Efesus 4
4
Nis Kristus e’gik oyuk ’gela’ge emin hwedik welagai a’geat de, nenebabut hundomok woknentasu wene
1An nonue ’gain Onuk Logo a’ge paget ne’gik herle wusogo nebegesema welat e, his wene mesik henesa’go werik o. Narilak norokhwi. His henebabut e, at Allah en yo’go henebesi hegitsogoat togu lomup o. 2#Kol. 3:12,13His-his nede-hedesogoat lerontogulat, nin hwedik nan hwedik henede sebelak poluk togulat, henebabut enago welat, henepe mosogo welat, togu lomup o. 3Allah Arogun en nenebe mesigat hwedik taknenebesimu welat, enebe op la’bulogo welagai ai a’ge logo pogu lomup o. 4Allah en yo’go henebasulat e,
“An en obaphenebik o,” oluk, obok mesigat a’ge mo’gulhentesi ’gela’ge, at ebe mesigat a’ge henemin hwedigap togulat, Arogun mesigat a’ge wogulat, tigep ai o. 5Nonue ’gain Onuk Logo a’ge ebe mesigat o. Nenede at ebam he’berik pogwi a’ge ai mesigarat o. Nenebe ik olomu ’belapnonobogwi a’ge mesigarat o. 6Nenebe ’berlegat nenaik Allah mesigarat. At emategat ebe logo ’gain Onuk Logo ereiya welago yo. Nis ’berlegat di a’ge yu a’ge togu lege ai, ebe at enat tiso yo. Tagalat, ebe nis ’berlegat nonogola welago ai o.
7A’ge re, at Kristus en so’butnentasu hegitsogoat, Allah ebabut op en, yabuk hundomok togu lemagoluk nenebabut lo’bok woknentesi. 8#Mzm. 68:18Ai enat, Allah en disogo oluk egei,
“At ebe ’bogorl heiladu ogola erabu legeigoluk,
at eselei a’ge ene’gik herle wusogo enebesirik wogonoboluk ligagarik e,
op a’ge logon aphwami o’go erlak a’ge so’busogo wogenta ’bu aga,”
oluk egeimu pelal wokho pegesa ai o.
9“At ebe ligaga,” oluk egei ai ebe re, at ebe ’gwiang ogola ’begeitik en ligaga, oluk u ’gela’ge egei ai o. 10At ebe ’gwiangma emin, ’bogorl pam emin, o di owi yu owi ’berlegat emin, weleigoluk, ’gwiangma ’bu agarik e, pobuk togolik ’bogorl heiladu ogola erabu ligaga ai o. 11-12Ye, so’busogo wogenta ’bu aga ai ebe re, nis Allah eiyagai nenebe ’berlegat Kristus ebe ’gela’ge oruakma, o worogwi ’gela’ge wusogo nenebasuam, nenebe ’berlek Allah ebaget togu lemagoluk e, nenebe lo’bok yo’go nenebesirik ediknenebil laga ai o. Is logon Allah iak woluk louwagoluk yo’go enebasulat, is logon Allah iak mo’gulentil louwagoluk yo’go enebasulat, is logon op wene aphwami o’borl o’gwe a’ge enebaget mo’gulentil louwagoluk yo’go enebasulat, is logon Allah eiyagai tenentarok welat wene mo’gulontogu lemagoluk yo’go enebasulat, nenebe lo’bok asogo yo’go nenebesi ai o. 13Asogo taga lemarik, nenede at ebam he’berik welat e, nenebe mesigat a’ge ’gela’ge agalat, Allah omlogo ai ebe dokhumsogo nenaluk agalat, at Kristus di paget yu paget ede ’garoksogo hurle modok welago ’gela’ge, nis nenede asogo hurle agalat, tul ai o. 14Asogo togulat, nenebabut malik wei a’ge enebabut yasobu en ik hererim hasulat lak-wak oso ai ’gela’ge, nis asogo togu lemagoluk, is aphwami logon enebabut lalonobogwi a’ge en eniak esei a’geat de, demat ’gela’ge lalnonobuogoluk, wene mu a’geat pobuk naduk mo’gulnentau wagai ai eniak hologup no yo. 15A’geat de, nenebe enarlue a’ge enebabut ’gela’geat wogulom o. Aphwami enebe nenedesogo welat, wene demat nak ogulat, di bele yu bele togulat, nonue ’gain Onuk Logo a’ge Kristus ede ’garoksogo hurleat welat taga laga ’gela’ge togulat, welat e, at ebabut wogulom o. 16#Kol. 2:19Nenebe nene’gik nonoyuk nenebam hwedik welago a’ge logon ’berlegat neneme’en pam en hwedik op welat, hundomok tu a’ge togwiam, nenebe op welege ai ’gela’ge, nis nonue ’gain Onuk Logo a’ge Kristus ebe pam emin hwedik welat, nenebabut lo’bok togulom a’ge hegitsogo togu lomul holuk, aphwami enarlue agalat enede hurle ago ’gela’ge, aphwami logon enebe nenedesogo togulat, nenebe Kristus ebe ’gela’ge nenanni omultik wolomul ai o.
