Yehezkiel 10
10
Allah amolit at owi werik a’ge pam oruak a’ge ano erlak aga wene
1 #
Yeh. 1:26; Wah. 4:2 Asogo toluk is malaikat ’gela’ge kerub lak ai ono’borl pam o ’burl eria wene le’gelogo mo’gulentasumu ’gela’ge helep permata lazurit ’gela’ge oruakma hegi o. 2#Wah. 8:5Hasukhwe eriano pam, Allah en ap osum modok gut ’buktak a’ge ano mo’guleselat, “Is malaikat ’gela’ge kerub onoyuk pogumu so oyuk ’gela’ge hwane tak a’ge welagai a’ge ene’gerlakma eba ’gwilotluk, is kerub lak welagaimu eba odouk e’gen here tiso a’ge he’gikmu aromsogo wasu loroguntik o kota ai pelak pei lak o,” oluk mo’gulesimu, nil oruakhwe mo’gulesimu ebano ’gwilasumu hegi o. 3’Gwi lasukhwe, is kerub ai, Allah owi werikmu o sogweik akhit eba edik oruakhwe entasulat, ye, hena odipmu parema eba e’girlogo oruakma hasulat, tegis o. 4Hasukhwe eriano pam, is kerub lak en ono’borl pam Allah amolit arogun, welaga a’ge ano ligagarik, Allah owi werik a’ge ’goduk ’gwi lagaimu o’borl pam lasuam e, at owi werik a’ge ogola eba o hena a’gurlok ano ’beterak pasulat, odipmu ebano. At Allah amolit nak Sellim takpasulat, 5tagoam e At Anni modok welago a’ge Allah iak osoam hologwi ’gela’ge, is kerub enagapsaburl iak o’borlogouk oso a’ge ano parema odipmu eba en hologukhwe entegis o.
6At Allah en at ap modok osum ’gut ’buktak a’ge ano wene le’gelogo mo’guleselat, “Is kerub lak onoyuk pogwimu hwane tak a’ge ano pam lagaimu ene’gerlakma odouk helep a’ge wemen o,” oluk mo’gulesi a’ge ano wa’gwegeirik, hwane tak a’ge lisogo woluk lasu a’ge mesik eragam inlai laga. 7Inagama, kerub mesik en e’gik ’beli’gogo is ene’gerlakma odouk helep a’ge welaga a’ge ano ado wesirik ap osum modok ’gut egeik a’ge ’buktak ano e’gikmu pasuam e, ap ano en woluk liplai lasumu, hegi o. 8Is kerub enagapsaburl pam eba re, ap ene’gik ’gela’ge oruakma entegis o.
9 #
Yeh. 1:15-21
Is kerub eneragam so oyuk ’gela’ge lisogo woluk lasu a’ge 4 ai re, erle’beluk lasu a’ge mesik kerub emin a’ge hwedik, mesik e’birek hwedik, taknakma re, lisogo woluk lasu a’ge mesik laga a’ge ai, helep permata pirus amolit deleng oso a’ge ’gela’ge welat, oruakhwe entegis o. 10Is wale’gil lagai a’ge enebe 4 ai, onorogole mesik hegit nak takma re, at mesik wale’gil lasu a’ge no’gorlik ye’gik welat at mesik wale’gil laga a’ge ogola edikpoluk oruakma hegi. 11Asogo tak a’ge oruakma is ebano lagalat holuk e, erei akhit-orogou akhit, esa’go-esa’go, eret-eret yogunat is kerub lak enede yogunat lo erlakma en is en lul opogumu nak lagalat, erabu akhit-ogobu akhit esa’go-esa’go agai erlakma en is kerub etleba lo opogumu ebano nak motluk lagalat, tugukhwe entegis o. 12#Wah. 4:8Is ono’borl pam, ene’gik pam, enagapsaburl pam, enebe ono’borl onolukhwe ’berlegat enil oruak a’ge nak welat, ye, wale’gil lasu a’ge 4 emin diptak a’ge ai ogo, enil e’gen asogo nagat oruak a’ge welat, oruakma entegis o. 13So oyogut ’gela’ge wale’gil lasu a’ge ononuk e obuk-ebak ontogwi a’ge o, oluk, ogukhwe nesa’go hwelegis o.
14 #
Yeh. 1:10; Wah. 4:7 Is kerub ai, enemetik-enematek enebe hun-domok 4 nakma re, onorogole mesik e, Malaikat kerub ’gela’ge, onorogole mesik, aphwami ’gela’ge, onorogole mesik e, mene singa ’gela’ge, ye, onorogole mesik e, tue pedi-pedi ’gela’ge, welagai entegis o. 15Asogo toluk, is kerub ai, erabu ligagaimu entegis o. An naduk ik Kebar esa’goma welat, is ontogwi erlak a’ge entegis ano re, is aiat o. 16Is kerub ai, lagaiam e, is wale’gil no’gwi a’ge ebano eneragam o’gwe welagai a’ge ebano ogo lagalat, ye, is kerub enagapsaburl pamat darak ’gwiang o’borl petne lagaiam is erlebil luk lagai a’ge ebano re, enemin lo’boksogo welagaimu, eneminat ligagalat, 17Ye, is kerub mo ogwi holuk, is erlebil luk lagai a’ge ogo, moat ogulat, is kerub erabu ligagai holuk erlebil luk lagai a’ge ogo enemin ligagalat, tugukhwe entegis. Is asogo tugukhwe entegis ano re, is ontogwi erlak a’ge enede re, is erle’bil luk lagai a’ge onogola oruakma, eminat lagaimu entegis o.
18Asogo toluk, Allah e’bak’bage at owi werikmu ’goduk ’gwi lagaimu lai laga ano, eba en ligotluk, is kerub lak welagai a’ge o’borl pam eba ligagoma hegi o. 19Asogo higirik, nil oruakma en is kerub ano enagapsaburl hebelik poluk ’gwiang pam en erabu ligagaihwe, is erle’billuk no’gwi a’ge ebano eneminat, ligegesarik at Allah owi werik a’ge ’goduk ’gwi lagaimu mo il orlu ago hegit eba oruak a’ge ano eba mo lai ligagaihwe is Israel enaik Allah e’bak-’bage ano is ena’gulmu eriaat oruakhwe entegis. 20Asogo tugukhwe entegis ai re, an naduk ik Kebar esa’goma welat, hogwi erlak a’ge Israel a’ge enaik Allah eragam oruakhwe entegis ano re is aiat o. Is ai re, malaikat ’gela’ge kerub at entegismu hegi, oluk, pobi tegis o.
21Is kerub ai hun-hun enebe 4 nak oruakhwe, takma re, enagapsaburl ogo 4 nak welat, tak enagapsaburl lekho eba ap ene’gik ’gela’ge, welat, 22Onorogole ai re, an ik Kebar esa’goma onorogole entegis ano ’gela’geat welat, ye, is enematek lo’bok ebela ’bekhit o’gwe nak toluk onowi pam nak, lagalat, tugukhwe entegis o.
Currently Selected:
Yehezkiel 10: Wul
Highlight
Copy
Compare
Share
Want to have your highlights saved across all your devices? Sign up or sign in
