Yehezkiel 12
12
Israel a’ge wogonoboluk hwigentai lo a’ge ebam walsogo aga wene
1Pobuk At Allah en an mo’gulneselat,
2 #
Yes. 6:9,10; Yer. 5:21; Mrk. 8:18 “Aphwami en dogo a’ge yu o. Is an niak holu enebit a’ge ene’gerlakma at welegen o. Is an niak holu enebit opogumu re, enil oruak a’geat de, enil hogwi erlagat welat, enesa’go oruagat a’geat de, enesa’go hologwi erlagat welat, togwi ai o.
3Asogoatma re, aphwami en dogo a’ge yu o. Is an niak ’belak mo’golu enebit opogwi a’ge ano pobi togumu no oluk, is wogonoboluk hwigentail lo a’ge walhe’gik ha’ge a’ge leik-louktak pasu loroguntik, o erlige pam is enil oruakhwe hat welegenma eba en ukpoluk, o momu lu o. 4O erlige pam enil oruakhwe, is wogonoboluk hwik entai lo, ’gela’ge walsogo ha’ge a’ge howi pam en odipmu lebikpasulat, ye, o hopmu enil oruakhwe, is wogonoboluk hwik entai lo ’gela’ge libagalat, tip o. 5Is enil oruakhwe helep leget werik a’ge ele delak poluk, ha’ge a’ge horloluk ele delak o’gwe ano liboroguntik, 6huba’goat enil oruakhwe ha’gea’ge ebano hum pam hwelalisogo horloluk lu o. Ye, is Israel a’ge enalugap pegimu re o ai, hil ho ’gela’ge, heberli pam sum sebelak poluk lu o,” oluk, an mo’gulnesi o.
7Mo’gulnosoam e, at en mo’gulnesi ano ’gela’geat, is ap wogonoboluk hwik entai lo a’ge walhegeik o erlige takhwe na’ge a’ge di degel tak a’ge ano lebik pegirik o huba’goat ne’gik en helep leget wogo a’ge ano ele delak poluk enil oruakhwe, na’gea’ge num pam hwelali sogo horloluk o hup a’goat libegi o.
8Tono hubet siaksogo At Allah en an mo’gulneselat.
9“Aphwami en dogo a’ge yu o. An niak hwolu enebit a’ge Israel a’ge ano en, hat tigen ai no’gosogo oluk en tigen o? Oluk, mo’gulhegisa ya, erlak a?
10An wene mo’gulhoso a’ge yu, ap onuk logo a’ge o Yerusalem oruak a’ge ’berlegat emin, is aphwami Israel a’ge eba oruak a’ge ’berlegat emin, tagonobo weneatma re, At otok modok welago a’ge Allah en egei o, oluk, is mo’gulonto ano re yuat o. 11Is mo’gulentasulat e, an en tegis ano re, his takhenebasu a’ge de walhegeigat tegis ani o, oluk mo’gulontomup o. Tu a’ge mo’gulhegismu tigen ai ’gela’ge, is asogoat aphwami en herle wat onoboluk o walekma yema hwik entauma o.
12Is onue onuk logo a’ge ene’gerlakma oruak a’ge ai, a’ge a’ge um pam horloluk, owi pam en liplau wagalat, o huba’go o ’gwiang ai, il ’gela’ge sum orogole hisakho at horloluk, helep leget werik a’ge ele delak pegesa ’gwe ano toluk libema a’geat de. 13#2Raj. 25:7; Yer. 52:11Nosum emde larak poluk oruakma yagat otluk werakma is aphwami Kasdim a’ge ono’gwiang pam o Babel yema pou weik o, pou weik a’geat de, o ’gwiang yu, at il ho erlak welat, yemaat warema o. 14Ye, at osi enemin togwi a’ge emin, osilak enesegen oruak a’ge emin, at o’borl o’gwe oruak a’ge ’berlegat o sogwei en di a’ge yu a’ge ’bulogo woluk lasu ai ’gela’ge, is asogoat takpaikmu ’bogologukhwe, ene’berlik wa’gun pangsogo mugonoboluk, laik ani o.
