Keluaran 12
12
Allah en e, “Delhenebik en e, wam domba emalik wusogo seni Paskah monup o,” oluk mo’gulentesi wene
1 #
Ima. 23:5; Bil. 9:1-5; 28:16; Ula. 16:1,2 Asogo agama, pobuk at Nenaik ’gain Onuk Logo a’ge en Musa Harun emin o Mesir oruakma disogo mo’gulentesi,
2“Tahun ebe lo’bok dugwi hene’gik wenarogulat e, dugwi yogodak wenarul a’ge yu re naduk a’ge at welemak o. 3Ai en e, An en wene mo’gulhentegis a’ge yu, his en aphwami Israel a’ge ’berlegat disogo mo’gulontomup o.
Dugwi yu a’ge tanggal 10 pam his ap henebe lo’bok en heberlhegeik domba ai elaluk pulogo pogu lomup o. Domba mesik e, ap mesik emalik enemin no a’ge at hegit holuk pulogo pogulom o. 4Wam domba ai wusogo re, aphwami enebe wam domba ai nouwa a’ge enebe lo’bok mesik-mesik pulogo wenagenebip o. Asogo a’geat de, is ap mesik eiyagai enebe weiyatma wam domba emalik mesigat nak ai werak poluk perlengsogo no re, mia ago holuk, ap mesik eiyagai enemin onowi horokho a’ge enemin en wam domba ano perlengsogo nouwogoluk e, enemin la’bolik welat en woru o. 5His en e, wam domba de a, at e, kambing de a, pebisogo po elirat a’geat de, ebe ierak a’ge umur 1 tahun mesigat a’ge de ebe aik ’belak erlak op a’ge holuk pulogo po yo.
6Asogo arat pulogo poluk ’gwelakharok oruakma en, tanggal 14 a’ge pam hopmu agoam e, o ai erligeat his aphwami Israel a’ge ’berlegat wam domba ai werak poluk se’gerlil lo yo. 7Asogo werak poluk se’gerlogulat e, mep weiyat logon wik-wok e, o is enebe welat wam domba nouwa a’ge ebano, ’goduk esa’go pema-pema worogulat e, ’goduk e’berli akhit lagabak a’ge pam worogulat, tip o. 8Asogo oluk, o hup ai erligeat wam domba ano odouk e’gen pam werakho re, yorum erle wiak a’ge sogo emin, so’boru roti e’gen periso a’ge emin worogo erlak a’ge emin, emin monup o. 9Wam domba emalik ai, ebe emin, a’guluak emin, oyuk emin, olot emin, ’berlegat odouk e’gen pam werarip o. Asogo arat worogo poluk no’gulat, ogola un a’ge emin, ik pamsogo a’ge emin, modok nagup no yo. 10Asogo no’gulat, dedil ago holuk, hweli poluk hubet no mia o. We, hweli po erlakma en perlengsogoat odouk narlu o. 11His wam domba ai no’gulat e, honosum ebela louwogoluk ’buktogwi ai ’gela’ge ’buktogulat, sandal honoyuk sum ’buktogulat, takpoluk hene’gikmu ’bouwa’gun tenakho modok louktak welat monup o. No’gulat e, perleneat monup o. Asogo nagup ai re, an henaik ’gain Nonuk Logo a’ge erliknobuogoluk seni Paskah monup o.
12Asogo nagup ai erlige huba’go, An o Mesir en di owi yu owi ’berlegat nil ’gogolil wagalat, aphwami eneiyagai ap naduk a’ge enebe lo’bok emin, wam emalik naduk dogo a’ge ebe lo’bok emin, warenebik o. Asogo warenebiselat, henaik ’gain Nonuk Logo a’ge An nemategat ai en e, aphwami Mesir a’ge en di asua yu asua a’ge pam he’berik welat erliktogwi a’ge ai ’berlegat wiagap paik o. 13Asogo wiagap pil wagalat, his honowi lo’gwe domba mep werak welema ai en enagat ema o. Asogo enak a’ge oruakma, An en aphwami Mesir a’ge erlagap enebil wagalat, his wathonobu erlakma en, eming hontoluk laik o. 14#Kel. 23:15; 34:18; Ima. 23:6-8; Bil. 28:17-25; Ula. 16:3-8Asogo ema ai en, his en e,
Nenaik ’gain Onuk Logo a’ge en o agauwa yu pam watnonobu erlakma en eming nentesi o, oluk An nebe henede ebetniogulat no’gulorogup a’ge edip takpoluk monup o. Asogo noluk, pobuk tahun ebe lo’bok pam, his en seni Paskah hwedigat asogo no’gu lomup o, oluk egei o, oluk mo’gulontomup o,” oluk Musa Harun emin mo’gulentesi.
