Yehezkiel 1
1
Allah ebe ’gain welagoma ebale il hesi wene
1-3Nis aphwami Yahudi a’ge en tahun emin, dugwi emin, nene’gik wenarogwi hegitsogo, tahun 30 ai pam, ye, dugwi 4 ogu lege ai pam a’ge tanggal 5 pam, ap ’gain onuk logo a’ge Yoyakim e’gik herle wusogo woluk o Babel wegesarikmu en tahun 4 welegerik, tahun mesik 5 a’ge pam oruakma, an ap Busi omlogo nonuk Yehezkiel Allah eiye a’ge, aphwami Yahudi a’ge logon ene’gik herle wusogo wogonoboluk wegesa a’ge nenemin, o Babel eba ik onuk Kebar esa’goma eba welegi o. Asogo oruakma, agauwa mesik pam wongat oruakma erianoat ’bogorl hialhasuam e, nabi ’gela’ge pam Allah ebe likhegi. Asogo likhasuam e, nenaik ’gain Onuk Logo a’ge en wene mo’gulneselat, e’gik anni pam senniarok oruakma hegi o.
4Asogo hasulat, nil likhegi ’gal e, yasobu lok a’ge o ik elaruk o’gwe hegit en punhau wagoma hegi o. Asogo punhau wagalat e, o hena lok orlogomtak a’ge pam en, obinal pobuk-naduk yebekhasuam e, eragam o’gwe atia modok aga laga. Asogo agalat, obinal yebekhasu laga ai odouk ’gela’geatma ogola re, orogole re, tembaga amolit ’gela’ge oruakma hegi. 5O hena orlogomtak ai ogola re, Allah en walentesi a’ge enelaluk welagai a’ge enebe aphwami ’gela’ge a’ge entegis o. 6Is ai enebe lo’bok onorogole 4 a’ge, ye, enagapsaburl ogo 4 enat oruakma hegi o. 7Onoyuk e, hegit modok. Ye, onoyuk ogop sapi uga’buk a’ge oyuk ogop tembaga horak a’ge ’gela’ge amolit wiak oruakma hegi o. 8Enebe lo’bok onorogole 4, ye, enagapsaburl 4 ai oruakhweat de, enagapsaburl ebe lo’bok opma’gwe re, ene’gik aphwami ene’gik ’gela’ge welaga o. 9Ye, enebe lo’bok enagapsaburl ’biren mesik langsogo at mesik agapsaburl re, ologun en mesik agapsaburl ologun e’birek dipholuk oruakma, enebe 4 ai, o’gut 4 ’gela’ge tak welegesa. Asogo welat enebe lo’bok hegilogo wema lagalat, enabel eden agai erlagat, welagai ’gela’geat ’bekhitsogo onorogole hegit lai lagaimu entegis o.
10Enebe lo’bok onorogole 4 en hele’gik ai, onorogole’gwe hegit e, aphwami onorogole ’gela’ge. Ye, ene’gik ’bekhit akhit hegit e, singa orogole ’gela’ge. Ye, ene’gik hware hegit e, sapi uga’buk a’ge orogole ’gela’ge. Ye, ono’borl o’gwe hegit e, tue pedi-pedi orogole ’gela’ge. 11Ye, is enebe lo’bok enagapsaburl ’biren a’ge re, mesik langsogo at mesik agapsaburl ologun en mesik agapsaburl ologun e’birek dipholuk oruakhwe, enagapsaburl ’biren mesik lo’boksogo enebe orlomusogo oruakhwe entegis. 12Ye, is enebe lo’bok onorogole etle akhit yu akhit oruak nakma re, hegilogo mu’gwe we, ’gwe ’gebane louwogoluk togwiam, enabel edenagai erlak ’bekhirat lo nak welegesa entegis o.
13Is ai ene’gerlakma re, odouk e’gen a’ge ’gela’ge emin, esaga heberlak a’ge ’gela’ge emin, o’borlogouk tiso modok welaga o. Odouk ’gela’ge ai magale ligagoam e, obinal ’gela’ge pobuk-naduk yebekhasu laga hegi o. 14Is ai onomuat ono’borlogouk perleneat obinal yebekhasu ai ’gela’ge lak-wak ogukhwe entegis.
