Keluaran 39
39
Ap Allah eiye a’ge onosum egerle oruak a’ge efod ano egesegisa wene
1At Allah en Musa mo’gulesi ano ’gela’geat Harun en Allah eiye welat, onosum omu degelak a’ge ano ’buk horloluk, o asua wolomma aphwami enebaget til laga lemagoluk, herle domba asu tuelak borlu a’ge emin, ’borlu ’belak a’ge emin, ’borlu il momi-momisogo tak a’ge emin, ebano pam ap Harun enebaget onosum egesegulat e, At Harun en Allah ebagerat polik welat osum ’buktagalom a’ge paget ogore, ikhoat pegesa.
2-3Egesegulat, emas a’ge pam pulogo-pulogo wei-wei a’ge ’gagal hegeik takpil legesarik, ap enaluk a’ge en dape’gek-yape’gek egesogwi ’gela’ge herle ano pam ’gennesogo poluk, ano pam emin, herle menya esi ’gela’ge op sakho tak a’ge pam tuelak a’ge ano pam emin, onosum egerle oruak a’ge o’borlma ’buktogwi a’ge onuk efod ano ikho, 4onnum pema-pema sebelogo ono’borl akhit pogulat, urlok takpoluk sum efod ologun dipsogo egesogulat, 5Ye, sum efod ano a’ge bagaluk enebagase ’gwe wan togulom ano re ene’gik ’bogun pam e’gik a’ge ’buktak wolomma re, sum efod il mesi’gat nak emak oluk herle domba asu pam tuelak lalu a’ge emin, ’borlu ’belak a’ge emin, ’borlu il momi-momisogo tak a’ge emin, herle menya esi ’gela’ge opsogo tuelak a’ge emin, ano pam nak egesu o, oluk, at Allah en Musa mo’gulesi ano ’gela’geat egesugulat, tigisa. 6Takpoluk, helep napunak ’gela’ge amolit deleng oso a’ge krisopras ano mul ’gela’ge emas a’ge pam wali’gogo helep ano pam lo’boksogo pogulat, ap ene’gik a’bosu pogwi a’ge onuk cap heli’gogwi ’gela’ge, at ap onuk mesik Israel eiyagai ononuk helep ano pam pelal wogo pogulat, 7Takpegesarik, at Allah en Musa mo’gulesi ano ’gela’ge aphwami Israel a’ge Eber entasu lemagoluk, sum efod ebagal oruak a’ge ikho pogumu sum efod ano pam helep emin ikho um sebelogo pogulat, tigisa.
Emeik sum egesegisa wene
8Asogo takpoluk, sum, emik pam lo’boktak wolom a’ge egesuak oluk, sum efod ikho po ano ’gela’geat, sum emik orlomu tak wolom a’ge paget, ogore, herle emas a’ge emin domba asu pam tuelak a’ge lalu a’ge emin, ’borlu ’belak a’ge emin, ’borlu il momi-momisogo tak a’ge emin, herle menya esi ’gela’ge, il op sakho tak a’ge emin ebano pam is ap enaluk a’ge en sum egesogwi ’gela’geat, egesegisa. 9Egesegulat, kain ebe o’gulogo ologun pema-pema emin, emde pema-pema emin, ano re, yat akhit legeik emin horok akhit no’gorlik emin meter 22 senti pam nak eikho pegesa. 10Helep o’go lok, permata ano a’ge pam nak lo’boksogo pou wagoluk, opma hwerli 4 pam pulogo poluk helep ’borlu ’belak a’ge yaspis mesik wogulat, helep krisopras mesik wogulat, helep malakit mesik wogulat, takpoluk, opma hwerli naduk pulogo pogulat, 11Pobuk helep morlil a’ge mesik wogulat, helep lazurit mesik wogulat, helep yaspis unega a’ge mesik wogulat, takpoluk hwerli o’borl pam hwalogo pogulat, 12Pobuk helep ambar mesik wogulat, helep akik mesik wogulat, helep kecubung mesik wogulat, takpoluk, wa’gi o’borl pam pil-pil, o’borlma pogulat, 13Hwerli modok opma ai re, helep pirus emin, helep krisopras emin, helep nefrit emin, ano pam hwalogo pegesa. Asogo tigisarik helep 12 hwalogo pegesa a’ge ai pam annisogo welemagoluk, mul ’gela’ge emas pam hetsogo wali’gogo poluk, 14Helep 12 pulogo pogwi a’ge ai pam ap Israel eiyagai 12 ano ena’gul onuk hundomok nak, cap ’gela’ge sogo ononuk pelal wokho pegesa. 