Efesus 5
5
“Henebe Allah eiyagai o dakharakma welat,
togu lomup o,” oluk mo’gulentesi wene
1Henebe Allah eiyagai at ede hwedik a’ge welegep ai en e, at ebaburat womup o. 2#Kel. 29:18; Mzm. 40:6Aphwami en di a’ge yu a’ge Allah paget poluk, ebe wusogo odouk narlik pogwiam, Allah ogola opsogo oluk e’ben op a’ge lagabak pogu legesa ai ’gela’ge, at Kristus nis nenebe edeapnonoboluk e,
“Is enebaget an nebe watnobuak o,” oluk epesi ano pam ebe werigisa ai en Allah ogola op aga ai ’gela’ge, nis-nis nede-hedesogo togu lomok o. 3Henebe Allah eiyagai a’ge welat henebabut togulom a’geat hegitsogoat togulom o. Holuk e, ’babi tenontogulat, ene’gerli erlak wiak togulat,
“Di a’ge yu a’ge an nak woknetlip e,” oluk onogola en opogulat, ogwi ai a’ge, aphwami logon en e,
“Is pema asogo wiak togwi o,” oluk, honobok wiak saga uano oluk, wiak mesik togup o. 4’Babi tenontogwi a’ge obok ogulat, wene enede erlak en ogwi a’ge ogulat, ene’gerlimu a’ge paget herettakma en ogulat, u puk a’ge ai u erlakma enat, Allah at hau worogu lomup o. 5Is aphwami ’babi tenontogwi a’ge emin, ene’gerli erlak welat wiak togwi a’ge emin,
“Di a’ge yu a’ge an en a’ge nak wellep o,” oluk onogola en opoluk togwi a’ge ai, dogwi asua pam he’berik welat togwi ’gela’geat togwi holuk e, Kristus Allah e’birek eneragam enebasuam welagaimu eba eiye ema modok erlak o, oluk, opsogo henede opomup.
6Is aphwami Allah iak hegitsogo tu puk a’ge en, wene egi a’ge ai asogo togumu, Allah olot het emarik wiagabonobua ai en e, is logon en eniak we ’burlat ogulat e,
“Wiak a’ge asogo tumu obat o,” oluk, lalhonobuano. 7Holuk e, his is ai enemin la’bulogo ai a’ge togu lorogup no yo. 8His naduk e, o hiktakma welegep a’geat de, yogodak nonue ’gain Onuk Logo a’ge emin hwedik takpoluk, o dakharakma welegep ai en, henebabut o dakharakma welat togulom a’geat hegitsogo togu lomup o. 9E edip op a’ge en e’gen op a’geat egesiso ai ’gela’ge, aphwami o dakharakma welat di a’ge yu a’ge op hegitsogo nak enede pam en demat togwi ai o. 10Honogola en e,
“Nenebabut no’gosogo togu lomul pam en nonue ’gain Onuk Logo a’ge ebam sakho ua,” oluk, henede en pobirak poluk, henebabut ai a’geat mo’gulip o. 11Is o hiktakma welat e, obabonobua erlak a’ge paget togwi a’ge ai re, enemin la’bulogo togu lorogup o. At e, asogo togwiam ’baksogo wene yagontogu lomup o. 12Is aphwami logon hisakho togwi a’ge ai onobok ogulom e, ene’gerli om ebelerak ai en e, onobok ogu lorogup o. 13Di a’ge yu a’ge ’baksogo o dakharakma pogwiam, enagat ago ai o. 14Asogo o dakharakma pogwiam enak agalat e, o dakha oso ai en e, disogo ogwi ai o,
“Hat nogo ese legen ai, hebe helaluk emen o.
Ye, werak a’ge ’gela’ge welegen ai, helaluk emen o.
