Yehezkiel 11
11
Israel onuelak onowiak o’go tagonobo wene
1Pobuk togolik, arogun en an ha’boksogo woknoboluk, Allah owi werikmu ’goduk ’gwi lagaimu o mo orluago hegit ebano nebei laga. Nebei lasuam e, ’goduk ’gwi lagaimu ’gwi loma eria ap enebe 25 oruakma, yerentegistik ene’gerlakma aphwami tenentarok a’ge onuelak ap Azur omlogo Yaazanya emin, ap Benaya omlogo Pelaca emin, oruakhwe nil yerentegis.
2Asogo yerentegistik, At Allah en an mo’gulneselat, “Aphwami en dogo a’ge yu o. Is enede mesigarap poluk, wiak tu wene hisakho eberogulat, O kota yema wiak owi hebelik pouwogoluk, ap togwi a’ge is yuat o. 3Is en ogulat e, wolom erlakma enat di owi yu owi werik erlakma enat aga a’ge ebalema worua ano erlak no? O kota yu re, kuali ’gela’ge, ye, einnyo ’gela’ge re, nisatma re, op at wolomul o, oluk ogwimu re, 4Aphwami en dogo a’ge yu o, disogo takhonobouwa o, oluk mo’gulentasulat, tu a’ge mo’gulentasulat, tip o,” oluk, mo’gulnosoma hegi o.
5Asogo hasuam e, Allah arogun nebam agarik, mo’gulonto a’ge mo’gulnesi ano re, yuat o. “At Allah en eselat, is Israel a’ge en ogwi ai an arat nesa’go hwelegis o. Ye, onogola en eberogwi a’ge holuk ogo re, arat yerentegis a’ge at de, 6Is en di ap yu ap a’bigat modok o kota yu pam wusogo enebil legesema ’gebela ’gwe enebe werak ’beterak oruak o,” oluk, mo’gulonto a’ge mo’gulnosoma hegi o.
7Asogoatma re, at otok modok welago a’ge Allah en mo’gulnosoma hegi ano re, yuat o. “Is en enebe werak a’ge ’gebela pam ugenebil legesa ano re, einnyo ’gela’ge, ye, o kota yu, kuali ’gela’geatma re, op at wolomul, opogwi a’geat de an o kota yema en lebik enebaik,” egei o.
8Odok modok welago a’ge Allah en eselat e, wa’gun pam waronobu onogorlok hogwi ano pam at waronobuak oluk perakonobou weik o. 9An en is o kota yu pam en lebik onoboluk ap mu a’ge ene’gikmu pasu holuk e, is en onowiak o’go e’gin modok a’ge enebam pou wagoluk, tagenebaik o. 10Wa’gun pam waronobogwi holuk e, warema o. Is Israel ono’gwiang pam modok onowiak o’go enebam pasu holuk e, is en Allah anat enaluk ema o. 11O kota yu re, kuali ’gela’ge ye, enebe re, einnyo ’gela’geatma re, nis op wolomul opogwi a’ge ano opogumu no yo. Is Israel ono’gwiang a’ge pamat wiak o’go e’gin modok wiak a’ge enebam pouwa ai pam, 12An Allah at enaluk ema o. An en wene le’gelogo mo’gulentasu a’ge ano motluk lagalat ye, tugulom a’ge niak ’belak ano tenak welat, tu erlakma en di aphwami yu aphwami o’borl-o’borl welat, togwi a’ge ano motluk lagaimu no, oluk, tagonobo yo, oluk, mo’gulnosoma hegi o.
13Mo’gulnosoma hegi ano nabi pam ’gela’ge owan mo’gulnosokhwe, ap Benaya omlogo Pelaca ano at waragoma nil hegi o. Asogo hegirik norogole sogup ’gwiang pam ’gonu, oluk, welat niak lok pam, “’Gain Honuk Logo a’ge hotok modok welegen a’ge Allah o. Is Israel pema dedelik a’ge yu ’berleksogo wusogo enebasu legen a?” oluk, an en at mo’gulosoma hegi o.