15Takpegesarik, enemeik sum ’gela’ge emik pam lo’boktak wolom a’ge emas il op a’ge pam tigene ikho pegesarik, 16Emas pam mul ’gela’ge wali’gogo pogulat, emas pam tigene ’biren ikho pogulat, takpoluk, tigene ’biren eriano wokho sum enemik sum ’gela’ge emik pam lo’boktak wolom a’ge ologun pema-pema sepnogo pegesarik, 17Emas pam tigene egeik a’ge ’biren tigene ’biren eriano sum emik sum ’gela’ge ologun pam sepnik a’ge ano pam diptak pogulat tegisa pogulat, tegisa. 18Ye, um sebelak a’ge ologun emin sum efod diptakma eriano 2 tigene emas a’ge pam lo’boktak poluk e, ologun ado pema herle emas il op a’ge pam abel pema-pema hettak pesi. 19Asogo takpoluk e, sum emik orlomu tak, a’ge ogola akhit en ologun ligakhit tigene emas en sum efod ebagal akhit diptak pesi. 20Sum efod ebagal egerle um pam en ’bekhit ologun woluk tegine egeik a’ge o’borl pam pei loma eria emas pam tigene ’biren mesik emin ikho sepnik pegesarik. Bagaluk efod wantak a’ge ano abel likho akhit. 21Po’gulogo louwano oluk, annisogo welemagoluk sum emik sum ’gela’ge ologun pam tigene egeik a’ge ano emin, tigene sum ogola egesik a’ge efod ologun pam lo’boktak oruak a’ge ano emin, e’birek la’bulogo herle wibe’gen iltak a’ge ano pam lo’boksogo pegesa. Asogo takpoluk, sum emuk orlomu tak a’ge ano ebagase herle hettak a’ge abel likho akhit hetsogo modok welemagoluk. Asogo tigisa ai re, at ’gain Onuk Logo a’ge en Musa mo’gulesi ano ’gela’geat tigisa.
Allah eiye a’ge onosum muat mesik egesigisa wene
22Asogo takpegesarik, Ap Allah eiye a’ge onosum o’borma ’buktu a’ge efod ano o’borl o’gwe oruakhwe sum yat a’ge ogola ’buktu ano re, Is ap enaluk a’ge en egesogwi ’gela’ge kain wibe’gen iltak a’ge ano pam egesegulat, 23Ono’gorlop sogo poma kain ’burl ele hele’gik poluk, derlep uano oluk, sing sum emde ’gela’ge ikho pogulat, 24Domba asu herle lolu a’ge tuelak emin, ’borlu ’belak a’ge tuelak emin, ’borlu il momi-momisogo tuelak a’ge emin, herle menya esi ’gela’ge il op a’ge tuelak emin, ano pam e delima e’gen momogou a’ge sum ologun pam erlilogo legesarik, 25E’gerlakma en erledeng tiso a’ge e’gerlak hobok ’bong-’bong iltak a’ge emin, sum baju ano ologun opma’gwe emas il op at en a’ge pam hele’gik a’ge erlelik delima e’gen pil lagalat, tigisa. 26Aphwami enebaget togulom a’ge paget til lagalat, ’buktu a’ge sum ologun o’gwe e delima e’gen ano erlilogo pou wagalat, emas pam hele’gik a’ge iak erledeng tiso a’ge ano erlilogo pou wagalat, til-til sum ologun o’gwe e’gerlak hobok wali’gogo erlelegisa. Ai, tigisa ano at nenaik ’gain onuk logo a’ge en Musa mo’gulesi ano ’gela’geat tigisa.