At Kristus en dakharak hobouwa o,”
oluk ogwi ai. 15Ai enat, henebabut heberlogo togu lomup o! Aphwami enede ebis a’ge en togwi ’gela’ge tu erlakma en, enede ’gagalak a’ge en togwi ’gela’ge togu lomup o. 16#Kol. 4:5Yogodak ya aphwami enebe lok o’gwe enebabut wiak togwi ai en, his henebabut we ’burlat almasogo togu lema no oluk, panoasuak henebabut op a’ge aiat togu lomup o. 17Henede ebis wolorogup no yo. We, at nonue ’gain Onuk Logo a’ge ogola agai epasu a’ge aiat edip hwiogo poluk hegitsogo togu lomup o. 18Anggur e’gen a’bosu loksogo no’gwi ai en henede ’balagalat wiagap henebisoma no oluk e, nagup o. At e, Allah Arogun aiat honogola ’betesogo womup o. 19#Kol. 3:16,17His-his weneane ogulat e, Allah paget weni Mazmur pam a’ge worogulat, Allah paget weni worogulat, Allah iak paget weni worogulat, worogwi a’ge ai wogulat togu lomup o. Henedemu en, weni worogulat nonue ’gain Onuk Logo a’ge ebe erliktogu lomup o. 20Nin hwedik nan hwedigat di a’ge yu a’ge ’berlegat paget e, nonue ’gain Onuk Logo a’ge Yesus Kristus onuk ’balogo re, nenaik Allah hau worogu lomup o.
Hwe ap wogo a’ge emin, ap hwe wogo a’ge emin, enebabut togulom wene
21Allah asogo hau worogulat e, Kristus hau do’goksogo worogulat, his-his mesik en mesik eragam welat eniak hwelakpoluk togu lomup o.
22-23 #
Kol. 3:18; 1Pet. 3:1 Nis Allah eiyagai nenebe Kristus ebe ’gela’ge oruakma, at en delnenebegeitik e, ebe nonue ’gain welago ’gela’ge, hwami onuelak ’gain e, onogunlagat ai en e, his hwami re, nonue ’gain Onuk Logo a’ge eragam welat iak hologo togu legep ai ’gela’geat, honogunlak lo’bok eneragam welat, eniak hologo togu lomup o. 24Ye, nis Allah eiyagai Kristus eragam welat iak hologo togu lege ’gela’ge, his hwami re, di paget yu paget ’berlegat tuogoluk e, honogunlagat eneragam welat eniak hologo togu lomup o.
25 #
Kol. 3:19; 1Pet. 3:7 At Kristus en nis Allah eiyagai nenebe edeapnenebegeitik e,
“Is enebaget watnobuak o,” oluk epesi ano pam ebe werigisema waraga ’gela’ge, his ap e, honugwami asogoat henedesogo togu lomup o. 26-27At Kristus en asogo tegei ai re, nis Allah eiyagai ’berlegat nenebe nenebam nonosogomerli erlak, nenagap ’bulongtak erlak, op wolom ’gela’ge, at ilem wene nenebam erlak, op modok degelak welemagoluk, nenebe ik olomu ’belapnonobogwiam, at iak ano pam, emesogo nonoboluk, at u’gwarek ebaget pagathwerlaiogoluk ebe waraga ai o. 28Ai ’gela’ge, his ap en e, honu’gwarek henebe henede welegep ai ’gela’ge, honugwami lo’bok enebe,
“An nu’gwarek nebe ’gela’geat o,” oluk, henedesogo wolomup o. Ap e, onugwami enedesogo welagai a’ge ai, onu’gwarek enebeat enedesogo welagai o. 29-30Aphwami logon en onu’gwarek enebe enebit logon welagai no? Erlak o. Nonu’gwarek nonso’boru op a’ge no’gulat, nenebe alnano horlogulat, togu lege ’gela’ge, at Kristus en e,
“Allah eiyagai an nu’gwarek nebe a’ge ne’gik noyuk ’gela’ge o,” oluk asogo alnanosogo tennentarok welago yo. 31#Kej. 2:24Ai paget, Allah iak disogo egei,
“Ai en e, ap en aik ia ugonoboluk,
ugwe emin la’bulik welat e,
enebe ’biren a’geat de, mesigat a’ge otluk welemak o,”
oluk, egeimu pelal wokho pegesa ai. 32Wene egei ai ogola hisogo wene logo a’ge mesik oruak o. Wene ai an nogola en e, at Kristus nis Allah eiyagai enemin hwedik op wolom a’ge paget egei epegi o. 33A’ge re, his henebe paget ogo eminat egei. His ap en, honu’gwarek henebe henedesogo welegep ai ’gela’ge, honugwami lo’bok henedesogo welat, his hwami honogunlak lo’bok hau do’goksogo waronobogulat, togu lomup o.
Currently Selected:
Efesus 5: Wul
Highlight
Copy
Compare
Share
Want to have your highlights saved across all your devices? Sign up or sign in
