Keluaran 13
13
Naduk dagagai a’ge holuk e, Allah wogogulom wene
1-2 #
Bil. 3:13; Luk. 2:23 Wogonoboluk liplau wagalat, at ’gain Onuk Logo a’ge en Musa disogo mo’gulesi; aphwami Israel a’ge enemalik naduk dagagai a’ge holuk onuam dogum doru erlakma re, naduk-naduk ierak a’ge dagagalat, tago holuk ai re, An na’geatma re, An nebaget modok modogat pulogo nobogulomup o, oluk, mo’gulesi.
So’boru roti periso erlak a’ge seni sorogwi wene
3Mo’gulesimu, at Musa en is aphwami Israel a’ge disogo mo’gulentesi, “His aphwami Mesir a’ge eneragam a’ge ’gela’ge welegepma en o agauwa yu pam at ’gain Onuk Logo a’ge e’gik anni pam wokhonoboluk liplau wagoma re, o agauwa yu pam lau wago holuk e, henede eberak welat, seni logat sorogulomup o. Asogo sorogulat, roti peruagoluk pogwi a’ge onuk ragi ano di a’ge yu a’ge e’gerlakma poluk, ebelogo no’gulom mia o.
4Dugwi yogodak naduk a’ge onuk Abib pelelak a’ge yu pamat o Mesir ukpoluk, liborogup ani o.
5Libagaimu re, at ’gain Onuk Logo a’ge en wokhonoboluk is aphwami Kanaan a’ge emin, Het a’ge emin, Amori a’ge emin, Hewi a’ge emin, Yebus a’ge emin, welagaimu eba re, agamu a’bosu emin, ’gin a’bosu emin, ik elaruk ’gela’ge horluk-horluk libagoma eba hene’balak wogentaik ani o, oluk, ho’buk ’balogo mo’gulentesimu ebano enebei lasuam welat, dugwi yu peleluago holuk Seni yu soru a’ge eberogulat,
6so’boru roti peruagoluk, ragi po erlak a’ge sakho werakho nil lagaihwe agauwa naduk hwerli en ’bekhit 7 pamat lailouwama re, ologun pam e, agauwa 7 a’ge pam at ’gain Onuk Logo a’ge erliktugulat, honogola henagaisogo seni logat sorogu lorogup ani o.
7 Roti peruagoluk ragi po erlak a’ge nil lagaihwe, agauwa 7 pam at tuama re, roti peruagoluk, ragi pogwi a’ge ano a’ge hene’gikmu emin, honowi pam emin tenakho wolom mia o.
8Seni ai sorogulat, heneiyagai ap dogo a’ge holuk e, mo’gulontogulat, nis o Mesir oruakma at ’gain Onuk Logo a’ge en agauwa yu pam woknonoboluk waga ai en togu lege o, oluk, wene ’beli’gogo mo’gulontogu lomup o.
9At ’gain Onuk Logo a’ge e’gik anni pam his o Mesir en wokhonoboluk, liplau waga holuk enat, seni yu sorogulomma re, at ’gain Onuk Logo a’ge en tugulom a’ge wene le’gelogo mo’gulhentesi a’ge ai henedemu modok-modok tenakho wolom oluk egei a’ge ai eberak weleripogoluk, hene’gik pam emin, hena’guluakma emin, herle ’gela’ge ago werak welemak o.
10Ye, tugulom wene le’gelak a’ge yu di tahun yu tahun wago ano, ai erlige tugulom wene werak a’ge ano modok modogat togu lorogup ani o,” oluk, mo’gulentesi.
Ap naduk dagagai holuk emin wam ierak naduk dagago holuk emin togulom wene
11Mo’gulentesirik, pobuk emin mo’gulentasulat, “His hene’balak henemin aphwami Kanaan a’ge ono’gwiang wokhentaik o, oluk, Allah en ho’buk ’balogo mo’gulhentesimu ebano at ’gain Onuk Logo a’ge en wokhonoboluk henebei asu lemarik, eiye welemagoluk, wokhentasu holuk, eba welat,
12 #
Kel. 34:19,20; Luk. 2:23 His ’berlegat heneiyagai ap naduk wedeba dagagai holuk, honuam a’gul onuk lo’bok ’berlegat emalik naduk-naduk ierak a’ge dagago holuk e, at ’gain Onuk Logo a’ge en a’geatma re, at ebagerat pulogo pogu lorogup ani o.
