Yehezkiel 13
13
Ap iak esei il noso a’ge ano o’go tagobouwa wene
1At Allah en an mo’gulneselat,
2“Aphwami en dogo a’ge yu o. Is Israel a’ge en, disogo ema o, oluk, ogwi a’ge ebano, Allah en, asogo takhonobouwa egei o, oluk, mo’gulonto ano re, yuat o. Is onomu enede enat ebetholuk ogwi a’ge ano mo’gulentasulat,
3At Allah otok modok welago a’ge en egei a’ge yu, henesa’go opsogo hologu lemis o. At otok modok welago a’ge Allah en eselat, is ap di a’ge yu a’ge tu a’ge enabi pam hogwi erlakhweat de uo a’ge ’gela’ge welat, enede opoluk ogwi a’ge nak, motluk lagai a’ge ano enebe nede o. At Allah otok modok welago a’ge en egei a’ge yu, henesa’go opsogo hologu lemis o. 4Is ap, disogo ema o, oluk ogwi a’ge en is Israel mo’gulontogwi a’ge enebe ai, orlomene o kota moluk-melaktak a’ge e’gerlakma welago ai ’gela’ge, asogoat welagai o. 5An henaik Allah wom erli’ge weim togukhwe is Israel a’ge ono’borlogouk erlak welemagoluk eneleget pakleget wogo a’ge ele del-del laga a’ge ano is ai en opsogo ebelak po erlakma enat oruak o. 6Is ap eniagesei a’ge en at, nabi pam disogo hegi o, oluk, mo’gulontogulat, eniak eseiat, disogo ema o, oluk, hin wok a’ge, is ’gain nonuk logo a’ge Allah en perak onobo erlakhweat de, At Allah en egei o, oluk, mo’gulontogwi a’ge ebano, demat emak oluk opogwi a’geat de, demat ago erlakhweat welat tugwi o. 7An en mo’gulentasu erlakhweat de, is en e, At Allah en egeimu at mo’gulhentasu legi o, Oluk, ogwi ano re, eniageseiat, Nabi pam hegi o, ogulat, eniageseiat disogo ema o, oluk ogulat eniageseiat asogo ema o, oluk hin wok a’ge, en togwi ano erlak no? 8Asogoatma re, Notok modok welago a’ge an Allah en is mo’gulonto ano, re yuat o. Is eniagesei wene ogulat, eniak eseiat nabi hegi o, oluk, mo’gulontogulat, togwi ano pam an nemin il ’balogo welegi o, oluk, An nonuk logo a’ge Allah enat egi ai o. 9Is ap eniageseiat nabi ’gela’ge hege o, oluk, ogwi a’ge en ogulat, eniageseiat, disogo hege o, oluk, hin wok a’ge en togwi a’ge ano o’go tagonobouwa o. Is an neiyagai emin odoktogwi a’ge enemin agalat, Is Israel a’ge enemin ononuk pelal wokho pogulat, Israel a’ge ono’gwiang pam enemin ’gwi lagalat, tua erlakma re, ai pam en ’gain nonuk logo welago a’ge Allah anat enaluk ema o.
10 #
Yer. 6:14; 8:11 Is eniagesei ogwi a’ge en neiyagai ’gebela eneperlagapsogo onobogulat, enede we yogunat lielak erlakhweat de, henede we yogunat lielak welemis o, oluk, mo’gulontogulat, is an neiyagai helep leget wiak-wiak wogwiam e, is eniagesei ogwi a’ge en e opsogo togwi erlakma en we ’gwiang togwi a’ge pam wogwi ’gela’ge togwi o. 11Hat en is leget ’gwiang pam wogwi a’ge ai, mo’gulentasulat, At Allah en moru lok ding-dungsogo ’belabu agalat, moru hagarle’gen ’belakpou wagalat, o Yasobu o’borlogouk punhaumagoluk, takpasulat, asogo tagalat, leget ai, moluktak paik, ani o, egei, oluk, mo’gulontomup o. 12Moluktak pasuam e, aphwami en, ’gwiang orlogom togwi a’ge pam, ano no’gosogo aga o? oluk, mo’gulontul erlak no? mo’gulontulat o.
13Asogoatma re, ’gain notok modok welago a’ge An Allah en tu a’ge ano yuat o. An nolot het en o Yasobu annisogo wetil wemagoluk takpasulat, nolot het en moru hagarle’gen ’belakpou wagalat, moru a’bigat ding-dungtak poluk perakpou wagalat, asogo tagalat, helep leget wogo a’ge ai, moluk-melaktak paik ani o. 14’Gwiang orlogom togwi a’ge pam helep leget wegesa a’ge ano erle’galogo ’gwiang pam ’biso holuk e, helep obule pouwa a’ge ano enamat ema o. ’Biselat, enebe ogola eba welema a’ge ebano ’berlegat waronobua o. Asogo tisoam e. An Allah at enaluk ema o.
