 16Is ap enebe henagan o eba e’gerlakma welema a’geat de, enemalik logomalik emin, hwelani emin, enagap delogo onobo erlakma en, is aphwami o eba welagai a’ge ebano lebil enebil lasulat, enemalik enemin wusogo enebil lasulat, ye, o eba aphwami enebe erlagapsogo enebasulat, is enebe henagan An Allah nak enagap delogo enebasulat teli o, oluk nelaluk welago a’ge ’gain nonuk logo a’ge eriano An Allah enat egi ai o.
17Aphwami en wa’gun woluk wemagoluk, perak pou wagalat, O yema honua’gun pam wusogo enebil lit o, oluk mo’gulentasuam woluk lagaihwe, an en aphwami emin, onuam emin, modok erlagapsogo enebil lasulat, 18Is ap enebe henagan eriano re, ene’gerlakma welema ano pam eneiyagai logomalik emin, hwelani emin, enagap delogo ugonobo erlakma en aphwami pema eneminat warenebil lagalat, enebe henagan eriano nak enagap delogo enebele o, oluk, nelaluk modok welago a’ge an Allah enat egi ai o.
19An en o ai erlige ou edip wiak a’ge perakpou wagalat, nolot het enebam pasulat, o ai erlige aphwami emin, onuam emin, enemep herlilogo mep demogo wusogo enebil lasulat, asogo tagalat, 20Is ap Nuh emin, Daniel emin, Ayub emin, eneiyagai logomalik ogo hwelani ogo, enagap delenebigoluk erlakma en, warenebiselat, is enaik lok ai nak enede op degelak ano pam enagap delhwerlele o oluk, nelaluk ’gain notok modok welago a’ge an Allah enat egi o, oluk, an mo’gulnesi.
21 #
Wah. 6:8
At ’gain odok modok welago a’ge Allah en eselat, asogo takpo egesa ano re, modok logo ’gela’geat a’geat de, onowiak o’go e’gin edip 4 pam tagonobo ano re, wa’gun pam en, So’boru obouk pam en, wam maro anni a’ge pam en, ou edip wiak a’ge pam en, is Yerusalem welagai a’ge ap emin, onuam emin, waremagoluk enebam paik ai nak e modok logat o! 22Asogoat a’geat de, eneiyagai ap logomalik emin, hwelani emin, ado ’bullak ’bogolil liplau wegesa a’ge wogonoboluk, o yema onobouwagai holuk e, ebabut emin til lagai a’ge emin, hil entasu loroguntik, an en o Yerusalem e’gin-pe’gin ano a’ge ’berlegat ebam pasu a’ge ano hasu loroguntik en, hede yamuk ua o. 23Edip erlak holuk erlak, oruak holuk o Yerusalem tak paik a’ge ano haluk, emma re, is enebabut emin, til lagai a’ge emin, pobirak pasu loroguntik, ai re, asogo oluk tegei hegi, oluk, hede yamuk ogun ani o, An notok modok welegi a’ge Allah enat egi ai o,” oluk, an mo’gulnesi o.
Currently Selected:
Yehezkiel 14: Wul
Highlight
Copy
Compare
Share
Want to have your highlights saved across all your devices? Sign up or sign in