“Seni so’boru roti e’gen periso a’ge emin worogo erlak a’ge no’gu lomup o,” oluk mo’gulentesi wene
15Nenaik ’gain Onuk Logo a’ge en asogo mo’gulentesirik, mesik disogo mo’gulentesi,
“Pobuk agauwa sabir a’ge welat, so’boru roti e’gen periso a’ge emin worogo a’ge holuk e, nagup o. Agauwa sabir eria welat, aphwami logon en so’boru roti e’gen periso ai a’ge emin worogo a’ge nagup holuk e, is enebe an neiyagai, oluk u mia ai en e, agauwa sabir ai a’ge no erlakma en, we, wolomogoluk agauwa naduk welat, his honowi pam so’boru roti ebe periso a’ge e’gen ai logon oruak holuk, ’berleksogoat lebikpo yo. 16Agauwa sabir wolomogoluk naduk-naduk wolorogup eria pam emin, agauwa hebarlig wolomtik agaikhen ai pam emin, henebe mesikmu odoktak poluk an erliknobogulom o. Agauwa eria pam welat e, hene’gik logon wo erlakma en, we, so’boru no a’ge nak werarogulat, di-degelsogo pogu lomup o.
17O yogodak e, An en his henebe ’berlegat yu o Mesir en wokhonoboluk liplau weik o. Agauwa yu pam tahun ebe lo’bok hwedigat, his en seni sorogulat, his An nebam eberak welat seni sakho no’gulat so’boru roti periso erlak a’ge no’gulomup o, oluk An en eselegi a’ge yu his en opsogoat tugu lomup o. 18-20Tahun ebe lo’bok, asogo togulat, o eria hegit lau wotluk, dugwi naduk-naduk namiso ai a’ge tanggal 14 a’ge hup hwerli en tanggal 21 hup welat, so’boru roti e’gen periso a’ge ai emin worogo a’ge his logon no modok mia o. O agauwa sabir eria pam welat, so’boru roti periso a’ge e’gen ai a’ge honowi pam en modok perlengsogo lebikpomup o. Aphwami Israel a’ge de a, at e, aphwami ap ’bok a’ge de a, so’boru roti e’gen periso a’ge ai emin worogo a’ge no’gwi holuk, is enebe An neiyagai ik erlak ani o,” oluk mo’gulentesi.
Seni Paskah naduk-naduk ne’gesa wene
21Nenaik ’gain Onuk Logo a’ge en asogo mo’gulentesimu, at Musa en aphwami Israel a’ge onuelak wemagoluk worlentesimu wegesema re, disogo mo’gulentesi,
“Heneiyagai enemin seni Paskah nagup en e, wam domba emalik mesik-mesik logon wai lit o, wai laguptik e wusogo ’balip o. 22Wai laguptik wusogo re, emep loyang ogola ebano poluk e, musan e’gela ’gela’ge onuk hisop e’gela mesigat ’gerelak a’ge emep ano ogola ’belebak poluk e, ’goduk esa’go pema-pema werak poluk li ’gakhit ’goduk e’berli petne weriselat e, e ’goduk esa’go o’borl akhit lagabak a’ge ano pam weriselat, tip o. Asogo takpoluk, hup o dakha u erlakhwe, his logon honowi pam eba en loborogup modok erlak o. 23#Ibr. 11:28Asogo werak poluk oruakma, Nenaik ’gain Onuk Logo a’ge aphwami Mesir a’ge warenebiogoluk il ’gogolil wagalat, domba emep his honowi lo’gwe ’goduk esa’go pema-pema emin, e ’goduk e’berli akhit ye’gik a’ge pam emin, werak oruakma il holuk e, his honowi pam ukpoluk ’bekhit lasulat, malaikat aphwami warenebiso a’ge en his honowi pam wathonobu ’gwilo erlakma en ’bekhit louwagoluk mo’guleik o.