13A’geat de honuam keledai emalik naduk deriso holuk e, ebalema re domba emalik at po yo. Ye, domba emalik po a’ge erlak holuk e, keledai emalik ano ebe waremagoluk odogun ’gorologo werak po yo. Asogo tua a’geat de, is ap naduk dagagai holuk nak e, enebalema Allah ebaget uang at pogulomup o.
14-15A’geat de, pabuk agauwa mesik pam heneiyagai en his en togwi a’ge yu wene ebe ’gesogo a’ge paget oluk en togu legep no? Oluk, mo’gulhontogwi holuk e, his en mo’gulontogulat, at Firaun ede anni welat, nis liplau mok oluk uknonobo a’ge ebit epasu lagarik, tenak nonoboluk oruakma at ’gain Onuk Logo a’ge en aphwami Mesir a’ge enemalik naduk dogo a’ge enemin, onuam doru erlakma re, naduk dogo a’ge emin warenebegeirik e’gik anni pam o Mesir en woknonoboluk liplau waga ai en, nonuam doru erlakma en naduk-naduk dagago holuk e, at Allah ebaget pulogo pogulat, ye, nenemalik ap naduk dogo a’ge at Allah wogoum a’ge enebit opogulat holuk e, enebalema uang at pogulat, tugu lege ani o.
16Yu togwi yu re, at ’gain Onuk Logo a’ge e’gik anni pam o Mesir en woknonoboluk liplau waga a’ge ano nenaluksogo eberak welemagoluk, nene’gik pam emin, neneberli pam emin, herle ’gela’ge ago wusogo pogu lege o,” oluk, mo’gulontogu lomup o, oluk, mo’gulentesi.
Erlige Allah o hena ogola inagalat, ye, huba’go odouk magale ogola inagalat, onorogolema waga laga wene
17At Firaun en aphwami Israel a’ge lebemagoluk arat mo’gulentesimu, at Allah en,
“Ebela horoksogo aphwami Filistin onowi lo’gwe wogonoboluk loma aphwami Israel a’ge onogola en e,
Aphwami Filistin a’ge nenemin weim obu ai nenebit o. Togolik o Mesir louwok o, oluk enede opogumu no,” oluk ede eberegeitik e, aphwami Filistin a’ge onowi lo’gwe ebela horogat a’geat de, ai ebela wogonoboluk wom erlak ai o. 18We, ebela wi-waling o leimu aphwami erlakma ik Laut Merah omugwe ye’gelak o’gwe toluk o Mesir ukpoluk weim obuogoluk ’gela’ge wa’gun segen woluk liplau wegesa.
19 #
Kej. 50:25; Yos. 24:32 Asogo liplau wom erlakma en oruakhwe, pageat at Yusuf ebe elaluk welat, eiyagai Israel a’ge ho’buk ’baluagoluk disogo mo’gulentesi,
“At Allah en delogo wokhonoboluk libago holuk e, an nuak o yema en woknoboluk lu o,” oluk mo’gulentesi ai en, at Musa en Yusuf uak woluk liplau waga.
20Is aphwami Israel a’ge ano o Sukot ukpoluk e, o leimu aphwami erlakma esa’goma eba o kota Etam eba o sum owi wosu egesa. 21At Nenaik ’gain Onuk Logo a’ge en is aphwami Israel a’ge ebela mo’gulentaiyogoluk erlige re, o hena ogola inagalat, ye, o hup e, odouk magale e’gerlakma, inagalat onorogolema naduk waga laga. Asogo wagoma no oluk e, aphwami Israel a’ge hup erlige modok waga legesa. 22O erlige aregen o hena ogola en, ye, o hup aregen odouk a’ge ai, is aphwami Israel a’ge ai onorogolema modok mo u erlakma en modok waga laga.
Currently Selected:
Keluaran 13: Wul
Highlight
Copy
Compare
Share
Want to have your highlights saved across all your devices? Sign up or sign in