15Di aphwami yu aphwami ene’gerlakma perakpasulat, di owi yu owi ’berlegat perakpasulat, tagoam, e, Allah anat enaluk ema o. 16Di aphwami yu aphwami ’bogolil louwa a’ge ene’gerlakma welat, Nis wiak enemelmel a’ge tigemaat taknenebesi o, oluk, onowiak ’baksogo mo’gulontogu lemagoluk, wa’gun pam en So’boru obouk pam emin, ou edip wiak a’ge pam emin, waronobu erlakma en ado me’gisogo ugenebaik o. Asogo tagoam e, ’gain Nonuk logo a’ge Allah anat enaluk ema o,” oluk, mo’gulnesi.
Yehezkiel ogorlok emagoluk mo’gulesi wene
17Pobuk, At Allah en an mo’gulneselat.
18“Aphwami en dogo a’ge yu o. Hogorlok hasulat, hoso’boru nasulat e, hogorlok en huak lup ’bopasulat, hede holum weriselat, asogo tagalat, hegeik nasulat, taga lomup o. 19Is O Yerusalem welagai a’ge emin, is Israel a’ge ono’gwiang pam welagai a’ge emin, tagonobo a’ge At otok modok welago a’ge Allah en egei is o yema welagai a’ge mo’gulonto ano re yuat o. Is o eba welagai a’ge ebano en enebabut wiak nak welat, yogun yogunat til-wil lagai, ano pam ono’gwiang pam a’gul onuk lo’bok pesi a’ge ’berlegat erlak nak emma re, enede perik welat onso’boru, no’gwi a’ge modok mia taknenebasu o, oluk, enegeik no’gulat, tugu lema o. 20Is aphwami eba welagaimu o kota-kotaebano wiagapsogo pogulat, o ai, di iak yu iak erlak welemagoluk, takpogulat togwiam e, An Allah at enaluk ema o,” oluk, mo’gulnesi.
Wene ebam elitsogo mesik op a’ge, mesik wiak a’ge mo’gulesi wene
21Pobuk At Allah en wene an mo’gulneselat,
22“Aphwami en dogo a’ge yu o. Enabi hogwi a’ge mesik demat ago erlakhwe, sogwi nak lai lasu o, oluk, is o Israel a’ge welagaimu eba en wene ogwi ano re, no’gosogo yo? 23At Allah otok modok welago a’ge en egei o, oluk mo’gulonto ano re, yuat o. Is en ogwi ai an en erlagapsogo paikmu re, is Israel a’ge welagaimu eba mesik emin ogu lema erlagat o, oluk egei oluk, mo’gulontomup o. Is ano mo’gulentasulat e, enabi ’gela’ge hogwi a’ge ano demat nak agalat, tago a’ge arat horok lau wagoam e,
24We, eniageseiat, Nabi ’gela’ge hege o, oluk, ogulat, demat erlak a’ge paget op ogwi opouwagoluk hin wok a’ge togwi ai, is aphwami Israel a’ge ene’gerlakma mesik emin tugu lema erlagat o. 25An Allah en u epasu a’ge anoat oso holuk, dagan u erlakma en hegit nak agalat, ye, is an en mo’gulentasu a’ge ano tu enebit opogulat owan oruakhwe, mo’gulentaik a’ge ano hegit nagat agalat tak paik o, oluk, An notok modok welago a’ge Allah enat egi o,” oluk mo’gulnesi.
26Pobuk Allah en an mo’gulneselat,
27“Aphwami en dogo a’ge yu o. Is aphwami Israel a’ge en, at abi’gela’ge hasu ano re, o pobuk om a’ge paget eselat, at en mo’gulnentasu ano re, o pobuk taknonobo a’ge eselat, tago yo, oluk, ogwi ai yet ontomup o.
28Is asogoat ogwimu re, At otok modok welago a’ge Allah en egei o, oluk, mo’gulonto ano re yuat o. An en tu a’ge oso ai re, mesigat nak mesik dagan oso erlakma en perleneat tagalat, ye, eselegi a’ge ano re, dagan u erlakma en hegit nak agalat, tua o, oluk An notok modok welago a’ge Allah enat egi o,” oluk, mo’gulnesi.
Currently Selected:
Yehezkiel 12: Wul
Highlight
Copy
Compare
Share
Want to have your highlights saved across all your devices? Sign up or sign in