24His heneiyagai enemin en wene Allah en,
Disogo togu lomup, oluk nenesa’go weregei wene ai hwelak poluk modok-modogat togu lomup o. 25His henebe o Nenaik ’gain Onuk Logo a’ge en his wokhentaigoluk wene werakhenebesimu ebano arat ’gwi lagupmu re,
Allah en delnenebegei, oluk tigep ai ’gela’ge eba enat togu lomup o. 26Asogo togukhwe heneiyagai en e,
Yu re, nopaget togu lege no, oluk hin wogwi holuk e, 27his en e,
Nenaik ’gain Onuk Logo a’ge en aphwami Mesir a’ge eneiyagai ap naduk a’ge modok warenebil wagalat, nis Israel a’ge nonowi pam nenebe watnenebi ’gwilo erlakma en nenelaluk eming nontoluk laga ai en, at erliktogulat wam domba wusogo seni Paskah no’gu lege o, oluk mo’gulontogu lomup o,” oluk mo’gulentesimu, is aphwami Israel a’ge ebano ondogorlu pam huregesarik at Allah erliktigisa. 28Asogo erliktakpoluk legesarik e, Nenaik ’gain Onuk Logo a’ge en,
“Disogo togu lomup o,” oluk Musa Harun e’birek mo’gulentesi a’ge aphwami en hegitsogoat tigisa.
Aphwami Mesir a’ge eneiyagai ap naduk dogo a’ge nak malaikat en warenebegei wene
29 #
Kel. 4:22,23 Asogo tigisema, o hup ede ’burl ai erlige Nenaik ’gain Onuk Logo a’ge en malik o Mesir a’ge eneiyagai ap naduk dogo a’ge nak ’berlegat edip at Firaun omlogo pam en ’bekhit hwerli ap ene’gik herle werak welegesa a’ge eneiyagai modok warenebegei. Asogo warenebiselat, wam emalik naduk dogo a’ge ’berlegat warenebegei. 30Asogo warenebiselat, o seli mesigat holuk malik ap naduk dogo a’ge mesigat holuk mesik ukpo erlakma en ’berlegat warenebegei nak ai en, lo’gu modok eniak loksogoat ogumu re, eniak enesa’go hweligisarik, at ’gain emin, at osi emin, aphwami Mesir a’ge ’berlek emin, o huba’goat enelaluk egesa. 31O hup ai erlige at ’gain Firaun en Musa Harun emin worlentesimu wegesema re, disogo mo’gulentesi,
“Henebe ’berlek en e, lit o!
Nenaik Allah erliktuogoluk lul o, oluk mo’gulnigep hegitsogoat, an nowi pam yema ukpoluk lit o. 32Asogo lagalat, honuam ’berlegat sapi emin, domba emin, kambing emin, woluk lagalat, Allah en an obap nobuagoluk yo’go pomup o,” oluk mo’gulentesi.
33Asogo mo’gulentesimu, is aphwami Mesir a’ge en e, aphwami Israel a’ge disogo mo’gulentigisa,
“His perleneat lagup erlak holuk e, nis nenebe ’berlegat waromul o. Holuk e, his o yema ukpoluk perleneat lit o,” oluk eneme’gen ’baligisa. 34Asogo eneme’gen ’baligisema, is aphwami Israel a’ge ebano tepung sagalak a’ge so’boru roti weraruogoluk e’gen periso a’ge po erlakma en uong ’gela’ge ogolasogo wegesarik, sum ’gain a’ge pam sebelak poluk woluk wegesa. 35#Kel. 3:21,22Asogo wogulat, at Musa en e,
“Aphwami Mesir a’ge disogo ’gonu mo’gulontomup o,” oluk mo’gulentesi hegitsogoat, enalli a’ge emas a’ge emin, perak a’ge emin, ’bogoyum emin, wogontuagoluk ’gonu mo’gulentigisa. 36Asogo ’gonu mo’gulentigisema, at Nenaik ’gain Onuk Logo a’ge en aphwami Mesir a’ge ena’ge-a’ge is aphwami Israel a’ge enedesogo wogontuagoluk tegeimu, is en a’ge di a’ge yu a’ge ’berlegat is aphwami Israel a’ge en,
“Nis ai a’ge woknontomup,” oluk ’gonu mo’gulentigisa a’ge hegitsogo wogentigisa. Asogo tigisa ai en, aphwami Mesir a’ge ena’ge-a’ge di a’ge yu a’ge o’go a’bik a’ge is aphwami Israel a’ge en hokhomsogo horloluk liplau wegesa ai o.