15An nolot het en helep leget wogo a’ge ai ebam pasulat, is ’gwiang orlogom togwi a’ge pam pegesa a’ge ano enebam pasulat, asogo tagalat, is mo’gulentasulat, helep leget ai erlak agalat, ap ’gwiang orlogom togwi a’ge pam pegesa a’ge ai, 16Is Israel a’ge en disogo ema oluk egesa ano is aiatma re, o Yerusalem takpo a’ge enabi ’gela’ge hogulat, enede we yogun lielak wolom puk a’ge paget, henede we yogun lielak welemis o, oluk, mo’gulontogwi a’ge ano ogo re, enebe erlak agalat, tegisa oluk mo’gulentaik o, oluk, ’gain Nonuk logo a’ge notok modok welegi a’ge An Allah enat, egi o,” oluk, an mo’gulnesi.
Is hwami eniak esei ogwi a’ge ano o’go tagonobo wene
17“Aphwami en dogo a’ge yu o. Hwami hat en a’ge en ede opoluk en nak, disogo hegi o, oluk mo’gulontogwi ano ’gela’ge mo’gulonto a’ge pobi tin o. Allah en takhenebaik egei ano yuat o, oluk, 18mo’gulentasulat, Allah en egei ano re yuat o. Is hwami enebam a’ge, oruak a’ge en, aphwami wiagap onobogu lemagoluk, tegine emin, siong emin, ena’gul pagaiya emin, enebam wantak pogulat, enegem emenesogo wantak onobogulat, onosum emenesogo ta'bonik onobogulat, togwi ai re enebe nede o. Is enebe erlele horlogulat, an neiyagai hweim onobouwogoluk, togwi a? 19wam a’ge ’gela’ge Jelai ene’gik mesik erlige lologo wogulat, roti hwik howi a’ge mesik-mesik wogulat, tuogoluk, neiyagai ene’gerlakma nonuk omu degelak a’ge ano wiagapsogo nobogulat, is an neiyagai eniak esei wene enesa’go holu enagai a’ge ebano, is hwami ai en eniageseiat disogo hegi o, oluk, ogwi a’ge en mo’gulontogulat, waronobu erlakma en ugonobo a’ge oruakhweat de waronobogulat, ye, is waronobu a’geat de, enelaluk ugonobogulat, togwi o, oluk, egei o.
20Asogoatma re, At otok modok welago a’ge Allah en egei ano re, yuat o. Tue hol ’gotnok uagoluk, hol herle logo pogwi ano ’gela’ge, is aphwami yagat onobogulomogo oluk, entegine ena’gul pam pogulat tak pagathorlogulat togwi ai nebit modok epasu a’ge ano, no’gorlogo ukpasulat, ye, tue hol ’gotnoksogo oruakma re, lologo wokhogwi ai ’gela’ge is hwami yagat onobogwi a’ge ai, asogoat erlagapsogo enebasulat, tik o. 21Ene’gen wantak a’ge emin, enelage ena’gul pam sepnik a’ge emin, ’goroksogo ukpasulat, hwami ai, ene’gikmu en neiyagai delogo enebasulat, tagoam, is en tagonobo eberogwi a’ge ano hwalogwi a’ge erlagapsogo paikmu re, ai pam ene ’gain nonuk logo a’ge Allah an at enaluk ema o.
22An en enede e’ginap po erlakhwe, is eniagesei il no’gwi ano pam is ap enede op a’ge ano, enede e’ginap pil lagalat, ye, is wiak til lagai a’ge ano, is wiak til no’gwi a’ge ano uk, poluk enagap delhorlogumu no oluk, enede gagalogulat, tugu legesema re, 23Eniageseiat nabi ’gela’ge hegi o, ogulat, ye, asogo ema o, oluk, hin wok age en, togwi a’ge ai mesik emin tugu lema erlagat o. Is hwami ai asogo til lagaimu en til lagaimu an neiyagai enagap delikmu re, enagap deliso holuk, an Allah at enaluk ema,” oluk mo’gulontomup o, oluk egeimu re, mo’gulhentegis o, oluk mo’gulentegis.
Currently Selected:
Yehezkiel 13: Wul
Highlight
Copy
Compare
Share
Want to have your highlights saved across all your devices? Sign up or sign in
