Keluaran 40
40
Musa en O Allah owi ebe weregei wene
1Ede aganhan enebam pasuam e, at Allah en Musa disogo mo’gulesi, 2“Dugwi naduk-naduk pelelak a’ge tanggal 1 yu pamat an nemin hwedik togulomma nowi ano werin o. 3Werise loroguntik, niak wene werak a’ge nepeti hele’gikmu yagarak a’ge ano po’gwi lasu loroguntik, orlomusogo welemagoluk, sum ebak a’ge ano sepnogo ’belakpo ’bu agalat, 4e roti pogulomma delak a’ge ano po’gwiselat, ai pam en taga loroguntik, ai pam tugulom a’ge di a’ge yu a’ge ebano pulogo o’borl pam pasulat, taga loroguntik, esaga ebe po’gwiselat, ye, e’gik pulogo hweriogo pil lasulat, 5e’ben op ago a’ge ebano odouk narlu a’ge paget emas pam heli’gik a’ge ano woluk e, an niak wene werak a’ge nepeti hele’gek mu ebano yagarak ogola oruakhwe, olukhwe pare akhit eria pasulat, sum ’goduk pam sepnik pasulat, tin o. 6Ye, nebaget wusogo odouk narlogumu hele’gik a’ge ano woluk nemin hwedik togulomma ’godukmu pare akhit eria pasulat, 7ene’gik-onoyuk, emerogwi a’ge hele’gik a’ge ano woluk nemin hwedik togulomma ogola akhit oruakhwe odouk mu’gwalogulom a’ge ano pare akhit oruakhwe ’burl eria poluk, ik emde loropsogo na’gogo pasulat, 8leget wo a’ge tiang wali’gogo edikpil lasu loroguntik, sum ebak egeik a’ge ano pam sepnik poluk ’belakpou wagalat, leget ’goduk ’gwi lagai a’ge ano pam ogo sum sepnogo ’belakpou wagalat, tip o.
9Asogo taga loroguntik, an nebaget pulogo Pasulat, herlelik po a’ge a’bosu ano wa’guntik, nowi werik emin, di a’ge yu a’ge ogola welago a’ge emin, di yu tu a’ge paget emin, ’berlegat nebaget polik welemagoluk, a’bosu egilogo pil loluk, nebaget pulogo pasulat, 10Ye, nebaget modok omu degelak welemagoluk, nebaget wusogo odouk narlogulomma emin, ai tugulat, tugulom a’ge di a’ge yu a’ge pam emin, a’bosu egilogo pil loluk, nebaget pulogo pasulat, 11Ye, ene’gik-onoyuk emerogulomma emin hweriogo poma oyuk emin, a’bosu egilogo pil loluk, nebaget pulogo pasulat, tip o.
12Asogo taga loroguntik, Harun emin, eiyagai emin, wogonoboluk an nemin la’bologulomma nowi werik a’ge ’godukmu eria onoboluk, ik pam onowiak hosogo pasulat, taga loroguntik, 13At Harun ai, an nebe eiye welat. Nebaget taga lemagoluk, sum ’buktugulom a’ge arat polik a’ge ano Harun ’buktak pasu loroguntik, a’bosu a’gul pam herlelik poluk, nebaget pulogo pomup o, 14Asogo takpoluk e, Harun eiyagai ebano heragam onobou woroguntik, onosum ogola ’buktogwi a’ge yat a’ge ano ’buk tagonoboluk, 15an nebe eiye welat, nebaget tugu lemagoluk, enaik ebam a’bosu herlelik pegen ai ’gela’geat a’bosu enebam herlelik enebemin o. A’bosu enebam herlelik enebasu legen a’ge ai re, is eneiyagai dagetil lagai a’ge ebano an Allah nebe eiye welat, modok-modogat tugu lemagoluk, asogoat tagonobomup o,” oluk, mo’gulesi. 16Mo’gulesimu, at Musa en e, at Allah en mo’gulesi a’ge ano mesik ukpo erlakma en e, modok hegitsogo nak, tegei.
At Musa en Nenaik ’gain Onuk Logo a’ge owi sum a’ge weregei wene
17Aphwami Israel a’ge o Mesir ukpoluk liplau wegesa hwerli tahun mesigat welegesarik, tahun mesik ’gwiselat, dugwi naduk wenarogwi a’ge ano pam, tanggal 1 a’ge pam e, o Nenaik ’gain Onuk Logo a’ge owi sum a’ge ano werigisa. 18At Musa en, o ai woruagoluk wa’gi ’bourak pesirik, o’gut uak lagabiselat, o ebe e no’gorlik a’ge pasulat, legeik a’ge mesik lagabiselat, tegei. 19Asogo tegeirik, Nenaik ’gain Onuk Logo a’ge en,
“Disogo werip o,” oluk egei hegitsogoat, o u’gwea sum a’ge ogola saliselat, o’borl pam saliselat, tegei. 20Asogo salegeitik, helep ’biren eriano peti Allah en wene wusogo woknenebegei oluk heli’gogo ogola yagarak pesi. Yagarak pesirik, peti ebe ’goduk lasogo re, e yesogo woluk no’gulom a’ge tigene emas pam hele’gik a’ge ele’gwe ’gwelabogo pesi. 21Asogo pesirik, Nenaik ’gain Onuk Logo a’ge en,
“Disogo tip o,” oluk mo’gulesi hegitsogoat, peti ai o Nenaik ’gain Onuk Logo a’ge owi sum owi weregei a’ge ano ogola pesirik, e’gerlik poluk sum ’gain a’ge pam erlilogo ’belabu aga.