Aphwami Israel a’ge en o Mesir ukpoluk liplau wegesa wene
37Is aphwami Israel a’ge ano asogo liplau wegesarik, enebe hwami emin, malik emin, ene’gik wenaru erlak a’geat de, we, ap nak e, hwerli 600.000 en o kota Raamses en o kota Sukot wegesa. 38Asogo wagalat, onuam a’bigat sapi emin, domba emin, kambing emin, woluk wegesa. Asogo woluk wagaimu, ene’gerlakma aphwami mu a’ge enebe a’bigat enemin wegesa. 39Asogo womogoluk togumu, aphwami en modok ningsogoat mugentigisema, so’boru ebela pam no a’ge opsogo degelogo wo erlakma en, we, so’boru roti weraruogoluk e’gen periso a’ge emin ’belabu erlak a’ge o Mesir en woluk wegesa a’ge ebano nak werarigisa.
40 #
Kej. 15:13; Gal. 3:17 Is aphwami Israel a’ge liplau wegesa ai 430 tahun o Mesir welegesarik en liplau wegesa. 41Asogo welegesarik, 430 tahun arat ’gobok e’gei erli’ge agauwa ai pam, Nenaik ’gain Onuk Logo a’ge eiyagai Israel a’ge esan logolak ebano o Mesir arat ukpoluk liplau wegesa. 42Nenaik ’gain Onuk Logo a’ge en aphwami Israel a’ge o Mesir en wogonoboluk liplau weigoluk tenentarok modok oruakma en, o hup ai erlige,
Nenaik ’gain Onuk Logo a’ge en disogo delnenebegei o, oluk enede eberak modok welat Allah paget togwi modok wolom a’ge paget tigisa ai o. O hup ai erligeat asogo togulat aphwami Israel a’ge en di a’ge yu a’ge degelogo poluk, enebabut heberlogo welegesa ai o.
Eming ontoluk laga a’ge paget enede ebesogo seni sorogulat, tugulom wene
43At Allah en Musa Harun e’birek mo’gulentasulat e, eming ontoluk legi a’ge paget enede ebesogo seni sorogulat, mesik disogo tu, mesik yusogo tu, oluk, mo’gulentesi a’ge ano re, yuat o. Ap mu a’ge enebe esan holuk e, seni henemin no’gulom mia o.
44Is ap heneragam a’ge o’go ’belak a’ge ebano enagap ene’gerlimu a’ge ’belak a’ge holuk nak seni henemin no’gulom op a’geat de,
45Ap ’bok a’ge emin, is ap o’go horlouwogoluk yabuk togwi a’ge emin, is ai ogo re, seni henemin no’gulom mia o.
46 #
Bil. 9:12; Yoh. 19:36 A’geat de ebe no’gulat, ’belak a’ge ado parema woluk libagalat, uak lolak mesik damulogo pogulat, tu ai re mia at o. A’geat de, o mesikmu nak welat, no’gulorogup ani o,
47eming ontoluk legi a’ge ai paget seni ai re, his aphwami Israel welagai a’ge enebe ’berlegat honogola henagaisogoat sorogu lomup o.
48Ap mu a’ge henemin, welagai a’ge ebano en, At Allah uam wusogo eming ontoluk legi a’ge ai paget seni sorogwi ai heneminat nonogola nenagaisogo soruok o, oluk, ogwi holuk e, nenagap ene’gerlimu a’ge ’belak erlak a’ge holuk e, no mia o. A’geat de, is emin, onosilak emin, enagap ene’gerlimu a’ge ’belakpoluk, nis e Israel a’geat ege o, oluk, ogwi holuk nak e, henemin no’gulom obat o.
49His ap honowirak Israel a’ge emin, is ap mu a’ge emin, eming ontoluk legi a’ge ai enede ebesogo Seni Sorogulat, tugulom a’ge wene werak mesigat ai nagat togu lomup o, oluk, mo’gulentesi.
50Mo’gulentesimu, at Allah en Musa Harun e’birek wene le’gelogo mo’gulentesi a’ge ano is Israel a’ge enebe ’berlegat, hegitsogo nagat togu legesa.
51A’geat de, o agauwa ai pamat, at Allah en is Israel a’ge onosilak polik modok ’berlegat o Mesir en wogonoboluk liplau waga.
Currently Selected:
Keluaran 12: Wul
Highlight
Copy
Compare
Share
Want to have your highlights saved across all your devices? Sign up or sign in