15Is ai enebe nil yerentarok oruakma, ’gwiangso e’beri ’gela’ge ebe ugan a’ge, is enebe lo’bok eneragam ’gwiang pam mesik-mesik oruakma entegis o. 16’Gwiangso e’beri ebe ugan eriano, orogole mesik nagat a’ge re, helebe’gen o’go a’bik onuk permata amolit wiak a’ge ’gela’ge. ’Gwiangso e’beri ’gela’ge ai ebe lo’bok ebe mesigarat a’geat de, elagaret ugan pam hele’gik oruakma, 17elagaret lo’bok abel etle akhit, yu akhit, perakpo elit nak a’ge oruakma hegi o. 18’Gwiangso e’beri ugan ai wale’gik ebe lo’bok enil e’gen modok a’bik oruakma entegis. 19-21’Gwiangso e’beri ’gela’ge ai enebe is Allah en walentesimu enelaluk welagai a’ge ai, ene’gik pam welegesa ai en e, is Allah en walentesi a’ge ai ’gwe ’gebane, we, is enagai opo ’gwe louwogoluk togwiam e, is ’gwiangso e’beri ’gela’ge ai emin modok no’gu legesa nagat o. Hwedik-hwadigat, is Allah en walentesimu enelaluk welagai a’ge ai legeik ligagalat, mo ogulat, togwi holuk is ’gwiangso e’beri ’gela’ge ai enemin modok no’gukhwe entegis o.
22Is Allah en walentesimu enelaluk welagai a’ge ai ena’gul hegit ’bogorl ’gela’ge wale’gik oruakma re, napunak amolit ’gela’ge erliktu a’ge welaga. 23Is ai enebe lo’bok ena’gul hegit ’bogorl ’gela’ge wale’gik ai ogola re, enebe lo’bok enagapsaburl ’biren a’ge re, mesik, at mesik en mesik eragam a’ge agapsaburl hegit langsogo oruakhwe, enagapsaburl ’biren mesik lo’boksogo enebe orlomusogo hettak oruakma entegis o. 24Is enebe darak no’gukhwe enagapsaburl o’borlogouk puk-puk osoam e, ik hurl pam iak dung-dung oso ai ’gela’ge emin, ap tentara esan lok logolak lagaihwe onoyuk o’borlogouk oso ’gela’ge emin, nenaik Allah di a’ge yu a’ge tu nak a’ge ano iak oso ’gela’ge emin, osoma nesa’go hwelegis o. Ye, is enebe darak lo erlakma en mo ogwiam e, enagapsaburl e’girlogo oruakma entegis o. 25Asogo oruakhweat de, is ena’gul hegit ’bogorl ’gela’ge wale’gik a’ge ano abel o’borl akhit en, iak ano osoat oruakma hwelegis o.
26’Bogorl ’gela’ge wale’gik a’ge ai abel likho re, ap ononuk logo a’ge enebe hweriogo welagaimu eba enebale ’gela’ge mesik, orogole helep o’go a’bik onuk nilam ai ’gela’ge oruakma re, ebam aphwami ’gela’ge a’ge hweriogo oruakma hegi o. 27At ai ebagase hwerlisogo likho’gwe re, tembaga odouk magale ogola amolit a’bik welago ’gela’ge welaga. Ye, ebagase hwerlisogo opma’gwe re, atia modok yebekhasulat taga laga a’ge re, 28orogole hun-hun warlo’gouk o moru nasuam o hena ogola ligago a’ge ai ’gela’ge likhegi o. Nenaik ’gain Onuk Logo a’ge ebe oruak oluk atia amolit a’bik yebekhasuam nil hegi re, aiyat o.
At Yehezkiel Allah en iak mo’gulentasu lemagoluk yo’go pesi wene
Asogo agokhwe hegirik e, nebe norogole sogup ’gwiangma sakhun egimu, at mesik en iak disogo mo’gulnosoma nesa’go hwelegis,
Currently Selected:
Yehezkiel 1: Wul
Highlight
Copy
Compare
Share
Want to have your highlights saved across all your devices? Sign up or sign in