Israel obap onobo, oluk, egei wene
14Mo’gulesimu, At Allah en an mo’gulneselat,
15“Aphwami en dogo a’ge yu o. Is aphwami O Yerusalem welagai a’ge ebano en ogulat e, Yehezkiel ue ari ’berlegat emin, arilak Israel a’ge hwik entail legesema enemin oruak a’ge emin, ebano re, o yatma eba welat, At Allah erlik tuma erlakma re, ono’gwiang yu, nis eiyetak pagathorloluk wolom a’ge Allah en arat woknentesimu hege o, oluk, ogwimu re.
16At otok modok welago a’ge Allah en wene egei ano re yu o, oluk, mo’gulonto a’ge mo’gulnosoma hegi ano re, yuat o. An en di aphwami yu aphwami o yatma eba oruak a’ge ene’gerlakma eba perak enebasulat, di owi yu owi ’bulogo mu’gulentasuam ebano welat an erliknobogumu nowi werik ’gela’ge re, an nebeat o.
17An nebeatma re, At otok modok welago a’ge Allah en wene egei ano re, yuat o, oluk, mo’gulonto ano re, yuat o. An en di aphwami yu aphwami welagaimu en mesikmu la’bolik enebasulat, mukho makho yarluk tagenebasumu di owi yu owi oruakma eba en odoksogo enebasulat, taga leiktik, wogonoboluk ono’gwiang lo’bok o Israel a’ge eiye welemagoluk, onobou weik o.
18Is onowi pam o yema togolik wagalemarik, enasua wiak a’ge emin, enemelmel a’ge di asua yu asua ogut hele’gik a’ge emin, o yema entugu legesa a’ge ano ’berlegat ukpouwa o. 19#Yeh. 36:26-28Ukpogwi holuk e, an en enede mesigarap sogo pasulat, enedemu at ’gerapsogo pasulat, enede anni helep ’gela’ge welagai a’ge ano ebalema enede erleberak pasulat, tagoam e. 20Wene an en le’gelogo mo’gulentasu a’ge ano motluk lagalat, ye, tugulom a’ge niak ’belak a’ge ano opsogo tenakho welat, togwi holuk e, is an neiyagai agalat, ye, an is enaigat agalat, tul o. 21Asogo tagenebaik a’geat de, enede enat enasua enemelmel a’ge emin, di asua yu asua enemelmel a’ge emin, til lagalom opogwi holuk nak e, is enebabut ’gorlotak pagathorlouwa ano pamat, wiak enebam paik o,” oluk, At Allah en an mo’gulnosoma hegi o.
22 #
Yeh. 43:2-5
Mo’gulnosoma hegirikmu en, is kerub ano louwok oluk, enagapsaburl hebilogo poluk, is so oyuk ’gela’ge wale’gil lasu a’ge ano emin, ligagaihwe, Israel a’ge enaik Allah amolit arogun ano is ena’gul muat oruakma hegi o. 23Asogo hasukhwe, At Allah amolit ano o kota e’gerlakma en erabuno ligagarik, o mo porlu ago hegit akhit o’gwe eba dom o’borl hegit eba lasuam hegi o. 24Asogo hegirikmu en, Allah arogun en nabi pam mo’gulnosokma hasumu en, arogun en an ha’boksogo woknoboluk pobuk togolik is aphwami wogonoboluk, o Babel enebeil lagama oruakma ebano nobouwagoma hegi. Nobou wagarik, nabi ’gela’ge hegi a’ge ano re, e’gik oyuk erlak a’geat erlak agoma hegi o. 25Erlak agoam e, At Allah en nabi ’gela’ge pam mo’gulnesi a’ge ano ’berlegat is aphwami wogonoboluk hwigentau wegesema oruak a’ge ebano ’beli’gogo mo’gulentegis ai o.
Currently Selected:
Yehezkiel 11: Wul
Highlight
Copy
Compare
Share
Want to have your highlights saved across all your devices? Sign up or sign in