22Asogo orlomu tobu agarik, sum ’gain ano abel pema akhit, ligakhit o’gwe hegit meja mesik pesi. 23Asogo pesirik, so’boru roti a’ge Allah paget pogulom a’ge meja ai pam Nenaik ’gain Onuk Logo a’ge en Musa mo’gulesi, ebe hun-hun werakho ogun hegeik, ’gela’geat, dalogo pesi. 24Pesirik, esaga lampu oyuk yogo a’ge o ano ogola ’belak akhit o’gwe hegit, meja ano emin onorogole e’bimusogo pesi. 25Asogo poluk e, esaga lampu ebano ebe lo’bok magalesogo re, Nenaik ’gain Onuk Logo a’ge en Nenaik ’gain Onuk Logo a’ge owi werik ogola, Musa mo’gulesi ano ’gela’geat, orogolema pesi.
26Asogo pesirik e, di a’ge yu a’ge Allah paget odouk narlogulom a’ge ebe emas a’ge pam hele’gik a’ge, o Allah owi ogola sum ’gain ’belebak a’ge ano orogole hegitsogo pesi. 27Asogo pesirik, at Nenaik ’gain Onuk Logo a’ge en,
“Disogo togu lomup o,” oluk Musa mo’gulesi hegitsogoat e’ben op a’ge odouk narlik pesi. 28Asogo narlik pesirik, sum yat a’ge o ’goduk o’gwe lasogo pesi. 29Ye, ’goduk ai e’berli pam e, di a’ge yu a’ge Allah paget odouk narlik obogulom a’ge mesik heli’gogo pesi. Asogo heli’gogo pesirik, o’borl pam e, Allah paget wam di a’ge yu a’ge wusogo odouk narlik obogulat, no’gwi a’ge logon emin, pasulat, tegei.
30Ik na’gogo pogulom a’ge ebale mesik heli’gogo o sum owi ano ’goduk ho’gorlakma, di a’ge yu a’ge Allah paget narlogulom a’ge ano ho’gorlakma, eba pesirik e, ogola ik na’gogo pesi. 31-32Asogo pesirik, Musa Harun e’birek emin, eneiyagai emin, nin hwedik nan hwedik Nenaik ’gain Onuk Logo a’ge owi sum owi werikmu ano ’guogoluk de a, at e, di a’ge yu a’ge wusogo Nenaik ’gain Onuk Logo a’ge ebaget narlogulom a’ge pesimu ano horoksogo ’guogoluk de a, ene’gik onoyuk ik eba emerogu legesa. 33O sum owi werik ai emin, di a’ge yu a’ge Allah paget wusogo odouk narlogumu ai emin, esa’go’gwe ’berlegat waling leget ’gela’ge sum a’ge erlilhe’gik pesi. Pesirik, ’goduk emde ’belakma eba sum a’ge erlilogoat ’belabu aga. O asogo weregeitik, at Musa en, arat il hodologo weregei o.
O hena Nenaik ’gain Onuk Logo a’ge owi werikmu eba sebelo ’bu aga laga wene
34 #
1Raj. 8:10,11; Yes. 6:4; Yeh. 43:4,5; Wah. 15:8 At Musa en o asogo arat weregeimu en, pobuk e, o hena Nenaik ’gain Onuk Logo a’ge owi werik a’ge ano pam sebelo ’bu agalat nenaik ebe oruakma re, o ai ogorli ’berlegat ’bak-’bage modok a’bik yogo pasu laga. 35Asogo taga laga ai en e, at Musa o ano ’gwilo mia aga laga. At Nenaik ’gain Onuk Logo a’ge ebe owi werikmu ebano o hena nak sebelak welat, Nenaik ’gain Onuk Logo a’ge ebano oruakhwe, amolit pasu laga.
36O hena ano Nenaik ’gain Onuk Logo a’ge owi werikmu dum o’borl pam ligagoam, aphwami Israel a’ge o momu hokhomsogo louwogoluk, onowi sum owi werik a’ge ano moluksogo horloluk laga legesa. 37Asogo a’geat de, o hena ano ligom erlak oruak en e, is ogo wom erlakma enat welegesa. 38Aphwami Israel a’ge asogo o da wetil lagaihwe Nenaik ’gain Onuk Logo a’ge ebe o sum a’ge werikmu oruak oluk, at ebe erlige welat holuk e, o hena welaga. Ye, o huba’go welat holuk e, odouk magale at welaga. Asogo agoam e, is aphwami Israel a’ge en enil hogu legesa.
Currently Selected:
Keluaran 40: Wul
Highlight
Copy
Compare
Share
Want to have your highlights saved across all your devices? Sign up or sign in