27Takpil legesarik, Harun eiyagai enemin onosum ogola a’ge likho ’buktogwi a’ge yat ai kain herle menya il sakhorak il op a’ge pam is ap enaluk a’ge en egesogwi ’gela’ge ikho pogulat, 28Ye, kain ena’gul sum hettak a’ge emin, herle hettu a’ge emin, herle hettu a’ge emin, sum ogola ’buktu a’ge emin, ano re, herle menya il op modok tuelak a’ge pam egesogulat, 29Ene’bagaluk ’ban ai re, herle menya il op a’ge pam tuelak a’ge emin, domba asu pam herle lalu a’ge tuelak a’ge emin, ’borlu ’belak tuelak a’ge emin, ’borlu herle il momi-momisogo tuelak a’ge emin, ano pam is ap sum il yape’gek-dape’gek egesogwi ai ’gela’ge ikho pogulat, tigisa. Ai, tigisa ai, at Allah en Musa mo’gulesi a’ge ano ’gela’geat tigisa. 30Ai takpegesarik, Allah paget degelagat onogorlok oruak sogoat enil hogu lemagoluk e, emas il op a’ge pam nak Melei amolit deleng oso ai ’gela’ge heli’gogo poluk e, ano pam wene Allah paget degelagat welemagoluk, cap ’gela’ge pelal wokho pegesarik, 31At Allah en Musa mo’gulesi ano ’gela’ge herle wibe’gen iltak a’ge ano pam sum a’gul sum ’buk tago a’ge ano pam. Herle ’borlu ’belak a’ge ano pam e emas il op a’ge ano ologun-ologun erlilogo re, a’gul sum ano edip sebelogo ’buktak pegesa.
O Sabo Allah owi woru a’ge di a’ge yu a’ge heli’gogo Musa wogegisa wene
32At Allah en an nemin hwedik togulomma o sabo disogoat woru o, oluk, Musa mo’gulesi a’ge ano is aphwami Israel a’ge en hegit ologun ’balogo weregisarik, 33Musa eragam o, at Nenaik ’gain Onuk Logo a’ge emin babologulomma pou wegesa ano re, o sum owi ebe woru a’ge kain ebak emin, ogola en tugulom a’ge di a’ge yu a’ge emin, tenaga’ge emin, e tiang edikpo a’ge emin, e no’gorlik pei lo a’ge emin leget tiang leget tenak gok e edikpo a’ge emin, oyuk emin, 34domba ierak a’ge agap pam ’borlu ’balogo egeik a’ge ebam lo’boktak po a’ge emin, hiane ’gela’ge lok a’ge onuk lumba-lumba ik ogola welago a’ge agap emin, sum ebak o asuama modok wolomma orlomusogo wolom a’ge emin, 35Allah iak wene werak a’ge yagarak wolom a’ge epeti hele’gik a’ge ano emin, peti Allah en a’ge e yesogo woluk lagalom a’ge e lolak a’ge emin, Allah emin hwedik togulomma osolup laru a’ge emin, 36Roti pogumu e delak a’ge emin, ai pam tugulom a’ge di a’ge yu a’ge emin, Allah ebe oruak opogu lemagoluk, roti emin, 37Esaga heberlogwi a’ge emas a’ge pam hele’gik a’ge uak emin, ede’bi hele’gik a’ge emin, esaga ai pam togwi a’ge di a’ge yu a’ge emin, esaga heberlugwi a’ge a’bosu emin, 38E’ben op a’ge odouk pam narlogumu emas pam lo’boktak a’ge emin, Allah paget polik pogulat, herle logwi a’ge a’bosu emin, e’ben op a’ge emin, sum ebak ’goduk o’gwe sepnogwi a’ge emin 39Ebaget wusogo odouk narlogwi a’ge tembaga a’ge pam lo’boktak a’ge emin, tembaga pam ’besieme’gen a’ge pam tegine egeik a’ge emin, ebe e yerak lagai a’ge e lolak emin, narlogulat di a’ge yu a’ge togwi a’ge emin, ene’gik-onoyuk emerogwi a’ge ebe emin, edip hweriogo po a’ge emin, 40Leget woru a’ge pam sum sepnogo ’belakpou wagai a’ge emin, oyuk oruak a’ge emin, ’goduk pam sum sepnu a’ge emin, annisogo welago a’ge herle emin, annisogo welago a’ge ’besieme’gen uak emin, Allah emin hwedik togulomma woru a’ge emin, di a’ge yu a’ge tugulomma ’berlegat emin, 41Allah owi woru a’ge asuema aphwami enebaget o’gogulat ’buktugulom a’ge sum ebaget polik a’ge at Harun osum emin, eiyagai onosum emin, ’berlegat, 42At Allah en Musa en tu a’ge paget mo’gulesi a’ge ano mesigat nak ogo mesik ukpo erlakma en ’berlegat-hegitsogo nagat heli’gogo Musa eragam pou wegesa. 43Asogo pou wegesema, Musa ano at Allah en tuagoluk mo’gulesi a’ge ano mesigat nak ogo ukpo erlakma en ’berlegat hegitsogo nak tegisema il hesirik, ede aganhan enebam pesi.
Currently Selected:
Keluaran 39: Wul
Highlight
Copy
Compare
Share
Want to have your highlights saved across all your devices? Sign up or sign in