At Kristus emin hwedik welat, nenebabut ’get muat togulom wene
17An nonue ’gain Onuk Logo a’ge emin hwedik welat, at en mo’gulhonto ’gela’ge, wene yu henesa’go wusogo mo’gulhentaik. Is aphwami o’borl o’gwe a’ge enebabut togwi ai ’gela’ge, his henebabut asogo togu lorogup o. Is ai, we ’burlat a’ge ebam eberogulat e, 18onogola o hiktak oruak o. Enede helep ’gela’ge ebesik en e, op wene eneperlagat welat, Allah en aphwami enelalugabenebiso a’ge ano emin hwedik erlak welat onomu a’ge welagai ai o. 19Is enebabut e,
“Wiak togu lege o,” oluk, onogorloksogo welagai erlak. Is en ogulat e,
“Nis e, wiak togu lomul o,” oluk, di wiak yu wiak ene’gerli erlagat loksogo togwi ai o. 20A’geat de, at Kristus en,
“His wiak asogo togu lomup,” oluk, mo’gulhonto erlak. 21His at obok hweligeptik henemin hwedik welat, dem wene Yesus tegei wene ai, mo’gulhentigisema wegep epegi. 22#Kol. 3:9Naduk e, honogola di nagai yu nagai opogu legep ai en lalhenebisoam e, henebe alemathorlogu legep ai en e, henebabut naduk a’ge ai ukpemit o. 23Ai ukpoluk, henede emin, honogola eberogu legep a’ge ai emin, Allah en henebabut ’get a’ge takhenebasu lemak o. 24#Kej. 1:26; Kol. 3:10Henebe demat, at Allah en u’gwarek ebaget pagathwerlesirik, at en e, henebabut hegitsogo togu lemagoluk, at ebabut ’gela’ge ’get a’ge takhenebesi a’ge ai, sum ’buktogwi ’gela’geat ’buktogu lomup o.
25 #
Zak. 8:16
Nis ’berlegat nenebe at Kristus e’gik oyuk ’gela’ge emin hwedik welege ai en e, eniak esei ogwi a’ge ai ukpoluk e, henarilak honorokhwi enemin heniak demat a’ge nak ogu lomup o. 26-27#Mzm. 4:4Honolot het oso holuk, wiak togup. Honolot het oruakma, Iblis en henede ’gagaluano oluk, o mo il ’goboksogo ’gwilo erlak oruakhwe, erlagap pomup o. 28His logon en yogorlia wogu legep a’ge holuk, pobuk asogo wogwi erlak welat, is enerlagaik a’ge lerontogu lomogoluk, honu’gwarek en yabuk hene’gik annisogo wogu lomup o.
29Weneane uogoluk holuk e, wiak a’ge ogu lorogup o. Wene op a’ge ogwiam is logon enede owan a’ge enesa’go holua a’ge ai Allah en obabenebisokhwe, enede hurle emagoluk, wene op a’ge nak ogu lomup o. 30Allah en pobuk henebe obaphenebiogoluk naduk nadugat Allah Arogun wokhentesimu honogola oruak a’ge ai, ede wiagap pagup o. 31Eniak harowiak ogulat, onolot het-’bet ogulat, onolot het agalat, eniak uareksogo wene ’balogulat, eniak eseiyat onobok ’balogulat, togwi a’ge ai ukpogulat e, wiagabonobogwi a’ge emin ’berlegat ukpogu lomup o. 32#Kol. 3:13Ukpoluk e, his-his henebabut enago sakhorak welat e, his wiak togu legep a’ge at Kristus en erlagapsogo ukpesi a’ge, Allah en erlagap pesi ai ’gela’ge, henarilak honorokhwi logon en wiagaphonobogwi holuk e, his-his en, wene ai erlagap pogu lomup o.
Currently Selected:
Efesus 4: Wul
Highlight
Copy
Compare
Share
Want to have your highlights saved across all your devices? Sign up or sign in
